ཉེ་ཆར། རང་རྒྱལ་གྱིས་ཁྱོན་ཡོངས་ནས་གེ་སར་རྒྱལ་པོའི་སྒྲུང་འགྲེམ་སྟོན་བྱས་པའི་མུ་འབྲེལ་དངོས་བཤུས་གློག་བརྙན་ཆེ་གྲས་དང་པོ《གླིང་རྗེ་གེ་སར་རྒྱལ་པོའི་རྟོགས་བརྗོད》ཞེས་པ་མཚོ་སྔོན་བརྙན་འཕྲིན་ཁང་ནས་བཏང་བ་རེད། གློག་བརྙན་ཡོངས་ལ་ལེའུ་གསུམ་ཡོད་པ་དང་། དེའི་ནང་གནའ་བོའི་བོད་ཀྱི་སྤྱི་ཚོགས་ཀྱི་ཤེས་བྱ་ཀུན་བཏུས་སུ་འབོད་པའི་ལོ་རྒྱུས་སྙན་རྩོམ་རིང་མོ་《གེ་སར་རྒྱལ་པོའི་སྒྲུང》བྱུང་སའི་ཁོར་ཡུག་དང་མི་རིགས་ཀྱི་རིག་གནས་འབྱུང་ཁུངས་སོགས་བརྗོད་ཡོད། གེ་སར་རིག་གནས་ཀྱི་མངའ་ཁོངས་ཞིབ་བརྗོད་བྱེད་པའི་དུས་མཚུངས་སུ། མཚོ་བོད་མཐོ་སྒང་གི་ཁྱད་དུ་འཕགས་པའི་ས་ཁམས་ཆགས་ཚུལ་དང་། མི་རིགས་ཀྱི་ཡུལ་སྲོལ་གོམས་གཤིས། རྩྭ་ཐང་གི་རིག་གནས་དང་གེ་སར་སྒྲུང་པའི་ངོ་མཚར་ཆེ་བའི་གཏམ་རྒྱུད་སོགས་འཛམ་གླིང་ལ་བསྟན་ཡོད་པ་རེད།
            《གེ་སར་རྒྱལ་པོའི་སྒྲུང》ནི་བོད་རིགས་དམངས་ཁྲོད་རིག་རྩལ་གྱི་ཉིང་བཅུད་ཅིག་ཡིན་ལ། འཛམ་གླིང་སྟེང་གི་དཔའ་བོའི་ལོ་རྒྱུས་སྙན་རྩོམ་རིང་ཤོས་དེའང་ཡིན། སྤྱི་ལོ་༢༠༠༩ལོའི་ཟླ་༩པར། མཉམ་འབྲེལ་རྒྱལ་ཚོགས་ཀྱི་སློབ་གསོ་ཚན་རིག་རིག་གནས་རྩ་འཛུགས་ཀྱིས་《གེ་སར་རྒྱལ་པོའི་སྒྲུང》དེ་འཛམ་གླིང་མངོན་མིན་ཤུལ་བཞག་རིག་གནས་ཀྱི་མིང་ཐོའི་ནང་དུ་བཀོད་པ་རེད། དངོས་བཤུས་གློག་བརྙན་འདི་ཕྱིར་གཏོང་དང་བརྒྱུད་སྒྲོག་བྱེད་པ་ནི། མི་རིགས་མཐུན་སྒྲིལ་ཡར་རྒྱས་དང་ཐུན་མོང་དར་རྒྱས་གོང་འཕེལ་ལ་སྐུལ་འདེད་གཏོང་བར་ཕན་ཆེ་བའི་དངོས་ཡོད་ཀྱི་དོན་སྙིང་དང་གཏིང་ཟབ་པའི་རིག་གནས་ཀྱི་དོན་སྙིང་ལྡན་ཡོད།