སྤྱི་ཟླ་9པའི་ཚེས་21ཉིན། ཀྲུང་གུང་ཀྲུང་དབྱང་དང་རྒྱལ་ཡོངས་སྲིད་གྲོས་ཀྱིས་རྒྱལ་ཡོངས་སྲིད་གྲོས་ཚོམས་ཁང་དུ་ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་བཙུགས་ནས་ལོ་འཁོར་65ལོན་པར་རྟེན་འབྲེལ་ཞུ་བའི་ཚོགས་ཆེན་བསྡུས་པ་དང་། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞི་ཞི་ཅིན་ཕིང་གིས་ཚོགས་ཆེན་སྟེང་གསུང་བཤད་གལ་ཆེན་གནང་།

                    ཚོགས་ཆེན་སྟེང་ཞི་ཅིན་ཕིང་གིས་གསུང་བཤད་གལ་ཆེན་གནང་དོན། མི་དམངས་སྲིད་གྲོས་ཀྱི་ལོ་འཁོར་65ཡི་འཕེལ་རིམ་ལ་ཕྱིར་དྲན་བྱས་ན། ང་ཚོས་སྔར་ལས་གཏིང་ཟབ་པའི་སྒོ་ནས་མི་དམངས་སྲིད་གྲོས་ཀྱི་རྩ་བ་དེ་ཀྲུང་གོའི་ལོ་རྒྱུས་དང་རིག་གནས་ལ་འབྲེལ་ཡོད་པ་དང་། ཉེ་རབས་ཀྱི་ཀྲུང་གོའི་མི་དམངས་ཀྱི་རླབས་ཆེན་འཐབ་རྩོད་ལས་བྱུང་ཞིང་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་འོད་སྟོང་འབར་བའི་ལག་ལེན་ལས་འཕེལ་རྒྱས་བྱུང་བར་མ་ཟད། ཀྲུང་གོའི་ཁྱད་ཆོས་གསལ་བོར་ལྡན་ལ་རྒྱལ་ཁབ་སྟོབས་འབྱོར་དང་མི་རིགས་དར་རྒྱས། མི་དམངས་བདེ་སྐྱིད་བཅས་མངོན་འགྱུར་བྱེད་པའི་སྟོབས་ཤུགས་གལ་ཆེན་ཞིག་ཡིན་པ་གསལ་བོར་ཤེས་ཡོད། མི་དམངས་སྲིད་གྲོས་ཀྱིས་འོད་སྟོང་འབར་བའི་ལོ་རྒྱུས་སྐྲུན་པ་དང་ཕྱིན་ཆད་ཀྱང་སྔར་ལས་འོད་སྟོང་འབར་བའི་མ་འོངས་པ་གསར་སྐྲུན་བྱེད་པར་ང་ཚོར་ཡིད་ཆེས་ཆེན་པོ་ཡོད་ཅེས་གསུངས།