༡

ཆར་ནག་གིས་མི་ཡུལ་གྱི་བྱ་དངོས་མཐའ་དག་བརླན་པའི་ནངས་མོ་ཞིག་ལ།ཡུལ་གྱར་བ་ས་རང་གི་གཏན་ཚིགས་ཀྱི་རྡོག་ཁྲེས་ཁུར་ནས་བསྐྱོད་དགོས་བྱུང་།ཡུལ་གྱར་བ་གཞན་ཞིག་དྲན་བཞིན་རེ་སྒུག་གི་མཐའ་འབྲས་ཞེད་སྣང་གིས་བསྐྱོད་བཞིན།ནངས་མོ་དེར།ཆར་བ་བབས།ཆར་བའི་ཁྲོད་དུ།ཕ་མའི་དཀའ་སྡུག་གི་གཙང་བོ་རླངས་འཁོར་གྱི་ཤེལ་སྒོའི་ནང་ངོས་སུ་འཐོར་བྱུང་།ནངས་མོ་དེར་ཐེག་དཀའ་བའི་གདུང་སེམས་མཐའ་དག་ལྗོན་ཤིང་དང་།རི་ཆུ་བརྒྱུད་ནས་ང་ཡི་ཉེ་སར་བཅར་འོངས།སུ་ཞིག་གི་སྨུག་སྤྲིན་སྲབ་མོ་དྲན་གདུང་གི་ཕྲེང་ཐག་ཆད་པ་འདྲ།ཉི་འོད་ཀྱི་སྐྱོ་གདུང་མདུན་ཕྱོགས་སུ་འབར་བའི་ཞོགས་པ་འདིར།བསམ་གཞིག་དང་ཟུག་གཟེར་རེ་དྲུད་པའི་ཁེར་རྐྱང་མཐའ་དག་ལྷོད་བག་གི་འདབ་མར་འཇུས་ནས་ཡིད་འོང་མཐིང་མདོག་གི་གཤོག་ཟུང་ནམ་མཁར་གཏད།ལོ་ཟླའི་སྒལ་ཚིགས་སུ་འབྱར་བའི་ཉིན་མཚན་རེ་རེ་ནི་གཙང་འདབས་ནས་ཁུར་ཞིང་སླར་ཡང་རྦ་རླབས་ཀྱིས་ཆུ་ཁར་བདས་པའི་བྱེ་མ་དང་རྡུལ་ཕྲན་རེ་དང་འདྲ་བར་ཐོགས་རེག་གི་ཆ་དང་བྲལ་བའི་བར་སྟོང་དུ་བཞུར་བ་ནི་དགའ་སྐྱོ་མཉམ་སྡེབ་ཡིན་པའི་སྣང་བ་ཞིག་འཆར་ཨང་།རྐང་ལག་ཐོགས་པའི་དུས་ཚོད་ཀྱི་མེ་ཏོག་ནི་ཞོགས་པ་ནས་ས་སྲོད་དང་།ཡང་ན།ས་སྲོད་ནས་ཞོགས་པའི་བར་བྲེལ་སྟབས་ཀྱིས་མི་ཚོགས་དང་འཚོ་བའི་གྲུ་ཁ་ལྷོག་ལྷོག་ཏུ་འགུལ་པའི་ངལ་དུབ་བསེད་ནས།ཨར་འདམ་གྱི་གས་སྲུབ་ན་སྐྱོ་ངལ་དུ་བཙིར་དགོས་བྱུང་།

༢

འཁྲེང་ཞེན་གྱི་གཡེར་བག་འདབ་མར་བརྒྱུས་པའི་དཔྱིད་ཀར་རྨ་འགྲམ་དུ་ཆར་བ་ཟམ་ཟིམ་དུ་བབས་བྱུང་།ད་དུང་གཤོག་པ་ཐོགས་པའི་སྨུག་པ་དེ་དག་གྲོང་ཁྱེར་གྱི་རྐང་ལམ་དང་མི་ཚོགས་ཀྱི་གཤིན་སར་བབས།ངལ་དྲགས་པའི་འགྲུལ་བ་དག་གི་སེམས་མགོར་འཐིམས།བརྡར་དྲགས་པའི་དུས་ཚོད་ཀྱི་སྐུད་སྣེར་ཉིན་གཅིག་གི་འཆར་སྣང་རེས་ཡིབ་རེས་གསལ་གྱི་ཚུལ་དུ་མངོན་ལྐོག་གང་རུང་ནས་བདག་གི་ཉེ་སར་བཅར་ཞིང་།གྲང་ཤུར་ཤུར་གྱི་ངོ་གདོང་དེ་དག་ལས་ལོ་རབས་འདིའི་ལྟོགས་སྐོམ་མཐའ་དག་རེ་ཆད་དང་སྐྱུར་སྣང་གིས་ལྡད་བྱུང་།ཆར་བ་ཟམ་ཟིམ་དེས་ཁྱོད་ཀྱི་མདངས་ཟད་པའི་མིག་ཀོང་དུ་ཆུ་ཞགས་གོར་མོ་རེ་འཁྱིལ་ཞིང་རེ་ཆད་ཀྱི་རྒྱང་རིང་ཞིག་མངོན་འདུག

༣

ཆར་བ་ཟམ་ཟིམ་བབས་རྗེས།ས་སྟེང་འདིའི་སྐྱེ་དངོས་ཡོད་ཚད་ང་ཡི་མིག་གི་བགོ་སྐལ་དུ་གསོན་ཉམས་ལྡན་པར་མངོན་ཡོང་།ཡུན་རིང་ཞིག་ལ་བཀྲུས་མ་མྱོང་བའི་མེ་ཏོག་དང་རྩྭ་ལྗང་གི་ལང་ཚོ།ད་དུང་སློབ་རའི་ལུས་རྩལ་ཐང་ཆེན་གྱི་གྲུ་ཟུར་རེར་སྔར་མེད་ཀྱི་འཛུམ་ཟེར་རྒྱས་ཡོང་།ཆར་བ་འབབ་ཐེངས་གཅིག་གིས་གྲོང་ཁྱེར་གྱི་མི་རྣམས་ལ་ཁུ་སིམ་པའི་ཉམས་སྣང་རེ་རང་ཆས་སུ་འཆར་བཞིན་འདུགཆར་ཆེན་གྱི་འཁྲུས་རྫིང་ཕར་ལ་གཏན་རྗེས།དེ་མ་ཐག་སའི་རྡུལ་དང་།མེའི་རྡུལ་དང་ཆུའི་རྡུལ།རླུང་གི་རྡུལ་དག་གཅིག་ཏུ་འདུས་ནས་དབྱིབས་དང་ཁ་དོག་མི་མཚུངས་པའི་སྨུག་པར་འགྱུར།སྐབས་འདིར་ཉི་འོད་ཀྱི་ཐིཊ་པས་ང་ཚོར་རམ་འདེགས་ཀྱི་ཚུལ་དུ་ལུས་སེམས་ཀྱི་གོ་རིམ་མཐའ་དག་བརྒྱུད་ཅིང་།རྙི་དྲགས་པའི་མི་སེམས་ཀྱི་མཐིལ་དུ་སྨོན་ལམ་གྱི་དྲོ་འཇམ་ཞིག་ཀྱང་ངང་གིས་བསྡུས་བྱུང་།འདི་ནི་མི་སེམས་གྲངས་མེད་ཀྱི་འདུས་མདོར་འཚང་བའི"ཆར་ཞོད་ཀྱི་ས་སྲོད་ཅིག་ཡིན"ཡང་ན་ས་སྲོད་ཀྱི་མཚར་སྡུག་ཅིག་རེད།རྡོ་ལྕགས་གཉིས་ལས་བཙིར་བའི་ལྕུག་ཕྲན་དང་རྨ་འགྲམ་དུ་བཞད་པའི་གསར་སྐྱེས་མེ་ཏོག་སྣ་ཚོགས་སྐམ་རིད་དུ་གྱུར་ཞིང་།ལྡོག་འོད་འཕྲོ་བའི་ཨར་འདམ་གྱི་མེ་ལོང་ངོས་སུ་ཚ་ལམ་ལམ་བྱེད།ཉི་འོད་ས་སྟེང་འདིའི་བྱ་དངོས་ཡོད་ཚད་ཀྱི་བྱེ་ཐང་དུ་ལྷུང་བ་བཞིན་བྲེལ་སྟབས་ཀྱིས་བགྲོད་བཞིན་འདུག

༤

རྨ་ཆུས་ཁྱོད་ཀྱི་ཁེར་རྐྱང་གི་དྲན་གདུང་མཐའ་དག་རླབས་ཀྱི་གཟུགས་བརྙན་དུ་སྤྲུལ་བ་ལས་ཁོར་ཡུག་ཚང་མ་གྲག་མེད་འགུལ་མེད་དུ་དབེན་ཐིང་ངེར་གནས་འདུགཁྱོད་རང་གཅིག་པུས་འཆར་ཡན་གྱི་ལང་ཚོ་མག་མོག་ཏུ་གྱུར་བའི་ཟླ་བའི་གྲིབ་བསིལ་མྱུལ་དུས།འདས་སོང་གི་གླེགས་བམ་ཉིལ་བའི་གྲོང་འཁྱེར་གྱི་གྲུ་ཟུར་དག་ན་ཁྱོད་ཀྱིས་སུ་ཞིག་ལ་ངུ་སྙིང་བྲོ་བའི་ལྦུ་ཆང་དེའི་མངར་སྐྱུར་ཁ་གསུམ་དང་།རོ་དང་རེག་བྱ་སྟེར་འདོད་དམ།སིག་རལ་དུ་གྱུར་བའི་འོད་ཀྱི་སྐར་ཚོགས་སུ་ཁྱོད་ཀྱི་བརྩེ་ཞེན་ལས་བཞུར་བའི་ཁྲག་ཐིགས་དང་།མཁའ་མཐའི་རྡོ་བའི་མེ་ཏོག་དག་ཁྱོད་ཀྱི་མིག་གི་སྒོ་ཁར་འཛུམ་བཞིན་རླུང་བུ་ལྡོམ་པོ་ཞིག་དང་བསྡོངས་ནས་རྒྱང་རིང་འཇའ་ཡི་དྲན་པ་བསུས།སྤྲིན་པའི་སྣང་བ་མིག་ཆུ་བྱས་ནས་ཁྱོད་དང་རྒྱང་རིང་བའི་འཛུམ་ཀོང་བཏུས།བྱེ་མའི་གཙང་བོ་དེ་ཁྱོད་ཀྱི་གདོང་ལས་བཞུར་ཞིང་རྡོ་བའི་མི་སེམས་སུ་བཅར་བ་དེ་ཁོ་ནས་དབྱར་དགུན་གྱི་ངོ་གདོང་མེད་པར་ང་ཡི་དྲན་པའི་ལྕགས་སྲུབ་ལས་སྐྱེས།དུས་ཚིགས་དང་དུས་ཚིགས་ལས་གྱེས་པའི་ཡོད་ཚད་གྲང་རླུང་གིས་ཟིན་ཏེ་མུན་པའི་ཁུག་སོར་ལྕེབས།རྨི་ལམ་གྱི་ཟམ་པས་རྒྱང་རིང་ལས་རྒྱང་རིང་བྲིས་ཤིང་ནང་སེམས་ཀྱི་གས་སྲུབ་དེ་ལས་ལྕགས་འཛེར་ལྟ་བུའི་ཁྱོད་རང་ཉིན་མཚན་གྱི་འདུ་ཤེས་ཟབ་སར་གཏད།

༥

མགོ་བོ་ནམ་མཁར་བཏེགས་པའི་མི་དེ་དག་གི་རྨི་ལམ་བྱ་རྒོད་ཀྱི་གཤོག་སྣེ་ལས་ལྷུང་ཞིང་།རླུང་གི་ཁ་གཏད་དུ་གྱུར་སོང་། རྨས་ཕོག་པའི་གྲུ་ཟུར་གྱི་གཡོ་སྐྱོམ་དེས།མུན་པའི་ཚ་གདུང་འབར་བའི་ཁེར་ཧྲེང་འདིའི་སྲུབ་ཀ་ནས་ཡོད་ཚད་གྱང་རལ་བཞིན་ང་ཡི་ལུས་པོའི་རྩྭ་ཐང་ཁུར།གཤོག་གྲུ་ཆུང་ཆུང་དེ་ཡི་ཉེ་བར་བཅར་བ་ནས།སྙན་ངག་གི་ཕུང་བོ་ལ་མེ་ལྕེ་བཏབ་སྟེ་ཐ་སྙད་དང་རྦབ་ཆུས་མེ་ཏོག་གི་རུ་དཔུང་དྲང་།མཛེས་སྡུག་གི་བསླུ་བྲིད་དེ་ཡིས་རྒྱང་རིང་ནི་བྱ་ཚོགས་ཀྱི་རྨི་ལམ་སྐྱ་བོ་བཞིན།ཁུ་སིམ་པའི་སྤྲིན་ནག་ལ་སྨོན་པ་གཏོར་ཏེ།རྒྱང་རིང་གི་རླུང་གིས་རྒྱང་རིང་ལ་ཞལ་སྐྱེམས་ཞུས་པས།ཡོད་ཚད་གོམ་པ་རེའི་བསྣོལ་མཚམས་ནས་ཧད་པར་གྱུར།ཉི་ནུབ་དང་གྲིབ་ཆེན་མཚམས་སྤྲིན་དང་བསྡོངས་ནས་བྱ་ཚོགས་དང་སང་ཉིན་ལ་རྒྱུས་མེད་ངང་རྒྱང་རིང་དུ་འཕུར།རྡོ་བའི་ཉེ་སར་བཅར་བའི་གླིང་ཕྲན་འདིའི་ལག་པ་ནག་པོ་སྨུག་ལོང་གི་ནམ་མཁའ་ནས་བྱ་རྒོད་ཀྱི་གཤོག་ཡ་ལྟར་མི་ཡུལ་ཞིག་གི་ཁ་དོག་ཆུར་བཀྲུས་པའི་ཚུལ།རུས་ཕྱེ་ཉག་ཕྲ་བ་དག་སེམས་ཀྱི་ཟབ་སར་གཏད།སྤྲིན་པ་དག་སྨྲེང་ཚུལ་གྱིས་སྐྲ་ལ་མེ་ཏོག་གད།རླུང་དང་ས་དམར་བདས་པའི་མོད་ལ་རྡོ་བའི་རུམ་ཁ་ནས་འགྲེང་བའི་ཆུ་བོའི་ལྷ་སྒྲུང་ཁྱོད་ཀྱི་གྲིབ་མ་ཆེན་པོའི་རུས་མཛོད་ཀྱི་འཁྱག་ངོས་སུ་འབྱར།

༦

དབྱར་དགུན་དག་གཤོག་བུ་བྱས་ནས་དེ་རུ་ཁ་བ་དང་བུ་ཡུག་འཚུབ་སའི་གངས་རི་བཟོས།ནགས་ཚལ་གྱི་གྱང་ངོས་ན་འབྱར་བའི་སྤྲིན་དཀར་དེ་མུན་པའི་འཇིངས་སུ་བསྣུབས་ཏེ་ཤོག་དཀར་དང་གྱེས་པའི་རྡོ་བ་དེ་དྲག་རླུང་གི་རྡུང་རྡེག་ཁྲོད་ནས་གནའ་བོའི་རྩྭ་ཐང་གི་གཞུང་རྟ་དྲུད།དུས་ཚོད་ཀྱིས་ར་རོར་གྱུར་བའི་རྨི་ལམ་སྐྱ་བོ་དེ་གངས་འཁྱག་གི་རུས་སྒྲོམ་དུ་བཅུག་རྗེས་རྣམ་ཤེས་དང་བྲལ་བའི་རྡོ་བ་དེ་དག་གཏམ་རྒྱུད་ཅིག་གི་ཁ་ཡིག་དང་དུར་བྱང་དུ་གྱུར།རྨི་ལམ་ལས་ཅི་ཡང་མེད་པའི་རྡོ་བ་དེ་དག་བྱ་ཚོགས་ཀྱི་གཤོག་སྣེ་ལས་ལྷུང་པའི་དགུན་ཁ་ཞིག་རེད།