ས་གདན་འཐག་ཤག་ཅིག་ནས་རྒྱལ་ནང་གི་ཆེས་ཐོག་མའི་ནོར་གནག་ཁིལ་རྩིད་ཀྱི་ས་གདན་བཟོ་གྲྭ་ཞིག་ཏུ་འགྱུར་རིམ་ལ། ཀྱག་ཀྱོག་གི་ལམ་བུ་ནས་ཐབས་ཤེས་ཟུང་དུ་འབྲེལ་བའི་གཏམ་རྒྱུད་ཅིག་ལོས་ཡོད། སྐབས་འདིར། ངས་ལྷན་རྒྱས་ལ་གཏམ་རྒྱུད་དེའི་བྱུང་རིམ་རེ་རེ་བཞིན་བཤད་པར་འདོད་དོ།།
སྲོལ་རྒྱུན་ལག་བཟོ་རྐྱང་རྐྱང་ལས།། ས་གདན་གང་ཐོན་ཉོས་ཚར་སོང་།།
དཀར་སེར་དམར་ལྗང་གི་མེ་ཏོག་གི་ཁྲ་ཆོམ་མེར་བཞད་པའི་རྩྭ་ཐང་དུ། ཧུང་ཡོན་རྫོང་ཨ་མཆོག་གྲོང་རྡལ་གྱི་སྟོད་ལུང་སྡེ་བ་ཆགས་ཡོད། སྡེ་བ་དེ་ན་འབྲོག་པ་ཞིག་གིས་གཉེར་བའི་ས་གདན་འཐག་ཤག་ཅིག་ཡོད་ལ། ས་གདན་ཚང་མ་ལག་ཤེས་ཁོ་ནར་བརྟེན་ནས་འཐག་བཟོ་བྱས་ཤིང་། བཟོ་བ་ནི་བལ་པོ་ནས་ཐོན་པ་རེད།
ས་གདན་འཐག་ཤག་གི་དཔལ་ལྡན་རྒྱ་མཚོ་ན་རེ། ས་གདན་བཟང་ཤོས་ཤིག་འཐག་བཟོ་བྱེད་ན་ཆེས་ཉུང་ནའང་ལས་རིམ༧ངེས་པར་དུ་བརྒྱུད་དགོས་ཤིང་། བཟོ་བ་གཉིས་ཀྱིས་གཟའ་འཁོར་གཅིག་གི་རིང་ལ་རྒྱུན་མི་ཆད་པར་རེམས་ན་ད་གཟོད་འགྲུབ་ཐུབ། ས་གདན་ཆ་གཅིག་གི་རིན་གོང་ནི་ཕལ་ཆེར་སྒོར༦༠༠༠ཡས་མས་ཡིན།
བོད་ཀྱི་འཐག་ལས་ནི་སྲོལ་རྒྱུན་གྱི་ཐོན་ལས་ཤིག་ཡིན་ལ། མང་ཆེ་བས་རང་ཉིད་ཀྱི་འཚོ་བའི་དགོས་མཁོ་བསྐངས་པ་ཙམ་ཡིན་ཡང་། ཉེ་བའི་ལོ་ཤས་རིང་། ཧུང་ཡོན་དུ་ཡུལ་སྐོར་བ་ཇེ་མང་དུ་སོང་བ་དང་བསྟུན་ནས། མི་རིགས་ཀྱི་ཁྱད་ཆོས་ལྡན་པའི་ལག་ཤེས་ཐོན་རྫས་ཀྱི་རིགས་ལ་ཉིན་བཞིན་དགའ་བོ་བྱེད་མཁན་དང་ཉོ་མཁན་ཇེ་མང་དུ་སོང་ནས་ཚོང་རར་ཆེས་བྲིན་པའི་ཚོང་རྫས་ཤིག་ཏུ་གྱུར་འདུག
ཡང་དཔལ་ལྡན་རྒྱ་མཚོ་ན་རེ། ལོ་རེ་བཞིན་ཚོང་མགྲོན་ཇེ་མང་དུ་སོང་སྟེ་ལོ་རེར་འཐག་བཟོ་བྱས་པའི་ས་གདན་གཅིག་ཀྱང་མི་ལྷག་པར་བཙོང་ཐུབ་པ་དང་། ཡོང་འབབ་རྐྱང་བ་ལའང་སྒོར་ཁྲི༢༠ནས༣༠བའི་བར་ཡོད་ཀི།
རྒྱུས་ལོན་པ་ལྟར་ན། ད་བར་ས་གདན་བཟོ་གྲྭས་ས་གདན་སྟོང་ལྷག་བཙོང་ཞིང་། ཧྲིན་ཀྲིན་དང་ཧྲང་ཧའེ། པེ་ཅིང་སོགས་གྲོང་ཁྱེར་ཆེན་པོ་སོགས་ལ་ཁྱབ་ཡོད།
སྔོན་མེད་ལག་རྩལ་གསར་དུ་རྙེད།། ནམ་ཡང་འགྱུར་མེད་ཚོང་རྟགས་བླངས།།
སྐ་ཆུའི་བཞུར་རྒྱུན་གྱི་ས་གདན་འཐག་བཟོ་ཁང་མ་ཚུགས་གོང་། དེ་ནི་སྟོད་ལུང་སྡེ་བར་ཆགས་པའི་འབྲོག་པའི་ས་གདན་འཐག་བཟོའི་མཉམ་ལས་ཁང་ཞིག་ཡིན་ལ། དཔལ་ལྡན་རྒྱ་མཚོས་མཉམ་ལས་ཁང་གི་འགན་ཁུར་བ་དང་། མི་རེ་འགའ་ལས་མེད་པའི་ས་གདན་འཐག་ཤག་ཆུང་ཆུང་ཞིག་ཡིན།རྗེས་སུ།ཧུང་ཡོན་རྫོང་གི་ཏང་ཨུ་དང་སྲིད་གཞུང་གིས་རོགས་འདེགས་དང་མཐུན་རྐྱེན་མང་དུ་སྦྱར་བས། མཉམ་ལས་ཁང་དེ་ཇེ་ཆེ་ནས་ཇེ་ཆེར་སོང་སྟེ། ཁྱིམ་དུ་བྲེལ་མེད་ཁོམ་པོར་གནས་པའི་འབྲོག་མོ་མང་པོར་ལས་ཞུགས་ཀྱི་གོ་སྐབས་བསྩལ་བར་མ་ཟད། མི་རིགས་ཤིག་གི་ཐོན་སྐྱེད་འཕེལ་རྒྱས་ལ་སྐུལ་མ་བཏབ་ཡོད། སྒོས་སུ་༢༠༡༧ལོར་མཉམ་ལས་ཁང་ལ་འཕེལ་རྒྱས་ཆེན་པོ་འབྱུང་བའི་གོ་སྐབས་གསར་བ་ཞིག་འཐོབ་པ་རེད།
༢༠༡༧ལོར། ཧུང་ཡོན་རྫོང་ཨུ་དང་རྫོང་སྲིད་གཞུང་གིས་ལྗང་མདོག་སྐྱེ་ཁམས་བཟོ་ལས་དར་རྒྱས་དང་སྟོབས་ལྡན་དུ་གཏོང་བ་དང་། སྲོལ་རྒྱུན་ཐོན་ལས་ཇེ་བཟང་ཇེ་ལེགས་སུ་གཏོང་བ། ནོར་གནག་གི་ཀོ་དང་རྩིད་པ། ཁིལ། རུས་པ། རྭ་སོགས་ཀྱི་ཐོན་ལས་ལ་ཤུགས་རྒྱག་པའི་བླང་བྱ་བཏོན་པས། ས་གདན་མཉམ་ལས་ཁང་གི་འཕེལ་རྒྱས་ལ་གོ་སྐབས་བཟང་པོ་འཐོབ་པ་རེད་ཅེས་ཨ་མཆོག་གྲོང་རྡལ་ཏང་ཨུའི་འགན་ཁུར་བ་ཀའོ་པིན་གྱིས་བཤད་བྱུང་།
རྫོང་ཨུ་དང་རྫོང་སྲིད་གཞུང་གིས་མཐུན་རྐྱེན་དེ་འདྲ་ལེགས་པོ་བསྐྲུན་ཡོད་པས། ང་ཚོས་མི་རེམས་ཀ་མེད་ཡིན། བོད་ཀྱི་ས་གདན་གྱི་རྒྱུ་སྤུན་ཚང་མ་ནི་རྒྱལ་ཁབ་གཞན་ནས་ཉོས་པ་ཡིན་པས་མ་རྩ་ཤིན་ཏུ་ཆེ། ནོར་གནག་གི་ཁིལ་དང་རྩིད་པ་སོ་སོར་ཕྱེས་ནས་རྒྱུ་སྤུན་བཟོ་ཐུབ་ན་མ་རྩ་ཇེ་ཉུང་དུ་འགྲོ་ཐུབ་ཅིང་། འབྲོག་པ་རྣམས་ལའང་ཁེ་ཕན་མང་དུ་འབྱུང་ཐུབ། དེར་བརྟེན། དོན་འདི་ལ་བསམ་བློ་བཞི་གསུམ་བཅུ་གཉིས་བཏང་བ་ཡིན། མཐར་ཡུལ་གཞན་ནས་ཐབས་བཀོད་རྙེད་མིན་འཚོལ་བའི་སེམས་ཐག་གོར་མོ་རྡོ་བཞིན་བཅད་པ་ཡིན་ཞེས་ལོ་རབས༩༠བའི་རྗེས་སུ་སྐྱེས་པའི་མཉམ་ལས་ཁང་གི་སྲོལ་འབྱེད་པའི་ཡ་གྱལ་གསང་འདུས་སྐྱབས་ཀྱིས་ལག་རྩལ་གསར་བ་འཚོལ་ཞིབ་སྐོར་གྱི་གནས་ཚུལ་བཤད་བྱུང་།
དེ་ནས་ང་རང༢༠༡༨ལོའི་མཚོ་སྔོན་བོད་གདན་རྒྱལ་སྤྱིའི་འགྲེམ་སྟོན་ལ་ཞུགས་ཏེ། རྒྱལ་ཁབ་ཕྱི་ནང་གི་བཟོ་གྲྭ་མང་པོ་ལ་ནོར་གནག་གི་ཁིལ་རྩིད་ཀྱིས་ས་གདན་བཟོ་ཐུབ་མིན་ཐད་ཀྱི་དྲི་བ་མང་དུ་དྲིས་ཀྱང་། ཀུན་གྱིས་ཚོད་ལྟ་བྱེད་མ་མྱོང་ཟེར་ཅེས་བཤད་བྱུང་།
ཡིན་ནའང་། གསང་འདུས་སྐྱབས་ཡིད་མ་ཆད་པར་ས་གདན་བཟོ་གྲྭར་ལོག་ནས། འབྲོག་པ་རྣམས་ལ་སྲོལ་རྒྱུན་གྱི་འཁེལ་འཐག་ཐབས་ཤེས་ལྟར་དུ་རྒྱུ་སྤུན་བསླ་རུ་བཅུག་པ་དང་། བལ་པོ་ཡི་ལག་རྩལ་བར་ཡང་ནས་ཡང་དུ་ཚོད་ལྟ་བྱེད་དུ་བཅུག་མཐར། ས་གདན་བཟོ་གྲྭས་ནོར་གནག་གི་ཁིལ་རྩིད་ཀྱིས་ས་གདན་འཐག་བཟོ་ཐུབ་མ་ཐག་ཚོང་རྟགས་ཀྱང་ཡར་ཞུ་བྱས་པ་རེད།
གསང་འདུས་སྐྱབས་ཀྱིས་ནོར་གནག་གི་ཁིལ་རྩིད་ས་གདན་འདི་ཡིས་སྒོར་ཁྲི་གཉིས་ཁུག་པས་ཐམས་ཅད་དགའ་བོ་བྱུང་ཞེས་བཤད་དུས། ནོར་གནག་གི་ཁིལ་རྩིད་ས་གདན་ཐོག་མར་བཙོང་བའི་དགའ་བའི་འཛུམ་མདངས་ད་དུང་ཡལ་མེད་པའི་སྣང་བ་སྟེར་ཡོང་ལ། ནོར་གནག་གི་ཁིལ་རྩིད་ས་གདན་གྱི་མདུན་ལམ་ལ་ཡིད་ཆེས་ཀྱིས་ཁེངས་འདུག
མཐུན་རྐྱེན་སྦྱར་བའི་གོ་སྐབས་རྙེད།། རང་གཞན་ཀུན་ལ་ཕན་ཐོགས་ཆེ།།
ལག་ཤེས་ཁོ་ནར་བརྟེན་ན་ནོར་གནག་གི་ཁིག་རྩིད་འཐག་བཟོ་ལ་དུས་ཡུན་རིང་བོ་འགོར་འགྲོ་བས། ཐོན་ཚད་དམའ་བ་དང་གླ་ཡོན་ཡང་མཐོ།དེས་ན་འཕྲུལ་ཆས་ཀྱིས་འཐག་བཟོ་ནི་ཐབས་ཤེས་ཡང་དག་པ་ཞིག་ཡིན་པས། ངས་སླར་ཡང་ནོར་གནག་གི་ཁིལ་རྩིད་འཁུར་ནས་རྒྱལ་ནང་གི་ས་གདན་བཟོ་གྲྭ་མང་སའི་ཧི་པའེ་དང་ཀྲེ་ཅང་། ཅང་སུའུ། ཧྲན་ཏུང་སོགས་ཞིང་ཆེན་དུ་མར་སོང་། མཐར་ཧྲན་ཏུང་ནས་རྒྱལ་ནང་ལ་མིང་གྲགས་ཆེ་བའི་བཟོ་གྲྭ་ཞིག་ནས། ཟླ་དུ་མར་ཡང་ནས་ཡང་དུ་ཚོད་ལྟ་དང་ཞིབ་འཇུག་བྱས་རྗེས། འཕྲུལ་ཆས་ཀྱིས་ནོར་གནག་གི་ཁིལ་རྩིད་ས་གདན་དུ་འཐག་བཟོ་ཐུབ་བྱུང་ཞེས་གསང་འདུས་སྐྱབས་ཀྱིས་བཤད།
ཡུལ་དེ་གའི་ཐོན་ལས་རིན་ཐང་མཐུད་ཐག་ཇེ་བཟང་དུ་འགྲོ་ཆེད། ཧུང་ཡོན་རྫོང་ཨུ་དང་སྲིད་གཞུང་གིས་གང་མགྱོགས་ཇི་མགྱོགས་སུ་གོ་སྐབས་བསྐྲུན་པར་འབད་ཅིང་། སྐ་ཆུ་བཞུར་རྒྱུན་གྱི་ས་གདན་འཐག་བཟོ་ཁང་ལ་གླ་ཡོན་སྐར་ཆ་ཙམ་ཡང་མ་བླངས་པར་ཀུན་ཕན་མཉམ་ལས་ཁང་དུ་བཞག་པ་དང་། རྫོང་མཁོ་འཚོང་ཁང་གི་སྣེ་ཁྲིད་འོག ༢༠༡༨ལོར། རྒྱལ་ནང་གི་ཆེས་ཐོག་མའི་ནོར་གནག་གི་ཁིལ་རྩིད་ཀྱིས་ས་གདན་འཐག་བཟོ་བྱེད་པའི་སྐ་ཆུ་བཞུར་རྒྱུན་གྱི་ས་གདན་འཐག་བཟོ་ཉོ་འཚོང་ཚད་ཡོད་འགན་ལེན་ཀུང་སི་གསར་དུ་བཙུགས་པར་མ་ཟད། ནོར་གནག་གི་ཁིལ་རྩིད་འཐག་བཟོའི་འཕྲུལ་ཆས་སྐོར་ཅིག་ཉོས་པ་རེད།
ཟླ་གཅིག་ཙམ་གྱི་རྗེས་སུ། ས་ཐག་རིང་བོ་ཧྲན་ཏུང་ཆིང་ཏའོ་ནས་འཕྲུལ་ཆས་གསར་བ་ཞིག་ངེད་བཟོ་གྲྭར་ཐོན་སྲིད་པས། སྔོན་ཆད་དང་བསྡུར་ན་ང་ཚོས་ལྡབ་འགྱུར་གྱིས་ས་གདན་ཐོན་སྐྱེད་བྱེད་ཐུབ། ནོར་གནག་གི་ཁིལ་རྩིད་ཉོ་སྒྲུབ་དང་། ལག་ཤེས་ཁོ་ནས་ས་གདན་འཐག་བཟོ། འཕྲུལ་ཆས་ཀྱིས་ས་གདན་འཐག་བཟོ་བཅས་མཉམ་དུ་བསྒྲུབ་ན། རང་གཞན་གྱི་འཚོ་བའི་དགོས་མཁོ་བསྐང་ཐུབ་པར་མ་ཟད། འབྲོག་པ་རྣམས་ལ་ཡོང་འབབ་གསར་བ་ཞིག་གི་འབྱུང་ཁུངས་ཀྱང་ཡོད་ཅེས་ལོ་རབས༩༠པའི་རྗེས་སུ་སྐྱེས་པའི་ཚོང་དཔོན་ན་ཆུང་གསང་འདུས་སྐྱབས་ཀྱིས་རང་གི་ཁེ་ལས་ལ་འཆང་བའི་རེ་འདུན་དང་འབྲོག་པ་མང་ཚོགས་ལ་འཆང་བའི་ལྷག་བསམ་དཀར་བོ་གླེང་དུས། རེ་བ་དང་ཡིད་ཆེས་ཀྱིས་ཁེངས་བའི་མིག་ཟུང་གསལ་ལྷང་ལྷང་བྱེད།
ཁོས་ཡུལ་འདི་ནས་མི་རིགས་ཤིག་གི་ཐོན་ལས་འཕེལ་རྒྱས་ཀྱི་གཏམ་རྒྱུད་གསར་བ་ཞིག་བྲིས་དང་འབྲི་བཞིན་ཡོད་ལ། གཏམ་རྒྱུད་དེ་ནི་མཐོ་སྒང་འབྲོག་ཁུལ་གྱི་ཁྱིམ་ཚང་རེ་རེ་དང་འབྲོག་མི་རེ་རེ་ལ་འབྲེལ་བ་དམ་པོ་ཡོད།
