དང་པོ། འབྲས་རྟགས་ཡང་དག་སྟོན་བྱེད་ཀྱི་མདོ་ཁུངས་གཙོ་བོར་བསྟན་ནས་ཡིག་ཆ་སོ་སོའི་འདོད་ཚུལ་བཤད་པ།
ཆོས་བཅུ་པའི་མདོ་ལས། །ཆུ་སྐྱར་ལས་ནི་ཆུར་ཤེས་དང་། ། དུ་བ་ལས་ནི་མེར་ཤེས་དང་། །བྱང་ཆུབ་སེམས་དཔའ་བློ་ལྡན་གྱི། ། རིགས་ནི་ཚད་མ་དག་ལས་ཤེས། །ཞེས་འབྲས་བུ་ཆུ་སྐྱར་ཡུན་རིང་ལྡིང་བའི་རྟགས་ལས་རྒྱུ་ཆུ་ཡོད་པར་བསྒྲུབས་པ་དང་། དུ་བའི་རྟགས་ལས་མེ་ཡོད་པ་དང་། ཉན་ཐོས་ཐེག་པའི་ཆོས་བཤད་པས་ལུས་ཀྱི་བ་སྤུ་གཡོ་ཞིང་མིག་ལས་མཆི་མ་འཁྲུགས་པས་ཉན་ཐོས་རིགས་ཅན་དང་། དེ་བཞིན་རང་རྒྱལ་རིགས་ཅན། ཐེག་ཆེན་རིགས་ཅན་དཔེ་དོན་གྱི་འབྲས་རྟགས་ཡང་དག་གི་རྣམ་བཞག་གསུངས། རྣམ་འགྲེལ་རྩ་བར། རྒྱུ་ལ་རང་བཞིན་ཇི་སྙེད་ཅིག །མེད་ན་མི་འབྱུང་འབྲས་བུ་ནི། །གཏན་ཚིགས་ཞེས་རྒྱུ་དེ་ཕན་འདོགས་བྱེད་དུ་མེད་ན་མི་འབྱུང་བའི་འབྲས་བུ་ནི་འབྲས་བུའི་གཏན་ཚིགས་ཡང་དག་སྟེ་མི་བསླུ་བ་ཡིན་པར་གསུངས། རྟ་ནག་རྣམ་འགྲེལ་དུ་དུ་ལྡན་ལ་ལ་མེ་ཡོད་པར་སྒྲུབ་པའི་ཚུལ་གསུམ་གང་ཞིག་རང་ཉིད་ཀྱི་རྟགས་ཀྱིས་དུ་ལྡན་ལ་ལ་མེ་ཡོད་པར་སྒྲུབ་པའི་དངོས་ཀྱི་བསྒྲུབ་བྱའི་ཆོས་སུ་བཟུང་བྱ་ཡང་ཡིན། རང་ཉིད་ཀྱི་རྒྱུ་ཡང་ཡིན་པའི་གཞི་མཐུན་སྲིད་པ་དེ། རང་ཉིད་དུ་ལྡན་ལ་ལ་མེ་ཡོད་པར་སྒྲུབ་པའི་འབྲས་རྟགས་ཡང་དག་གི་མཚན་ཉིད་ཅེས་དང་། ཀུན་མཁྱེན་རྣམ་འགྲེལ་ལེའུ་དང་པོའི་མཐའ་དཔྱོད་དུ་འབྲས་བུའི་ཚུལ་གསུམ་ཡིན་པ་འབྲས་རྟགས་ཡང་དག་གི་མཚན་ཉིད་ཅེས་ཕྱོགས་ཆོས་དང་རྗེས་ཁྱབ། ལྡོག་ཁྱབ་གསུམ་དུ་གྲུབ་པ་ཞིག་ཏུ་བསྟན་པས་འབྲས་བུའི་རྟགས་ལ་བརྟེན་ནས་རྒྱུ་ཡོད་པར་སྒྲུབ་ཚུལ་གསུངས་པ་བཅས་ལས་འབྲས་རྟགས་ཡང་དག་གི་རིགས་པ་འདི་མདོ་ལས་འཕྲོས་ཏེ་རྒྱ་གར་འཕགས་པའི་ཡུལ་དང་བོད་གངས་ཅན་གྱི་སྔོན་བྱོན་མཁས་པ་མང་པོས་དགོངས་པ་རྨ་མེད་པ་ཞིག་ཡིན་པ་ཤེས་ཐུབ།
གཉིས་པ། སྤྱིར་འབྲས་རྟགས་ཡང་དག་གི་དབྱེ་བ་དང་། བྱེ་བྲག་རྒྱུ་སྔོན་སོང་སྒྲུབ་ཀྱི་འབྲས་རྟགས་ཡང་དག་ཅུང་ཙམ་བཤད་པ།
འབྲས་རྟགས་ཡང་དག་འདི་ཉིད་ཐོག་མར་སྟོན་པ་མཉམ་མེད་ཐུབ་པའི་དབང་བོས་མདོ་ལས་གསུངས་ཤིང་། རྗེས་སུ་དཔལ་ཆོས་ཀྱི་གྲགས་པས། རྒྱུ་ལ་རང་བཞིན་ཇི་སྙེད་ཅིག ། མེད་ན་མི་འབྱུང་འབྲས་བུ་ནི། །ཞེས་པ་ནས། རྒྱུ་ཆོས་རྗེས་སུ་དཔག་པ་ནི། །དུ་བའི་བུད་ཤིང་འགྱུར་བ་བཞིན། །ཞེས་འབྲས་རྟགས་ཡང་དག་ལ་དབྱེ་བ་ལྔ་རུ་འདོད་ཅེས་གསུངས་པ་ཀུན་མཁྱེན་རྣམ་འགྲེལ་ལེའུ་དང་བོའི་མཐའ་དཔྱོད་དུ་གསལ་ཞིང་། དེ་ལྟ་ན་འདིའི་དབྱེ་བ་གསུངས་ཚུལ་རྒྱ་གར་པཎ་གྲུབ་ནས་བརྒྱུད་བོད་གངས་ཅན་གྱི་ལྗོངས་སུ་རིམ་པར་དར་བར་གསལ་ཞིང་། བོད་དུ་རྒྱལ་བ་དགེ་འདུན་གྲུབ་པས་མཚན་གཞིའི་དབྱེ་བ་ལ་ལྔ་ཞེས་གསུངས་པ་དང་། ཡོངས་འཛིན་ཕུར་ལྕོག་རིན་པོ་ཆེས་ཀྱང་གོང་བཞིན་རྒྱུ་དངོས་སྒྲུབ་ཀྱི་འབྲས་རྟགས་ཡང་དག་དང་། རྒྱུ་སྔོན་སོང་སྒྲུབ་ཀྱི་འབྲས་རྟགས་ཡང་དག རྒྱུ་སྤྱི་སྒྲུབ་ཀྱི་འབྲས་རྟགས་ཡང་དག རྒྱུ་ཁྱད་པར་སྒྲུབ་ཀྱི་འབྲས་རྟགས་ཡང་དག རྒྱུ་ཆོས་རྗེས་དཔག་གི་འབྲས་རྟགས་ཡང་དག་དང་ལྔ་ཞེས་དབྱེ་བ་ལྔ་གསུངས་ཚུལ་འདི་བླ་མ་རྗེ་བཙུན་པ་སོགས་ངེས་དོན་མཁས་པའི་དབང་པོ་མང་པོ་ཞིག་གི་དགོངས་པར་བཞེད་དོ། །
འོ་ན་འབྲས་རྟགས་ཡང་དག་ལ་དབྱེ་བ་ལྔ་མ་གཏོགས་མེད་དམ་ཞེ་ན་དེ་ཡང་མིན་ཏེ། སྡེ་བདུན་རྒྱན་ལས་འབྲས་རྟགས་ཀྱི་རྟགས་འགོད་ཚུལ་གྱི་རིགས་ཇི་སྐད་བཤད་པ་འདི་དག་ཏུ་གྲངས་ངེས་པ་ནི་མ་ཡིན་ཏེ། འདི་ལྟར་མྱུ་གུ་ཆོས་ཅན། ཁྱོད་རང་གི་རྒྱུ་རྐྱེན་དུ་མ་ཚོགས་པ་ལས་སྐྱེ་དགོས་ཏེ། ཁྱོད་རང་གི་ཉེར་ལེན་དང་ལྷན་ཅིག་བྱེད་རྐྱེན་གྱི་ཚོགས་པ་གྲངས་མ་ཚང་ན་མི་སྐྱེ་བའི་དངོས་པོ་ཡིན་པའི་ཕྱིར། ཞེས་བཀོད་པ་སོགས་མང་དུ་སྲིད་པའི་ཕྱིར་རོ། ཞེས་གསུངས་པ་དང་། ཀུན་མཁྱེན་རྣམ་འགྲེལ་ལེའུ་དང་པོའི་མཐའ་དཔྱོད་དུ་འབྲས་རྟགས་ཡང་དག་འདི་ལྔ་ཁོ་ནར་མ་ངེས་ཏེ། རྒྱུ་ཚོགས་གྲངས་ཚང་སྒྲུབ་ཀྱི་འབྲས་རྟགས་ཡང་དག་སོགས་ཡོད་པའི་ཕྱིར། ཞེས་དང་། མདོ་ལས། རྒྱུ་དང་རྐྱེན་མ་ཚང་བ་མེད་པའི་ཕྱིར། ལས་ཀྱི་འབྲས་བུ་མངོན་པ་ཡང་ཡོད་དོ། །ཞེས་དང་། འདི་ཉིད་ལས། རྒྱུ་ཚོགས་སོགས་སོ། །ཞེས་གསུངས་པ་སོགས་དབྱེ་བའི་སྐོར་ལ་ལྔ་དང་དྲུག་བཅས་མི་མཐུན་པ་རེ་ཡོད་པར་མ་ཟད། ཐ་སྙད་ཀྱི་དབང་དུ་མ་བྱས་ན་དབྱེ་བ་མེད་པར་འདོད་པའང་སྡེ་བདུན་རྒྱན་ལས། ཇི་སྐད་བཤད་པའི་འབྲས་རྟགས་ཀྱི་དབྱེ་བ་དེ་དག་ཐ་སྙད་མ་གཏོགས་དོན་ཐ་དད་པ་ནི་མ་ཡིན་ཏེ་ཞེས་བསྟན་པ་སོགས་མང་དུ་ཡོད་ཀྱང་དགག་བཞག་གི་གནད་ཆེ་བར་བཟུང་བ་གང་དུའང་མེད་པས་མི་འགལ་སྙམ།
འདི་ལྟར་སྔོན་བྱོན་མཁས་པ་དག་གིས་འབྲས་རྟགས་ཡང་དག་གི་དབྱེ་བ་དུ་མ་ཞིག་གསུངས་པ་ལས་རྒྱུ་སྔོན་སོང་སྒྲུབ་ཀྱི་འབྲས་རྟགས་ཡང་དག་ནི། ཀུན་མཁྱེན་འཇམ་དབྱངས་བཞད་པའི་གྲུབ་མཐའ་ཆེན་མོར། བརྡ་ལ་མ་བྱང་བའི་བྱིས་པའམ། བེའུ་སོགས་ཆོས་ཅན། སྐྱེ་བ་གཞན་དུ་ཟ་བ་དང་། ཆགས་སོགས་ལ་གོམས་པ་སྔོན་སོང་ཡིན་ཏེ། བསླབ་མི་དགོས་པར་ཟས་ཀྱི་ཆེད་དུ་སྐྱོད་པ་དང་། ཆགས་སོགས་ལ་འཇུག་པའི་ཕྱིར། དཔེར་ན་དབང་བོ་སྨིན་པའི་མི་བཞིན་ཞེས་གསུངས་པ་དང་། རང་འགྲེལ་རྟོག་གེ་འབར་བར་བེའུ་ཡང་སྔོན་ཆད་གོམས་བྱས་པས། །བྱུང་མ་ཐག་ཏུ་ཟས་འཚོལ་བྱེད། །ཟས་ཀྱི་དོན་དུ་སྐྱོད་པའི་ཕྱིར། །དཔེར་ན་དབང་བོ་སྨིན་པ་བཞིན། ཞེས་དབུ་མ་སྙིང་བོའི་ལུང་དྲངས་ཏེ། ཞེས་བྱ་བ་འདི་ནི་དེའི་ཕྱིར་ཡང་མངལ་ན་གནས་པའི་སྔོན་རོལ་གྱི་རྣམ་པར་ཤེས་པ་གང་ཡིན་པ་དེ་ཡང་རྣམ་པར་ཤེས་པ་གཞན་སྔོན་དུ་སོང་བ་ལས་བྱུང་བ་ཡིན་པར་ཁོང་དུ་ཆུད་པར་བྱ་སྟེ། གལ་ཏེ་སྔོན་གྱི་སྲིད་པ་གཞན་དག་ཏུ་ཁ་ཟས་ལ་གོམས་པར་མ་བྱས་ན། ཇི་ལྟར་བེའུ་བྱུང་མ་ཐག་ཁོ་ནར་སུས་ཀྱང་མ་བསྐུལ་བར་སེམས་གསལ་བས་ཟས་ཀྱི་དོན་དུ་སྐྱོད་པར་བྱེད་དེ། དེ་ལྟར་ཟས་ཀྱི་དོན་དུ་སྐྱོད་པར་བྱེད་པའི་ཕྱིར་དཔེར་ན་དབང་བོ་ཡོངས་སུ་སྨིན་པ་གཞོན་ནུ་དང་བར་མ་དང་། རྒན་པའི་གནས་སྐབས་ན་གནས་པ་དག་བཞིན་བུ་བེའུ་དག་གིས་ཀྱང་སྔོན་གྱི་ཚེ་རབས་གཞན་དག་ཏུ་གོམས་པར་བྱས་པ་མངོན་ནོ། །ཞེས་གསུངས་པ་དང་། ཀུན་མཁྱེན་རྣམ་འགྲེལ་ལེའུ་དང་བོའི་མཐའ་དཔྱོད་དུ་ཡང་སྐྱེས་ཙམ་ནས་ཟ་སོགས་ཤེས་པ་དེ་བེའུ་རང་གི་སྐྱེ་བ་སྔོན་མའི་གོམས་པ་སྔོན་སོང་དུ་སྒྲུབ་པའི་རྒྱུ་སྔོན་སོང་སྒྲུབ་ཀྱི་འབྲས་རྟགས་ཡང་དག་ཅེས་གསུངས་པ་སོགས་ལས་རྒྱུ་སྔོན་སོང་སྒྲུབ་ཀྱི་འབྲས་རྟགས་ཡིན་ན་གཙོ་བོ་ཕྱི་རྒོལ་ཡང་དག་གི་ངོ་བོར་རང་རྒྱུ་སྔ་མ་སྔོན་དུ་སོང་བ་ཞིག་སྒྲུབ་པའི་རྟགས་ཤིག་དགོས་པར་མཐོང་ངོ་། །
གསུམ་པ། རྒྱུ་སྔོན་སོང་སྒྲུབ་པའི་འབྲས་རྟགས་ཡང་དག་གསུངས་པའི་དགོས་པ་བཤད་པ།
རྒྱུ་སྔོན་སོང་སྒྲུབ་ཀྱི་འབྲས་རྟགས་ཡང་དག་གསུངས་པ་ནི་རང་ལུགས་ལ་ཕྱི་ནང་གི་རྒྱུ་འབྲས་གཙོ་བོར་སྒྲུབ་པའི་ཞར་ལ་ཕྱི་རོལ་བའི་ལོག་རྟོག་དགག་པ་ཡིན་ལ། སྤྱིར་ཕྱི་རོལ་པ་ཞེས་པ་ནི་གཙོ་བོ་སངས་རྒྱས་ཆོས་ལུགས་པས་ཕར་ཅུང་དམའ་འབེབས་ཀྱི་ཐོག་ནས་བཏགས་པའི་མིང་ཞིག་ཡིན་ལ། མིང་དེའི་གོ་དོན་ཆ་ཚང་ནི་དུང་དཀར་གྲུབ་མཐར་ལྟ་བ་ངན་པའི་མུ་ལ་སྟེགས་བུ་བྱས་ནས་ལྟ་བ་ངན་པ་དེ་ཐར་བའི་ལམ་ལ་འཁྲུལ་བས་ན་མུ་སྟེགས་པ་ཞེས་བརྗོད་ཅེས་གསུངས་པ་དང་། མཉམ་མེད་ཇོ་བོ་རྗེས་ཞལ་ནས་ཀྱང་ཕྱི་བ་ནང་བ་སྐྱབས་འགྲོའི་ཁྱད། ཅེས་གསུངས་པ་བཞིན་ནང་བ་རྣམས་ཀྱིས་དཀོན་མཆོག་གསུམ་སྐྱབས་གནས་ཡང་དག་ཏུ་ཁས་མི་ལེན་མཁན་ལ་ཕྱི་བ་ཞེས་འབོད་བཞིན་འདུག ཕྱི་བ་ལའང་དབྱེ་བ་མང་པོ་ཡོད་དེ། ཇི་སྐད་དུ་ཟླ་བའི་སློབ་མ་ལེགས་ལྡན་གྱི་དབུ་མ་རིན་ཆེན་སྒྲོན་མེ་ལས། ལྟ་བའི་འཕྲེང་བ་སུམ་བརྒྱ་དྲུག་ཅུ་རྩ་གསུམ་དང་། ཞེས་གསུངས་པ་དང་། སློབ་དཔོན་ལེགས་ལྡན་གྱི་དབུ་མ་སྙིང་པོའི་རང་འགྲེལ་ལས། དེ་ཡང་ལྟ་བའི་དབྱེ་བ་བརྒྱ་རྩ་བཅུར་འགྱུར་ལ། ཞེས་གསུངས་པ་སོགས་དབྱེ་ཚུལ་མང་དུ་ཡོད་ཀྱང་གྲུབ་མཐའ་རྩ་བར་ཉེར་ལྔ་བཤད་ཀྱང་འདིར་གསལ་མི་འདྲ་ཁྱིམ། །ཞེས་པ་ནས། ཆད་སྨྲ་གཅིག་དང་རྟག་སྨྲ་བཅུ་གཅིག་གྲགས། །ཞེས་ཕྱི་ནང་གི་གྲུབ་མཐའ་ཉེར་ལྔ་སོགས་སུ་དབྱེ་བ་ཡོད་ཀྱང་འདིར་གསལ་བ་ནི་ཆད་པར་སྨྲ་བ་གཅིག་དང་རྟག་པར་སྨྲ་བ་བཅུ་གཅིག་སྟེ་བསྡོམས་ན་བཅུ་གཉིས་ཡིན་ཞེས་གསུངས།
དེ་དག་ལས་རྒྱུ་སྔོན་སོང་སྒྲུབ་ཀྱི་འབྲས་རྟགས་ཡང་དག་གིས་དགག་ཡུལ་གཙོ་བོ་ནི་ཆད་སྨྲ་བ་སྟེ་རྒྱང་འཕེན་པ་དང་། གྲངས་ཅན་པ་གཉིས་ཡིན་ལ། རྒྱང་འཕེན་པའི་འདོད་ཚུལ་ནི་སྐྱེ་བ་སྔ་མ་ནས་འདིར་འོངས་པ་མེད་དེ། སྐྱེ་བ་སྔ་མ་སུས་ཀྱང་མ་མཐོང་བའི་ཕྱིར། ལུས་གློ་བུར་བ་ལས་སེམས་གློ་བུར་དུ་གྲུབ་པ་ཡིན་ཏེ། མར་མེ་གློ་བུར་དུ་གྲུབ་པ་ལས་འོད་གློ་བུར་དུ་གྲུབ་པ་བཞིན་ནོ། སྐྱེ་བ་འདི་ནས་ཕྱི་མར་འགྲོ་བ་ཡང་མེད་དེ། ལུས་སེམས་རྫས་གཅིག་པས་ལུས་འཇིག་པ་ན་བློ་ཡང་འཇིག་པའི་ཕྱིར། དཔེར་ན་རྡོ་འཇིག་པ་ན་རྡོའི་རི་མོ་འཇིག་པ་བཞིན་ནོ། །ཞེས་ཟེར།
གྲངས་ཅན་པས་རྒྱུ་འབྲས་དུས་མཉམ་དུ་འདོད་དེ་རྒྱུ་ཡི་དུས་སུ་འབྲས་བུ་མངོན་པར་མི་གསལ་བའི་ཚུལ་དུ་ཡོད་པ་དང་འབྲས་བུའི་དུས་སུ་རྒྱུ་མངོན་པར་མི་གསལ་བའི་ཚུལ་དུ་ཡོད་ཅེས་ཟེར་དེ། ཚད་ཆེན་ལས། ཁྱད་པར་ཚད་ཕྱིར་རྗེས་འགྲོ་ཕྱིར། །ནུས་པའི་སྒོ་ནས་འཇུག་པའི་ཕྱིར། །རྒྱུ་དང་འབྲས་བུ་དབྱེར་ཡོད་ཕྱིར། །རང་བཞིན་སྣ་ཚོགས་དབྱེར་མེད་ཕྱིར། །མི་གསལ་བ་ཡི་རྒྱུ་ཡོད་དོ། །ཞེས་གསུངས། ལོག་རྟོག་དེ་དག་དགག་པ་ནི་རྒྱུ་སྔོན་སྒྲུབ་ཀྱི་འབྲས་རྟགས་ཡང་དག་གི་དགོས་པ་གཙོ་བོ་ཡིན་ཏེ། ཚད་ཆེན་དཀའ་འགྲེལ་ལས། འདི་ལྟར་རྟེན་ཅིང་འབྲེལ་བར་འབྱུང་བ་ཕྱིན་ཅི་མ་ལོག་པར་སྟོན་པའི་ཕྱིར་དེའི་དོན་ངེས་པར་བཟུང་བ་ལས་བདེ་འགྲོའི་རྒྱུ་ལས་དང་འབྲས་བུ་ཕྱིན་ཅི་མ་ལོག་པ་ལ་ཡིད་ཆེས་སྐྱེ་ཞིང་། ངེས་པར་ལེགས་པའི་རྒྱུ་ཆོས་དང་གང་ཟག་ལ་བདག་མེད་པར་རྟོགས་པ་ཡང་ཐོས་པ་དང་བསམ་པ་དང་སྒོམ་པའི་རིམ་གྱིས་སྐྱེའོ་ཞེས་པ་ནས། གཞན་དག་གིས་མི་མཐུན་པའི་རྒྱུ་དང་ཚད་མ་དང་འགལ་བའི་དངོས་པོ་ལ་བརྟེན་པར་འདོད་དེ། དེ་ལྟ་བས་ན་དེ་གསལ་བའི་སྒོ་ནས་བཅོམ་ལྡན་འདས་ཀྱིས་ཇི་ལྟ་བ་བཞིན་དུ་གསུངས་པ་ཡིན་ནོ། །ཞེས་བསྟན་པའི་དོན་དང་ཞེས་གསུངས། ཀུན་མཁྱེན་རྣམ་འགྲེལ་མཐའ་དཔྱོད་དུའང་དགོས་པ་ཡོད་དེ། སྤྱིར་རྒྱུ་འབྲས་ཀྱི་རྣམ་དབྱེ་ལ་མཁས་པ་དང་། ཁྱད་པར་ཀུན་ཉོན་གྱི་རྒྱུ་རྐྱེན་དང་། དེ་ལྡོག་བྱེད་རྣམ་བྱང་རྒྱུ་རྐྱེན་ལ་མཁས་པ་དང་། ཞར་བྱུང་རྒྱང་འཕེན་གྱིས་རྒྱུ་མེད་པར་འདོད་པ་དང་།
རྒྱུ་ཡོད་པར་འདོད་ཀྱང་གྲངས་ཅན་དང་དབང་ཕྱུག་པ། ཁྱབ་འཇུག་པ་དང་སྤྱོད་པ་བ་སོགས་ཀྱིས་རྒྱུ་རྟག་པ་དང་ཁ་ཡར་བས་འབྲས་བུ་སྐྱེ་བར་འདོད་པ་དང་། སྒྲ་བའམ་བརྡ་སྤྲོད་པའམ་ལུང་སྟོན་པ་ཁ་ཅིག་མེ་མེད་པའི་བརྒྱ་བྱིན་གྱི་སྤྱི་བོར་ཡང་དུ་བ་ཡོད་པར་འདོད་པའི་ལོག་རྟོག་ཀུན་བཏགས་དུ་མ་བཟློག་པའི་ཆེད་ཡིན་པའི་ཕྱིར་ཞེས་གསུངས་སོ། ། རྟ་ནག་རྣམ་འགྲེལ་དུ་དངོས་པོ་རྣམས་རང་དང་རིགས་མི་མཐུན་གྱི་རྒྱུ་དང་། རྒྱུ་མེད་ལས་སྐྱེ་བ་བཀགས་ནས། དངོས་པོ་རྣམས་རང་དང་རིགས་མཐུན་གྱི་རྒྱུ་དང་རང་རྒྱུ་ལས་སྐྱེའོ། །ཞེས་ཤེས་པར་བྱ་བའི་ཆེད་ཡིན་པའི་ཕྱིར། དེ་ལྟར་ཤེས་པ་ལ་དགོས་པ་ཡོད་དེ། རྒྱུ་དགེ་བ་བྱས་པ་ལ་བརྟེན་ནས། རང་འབྲས་བདེ་འབྱུང་། མི་དགེ་བ་བྱས་པ་ལ་བརྟེན་ནས། སྡུག་བསྔལ་འབྱུང་ངོ་སྙམ་དུ་ལས་འབྲས་ལ་ཡིད་ཆེས་ཀྱི་དད་པ་སྐྱེ་བར་བྱ་བའི་ཆེད་ཡིན་པའི་ཕྱིར། ཞེས་གསུངས་པ་དང་། འབའ་ལང་བས་རྒྱུ་ཡོད་ཀྱང་རྒྱུ་འབྲས་དུས་མཉམ་པར་འདོད་པའི་ལོག་རྟོག་དགག་པའི་ཆེད་དུ་རྒྱུ་སྔོན་སོང་སྒྲུབ་པ་དང་ཞེས་གསུངས་པ་བཞིན་ཕྱི་རོལ་མུ་སྟེགས་པ་དག་གིས་རྒྱུ་འབྲས་མེད་པར་འདོད་པ་དང་ཡོད་ཀྱང་དུས་མཉམ་དུ་འདོད་པ། རྒྱུ་སྔོན་དུ་མ་སོང་བར་འབྲས་བུ་སྐྱེ་བར་འདོད་པ། རྒྱུ་རྟག་པ་དང་ཁ་ཡར་བས་འབྲས་བུ་སྐྱེ་བར་འདོད་པ་སོགས་དགག་པའི་ཆེད་དུ་འབྲས་རྟགས་ཡང་དག་གསུངས་ལ་རྒྱང་འཕེན་པ་དང་གྲངས་ཅན་པ་དག་གི་ལོག་རྟོག་དགག་པའི་ཆེད་དུ་བྱེ་བྲག་ཏུ་རྒྱུ་སྔོན་སོང་སྒྲུབ་ཀྱི་འབྲས་རྟགས་ཡང་དག་གསུངས་པར་འདོད་དོ། །
བཞི་བ། མཇུག་བསྡུ་བའི་གཏམ།
པད་མའི་མཚོ་ལ་ངང་བའི་རྒྱལ་བོ་བཞིན། །
འཇུག་མཛད་འཇམ་དཔལ་དབྱངས་དངོས་བློ་བཟང་གྲགས། །
ཡབ་སྲས་བརྒྱུད་པར་བཅས་པའི་ཞབས་ཀྱི་རྡུལ། །
སྤྱི་བོས་རྒྱན་དུ་ལེན་བཞིན་སྙིང་ནས་འདུད། །
དོན་ཟབ་གཞུང་ལུགས་མ་དྲོས་མཚོ་ཆེན་ལས། །
ལེགས་འོང་རང་རྒྱུ་སྔོན་སོང་རྟགས་ཀྱི་ཚུལ། །
ཅུང་ཙམ་བཤད་པའི་སྐལ་བཟང་རླབས་ཀྱི་ཕྲེང་། །
འཕྱུར་བ་འདི་ཡང་བླ་མའི་དྲིན་དུ་ངེས། །
མཁོས་ཆུང་བདག་བློ་རྨོངས་པའི་དྲར་ཚུད་པས། །
ཟབ་རྒྱས་གཞུང་དོན་མ་རྟོགས་ལོག་བཤད་དེ། །
མཁས་རྣམས་བསྟིང་ཚིག་སྨྲ་བའི་རྒྱུར་སྲིད་ཀྱང་། །
བླ་མའི་བཀའ་བཞིན་བསྒྲུབས་པས་མཉེས་གྱུར་ཅིག །
