རི་མོ་གཉིས་སུ་གྱེས་པའི་ལོ་ཟླ་དེ།།

མེ་ཏོག་དཀར་དམར་ཞིག་གི་འཁྲུངས་སྐར་ཡིན།།

ཟླ་བ་ཕྱེད་ཀའི་སྒང་གི་དུས་ཚོད་ནི།།

སྤྲིན་པའི་རྐང་རྗེས་དེད་ནས་ཐུར་དུ་འགྲུལ།།

མཚན་མོའི་སྒེའུ་ཁུང་ནང་གི་མགྲོན་པོ་དེ།།

ལྭ་བ་ནག་པོ་ཅན་གྱི་རྟ་རྫི་ཞིག།

རྣ་བའི་ཟོམ་དུ་ལྷུང་བའི་བྲག་ཅ་ནི།།

སྒོ་ཁྱིས་དམ་ལ་བཏགས་པའི་རྣམ་ཤེས་སམ།།

ཡིག་འབྲུའི་ལོ་མས་གཡོགས་པའི་སྒྲུབ་ཕུག་དེ།།

བརྡ་ཆད་འཚང་པར་རྒྱ་སའི་བྱང་ཆུབ་གྲོང་།།

དགའ་སྐྱོའི་བྲག་ལ་བརྡར་བའི་སྡིག་སྒྲིབ་ནི།།

ཚེ་ཡི་ཆུ་ཐིགས་བསགས་པའི་རྒྱ་མཚོ་ཉིད།།