སའི་གོ་ལ་ཡོངས་ནས་ཁུང་ཙི་སློབ་གླིང་བཙུགས་ནས་ལོ་འཁོར་10ལོན་པ་དང་སའི་གོ་ལ་ཡོངས་སུ་ཁུང་ཙི་སློབ་གླིང་ཉིན་མོ་ཐེངས་དང་པོ་ཐོན་ལ་ཡོད་པའི་སྐབས་སུ། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་གློག་འཕྲིན་བཏང་ནས་སའི་གོ་ལ་ཡོངས་ཀྱི་ཁུང་ཙི་སློབ་གླིང་གི་དགེ་སློབ་རྣམས་ལ་སྤྲོ་སེམས་འཁོལ་བའི་ངང་རྟེན་འབྲེལ་ཞུས་པ་དང་ལྷག་བསམ་རྣམ་དག་གིས་འཚམས་འདྲི་ཞུས། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས་རྟེན་འབྲེལ་ཞུ་བའི་གློག་འཕྲིན་བཏང་།

               ཞི་ཅིན་ཕིང་གིས་གློག་འཕྲིན་ནང་དུ། སའི་གོ་ལ་ཡོངས་ནས་ཁུང་ཙི་སློབ་གླིང་བཙུགས་ནས་ལོ་འཁོར་བཅུ་ལོན་པའི་སྐབས་སུ། ང་ལ་རྒྱལ་ཁབ་དང་ས་ཁུལ་དགུ་བཅུ་ནས་བསྐུར་ཡོང་བའི་ཁུང་ཙི་སློབ་གླིང་གི་སློབ་གཙོ་དང་ཡོན་ཀྲང་གི་འཕྲིན་ཡིག་འབྱོར། ཁྱེད་ཚོས་བསྐུར་བའི་འཕྲིན་ཡིག་ནང་དུ་ཁུང་ཙི་སློབ་གླིང་ནི་ཀྲུང་གོས་འཛམ་གླིང་ཞི་བདེ་དང་རྒྱལ་སྤྱིའི་མཉམ་ལས་ཐད་ལ་འབད་པ་ལྷོད་མེད་བྱས་པའི་མཚོན་རྟགས་ཡིན་ལ། ཀྲུང་གོ་མི་དམངས་དང་འཛམ་གླིང་མི་དམངས་འབྲེལ་མཐུད་བྱེད་ས་གཙོ་བོ་ཞིག་ཀྱང་ཡིན་པ་མ་ཟད། ཁུང་ཙི་སློབ་གླིང་གི་འོད་སྟོང་འབར་བའི་མ་འོངས་བར་ཡིད་ཆེས་བཅངས་བ་མཚོན་ཡོད་ཅེས་བྲིས་ཡོད་པས་ངས་དེར་གཟེངས་བསྟོད་བྱས་པ་ཡིན་ཟེར། ལོ་ངོ་བཅུའི་རིང་ལ། ཁུང་ཙི་སློབ་གླིང་གིས་རྒྱ་སྐད་སློབ་ཁྲིད་དང་རིག་གནས་བརྗེ་རེས་བྱ་འགུལ་སྤེལ་ནས། འཛམ་གླིང་གི་རྒྱལ་ཁབ་སོ་སོ་དང་དཔལ་ཡོན་བརྗེ་རེས་ཡར་སྐུལ་བྱས་ནས་ཕན་ཚུན་ཉམས་མྱོང་ལེན་པ་དང་། ཀྲུང་གོ་མི་དམངས་དང་རྒྱལ་ཁབ་སོ་སོའི་མི་དམངས་བར་ཕན་ཚུན་རྒྱུས་ལོན་དང་མཛའ་བཤེས་ཇེ་ཟབ་དུ་གཏོང་བར་ནུས་པ་གལ་ཆེན་ལྡན་ཟེར། ཁྱེད་ཚོས་རིག་གནས་ཤེས་བྱ་བསྒྲགས་པ་དང་། མི་དམངས་དང་སེམས་གཏད་ནས་འབྲེལ་འདྲིས་བྱེད་པའི་ཐད་ལ་སྟོབས་ཤུགས་མང་པོ་བཏོན་པས། དེ་ནི་དོན་སྙིང་གལ་ཆེན་ལྡན་པའི་བྱ་བ་ཞིག་རེད་ཅེས་བསྟན་ཡོད།

          ཞི་ཅིན་ཕེན་གྱིས་གློག་འཕྲིན་ནང་དུ། འཛམ་གླིང་གི་རྒྱལ་ཁབ་སོ་སོའི་མི་དམངས་ཀྱིས་གསར་སྐྲུན་བྱས་པའི་འོད་སྟོང་འབར་བའི་རིག་གནས་ནི་མིའི་རིགས་ཀྱི་ཐུན་མོང་གི་རྒྱུ་ནོར་རྩ་ཆེན་ཞིག་ཡིན། ང་ཚོས་ཕན་ཚུན་བར་གྱི་ཉམས་མྱོང་བརྗེ་རེས་དང་གསར་སྐྲུན་བྱས་ནས། ཁུང་ཙི་སློབ་གླིང་དེ་ཀྲུང་གོར་གཏོགས་ལ། འཛམ་གླིང་ལའང་གཏོགས་པས། ཀྲུང་གོ་སྲིད་གཞུང་དང་མི་དམངས་ཀྱིས་སྔར་བཞིན་དུ་ཁུང་ཙི་སློབ་གླིང་འཕེལ་རྒྱས་སུ་གཏོང་བར་རྒྱབ་སྐྱོར་བྱེད་དགོས། ང་ཚོས་མཉམ་དུ་འབད་འཐབ་བྱས་ནས་མིའི་རིགས་ཀྱི་དཔལ་ཡོན་ཡར་ཐོན་ཡོང་བར་ཡར་སྐུལ་བྱེད་དགོས་པ་དང་། མི་དམངས་ཀྱི་སེམས་དང་སེམས་གཉིས་སྦྲེལ་བའི་བརྗེ་རེས་བྱ་བ་ཡར་སྐུལ་བྱས་ཏེ། མཉམ་དུ་མིའི་རིགས་ལ་སྔར་ལས་བདེ་སྐྱིད་ཀྱི་མ་འོངས་བ་གསར་སྐྲུན་བྱེད་དགོས་ཞེས་བསྟན་ཡོད།

        ལིས་ཁི་ཆང་གིས་རྟེན་འབྲེལ་གློག་འཕྲིན་ནང་དུ་ཁུང་ཙི་སློབ་གླིང་གིས་རྒྱལ་ཁབ་ཕྱི་ནང་དང་མཉམ་ལས་བྱས་ནས་སློབ་གྲྭ་བསྒྲུབ་པའི་རྣམ་པ་རྒྱུན་འཁྱོངས་བྱས་ནས། རྒྱུན་ཆད་མེད་པར་སློབ་གྲྭ་སྒྲུབ་པའི་རྒྱུ་སྤུས་དང་ཆུ་ཚད་ཇེ་མཐོར་གཏོང་དགོས་པ་དང་། རྒྱལ་ཁབ་ཕྱི་ནང་གི་རིག་གནས་བརྗེ་རེས་བྱ་བ་ཇེ་ཟབ་དུ་བཏང་ནས། འཛམ་གླིང་དཔལ་ཡོན་སྣ་མང་ཅན་དང་རྒྱལ་ཁབ་སོ་སོའི་མི་དམངས་འཆམ་མཐུན་ངང་ཡར་རྒྱས་བརྩོན་ལེན་བྱ་བ་ཡར་སྐུལ་བྱེད་པར་སྔར་ལས་བྱས་རྗེས་འཇོག་དགོས་པའི་རེ་བ་བཏོན་ཡོད།

        རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ལིའུ་ཡན་ཏུང་གིས་ཚེས་27ཉིན་ཁུང་ཙི་སློབ་གླིང་ཉིན་མོ་སྤེལ་མགོ་བརྩམས་པའི་མཛད་སྒོའི་སྟེང་ཞི་ཅིན་ཕེན་དང་ལིས་ཁི་ཆང་རྣམ་གཉིས་ཀྱི་རྟེན་འབྲེལ་གློག་འཕྲིན་སྒྲོག་འདོན་བྱས།