—— མཚོ་སྔོན་མཚོ་ནུབ་ཁུལ་གྱིས་ཡུལ་ཤུལ་གནོད་ཐེབས་ས་ཁུལ་དཀའ་ཁག་ལས་སྒྲོལ་བར་རོགས་སྐྱོར་བྱས།
དུས་ཚོད་ནི་ཅི་འདྲའི་མགྱོགས་པ་ལ། ཡོད་ཚད་ཁ་སང་ནང་བཞིན་སྣང་།
2010ལོར་ཡུལ་ཤུལ་ས་འགུལ་གནོད་འཚེ་རྗེས་ཀྱི་བསྐྱར་སྐྲུན་བྱས། མཚོ་སྔོན་ཞིང་ཆེན་མཚོ་ནུབ་སོག་རིགས་བོད་རིགས་རང་སྐྱོང་ཁུལ་གྱིས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་། མཚོ་སྔོན་ཞིང་ཨུད། ཞིང་ཆེན་སྲིད་གཞུང་གི་འབོད་སྐུལ་དང་ལེན་བྱས་ཏེ། འཕྲལ་མར་མི་ཤུགས་དང་དངོས་ཤུགས་བསྡུས་ནས། ཡུལ་ཤུལ་གེགས་རྗེས་ཀྱི་བསྐྱར་སྐྲུན་ལས་དོན་ནང་ཞུགས། ཡིན་ནའང་ཁོ་ཚོའི་རོགས་སྐྱོར་ས་ཚིགས་ནི་རྒྱ་མཚོའི་ངོས་ལས་མཐོ་ཚད་སྨི་4200ལྷག་ཙམ་ཟིན་པའི་ཡུལ་ཤུལ་འབྲི་སྟོད་རྫོང་རྒྱ་རྗེ་ཕོ་བྲང་གྲོང་བརྡལ་ཡིན། གནས་འདིར་མཚོ་ནུབ་ཀྱི་རོགས་སྐྱོར་དཔུང་ཆེན་ངོས་ནས་ཚད་མཐོའི་འགྲན་སློང་བ་ཡིན་པས། ས་མཐོའི་“ཚྭ་འདམ་ཀྱི་སྙིང་སྟོབས་”དར་སྤེལ་བྱས། དམངས་ཀྱི་རེ་བ་སྟོང་ཟད་དུ་མི་གཏོང་ཆེད་ལོ་གསུམ་རིང་དཀའ་སྤྱད་སྡུག་རུས་ཀྱིས་འཐབ་འཛིང་བྱས་མཐར། ལོ་རྒྱུས་ཀྱི་ལས་འགན་ལྗིད་པོ་བདེ་ལེགས་ངང་ལེགས་འགྲུབ་བྱུང་བས། འབྲི་སྟོད་རྫོང་མི་དམངས་ལ་རྒྱུགས་གཞི་ལེགས་པོ་སྤྲད། འབྲི་སྟོད་རྫོང་བདེ་སྐྱིད་གཞིས་ཁུལ་དུ་སྡོད་པའི་མི་སེར་གྱིས་ཀྲང་བཀོད་འདོམས་པ་དང་ཀྲུའུ་བཟོ་བ། ད་དུང་འཛུགས་བསྐྲུན་ཆེད་ཚེ་སྲོག་བློས་བཏང་བའི་སྤུན་ཟླ་ཀྲུ་ཆང་རྣམས་ད་ལྟའི་བར་དྲན་བཞིན་ཡོད།
མཚོ་ནུབ་ཁུལ་དང་ཡུལ་ཤུལ་ཁུལ་བར་གྱི་མཛའ་བརྩེའི་འབྲེལ་བ་ཉིན་བཞིན་གོང་འཕེལ་དུ་སོང་བ་དང་ས་ཁུལ་གཉིས་ཀྱི་དཔལ་འབྱོར་མཉམ་ལས་དང་རིག་གནས་སྤེལ་རེས་དེ་ནས་བཟུང་སྔར་བས་གཏིང་ཟབ་ཏུ་ཕྱིན།
ན་ནིང་དགུན་ཁ་ནས་བཟུང་ཡུལ་ཤུལ་ས་ཁུལ་དུ་བསྟུད་མུར་ལོ་བཅུའི་རིང་མ་བྱུང་བའི་ཁ་བ་ཆེན་པོ་བབས་ཏེ། འབྲོག་ལས་ཐོན་སྐྱེད་དང་མང་ཚོགས་ཀྱི་འཚོ་བར་གྱོང་གུན་ཚབས་ཆེན་བཟོས་ཡོད། གནས་ཚུལ་དེ་ལ་དམིགས་ནས་མཚོ་ནུབ་ཁུལ་ཏང་ཨུ་དང་ཁུལ་སྲིད་གཞུང་། མི་རིགས་ཁག་གི་མི་དམངས་ཀྱིས་སེམས་ཁྲལ་ཆེན་པོ་བྱས། ཡང་བསྐྱར་བརྩེ་བའི་ལག་པ་བསྲིངས་ནས་འཕྲལ་མར་མ་དངུལ་སྒོར་ཁྲི་300གཏོང་སྤྲོད་བྱས། གོར་མོ་གྲོང་ཁྱེར་གྱིས་སྒོར་ཁྲི་100ཞལ་འདེབས་སུ་ཕུལ་ནས་གངས་འཁྱག་ཁྲོད་འཐབ་འཛིང་བྱེད་བཞིན་པའི་ཡུལ་ཤུལ་ལ་རོགས་སྐྱོར་བྱས།
ཟླ་2ཚེས་18ཉིན། མཚོ་ནུབ་ཁུལ་ཨུད་དང་ཁུལ་སྲིད་གཞུང་གིས་གཅིག་གྱུར་བཀོད་སྒྲིག་འོག་ནས་ཏུན་100དང་སྔོ་རྩྭ་སྐམ་པོ་ཏུན་100 གཟན་ཆས་རིལ་བུ་ཏུན་100 དང་འབྲུ་རིགས་བླུགས་ཡོད་པའི་ལྗིད་འཁོར་ཆེ་གྲས་11ཏི་ཧྭ་མྱུར་ལམ་བརྒྱུད་ཡུལ་ཤུལ་ཕྱོགས་སུ་བསྐྱོད། ཆབས་ཅིག་གོར་མོ་གྲོང་ཁྱེར་གྱི་གཟན་ཆས་ཏུན་100དང་རྡོ་སོལ་ཏུན་160 དམག་སྤྱོད་རས་གུར་160 སོག་གུར་40སོགས་བཅུག་ཡོད་དངོས་ཟོག་རླངས་འཁོར་9ཡིས་རྒྱལ་ལམ་109བརྒྱུད་ཡུལ་ཤུལ་ཁུལ་ཆུ་དམར་ལེབ་རྫོང་དང་འབྲི་སྟོད་རྫོང་དུ་དབོར་འདྲེན་བྱས།
རང་བྱུང་གནོད་འཚེས་བཟོས་པའི་གྱོང་གུན་ནི་ཧ་ཅང་ཆེ་ཡང་། དུས་རབས་གསར་པའི་ནང་“ཕྱོགས་གཅིག་དཀའ་ངལ་འཕྲད་ཚེ་ཀུན་གྱིས་རོགས་རམ་བྱེད་པའི་”སྤྱི་ཚོགས་རིང་ལུགས་ལམ་ལུགས་ཀྱི་ཁྱད་འཕགས་རང་བཞིན་དང་། དེ་བཞིན་ཡུལ་ཤུལ་དང་མཚོ་ནུབ་ཁུལ་གཉིས་བར་གྱི་སྲུབ་མེད་མཛའ་མཐུན་དང་ཤ་ཁྲག་གཅིག་ཏུ་འདྲེས་པའི་སྤུན་ཟླའི་བརྩེ་སེམས་མཚོན་པའི་དཔང་པོར་གྱུར།
