སྤྱི་ཟླ4པའི་ཚེས15ཉིན། ཁམས་པའི་འཕེལ་རྒྱས་དང་ཞིབ་འཇུག་ལྟེ་གནས་དང་ཁམས་པའི་རིག་གནས་དང་སྤྱི་ཚོགས། ཚན་རིག་ཁྱབ་སྤེལ་དང་དེའི་རྟེན་གཞི་ཡིས་གཙོ་གཉེར་བྱས་ཤིང་། སི་ཁྲོན་མི་རིགས་སློབ་གྲྭ་ཆེན་མོའི་དྲིལ་བསྒྲགས་པུའུ་ཡིས་ལས་རོགས་བྱས་པ། རོལ་དབྱངས་ཟློས་གར་སློབ་གྲྭ་ཆེན་མོས་སྒྲུབ་འགན་འཁུར་བའི་སི་ཁྲོན་མི་རིགས་སློབ་གླིང་གི་སྐབས་དང་པོའི་གཟུགས་མེད་ཤུལ་བཞག་རིག་གནས་སློབ་གྲྭར་ཁྱབ་སྤེལ་གཏོང་བའི་བྱེད་སྒོ་སྤེལ་འགོ་ཚུགས་པ་རེད།

        ཤེས་རྟོགས་བྱུང་བར་གཞིགས་ན། ཐེངས་འདིར་བྱེད་སྒོ་སྤེལ་བའི་དམིགས་ཡུལ་ནི་ཁམས་པའི་བོད་ཁུལ་ལ་དམིགས་ཏེ་ཁམས་པའི་རིག་གནས་དྲིལ་བསྒྲགས་བྱ་རྒྱུ་དང་། མི་རིགས་རང་བཞིན་དང་། ས་གནས་རང་བཞིན། བཀོལ་སྤྱོད་ཅན་གྱི་སློབ་གཉེར་གནས་ཐིག་གཏན་འཁེལ་ལ་དམིགས་ནས་གཟུགས་མེད་ཤུལ་བཞག་རིག་གནས་རྒྱུན་འཛིན་དང་སྲུང་སྐྱོང་བྱེད་འགོ་བཙུགས་ནས་སློབ་གྲྭའི་རིག་གནས་འཚོ་བ་ཕུན་སུམ་ཚོགས་ཤིང་འཁྲུག་པོ་གཏོང་ཆེད་ཡིན་ལ། སློབ་གྲྭ་ཆེན་པོའི་སློབ་མའི་རིག་གནས་བྱང་ཚད་མཐོ་རུ་གཏོང་བ། རྒྱ་ཆེ་བའི་དགེ་རྒན་དང་སློབ་མར་སྣ་མང་ཅན་གྱི་མི་རིགས་རིག་གནས་ཀྱི་ཁོར་ཡུག་དང་ཁྱོན་ཡོངས་དང་འཆམ་མཐུན་གྱི་འཕེལ་རྒྱས་གཏོང་བའི་ཁོར་ཡུག་འཛུགས་སྐྱོང་བྱེད་པའི་ཆེད་དུའང་ཡིན། བྱེད་སྒོའི་བརྗོད་བྱ་གཙོ་བོ་ནི་ཤུལ་བཞག་རིག་གནས་རྒྱུན་འཛིན་བྱས་ཏེ་བསམ་པའི་ཁྱིམ་གཞིས་བརྟན་སྲུང་བྱེད་ཅེས་དེ་རེད།
        བྱེད་སྒོ་སྤེལ་བའི་ལས་ཡུལ་དངོས་སུ་འཛམ་གླིང་གི་གཟུགས་མེད་ཤུལ་བཞག་རིག་གནས《གེ་སར》གྱི་སྒྲུང་གླུ་རྒྱུན་འཛིན་པ་ཨ་ཉིད་དང་། ཁུལ་རིམ་པའི་ཤུལ་བཞག་གཟུགས་མེད་ཤུལ་བཞག་རིག་གནས《ལྕགས་ཟམ་ཁའི་ལ་གླུ》ཡི་འཐུས་ཚབ་རང་བཞིན་གྱི་རྒྱུན་འཛིན་པ་ཝུའུ་ཆོན་ཆིང་གཉིས་ཀྱིས་ཁག་བགོས་ནས་རང་ཉིད་ཀྱིས་གཟུགས་མེད་ཤུལ་བཞག་རིག་གནས་ཞིབ་འཇུག་བྱེད་རིམ་བྲིས་པའི་བསྟན་བཅོས་དང་དཔེ་དེབ་སི་ཁྲོན་མི་རིགས་སློབ་གྲྭ་ཆེན་མོར་ལེགས་སྐྱེས་སུ་འབུལ་ཡོད་པ་རེད།
        སི་ཁྲོན་མི་རིགས་སློབ་གླིང་གི་ཏང་ཨུའི་རྒྱུན་ཨུ། སློབ་གཙོ་གཞོན་པ་ཀྲན་ཞན་ཡིའུ་ཡིས་བྱེད་སྒོ་སྤེལ་སྐབས་བཤད་དོན། རིག་གནས་ནི་མི་རིགས་ཀྱི་ཕུགས་རྩ་ཡིན་ལ་། རིག་གནས་ནི་མི་རིགས་ཀྱི་བླ་སྲོག་ཀྱང་ཡིན། དཀར་མཛེས་ཁུལ་གྱི་ལོ་རྒྱུས་དུས་ཡུན་རིང་པོ་ཡིན་པ་དང་རི་གནས་ཕུན་སུམ་ཚོགས་པོ་ཡིན་པ། ཁམས་པའི་བོད་ཁུལ་གྱི་མཐོ་རིམ་སློབ་གླིང་ཉག་གཅིག་ཡིན་ཕྱིར། སི་ཁྲོན་མི་རིགས་སློབ་གླིང་ལ་ཁམས་པའི་ཕུལ་བྱུང་གི་རིག་གནས་རྒྱུན་འཛིན་བྱ་རྒྱུའི་འོས་འགན་དང་འགན་འཁྲི་ཡོད་པ་རེད།།