སྔོན་འགྲོའི་འགྱུར་ཁུགས།

འགྲུལ་བཞུད་གོམ་ཁ་རིང་མོ་ལྷོ་རུ་གཏད༎

ཕྱིར་དྲན་རྒྱལ་མོ་ཕ་ཡུལ་རི་ལུང་བསྲིངས༎

སེམས་དང་བསམ་བློའི་ཀློང་དུ་འཕྱུར་བཞིན་པ༎

བདེན་པའི་སྙན་ངག་འཚོ་བའི་མེ་ལོང་ལགས༎

གནས་འགྲོ་བུ་མོ།

ལང་ཚོའི་མེ་ཏོག་གངས་རིའི་འདབས་ནས་འཛུམ༎

དབྱངས་གསལ་ཕོ་བྲང་འགྲིམས་པའི་སྐལ་མ་བྱུང་༎

བཅུ་དྲུག་ལང་ཚོའི་གང་བུ་གྲོལ་བའི་དུས༎

མིག་ཆུས་ལང་ཚོ་བརྫི་བཞིན་གཞན་ཁྱིམ་གྱར༎

ཨ་མའི་བརྩེ་འདང་།

སྐྲ་དཀར་བུ་མོས་མགོ་བོའི་ས་ཆེན་གཡོགས༎

ལོ་ཟླའི་འགྲོས་ཀྱིས་དུང་སོའི་ཕྲེང་ཐག་ཆད༎

གཉེར་མའི་ལམ་ཕྲན་གཤགས་པའི་གདེང་ཀ་ནས༎

བུ་ལ་བཅངས་པའི་འདང་བརྩེ་ལྷོད་མ་མྱོང་༎

སེམས་ཀྱི་ཁ་ཕྱོགས།

རྒྱལ་ཁའི་རླུང་རྟ་དབྱིངས་སུ་སྤུར་བའི་ཚེ༎

མི་འདོད་ཆར་བས་བརླན་ཏེ་ས་གཞི་གཏོར༎

ཕམ་ཁའི་སྐྱོ་དབྱངས་སྨྲེ་ངག་གྱེར་བའི་ཚེ༎

རི་ལུང་ཐང་གསུམ་དགའ་བའི་མེ་ཏོག་བཞད༎

བདག་གི་སྐྲ་ལོ།

གནག་སྣུམ་སྐྲ་ལོས་རྒྱབ་གཞུང་ལེབ་མོ་ཁེབས༎

སྙན་ངག་རླབས་ཕྲེང་བྲང་གཞུང་ངོས་སུ་རྩེན༎

སྲིད་པའི་འཁོར་བའི་གྲོང་གི་མི་ཁ་ཡིས༎

སྙན་ངག་རྩོམ་པའི་བློས་བསླངས་མང་དུ་སྦྱིན༎

དྲན་པའི་ངང་ཚུལ།

མཚན་མོའི་ཀློང་ན་ཟླ་བ་ཁེར་བགྲོད་ཅིག༎

ཆུ་མོའི་འགྲམ་ན་ཁེར་རྐྱང་གྲིབ་གཟུགས་ཤིག།

ནམ་རྒྱུན་མཆི་མས་བསླུས་པའི་སེམས་པ་ཞིག།

རི་བོའི་ཕ་རོལ་ཕྱོགས་སུ་རྟག་ཏུ་འཁྲེང༎

སྟོན་མཇུག་གི་སྙན་ངག

བསིལ་རླུང་འཇམ་པོ་ལྷོད་ཀྱིས་ལྡང་བ་ཡིས༎

རྒྱ་ལྕང་ལོ་མ་སྒེའུ་ཁུང་འགྲམ་དུ་འཐོར༎

ས་མཐའི་གྲོང་ན་འདུར་བའི་ཡུལ་གྱར་བའི༎

སྟོན་མཇུག་སྙན་ངག་ལོ་མའི་གསེབ་ནས་ལྷུང་༎

ཆང་ཁང་དམར་པོ།

གློག་གཞུའི་དམར་མདངས་སྐྱོམ་པའི་གུར་ནང་ན།

ཆང་དང་བུད་མེད་སྒྲོག་ཙེ་མདུན་དུ་སྤུངས༎

དངུལ་ལོར་ཤག་སྒྲའི་བར་ནས་རིན་གོང་གཏམས༎

མཆུ་སྦྱོར་གཅིག་གིས་ཕན་ཚུན་དམ་དུ་འཁྱུད༎

ས་སྲོད་ཀྱི་གྲོང་རྡལ།

ནུབ་རིའི་ཕག་ནས་ཉི་མས་ཕྱི་མིག་ལྟ༎

འདབ་ཆགས་གཤོག་པ་རང་ཁྱིམ་གནས་སུ་བརྐྱངས༎

མི་ཚོགས་འཁོར་ལོ་བསྐོར་བའི་བར་གསེང་ནས༎

ས་སྲོད་སྐྱེ་བོའི་རང་གཤིས་ངང་གིས་རྟོགས༎

བྱང་ཐང་གི་སེམས་པ།

རྒྱལ་མོ་རྔུལ་ཆུ་ལྷོ་ནས་ནུབ་ཏུ་བཞུར།།

དགུ་ཚིགས་སྐྱ་མོས་བསམ་གཞིག་རྒྱང་དུ་བསྲིངས༎

རེ་སྒུག་སྐྱོ་བས་མནར་བའི་སེམས་པ་ཞིག།

ཕ་ཡུལ་སྡེ་འདབས་ཕྱོགས་སུ་ཡུན་གྱིས་ཤོར༎

དྲན་གདུང་གི་སྙན་ངག

ས་མཐའི་གྲོང་ནས་ཁེར་རྐྱང་འཚོ་བ་རོལ༎

ཁང་མིག་གྲུ་བཞི་ཆང་དམ་སྟོངབས་གང་༎

སྒྲོག་ཙེ་མཐའ་ནས་སྙན་ངག་བློས་བསླངས་ཚེ༎

སློབ་གླིང་རྩོམ་གྲོགས་མཐའ་དག་ཡིད་ལ་འཁོར༎

ཉིན་མཚན་གྱི་འདྲེ།

གདོང་ལ་བལྟས་ནས་བསྟོད་པའི་རྣམ་ཐར་རྩོམ༎

ལྐོག་ཏུ་སྐྱོན་མཚང་མདའ་མོས་གང་སར་བསྣུན༎

ཉིན་དང་མཚན་མོ་རྒྱུ་བའི་འདྲེ་མོ་འདིས༎

བསམ་བློ་ཅན་གྱི་སྐྱེས་ཆེན་མང་པོ་བཀྲོངས༎

རི་བོ་ཧི་མ་ལ་ཡ།

འུག་པས་གཡོ་སྒྱུ་དྲན་པའི་ལོ་ཞིག་ལ༎

སྤྱང་ཀིས་རི་བོང་འཛིན་པའི་དུས་ཤིག་ལ༎

གངས་ཀྱི་རི་ལ་གནས་པའི་མ་བུ་གཉིས༎

སྤྱན་ཆབ་ཟག་བཞིན་གོམ་ཁ་ལྷོ་རུ་བསྒྱུར༎

ཁོར་ཡུག་གི་སུན་སྣང་།

མལ་ཁྲི་སྟེང་ནས་གཅིག་པུར་གཉིད་མ་ཁུགས༎

སྒེའུ་ཁུང་འགྲམ་ནས་མཁའ་ཡི་ཟླ་བ་མཐོང་༎

ཁེར་རྐྱང་ཀློང་ན་རྒྱུ་བའི་གྲིབ་གཟུགས་འདིས༎

ཁོ་བོའི་སེམས་ལ་དུ་ཁའི་དངན་པ་བསླངས༎་

སྐོར་བྲོའི་ཉམས་འགྱུར།

རྡོ་རྗེ་འཁོར་ལོའི་འགྱུར་ཁུགས་རྣ་བར་སྙན༎

གཅིག་སེམས་སྦྲེལ་བའི་ལག་གདང་དམ་དུ་འཁྱུད༎

རྐང་ལག་སྟོང་གི་གར་གྱི་ཉམས་འགྱུར་དབུས༎

མེ་ཏོག་མང་པོའི་ཟུར་མིག་གང་སར་གཡོ༎

རྭ་སྐྱེས་རྒྱལ་བོ།

དཀར་སེམས་ཆེ་བའི་ཁྱིམ་གྱི་བཟའ་ཟླ་གཉིས༎

འཇིག་རྟེན་འཚོ་བའི་རི་མོ་ལོངས་སུ་སྤྱད༎

བར་གྱི་འགལ་རྐྱེན་ཞིག་གི་ཕན་ཚུན་དབར༎

མདའ་མོ་གཅིག་གིས་ཁྱིམ་གཞིའི་བྱ་ཚང་གཏོར༎

གྱེས་ཁའི་འཛུམ་ཆུང་།

ཆུང་དུས་རྩེད་ར་གཅིག་ནས་རྒུན་འབུ་འཐུས༎

ལོ་ཟླའི་ཕྲེང་ཐག་བར་ནས་སེམས་པ་བརྟན༎

མི་འདོད་སྐྱོ་གདུང་བར་དུ་བྲལ་མགོ་བརྩམས༎

གྱེས་ཁའི་འཛུམ་ཆུང་སེམས་ཀྱི་དྲན་ཤིང་ཉིད༎

སྐྱེད་ཚལ་གྱི་དྲི་བ།

སེམས་པ་སྐྱོ་བས་གོམ་ཁ་ཚལ་ལ་བསྒྱུར༎

གྲིབ་གཟུགས་མག་མོག་སྤང་གི་ངོས་སུ་འདར༎

སྐྱེད་མོས་ཚལ་འདི་དབེན་འཇགས་ཡིན་ནའང་༎

ཁོ་བོའི་སེམས་པ་དྲག་ཏུ་ལྡིང་བཞིན་ཅི༎

སྦྲ་ནག་དང་ལུག་ཁྱུ།

དུས་བཞི་ལོ་ཟླ་བརྩེགས་པའི་ཧྲག་བར་ནས༎

རྩྭ་ཐང་ཕང་བར་སྦྲ་ནག་གཏམ་རྒྱུད་འཁྲུངས༎

ལུག་གི་ངང་མོ་སྤང་ལ་འདུར་བའི་ཚེ༎

སྦྲ་ནག་རོག་པོ་ལུག་ཁྱུའི་རྫི་བོ་སྤྲས༎

ལྷ་སྡེའི་སྲས་མོ།

ས་བོན་དགུ་ཆུའི་འགྲམ་ནས་བཏབ་པ་ནས༎

ཁྱོད་ལ་དུངས་བའི་སེམས་པ་ལྷག་ཏུ་བརྟན༎

རེ་སྨོན་བརྩེ་བའི་མདུད་པ་མ་ཆད་ན༎

ལས་ཀྱིས་རླུང་རྟ་ནམ་ཡང་མཁའ་རུ་སྤུར༎

འཆམ་འཆམ་ཐེངས་ཤིག

དཀར་གསལ་ཟླ་འོད་འཛིན་མའི་ངོས་སུ་འཕྲོ།།

གྲིབ་གཟུགས་རིང་ཐུང་ལོ་མའི་གསེབ་ན་གཡོ༎

སྙིང་གཏམ་དྲོན་མོས་སེམས་ལ་དྲོད་འཁོལ་བསྐྱིལ༎

མཆི་མའི་ཐིགས་པས་ས་ཆེན་ཁྱོན་ཡོངས་བརླན༎

ཞིང་གྲོང་གི་ནུབ་ཁ།

ར་ལུག་གནག་ཕྱུགས་ལྷས་རའི་ནང་དུ་བསྐོར༎

དགོ་དགོ་དབྱངས་རྟ་སྙན་མོས་ལྷིང་འཇགས་རྒུམ༎

སྒེའུ་ཁུང་སྲུབས་ཀའི་བར་ནས་འཐུལ་བའི་དྲི༎

རྒྱང་རིང་མགྲོན་པོའི་སྣ་དབང་བུ་གར་ལྷུང་༎

ཁེར་རྐྱང་གི་འཇིག་རྟེན།

བྱ་རྒྱལ་རྒོད་པོ་ནམ་མཁའི་དབྱིངས་སུ་རྒྱུ༎

བྱེའུ་ཆུང་འཇོལ་མོ་རྒྱ་རྫོང་ནགས་ན་རྩེན༎

ང་ལ་མཁོ་བའི་བསྟི་གནས་གང་དུ་འཚོལ༎

ཁེར་རྐྱང་འཇིག་རྟེན་སྔོན་མོ་གྲང་ཤུར་ཤུར༎

མཇུག་མཐའི་ཞལ་ཆེམས།

ཉེ་འཁོར་མི་ཡི་གསང་བ་རྟོགས་པར་དཀའ༎

རིགས་རྒྱུད་ནང་དུ་ཕྲག་དོག་རླུང་ལྟར་རྒོད༎

ཕན་ཚུན་གཡོ་སྒྱུས་བསླུས་པའི་ལྡིང་ཁང་ནས༎

ཡུལ་མི་སྤུན་ཟླར་ཁྲག་གི་སྙན་ངག་འབྲི༎