ཟླ3པའི་ཚེས10ཉིན། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན་ནམ་རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཝང་དབྱང་རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་གསུམ་པའི་གྲོས་ཚོགས་ཐེངས་གཉིས་པའི་བོད་ལྗོངས་འཐུས་ཚབ་ཚོགས་པའི་གྲོས་ཞིབ་ལ་ཞུགས།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཝང་དབྱང་ཚེས10ཉིན་རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་གསུམ་པའི་གྲོས་ཚོགས་ཐེངས་གཉིས་པཔའི་བོད་ལྗོངས་འཐུས་ཚབ་ཚོགས་པའི་གྲོས་ཞིབ་ལ་ཞུགས།
འཐུས་མི་ཕུར་བུ་དོན་གྲུབ་དང་། སྐལ་བཟང་སྒྲོལ་དཀར། བཀྲ་ཤིས་རྒྱལ་མཚན་བཅས་ཀྱི་གཏམ་བཤད་ལ་ཉན་རྗེས་ཝང་དབྱང་གིས་བསྟན་དོན། ང་རང་ཨུ་ཡོན་ཀྲང་ལིས་ཀྲན་ཧྲུའུ་ཡིས་གནང་བའི་རྒྱལ་ཡོངས་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་བྱ་བའི་སྙན་ཞུར་མོས་མཐུན་བྱུང་ཡོད་ཅིང་། འདས་པའི་ལོ་གཅིག་རིང་བོད་ལྗོངས་ཀྱི་ལས་རིགས་ཁག་འཕེལ་རྒྱས་ཀྱི་གྲུབ་འབྲས་ལ་ཁས་ལེན་གང་ལེགས་བྱས་པ་དང་། བོད་ལྗོངས་ཀྱི་དཔལ་འབྱོར་འཕེལ་རྒྱས་དང་སྤྱི་ཚོགས་བརྟན་བརླིང་རྒྱུན་མཐུད་ངང་ཇེ་ལེགས་སུ་ཕྱིན་ཡོད་ནའང་། ཉེན་ཁ་དང་འགྲན་སློང་གནས་པའང་གསལ་བོར་རྟོགས་དགོས། སྤྱི་ཁྱབ་ཧྲུའུ་ཅི་ཞི་ཅིན་ཕེན་གྱིས་བོད་ལྗོངས་ཀྱི་ལས་དོན་ཐད་གནང་བའི་གསུང་བཤད་གལ་ཆེན་དག་ལ་སློབ་སྦྱོང་གཏིང་ཟབ་དང་ལག་ལེན་མཐའ་འཁྱོལ་བྱས་ཏེ། མེས་རྒྱལ་གོང་བུ་གཅིག་གྱུར་ལ་སྲུང་སྐྱོང་དང་མི་རིགས་མཐུན་སྒྲིལ་ལ་ཤུགས་སྣོན་པའི་གཞི་ཚུགས་ས་དང་ཤུགས་རྒྱག་ས་བརྟན་པོར་འཛིན་པ་དང་། ཁྲིམས་ལྟར་བོད་ལྗོངས་སྐྱོང་བ་དང་། དམངས་ཕྱུག་བོད་དར། ཡུན་རིང་བོར་བོད་ཡུལ་འཛུགས་སྐྲུན། མི་སེམས་གཅིག་ཏུ་སྒྲིལ་བ། རྨང་གཞི་བརྟན་པོ་འཇོག་པ་བཅས་ཀྱི་རྩ་དོན་གལ་ཆེན་དམ་པོར་འཛིན་དགོས། བརྟན་བརླིང་ངང་མདུན་སྐྱོད་བྱས་ནས་སྤྱི་ཚོགས་ཀྱི་ཕྱོགས་ཡོངས་བརྟན་བརླིང་གི་རྣམ་པ་བཟང་པོ་སྔར་བས་སྲ་བརྟན་དུ་གཏོང་བ་དང་། དགོན་སྡེའི་དོ་དམ་ལ་སྔར་བས་ཤུགས་སྣོན་བརྒྱབ་སྟེ་ནུས་པ་འཛུགས་སྐྱོང་དང་། དབུལ་ཐར་མཁྲེགས་གཏོར་གྱི་སྤུས་ཚད་སྔར་བས་མཐོ་རུ་གཏོང་བ་བཅས་བྱས་ཏེ་གངས་ལྗོངས་ས་མཐོར་འཆམ་མཐུན་བརྟན་བརླིང་དང་རིགས་སོ་སོའི་མི་དམངས་ཀྱི་བདེ་སྡོད་ལས་བརྩོན་ལ་ཁག་ཐེག་བྱེད་དགོས་ཟེར། །
