“རྒྱང་སྒྲིབ་སངས་དྲག་འགྲོ་ཐུབ”སོགས་ཀྱི་དྲིལ་བསྒྲཌ་སྐད་ཆ་སྤྱོད་མི་ཆོག་པ།
འདི་ག་ཚགས་པར་ཁང་དུ་པེ་ཅིང་ནས་གློག་འཕྲིན་འབྱོར་གསལ། ཉེ་ཆར། རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་སོགས་སྡེ་ཚན་དྲུག་གིས་མཉམ་དུ་ཡིག་ཆ་བཏོན་ནས། བྱིས་པ་དང་གཞོན་ནུ་ལོ་ཆུང་གི་རྒྱང་སྒྲིབ་ནད་བཅོས་སྟངས་ཚད་ལྡན་དུ་བཏང་བ་དང་། “རྒྱང་སྒྲིབ་སངས་དྲག་ཏུ་འགྲོ་ཐུབ”སོགས་ཀྱི་དྲིལ་བསྒྲགས་སྐད་ཆ་སྤྱོད་མི་ཆོག་པའི་བླང་བྱ་བཏོན་ཡོད་པ་རེད།
ཉེ་བའི་དུས་སྐབས་ཤིག་རིང་། བྱིས་པ་དང་གཞོན་ནུ་ལོ་ཆུང་གི་རྒྱང་སྒྲིབ་བཅོས་སྟངས་ཡ་མ་བརླ་མང་པོ་ཐོན་ཡོད་པ་དང་། ལྷག་པར་དུ་དྲིལ་བསྒྲགས་རྫུན་མ་དང་འུད་སྒྲོག་གི་དྲིལ་བསྒྲགས་མང་པོ་ཐོན་ནས། རྒྱང་སྒྲིབ་མིག་ནད་ཅན་གྱི་བྱིས་པ་དང་གཞོན་ནུ་ལོ་ཆུང་དང་དེ་བཞིན་ཁོང་ཚོའི་ཕ་མ་ལོག་ལམ་དུ་ཁྲིད་དེ། བྱིས་པ་དང་གཞོན་ནུ་ལོ་ཆུང་ཚོའི་མིག་གི་བདེ་ཐང་ལ་འཇིགས་སྐུལ་བཟོས་པར་སྤྱི་ཚོགས་ཀྱི་དོ་སྣང་རྒྱ་ཁྱབ་ཐོབ་ཡོད། རིགས་གཅིག་མཁས་ཅན་གྱིས་བསྟན་དོན། མིག་སྔའི་སྨན་བཅོས་ལག་རྩལ་གྱི་ཆ་རྐྱེན་འོག རྒྱང་སྒྲིབ་ནི་སྨན་བཅོས་བྱས་ནས་སངས་དྲག་ཏུ་འགྲོ་མི་ཐུབ་ཀྱང་། བྱིས་པ་དང་གཞོན་ནུ་ལོ་ཆུང་ཚོས་ཚན་རིག་དང་མཐུན་པའི་ངང་མིག་སྤྱོད་པ་དང་། ཁང་ཕྱིའི་བྱེད་སྒོ་སྤེལ་ཡུན་རིང་དུ་གཏོང་བ། དུས་ཡུན་རིང་པོར་ཉེ་བར་བཅར་ནས་ལྟ་བའི་ཡུན་ཚད་ཐུང་དུ་གཏོང་བ་སོགས་བྱེད་སྟངས་བརྒྱུད་དེ། རྒྱང་སྒྲིབ་སྔོན་འགོག་དང་། ཚོད་འཛིན། ལེགས་གཏོང་བཅས་བྱེད་ཆོག ཁྱིམ་བདག་གིས་བྱིས་པ་དང་གཞོན་ནུ་ལོ་ཆུང་གི་མིག་ཤེད་རྒྱུན་ལྡན་མིན་པ་རྟོགས་ཚེ། དུས་ཐོག་ཏུ་མིག་ནད་སྨན་ཁང་ལ་བསྟན་ནས་བརྟག་དཔྱད་བྱས་རྗེས་སྨན་པའི་ངག་བཞིན་དུ་ཚན་རིག་དང་མཐུན་པར་བཅོས་དགོས།
རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱིས་བླང་བྱ་བཏོན་དོན། བྱིས་པ་དང་གཞོན་ནུ་ལོ་ཆུང་གི་རྒྱང་སྒྲིབ་ནད་བཅོས་མཁན་སྒྲིག་གཞིའམ་མི་སྒེར་གྱིས་ངེས་པར་ཏུ་ཁྲིམས་ལྟར་ལས་སྒྲུབ་དང་ཁྲིམས་ལྟར་གཉེར་སྐྱོང་བྱེད་པ་ལས། རྒྱང་སྒྲིབ་ནད་བཅོས་པའི་ཕྱི་ཕྱོགས་དྲིལ་བསྒྲགས་ཁྲོད“སླར་གསོ་བྱེད་ཐུབ”དང་། “ཏུའུ་གྲངས་ཆག་ཐུབ”“རྒྱང་སྒྲིབ་སངས་དྲག་ཏུ་འགྲོ་ཐུབ” “རྒྱང་སྒྲིབ་ཀྱི་གཉེན་པོ”སོགས་ཀྱི་སྐད་ཆ་སྤེལ་ནས། རྒྱང་སྒྲིབ་ནད་ཅན་གྱི་བྱིས་པ་དང་གཞོན་ནུ་ལོ་ཆུང་དང་དེ་བཞིན་ཁོང་ཚོའི་ཕ་མ་ལོག་ལམ་དུ་འཁྲིད་མི་རུང་། ཀྲུང་ལུགས་གསོ་རིག་སྨན་རྫས་བཅའ་ཁྲིམས་ཁྲོད་ཀྱི་གཏན་འཁེལ་དང་འགལ་ནས། ཀྲུང་ལུགས་གསོ་རིག་གི་མིང་ཐོག་ནས་སམ་ཡང་ན་ཀྲུང་ལུགས་གསོ་རིག་གི་རིགས་པའི་གཞུང་ལུགས་དང་ལག་རྩལ་ལ་ཁ་གཡར་ནས་འཛད་སྤྱོད་པར་མགོ་སྐོར་བཏང་སྟེ་ཚུལ་མིན་གྱི་ཁེ་ཕན་ལེན་མི་རུང་། རིམ་ཁག་འཕྲོད་བསྟེན་སྲིད་འཛིན་སྡེ་ཚན་གྱིས་སྨན་བཅོས་སྒྲིག་གཞི་ཁག་ལ་བྱེད་པོའི་འགན་འཁྲི་དོན་འཁྱོལ་བྱས་ཐོག རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱིས་ཁྱབ་བསྒྲགས་བྱས་པའི《རྒྱང་སྒྲིབ་སྔོན་འགོག་ཕྱོགས་སྟོན》སོགས་ཀྱི་བླང་བྱ་ལྟར། བྱིས་པ་དང་གཞོན་ནུ་ལོ་ཆུང་གི་རྒྱང་སྒྲིབ་ནད་བཅོས་པའི་ལས་དོན་སྤེལ་སྟངས་དང་མིག་མཐོང་འོད་ཤུགས་སྨན་བཅོས་ཡོ་ཆས་སྤྱོད་སྟངས་ཚད་ལྡན་དུ་གཏོང་རྒྱུའི་ལྟ་སྐུལ་བྱས་ནས། སྨན་བཅོས་སྒྲིག་གཞི་ཁག་གིས་དྲིལ་བསྒྲགས་རྫུན་མ་དང་འུད་སྒྲོག་གི་དྲིལ་བསྒྲགས་སོགས་གཏན་འགོག་བྱེད་དགོས་པ་དང་། ཁྲིམས་འགལ་བྱེད་སྤྱོད་ལྷག་རིགས་ལ་ཁྲིམས་ལྟར་རྩད་གཅོད་ནན་པོ་བྱེད་དགོས། སྨན་བཅོས་སྒྲིག་གཞིས་བེད་སྤྱོད་བྱེད་པའི་མིག་མཐོང་འོད་ཤུགས་ཐོན་རྫས་དང་སྨན་བཅོས་ཡོ་ཆས་དག་གི་སྤུས་ཚད་ཚད་ལོན་མིན་ནམ་ཡང་ན་འུད་སྒྲོག་བྱེད་པ་སོགས་ཀྱི་གནད་དོན་རྟོགས་ཚེ། དུས་ཐོག་ཏུ་བརྡ་ཁྱབ་གཏོང་བའམ་ཡང་ན་ཁྲོམ་ར་ལྟ་སྐུལ་དོ་དམ་དང་སྨན་རྫས་ལྟ་སྐུལ་དོ་དམ་སོགས་སྡེ་ཚན་ལ་རྩིས་སྤྲོད་དགོས།
