ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཧྥ་རན་སི་ལ་རྒྱལ་དོན་འཚམས་འདྲི་མཛད་པར་ཧྥ་རན་སིའི་ལས་རིགས་སོ་སོའི་དོ་སྣང་ཆེན་པོ་ཐོབ། ཧྥ་རན་སིའི་ལས་རིགས་སོ་སོའི་མི་སྣས་བཤད་རྒྱུར། ཀྲུའུ་ཞི་ཞི་ཅིན་ཕིང་གིས་ད་ཐེངས་འཚམས་འདྲི་མཛད་པ་དེས་ཧྥ་རན་སི་དང་ཀྲུང་གོའི་མཉམ་ལས་མཉམ་རྒྱལ་ལ་སྔར་ལས་སྐུལ་འདེད་གཏོང་བ་དང་། རྒྱུད་གཅིག་ལམ་གཅིག་སྤྱི་ཁོག་ནང་གི་དངོས་གཉེར་མཉམ་ལས་རྒྱ་བསྐྱེད་ནས་མཉམ་དུ་འཕེལ་རྒྱས་སུ་འགྲོ་བར་མཛེས་པའི་མདུན་ལྗོངས་གསར་སྐྲུན་བྱེད་ངེས་ཡིན་ཟེར།
        ཡུན་རིང་ལ་ཀྲུང་གོའི་མཛའ་མཐུན་འབྲེལ་བ་འཕེལ་རྒྱས་སུ་འགྲོ་བར་འབད་བརྩོན་བྱས་པའི་ཧྥ་རན་སིའི་སྔོན་ཆད་ཀྱི་ཙུང་ལི་ལ་ཧྥ་ལན་གྱིས་ཀྲུང་དབྱང་བརྙན་འཕྲིན་ཁང་གི་གསར་འགོད་པའི་བཅའ་འདྲི་དང་ལེན་བྱེད་སྐབས་བཤད་རྒྱུར། ཀྲུང་གོ་དང་ཧྥ་རན་སིའི་བར་འབྲེལ་བ་བཙུགས་ནས་ལོ་ང་ལྔ་ལོན་པའི་སྐབས་འདིར་ཀྲུའུ་ཞི་ཞི་ཅིན་ཕིང་གིས་ཡང་བསྐྱར་ཧྥ་རན་སི་ལ་འཚམས་འདྲི་མཛད་པ་དེ་རྒྱལ་ཁབ་གཉིས་ཀྱི་མཛའ་བཤེས་སྔར་ལས་ཇེ་ཟབ་ཏུ་འགྲོ་བར་དོན་སྙིང་གལ་ཆེན་ལྡན་ཟེར།
        ཉི་སི་ནི་ཀྲུའུ་ཞི་ཞི་ཅིན་ཕིང་གིས་ཧྥ་རན་སི་ལ་འཚམས་འདྲི་བྱེད་པའི་ས་ཚིགས་དང་པོ་ཡིན་པ་དང་། ཀྲུང་གོ་དང་ཧྥ་རན་སིས་ལོ་ང་ལྔའི་རིང་ལ་འབྲེལ་འདྲིས་དང་འགོ་འོང་བྱེད་སྐབས་ཉི་སི་ཡིས་ནུས་པ་ཆེན་པོ་བཏོན།
        ཧྥ་རན་སིའི་འགོ་གཙོ་དང་ཤེས་ཡོན་ཅན་གང་མང་གིས་བཤད་རྒྱུར། ཀྲུའུ་ཞི་ཞི་ཅིན་ཕིང་གིས་ད་ཐེངས་འཚམས་འདྲི་མཛད་པ་དེས་ཕྱོགས་གཉིས་ཀྱི་འབྲེལ་བ་སྔར་ལས་སྲ་བརྟན་དུ་གཏོང་བ་དང་རྒྱལ་ཁབ་གཉིས་ཀྱི་ཁྱབ་ཁོངས་མང་པོའི་མཉམ་ལས་གཏིང་ཟབ་ཏུ་སྤེལ་བར་སྐུལ་འདེད་ཀྱི་ནུས་པ་ཆེན་པོ་འདོན་ངེས་ཡིན་ཟེར། །