ད་ཐེངས་ཀྱི་རྒྱུགས་ལེན་ཡུལ་སྡེ་དགེ་རྫོགས་ཆེན་ཤྲཱི་སེང་བཤད་གྲྭ་ནི། སྤྱི་ལོ་1826ལོར་རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེ་དང་རྙིང་མའི་མཁས་པ་ཆེན་པོ་རྒྱལ་སྲས་གཞན་ཕན་མཐའ་ཡས་ཀྱིས་ཕྱག་བཏབ་ཅིང་། ད་བར་ལོ་ངོ་ཉིས་བརྒྱ་ལ་ཉེ་བས་ཁམས་ཁུལ་གྱི་ཆེས་ཐོག་མའི་བཤད་གྲྭ་དེ་ཡིན་ལ། རྒྱ་གཞུང་བཅུ་གསུམ་ལ་ཡིག་ཆ་མཛད་པས་ནཱ་ལེནྡྲའི་ཆོས་བརྒྱུད་གཙང་མ་འཛིན་མཁན་ཉག་གཅིག་ཡིན། ལོ་རྒྱུས་སྟེང་རྒྱལ་སྲས་གཞན་ཕན་མཐའ་ཡས། རྫ་དཔལ་སྤྲུལ། མཁན་ཆེན་པདྨ་བཛྲ། འཇུ་མི་ཕམ། མི་ཉག་ཀུན་བསོད། འབམ་འདའ་དགེ་ལེགས་རྒྱ་མཚོ། འགྱ་བ་མདོ་སྔགས། ཚོགས་ཤུལ་ནོར་བུ་བསྟན་འཛིན། རྒྱ་ཀོང་གཞན་དགའ། གླག་བླ་ཆོས་འགྲུབ། དབོན་བསྟོད་མཁྱེན་རབ། ཟུར་མང་པད་རྣམ། ཀཿཐོག་མཁན་པོ་ངག་ཆུང་། གངས་དཀར་སྤྲུལ་སྐུ། བོད་སྤྲུལ་མདོ་སྔགས་བསྟན་ཉི། ཁུ་ནུ་བསྟན་འཛིན་རྒྱལ་མཚན་སོགས་རྙིང་མ་དང་ས་སྐྱ་བཀའ་བརྒྱུད་དགེ་ལུགས་ཇོ་ནང་བཅས་ཀྱི་མཁས་པ་མང་པོས་གདན་ས་འདི་ནས་འཆད་ཉན་ཐོས་བསམ་རྒྱ་ཆེར་མཛད་མྱོང་བས་བོད་ཁམས་ཁུལ་གྱི་རིག་གནས་ལྟེ་གནས་གལ་ཆེན་ཞིག་ཡིན། དུས་རབས་སྔ་མའི་ལོ་རབས་བརྒྱད་ཅུ་པར་གཟན་དཀར་རིན་པོ་ཆེ་སོགས་ཀྱི་ཐུགས་ཁུར་འོག་གནས་འདིར་སི་ཁྲོན་ཞིང་ཆེན་བོད་ཡིག་སློབ་གྲྭ་ཐོག་མར་དབུ་བཙུགས་ནས་ཤེས་ལྡན་མི་སྣ་མང་པོ་བསྐྱེད་སྲིང་བྱས། སྤྱི་ལོ་1988ལོ་ནས་མཆོག་སྤྲུལ་པདྨ་སྐལ་མཆོག་གིས་ཐུགས་བསྐྱེད་སྐུ་ངལ་ལྷུར་བཞེས་ཀྱིས་སྔར་གྱི་ཆོས་གྲྭ་སླར་གསོ་མཛད་ཅིང་རིས་མེད་མཁས་དབང་མང་པོ་གདན་དྲངས་ནས་འཆད་ཉན་ཐོས་བསམ་མཛད་པས་ལོ་ངོ་ཉི་ཤུ་ལྷག་རིང་བསྟན་འགྲོ་ལ་ཕན་ངེས་ཀྱི་མཁན་སྤྲུལ་བརྒྱ་ཕྲག་འགའ་བསྐྱེད་སྲིང་བྱུང་། ད་ལྟའི་ཆར་རྫོགས་ཆེན་རིན་པོ་ཆེ་བསྟན་འཛིན་ལུང་རྟོགས་ཉི་མ་མཆོག་གིས་སློབ་གཙོའི་འགན་བཞེས་ཏེ་སློབ་གླིང་གསར་པ་ནཱ་ལེནྡྲ་གསར་བཞེངས་རྒྱ་བསྐྱེད་དང་། སློབ་ཞུགས་ཡོན་ཚད། རྒྱུགས་སྤྲོད་ལམ་ལུགས། འཛིན་རིམ་འཕར་བགྲོད་སོགས་གནའ་དེང་ཟུང་འབྲེལ་གྱི་སློབ་གསོའི་སྒྲིག་གཞི་གཏན་འབེབས་མཛད་དེ་མཐུན་རྐྱེན་བསྐྲུན་པས། སློབ་གླིང་གོང་འོག་གཉིས་དང་། འཛིན་གྲྭ་བཅུ་གསུམ། ལས་ཐོག་མཁན་ཆེན་ཁྲི་རྒན་ཟུར་རྣམ་གསུམ་དང་། གཞུང་ཆེན་མཁན་པོ་བཅུ། འཛིན་གྲྭའི་མཁན་པོ་དྲུག །སྐྱོར་དཔོན་བཅུ་བདུན། སྡེ་སྣོད་འཛིན་པ་སློབ་ཚོགས་བརྒྱད་བརྒྱ་ལྷག་ལ་དེང་རབས་ཀྱི་ཆ་རྐྱེན་ལྡན་པའི་བཞུགས་ཤག་དང་གསོལ་ཆས། སློབ་དོན་ཁང་དང་། ཆོས་ཁྲིམས་ཁང་། གཞུང་དོན་ཁང་བཅས་ལས་ཚན་སྡེ་གསུམ། རྒྱལ་སྤྱི་ནང་བསྟན་འདྲེན་སྤེལ་ལྟེ་གནས་བཅས་ལས་གྲུབ་པའི་བོད་ཁུལ་གྱི་ནང་བསྟན་སློབ་གླིང་ཚད་ལྡན་མིག་དཔེར་འོས་པ། ཕྱི་ནང་གི་མཐུན་རྐྱེན་འཛོམས་ཤིང་ཚད་གཞི་ལྡན་ཤོས་ཤིག་ཏུ་ཆགས་ཡོད། །
