ལོ་གསར་བ་ཞིག་གི་དཔྱིད་ཀའི་རྨོ་འདེབས་ལས་ཀར་མགོ་འཛིན་པར་སྟ་གོན་བྱེད་པའི་སྐབས་འདིར། ལིས་རྫོང་གི་ཞིང་ལས་སྡེ་ཁག་དང་ཞིང་ཆེན་ཞིང་ལས་ཚན་རིག་ཁང་གཉིས་ཀྱིས་མཉམ་འབྲེལ་བྱས་ནས།  ཆུ་འཛིན་ཐུབ་པའི་སྨན་དང་སྤུས་དག་ལུད་རྫས་མཉམ་བསྲེས་བྱེད་པའི་ལག་རྩལ་གསར་བ་གསོ་སྦྱོང་བྱེད་པའི་ཚོད་ལྟའི་ས་ཚིགས་ལིས་རྫོང་དུ་བཙུགས།
   ཉེ་ཆར།  ལིས་རྫོང་མུའུ་ཁ་ཡུལ་ཚོའི་ལིའེ་ལིའེ་སྡེ་བའི་ཞིང་ཁ་སོ་སོ་ན་ཞིང་ཆེན་ཞིང་ལས་ཚན་རིག་ཁང་གི་ཞིབ་འཇུག་པ་ཚོ་ལག་རྩལ་བ་གསར་བ་ནང་འདྲེན་དང་། ས་དེའི་ཞིང་བ་ཚོར་དེའི་སྐོར་གྱི་ཤེས་བྱ་ཁྲིད་བཞིན་ཡོད་ཅིང་། སྡེ་བ་འདིའི་ལི་སོབ་འདེབས་འཛུགས་ལ་ཆུ་འཛིན་ཐུབ་པའི་སྨན་དང་སྤུས་དག་ལུད་རྫས་མཉམ་བསྲེས་བྱེད་པའི་ལག་རྩལ་གསར་བ་འདི་བེད་སྤྱོད་བྱས་ཆོག་པས། ཡུལ་དངོས་ནས་ལི་སོབ་འདེབས་འཛུགས་སྐོར་གྱི་ཤེས་བྱ་གསར་བ་ཁྲིད་པ་རེད།
   ལིས་རྫོང་གི་ཞིང་ལས་ཅུས་ཀྱི་ཅུས་ཀྲང་གཞོན་པ་དབྱང་ཧྥེང་ཅིན་གྱིས་བཤད་རྒྱུར།  ད་ལོ་རང་རྫོང་དང་ཞིང་ཆེན་ཞིང་ལས་ཚན་རིག་ཁང་གཉིས་ཀྱིས་མཉམ་འབྲེལ་བྱས་ནས། མུའུ་ཁ་ཡུལ་ཚོའི་ལིའེ་ལིའེ་སྡེ་བ་དང་ཐུང་ཧྭ་ཡུལ་ཚོ་ཁ་ཙི་སྡེ་བ་གཉིས་ལ་སོ་སོར་ཆུ་འཛིན་ཐུབ་པའི་སྨན་དང་སྤུས་དག་ལུད་རྫས་མཉམ་བསྲེས་བྱེད་པའི་ལག་རྩལ་གསར་བ་ལག་ལེན་བྱེད་པའི་ཚོད་ལྟའི་ས་ཚིགས་བཙུགས་པ་མ་ཟད། ད་ལོ་ནས་བཟུང་ཕྱོགས་ཡོངས་ནས་ལས་ཀ་འདི་དངོས་སུ་ལས་མགོ་བཟུང་ཡོད་ཟེར།
   རྒྱུས་ལོན་བྱུང་བ་ལྟར་ན།  2017ལོར་ཞིང་ཆེན་ཞིང་ལས་ཚན་རིག་ཁང་དང་ལིས་རྫོང་ཞིང་ལས་ཅུས་གཉིས་ཀྱིས་མཉམ་འབྲེལ་བྱས་ནས། ཐེངས་དང་པོ་ལིས་རྫོང་གི་ཐུང་ཧྭ་ཡུལ་ཚོ་ཞི་ཧྲན་སྡེ་བ་ནས་ས་མུའུ3རྒྱ་ཁྱོན་ལ་ལི་སོབ་འདེབས་འཛུགས་བྱས་ཏེ། ཆུ་འཛིན་ཐུབ་པའི་སྨན་དང་སྤུས་དག་ལུད་རྫས་མཉམ་བསྲེས་བྱེད་པའི་ལག་རྩལ་གསར་བ་བེད་སྤྱད་ནས་ལི་སོབ་བཏབ་པར་འབྲས་བཟང་ཐོབ་པས།  ད་ལོ་ནས་བཟུང་རྫོང་དེའི་སྡེ་བ17ལ་ཁྱབ་བརྡར་གཏོང་རྩིས་ཡོད་པ་རེད།