འདིར་སྔ་མོ་ནས་ལུང་བསྟན་འདི་འདྲ་ཞིག་ཡོད་པར་བཤད་དེ། ལྷ་ལས་བབས་པའི་རྡོ་ཡིས་གཤོག་ཟུང་བརྐྱངས་ཏེ། འབྲུག་མོའི་སྤྱན་ཆབ་མཁའ་ལ་འཕྱོ་ཞིང་། གེ་སར་རྒྱལ་པོ་འཇིག་རྟེན་དུ་བྱོན་པའི་དུས་སུ། དཀར་མཛེས་སུ་པདྨའི་མཁར་ཞིག་འབྱུང་ཞེས་པ་བཞིན། བྱ་རྡོ་ལམ་འཕྲད་མ་བྱུང་ན། སྙན་པའི་གཏམ་རྒྱུད་ཡོང་མི་སྲིད་ཟེར་བ་ཅིས་མ་བདེན། གེ་སར་མཁར་གྲོང་མ་བཞེངས་གོང་། རྡོ་ཁྱད་མཚར་བ་དང་ཆུ་ཚན། གེ་སར་གྱི་དབུ་རང་བྱོན་སོགས་ལུང་བསྟན་དང་མཐུན་པའི་རྟགས་མཚན་ཁྱད་པར་བ་བྱུང་།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྱང་ཀྲུང་ཧྭ་མི་རིགས་ཀྱི་དཔལ་ཡོན་འཕེལ་རྒྱས་ལོ་རྒྱུས་ཀྱི་ཟུར་ནས། གེ་སར་སྒྲུང་གི་གལ་ཆེའི་གོ་གནས་ལ་གདེང་འཇོག་གནང་ཡོད་པ་དང་། རང་རྒྱལ་གྱི་གེ་སར་རིག་པའི་ཁྱུ་མཆོག་འཇམ་དཔལ་རྒྱ་མཚོ་མཆོག་ནས་ཀྱང་། གེ་སར་སྒྲུང་གི་རྒྱུད་འཛིན་དང་དར་སྤེལ་ནི་བོད་རིགས་མི་དམངས་ཀྱི་གཟི་བརྗིད་ཡིན་ལ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ང་རྒྱལ་ཡིན་པ་མ་ཟད། མིའི་རིགས་ཡོངས་ལ་དཀོན་པའི་སྒྱུ་རྩལ་གྲུབ་འབྲས་ཀྱི་མངོན་ཚུལ་དང་གཟི་ཉམས་ཡིན་ཞེས་དཔྱད་འཇོག་གནང་།

ཀྲུང་དབྱང་བརྙན་འཕྲིན་ཁང་CCTV3ཡི་རྒྱལ་ཁབ་གཏེར་མཛོད་ཅེས་པའི་ལེ་ཚན་ཁྲོད་དུ། འཇམ་དཔལ་རྒྱ་མཚོ་མཆོག་ནས་ཁོང་ལ་སེམས་འདུན་ཞིག་ཡོད་དེ། གེ་སར་སྒྲུང་དེ་གློག་བརྙན་དུ་ཕབ་ནས། འཛམ་གླིང་ཡོངས་ལ་འགྲེམ་པ་དང་། དེང་རབས་ཀྱི་སྨྱན་སྦྱོར་ལག་རྩལ་བེད་སྤྱད་ནས། སྔོན་གྱི་རྟོགས་བརྗོད་དེར་ཚེ་སྲོག་གསར་པ་ཞིག་བསྩལ་རྒྱུ་དེ་ཡིན་ཞེས་གསུངས། དཀར་མཛེས་རྫོང་གི་མང་ཚོགས་ལས་བྱེད་ཡོངས་དང་དབུལ་ཕོངས་གྲོང་ཚོ་128ཀྱིས་ཀྱང་གེ་སར་གྱི་གློག་བརྙན་དེ་དཀར་མཛེས་གེ་སར་མཁར་གྲོང་དུ་ཕབ་བསྐྲུན་བྱེད་པར་རེ་བ་ཆེན་པོ་བྱེད་བཞིན་མཆིས།

ལས་གཞི་འགོ་ཚུགས་པ་ནས། དཀར་མཛེས་རྫོང་ཨུ་དང་རྫོང་སྲིད་གཞུང་གིས་རྫོང་ཡོངས་ཀྱི་ནུས་པ་ཡོད་ཚད་དང་ཕྱོགས་ཡོངས་ནས་ཐབས་མཆོག་ཡོད་ཚད་བཏོན་ཏེ། རིམ་པ་མི་འདྲ་བའི་ཚོགས་འདུ་སྣ་ཚོགས་བསྡུས་ནས་དཔྱད་བསྡུར་མང་པོ་བྱས་ཤིང་། དམངས་ཆེན་གྱི་འཐུས་མི་དང་སྲིད་གྲོས་ཨུ་ཡོན། ལས་བྱེད་རྒན་པ། མང་ཚོགས་ལས་བྱེད་ཡོངས་ཀྱི་བསམ་འཆར་བསྡུ་ལེན་བྱས་པ་ཡིན། དེ་བཞིན། ལས་གཞིའི་རིག་གནས་བློ་འདོན་པར་མིང་གྲགས་ཆེ་བའི་ཆེད་མཁས་པ་གདན་དྲངས་ནས། དཀར་མཛེས་རྫོང་གི་གེ་སར་མཁར་གྲོང་གི་འཆར་འགོད་དང་ཇུས་འགོད། འཛུགས་སྐྲུན་སོགས་ཀྱི་ཕྱོགས་ལ་ལག་རྩལ་གྱི་རྒྱབ་སྐྱོར་དང་མཛུབ་སྟོན་གནང་།

གེ་

སར་མཁར་གྲོང་ནང་དུ་རྔམ་བརྗིད་ལྡན་པའི་སེང་འབྲུག་སྟག་རྩེའི་ཕོ་བྲང་ཡོད་པ་དང་། སྔར་སྲོལ་མ་ཉམས་པའི་དཔལ་རྟུལ་སུམ་ཅུའི་གཞིས་སྒར་ཡོད་པ་མ་ཟད། ཞི་འཇམ་གྱི་འབྲུག་མོའི་བླ་མཚོ་ཡང་ཡོད། དེ་ལས་གཞན། ཉེ་བའི་ལོ་གཉིས་རིང་དབུལ་ཐར་འགག་སྒྲོལ་ཁྲོད་སེམས་ཤུགས་མ་ཉམས་པའི་དཀར་མཛེས་རྫོང་གི་ལས་བྱེད་མི་སྣ་དག་ཀྱང་ཡོད། ཁོ་ཚོའི་དཀའ་སྤྱད་སྡུག་རུས་དང་། སྒེར་སེམས་མེད་ལ་གཏོང་ཕོད་ཆེ་བ། དབུལ་སེལ་འགག་སྒྲོལ་ལ་དཔའ་མི་ཞུམ་པའི་སྙིང་སྟོབས་དེ་གེ་སར་མཁར་གྲོང་ལ་འཐིམས་ཡོད།

ཆེས་ཉམས་དགའ་བའི་རྣམ་པ་ནི། མང་ཚོགས་ཀྱིས་རང་གི་གྲོང་ཚོའི་ཁང་པ་གྲུབ་རྗེས་ཀྱི་གདོང་ལ་ཤར་བའི་འཛུམ་མདངས་དེ་ཡིན།