བཀྲ་ཤིས་གླུ་གར་མཉམ་དུ་འཛོམས། གླུ་སྐད་སྙན་མོས་གཡང་ལོ་བསུ། གླུ་ལེན་གར་རྩེན་དུས་བདེར་བསྟོད། གྲུ་གཡོར་བཀལ་ནས་ལམ་གསར་བཏོད།
     2019ལོའི་ཟླ་1ཚེས་21ཉིན། ཁམས་པའི་བརྙན་འཕྲིན་ཁང་གི་2019ལོའི་བོད་ས་ཕག་ལོའི་ལོ་གསར་བརྙན་འཕྲིན་སྤྲོ་ཚོགས་ཏེ་《བཀྲ་ཤིས་གཡང་ལོ》ཞེས་པ་ཁྲེང་ཏུའུ་ནས་ཕབ་བསྐྲུན་ལེགས་གྲུབ་བྱུང་བ་རེད། སྤྲོ་ཚོགས་འདི་ནི་སི་ཁྲོན་ཁམས་པའི་བོད་སྐད་བརྙན་འཕྲིན་ཁང་དང་སི་ཁྲོན་རླུང་འཕྲིན་བརྙན་འཕྲིན་ཁང་མི་རིགས་སྒྱུ་རྩལ་འཕྲིན་ལམ། དཀར་མཛེས་ཁུལ་ལི་ཐང་རྫོང་མི་དམངས་སྲིད་གཞུང་བཅས་ཀྱིས་ཐུན་མོང་ཐོག་གཙོ་གཉེར་བྱས་པ་རེད།
     ཐེངས་འདིའི་སྤྲོ་ཚོགས་ཀྱི་ལེ་ཚན་ལ་དུས་རབས་གསར་པའི་ཁྱད་ཆོས་འབུར་དུ་བཏོན་ཡོད་དེ། ལྗོངས་ཞིང་ལྔའི་བོད་ཁུལ་གྱི་ཕུལ་དུ་བྱུང་བའི་རིག་རྩལ་ལེ་ཚན་བློ་ཞིབ་མོས་བདམས་དཔྱད་བྱས་ནས། སྒྱུ་རྩལ་ཐབས་ལམ་སྣ་མང་བརྒྱུད་ནས་མཚོ་བོད་མཐོ་སྒང་གི་རང་བྱུང་མཛེས་ལྗོངས་དང་། ལོ་རྒྱུས་ཟབ་མོ། སྣ་མང་ཕུན་སུམ་ཚོགས་པའི་དམངས་སྲོལ་རིག་གནས་བཅས་ཀྱི་རྣམ་པ་མངོན་ཡོད་ཅིང་། ལུགས་རྙིང་གི་དཔྱིད་གསར་དུས་ཆེན་དང་བོད་ཀྱི་ལོ་གསར་སྐབས། རྒྱ་ཆེའི་གཟིགས་མོ་བ་རྣམས་ལ་གཟི་འོད་བཀྲ་ཞིང་རིགས་སྣ་མང་བའི་རིག་གནས་ཀྱི་སྟོན་མོ་གཟབ་རྒྱས་ཤིག་འབུལ་རྒྱུ་རེད།

     2019ལོར། ང་ཚོས་ཀྲུང་གོ་གསར་པ་དབུ་བརྙེས་ནས་ལོ་ངོ 70 འཁོར་བའི་འཁྲུངས་སྐར་བསུ་རྒྱུ་ཡིན་ལ། ད་ལོ་ནི་ཁམས་པའི་བརྙན་འཕྲིན་ཁང་བཙུགས་ནས་ལོ་བཅུ་འཁོར་བའི་ལོ་ཡང་ཡིན། ཁམས་པའི་བརྙན་འཕྲིན་ཁང་གིས་མུ་མཐུད་“དར་ཆ་མཐོན་པོར་སྒྲེང་བ་དང་། མི་སེམས་གཅིག་ཏུ་བསྡུ་བ། མི་གསར་གསོ་སྐྱོང་བྱེད་པ། རིག་གནས་དར་རྒྱས་གཏོང་བ། སྣང་བརྙན་འགྲེམས་སྟོན་བྱེད་པ”སོགས་རང་འགན་དུ་བླངས་ནས། སྤྱི་ཕན་གྱི་སྟོབས་ཤུགས་གཅིག་སྡུད་དང་། རིག་རྩལ་བརྩམས་ཆོས་སྤུས་ལེགས་བཟོ་རྒྱུ་རེད།