སྡེ་དགེ་ཟུར་ལུགས་སྨན་རྩིས་ཁང་སྒོ་འབྱེད་ནས་ལོ་འཁོར་དྲུག་ཅུ་ལོན་པའི་དགའ་སྟོན་མཛད་སྒོར་ཕུལ་བའི་བཀྲ་ཤིས་རྟགས་བརྒྱད་ཀྱི་སྨོན་ཚིག
ཟླ་བ། སྡེ་དགེ་རྫོང་བོད་སྨན་སློབ་གྲྭ ། རྩོམ་སྒྲིག་པ།ཡོང་ཁུངས། སྤེལ་དུས། 07-25
ཁམས་པའི་རིག་གནས་ཀྱི་འབྱུང་ཁུངས་སྡེ་དགེ་ལ་བསྔགས་པ།
སྡེ་བཞི་དགེ་བཅུ་འཛོམས་པའི་རིག་པའི་གནས་མཆོག་ཁམས་པ་སྡེ་དགེ་ནི། །
མཛེས་སྡུག་སུན་རྩེན་ལྷག་པའི་མཁས་དབང་རིམ་བྱོན་འཁྲུངས་སའི་བྱིན་རླབས་གནས། །
ཉི་ཟླ་དགོས་འདོད་ཀུན་འབྱུང་མཚུངས་པའི་སྣ་འཛོམས་ཆོས་ཀྱི་གྲོང་ཁྱེར་འདིར། །
སྦྲང་རྩིར་རྐང་དྲུག་རང་འཁོར་བཞིན་དུ་མཁས་དབང་དུ་མ་སྡེ་དགེར་འཛོམས། །
ཆོས་རྒྱལ་བསྟན་པ་ཚེ་རིང་མཆོག་ལ་ན་མོ།
ཆོས་སྲིད་རིག་པའི་གཏེར་མཛོད་མངའ་བའི་ཆོས་རྒྱལ་བསྟན་པ་ཚེ་རིང་ནི། །
ཐུགས་དགོངས་ལྷ་ལམ་མཛད་འཕྲིན་ཉི་ཟླའི་སྟོབས་དང་མཉམ་པའི་སྐྱེས་བུ་མཆོག །
གངས་ཅན་ཡུལ་དུ་ཕྱོགས་རིས་གཉིས་མེད་ཆོས་ཀྱིས་གྲུབ་མཐའ་འཛིན་སྐྱོང་སྤེལ། །
སྔར་རབས་མེས་པོ་དམ་པའི་མཛད་རྗེས་རིག་པའི་འབྱུང་ཁུངས་ཁྱེད་ཀྱི་དྲིན། །
བོད་ལུགས་གསོ་རིག་ལ་བསྔགས་པ།
བསིལ་ལྡན་ཁ་བའི་གསོ་དཔྱད་འོད་སྟོང་འབར་བའི་དཔལ་ལྡན་རྒྱུད་བཞི་འདིར། །
འཛམ་གླིང་ཡུལ་གྲུ་ཀུན་ཏུ་སྙན་པ་གྲགས་པའི་ཡན་ལག་བརྒྱད་པ་ཡིན། །
སྔོན་བྱོན་མཁས་དབང་དམ་པའི་སྐུ་གསུང་ཐུགས་ཡོན་སྤྲུལ་བའི་གསོ་རིག་འདིར། །
དུས་གསུམ་རྟོགས་པའི་ཀུན་མཁྱེན་སངས་རྒྱས་སྨན་བླའི་བྱང་ཆུབ་སེམས་པ་མཁྱེན། །
སྡེ་དགེ་རིག་པའི་བང་མཛོད་བཀྲ་ཤིས་སྒོ་མང་ལ་བསྔགས་པ།
འཛམ་གླིང་འགྲན་མེད་པར་ཁང་བཞི་ཡི་ཡ་གྱལ་བཀྲ་ཤིས་སྒོ་མང་འདིར། །
གཙུག་ལག་རིག་གནས་གླེགས་བམ་ཁྲི་ཕྲག་སུམ་ཅུས་གཏམས་པའི་ཆོས་ཀྱི་མཛོད། །
ཁམས་པའི་བཅུ་ཕྲག་རིག་པའི་ཕ་ཁྱིམ་སྡེ་དགེའི་ཡིད་བཞིན་ནོར་བུ་ཆེ། །
བཀོད་པ་བརྗིད་ཅིང་བྱིན་རླབས་འཁྱིལ་བ་པར་ཁང་ཆོས་མཛོད་ཆེན་མོ་ལགས། །
སྡེ་དགེ་བོད་ལུགས་ཟུར་ལུགས་སློབ་གླིང་ལ་བསྔགས་པ།
རིན་ཆེན་སྣ་བདུན་འོད་ཟེར་འཕྲོས་པའི་སྡེ་དགེའི་གསོ་རིག་སློབ་གླིང་འདིར། །
བྱམས་བརྩེ་ལྷག་བསམ་ལྡན་པའི་གཞན་རྗེས་འཛིན་པའི་དྲང་སྲོང་དམ་པ་བཞུགས། །
གཞུང་དྲང་བློ་རིག་བཀྲ་བའི་ཟུར་ལུགས་གསོ་རིག་བརྒྱུད་འཛིན་དམ་པ་ཡིས། །
མ་འོངས་སྡེ་དགེ་བོད་སྨན་འོད་སྟོང་འབར་བའི་ལམ་ལ་འཁྲིད་གྱུར་ཅིག །
ཡོངས་འཛིན་ལ་བསྔགས་པ།
བཀའ་དྲིན་བགྲང་ཡས་སྤེལ་བའི་འཚོ་བྱེད་དམ་པས་བཅུ་ཕྲག་རིག་གནས་འཆད། །
གཞན་ཕན་ལྷག་བསམ་བཅངས་ཏེ་ཉམ་ཐག་ནད་པའི་མནར་གཅོད་གདུང་བ་བསལ། །
འུ་ཅག་རྨོངས་མུན་དབྱིངས་སུ་སེལ་བའི་ཤེས་རབ་རལ་གྲིའི་རྗེས་འགྲོ་བའི། །
ས་ལའི་སྨན་ལྗོངས་ཕྱུག་མོའི་རེ་བ་བཅངས་སའི་ལྷ་རྗེ་ཁྱེད་རྣམས་མཁྱེན། །
སློབ་གྲོགས་ལ་བསྔགས་པ།
རྩེ་དགའི་གཉེན་གྱུར་དུངས་བ་ཟབ་པའི་ཟུར་ལུགས་སློབ་གླིང་གནས་པ་དག །
རྟག་ཏུ་གསོང་པོར་སྨྲ་ཞིང་རང་གཤིས་མདའ་བཞིན་དྲང་བའི་སློབ་གྲོགས་ལགས། །
དཔའ་ངར་ཞུམ་མེད་ནད་ཐོག་གསོ་རིག་ཚུལ་བཞིན་བརྩོན་འགྲུས་ཆུ་བོ་ལྟར། །
ཤེས་བྱའི་རྒྱ་མཚོ་ཕྱུག་པའི་འཇིག་རྟེན་ཁམས་སུ་མདུན་ནས་བསྐྱོད་པ་ལ། །
བརྩོན་གུས་འཇོན་གསུམ་ལྡན་པའི་སྡེ་དགེ་གསོ་རིག་སློབ་གླིང་མཛེས་པའི་རྒྱན། །
ལོ་འཁོར་དྲུག་ཅུར་རྟེན་འབྲེལ་ཞུ།
སྡེ་དགེ་བོད་སྨན་ལོ་འཁོར་དྲུག་ཅུ་ཚེས་པའི་བཀྲ་ཤིས་དུས་བཟང་འདིར། །
འཚོ་བྱེད་བུ་ཆུང་སྒོ་གསུམ་གུས་པའི་བཀྲ་ཤིས་གཏམ་སྙན་ཁྱེད་ཚོར་འབུལ། །
གཞན་ཕན་ལྷག་བསམ་ལྡན་པའི་ཟུར་ལུགས་རྒྱུད་འཛིན་སྐྱེས་མཆོག་དམ་པ་ཚོར། །
དྲུག་ཅུ་དགའ་སྟོན་མཛད་པའི་བཀྲ་ཤིས་རྟགས་བརྒྱད་དམ་པས་མཆོད་པ་འབུལ། །
སྡེ་དགེ་རྫོང་བོད་ལུགས་གསོ་རིག་ཤེས་ལྡན་མི་སྣ་གསོ་སྐྱོང་ཟབ་སྦྱོང་སློབ་གྲྭ། དཀར་མཛེས་འཕྲོད་བསྟེན་སློབ་གྲྭ་སྡེ་དགེ་དངོས་སྦྱོང་གནས་གཞི་ལྟེ་གནས་ཀྱི་2016ལོའི་བོད་སྨན་འཛིན་གྲྭའི་སློབ་མ།
