གདོང་དམར་བོད་བརྒྱུད་མདོ་ཁམས་ལྗོངས་སུ་མཆེད། །

གསོ་རིག་བསྟན་པ་སྲིད་ཀྱིས་བླ་ན་བཏེགས། །

མངའ་འོག་འབངས་ལ་ཚེ་ཡི་བཅུད་ལེན་བསྩལ། །

སྨན་པའི་ཆོས་རྒྱལ་བསྟན་པ་ཚེ་རིང་མཆོག །

ཞང་བོད་མཁས་པ་སྟོང་གི་ཞལ་རྒྱུན་བསྡུས། །

མན་ངག་ཕྱག་ལེན་ཐམས་ཅད་གཅིག་ཏུ་བསྒྲིལ། །

ཟུར་ལུགས་བསྟན་པའི་སྙིང་པོ་ལྗོངས་འདིར་སྤེལ། །

གསོ་རིག་བསྟན་པའི་སྣང་བྱེད་ཆོས་འབྱུང་རྗེ། །

འགྲོ་ཀུན་ནད་ཀྱི་ཟུག་རྔུལ་བཅོམ་པའི་གཉེན། །

མན་ངག་ཕྱག་ལེན་འབུམ་གྱི་ཡིག་ཚང་རྣམས། །

གཅིག་ལས་དུ་མ་འཕྲོ་བའི་འཕྲུལ་གྱི་སྤར། །

གསོ་རིག་གདམས་ངག་གཏེར་མཛོད་སྡེ་དགེའི་ཡུལ། །

བཞི་བརྒྱ་རྩ་བཞིའི་ནད་ཀྱི་གཉེན་པོ་ལ། །

རོ་ནུས་སྦྱོར་ཐབས་སྨན་སྦྱོར་བདུད་རྩིའི་གཏེར། །

གངས་རིའི་ལྗོངས་འདིར་བྲིན་པའི་ཕྱག་ལེན་གཞུང་། །

མན་ངག་ཨེ་ཝཾ་འབྱུང་གནས་སྡེ་དགེའི་ཡུལ། །

ཆོས་འབྱུང་ཡབ་སྲས་མཁྱེན་ཀོང་ལ་སོགས་པས། །

མཁས་མཆོག་སྟོང་ལས་བརྒྱུད་པའི་མེས་པོའི་ནོར། །

རིན་ཆེན་དངུལ་ཆུ་སྦྱོར་བའི་ཕྱག་ལེན་རྣམས། །

མི་ནུབ་རྒྱལ་མཚན་བསྒྲེངས་པ་སྡེ་དགེའི་ཡུལ། །

ལྗོངས་འདིར་མཁས་གྲུབ་སྟོང་གིས་རྟོགས་དཀའ་བའི། །

ཟབ་མོའི་རྒྱུད་ལས་བྱུང་བའི་དཀའ་གནད་རྣམས། །

བདེ་བླག་རྟོག་པའི་ངག་གིས་འགྲེལ་མཁས་པ། །

གླིང་སྨན་བཀྲ་འབུམ་གསུངས་རྣམས་སྡེ་དགེའི་བརྒྱན། །

གནམ་ས་བླ་འོག་བསྒྱུར་བའི་དུས་འགྱུར་ནང་། །

དམ་པའི་ཐུགས་བསྐྱེད་སྨོན་ལམ་མཐུ་བཙན་པས། །

མདོ་ཁམས་ཀུན་ལ་དཀོན་པའི་སྲོལ་རྒྱུན་གྱི། །

གསོ་རིག་སྨན་ཁང་སྡེ་དགེའི་སྤར་ཁང་བརྒྱན། །

བསིལ་དྲོད་སྨན་རྫས་རང་བྱུང་མཛོད་དུ་གྲུབ། །

ལྕགས་ཁམས་རྫས་བརྒྱད་ས་གཞིའི་བཅུད་དུ་འཛིན། །

རྩི་སྨན་སྣ་ཚོགས་རོང་འབྲོག་ཡུལ་ཀུན་ཁྱབ། །

བདུད་རྩི་སྨན་གྱི་གཏེར་མཛོད་སྡེ་དགེའི་ཡུལ། །

བཅོས་བསྒྱུར་སྒོ་འབྱེད་དབྱར་རྔ་མཁའ་ལ་ལྡིར། །

ཤེས་རིག་ཉམས་གསོའི་སྦྲང་ཆར་ས་གཞིར་འབེབ། །

དངུལ་ཆུ་བཙོ་བཀྲུའི་ཕྱག་ལེན་སླར་གསོའི་གཞི། །

མདོ་ཁམས་ཡུལ་ན་ཐོག་མར་སྡེ་དགེར་དར། །

ས་གཞི་རིལ་པོ་འགྲན་ཟླའི་རྩོད་རར་གྱུར། །

འགྲན་ཟླའི་ཁྲོད་ན་རང་ཡུལ་ཡར་རྒྱས་རྙེད། །

མཁས་མཛངས་དཔོན་པོའི་བློ་རིག་གློག་ལྟར་མྱུར། །

ཟུར་ལུགས་གསོ་རིག་བདག་དབང་སྡེ་དགེར་ཐོབ། །

ལུས་ཁམས་བདེ་ཐང་སྟེར་བའི་སྨན་ཁང་དང་། །

གསོ་རིག་རྒྱུན་འཛིན་བསྐྱང་བའི་སློབ་སྡེ་སོགས། །

དེང་རབས་འཕྲོད་བསྟེན་ལས་ལ་གང་དགོས་པའི། །

གསོ་རིག་བསྟན་པ་སྡེ་དགེའི་ཡུལ་ན་དར། །

ཞེས་པ་ཤར་དཔལ་སྤུངས་པའི་སྙན་ངག་སྨྲ་བ་རྒྱལ་ཁམས་པ་ཐུབ་བསྟན་ཕུན་ཚོགས་དེས་ལྷོ་ནུབ་མི་རིགས་སློབ་ཆེན་མོའི་རང་ཤག་ནས་སྤྲིངས་སོ། །