ལོ་རེའི་ཟླ5བའི་ཟླ་འགོ་ནས་ཟླ6པའི་ཟླ་མཇུག་བར་ནི་དབྱར་རྩྭ་དགུན་འབུ་བརྐོ་བའི་དུས་ཚིགས་ཡིན་པས། ཞིང་འབྲོག་མང་ཚོགས་ཀྱིས་བརྐོས་མ་ཐག་པའི་དབྱར་རྩྭ་དགུན་འབུ་ཚོང་རར་ཁྱེར་ནས་ཉོ་འཚོང་ལ་བྲེལ་བཞིན་ཡོད། འཛམ་ཐང་རྫོང་དབྱར་རྩྭ་དགུན་འབུ་ཉོ་འཚོང་ཁྲོམ་ར་ནས་རྒྱུས་ལོན་བྱུང་བ་ལྟར་ན། ད་ལོ་ན་ནིང་དང་བསྡུར་ན་མཐོ་སྒང་གི་དབྱར་རྩྭ་དགུན་འབུའི་རིན་གོང་ཅུང་ཇེ་ཆེར་སོང་བར་བརྟེན། མང་ཚོགས་ཀྱི་ཡོང་སྒོ་ཡང་ཇེ་མཐོར་སོང་ཡོད་ཅིང་། ཞིང་འབྲོག་མང་ཚོགས་ཀྱི་འཚོ་བའི་ཡོ་བྱད་དང་བཟའ་བཏུང་གི་ཆུ་ཚད་ཡང་ལོ་རེ་བཞིན་ཇེ་མཐོར་འགྲོ་བཞིན་པ་མིག་མཐོང་ལག་ཟིན་ཡིན། དེ་ལས་ཀྱང་བརྩོན་འགྲུས་ཅན་གྱི་ཁྱིམ་ཚང་འགའ་རེས་ཡོང་སྒོ་འདི་དག་ལ་བརྟེན་ནས་མགྲོན་ཁང་འཛུགས་པ་དང་རླངས་འཁོར་སོགས་ཉོ་བཞིན་ཡོད་པས།  དབྱར་རྩྭ་དགུན་འབུ་ནི་ཞིང་འབྲོག་མང་ཚོགས་ཀྱི་ལས་རིགས་གཉིས་པའི་ཡོང་འབབ་ཐོན་ཁུངས་གཙོ་བོ་ཡིན།

       འཛམ་ཐང་རྫོང་ནི་མཚོ་ངོས་ལས་མཐོ་ཚད་མཐོ་བས་དབྱར་རྩྭ་དགུན་འབུའི་སྤུས་ཚད་ལེགས་པས། བསྡུ་ཉོ་བྱེད་མཁན་གྱི་ཚོང་བ་ཚོ་བུང་བ་མེ་ཏོག་ལ་འཁོར་བ་བཞིན་དབྱར་རྩ་དགུན་འབུ་ཉོ་བར་བྲེལ་བཞིན་ཡོད་ཅིང་། ཚོང་བ་རྣམས་ཀྱིས་དབྱར་རྩྭ་དགུན་འབུ་གཙང་མར་བཟོས་པ་དང་ས་རྡུལ་གཙང་མར་སེལ་ནས་ཕྱིར་འཚོང་བྱེད་བཞིན་ཡོད།  

      བརྐོས་མ་ཐག་པའི་དབྱར་རྩྭ་དགུན་འབུ་གསར་བ་ཉོ་འཚོང་བྱེད་པའི་ཁྲོམ་རར་བསྡུ་ཉོ་བྱེད་མཁན་གྱི་ཚོང་བ་དང་རྒྱ་ཆེའི་ཞིང་འབྲོག་མང་ཚོགས་ཀྱི་ཁེངས་ཡོད་ལ། དབྱར་རྩྭ་བསྡུ་ཉོ་བྱེད་མཁན་གྱི་ཚོང་བ་དང་ཞིང་འབྲོག་མང་ཚོགས་རྣམས་ཚོང་བཤད་ལ་བྲེལ་བཞིན་པ་སོགས་ཁྲོམ་རར་ཟང་ཟིང་གི་རྣམ་པས་ཁེངས་འདུག རྒྱུས་ལོན་བྱུང་བ་ལྟར་ན།  ད་ལོ་དབྱར་རྩྭ་ཉོ་འཚོང་གི་དུས་ཡུན་བསྟུད་མར་ཟླ་གཉིས་དང་གསུམ་གྱི་རིང་ལ་རྒྱུན་མཐུད་བྱེད་རྒྱུ་རེད། །