སྡེ་དགེ་རྫོང་སྨན་རྩིས་ཁང་སྨན་སྦྱོར་ཚན་ཁག་ནི་སྤྱི་ལོ་1959ལོར་རྫོང་སྲིད་གཞུང་ནས་སྡེ་དགེ་པར་ཁང་དུ་མཉམ་འབྲེལ་སྨན་ཁང་བཙུགས་ཤིང་། སྤྱི་ལོ་1978ལོར་སི་ཁྲོན་ཞིང་ཆེན་གྱིས་སྡེ་དགེ་སྨན་རྩིས་ཁང་ཞེས་མཚན་གསོལ་ནས་སྡེ་དགེ་པར་ཁང་ལས་ལོགས་སུ་སྤོས་ཏེ། གསར་དུ་གསོ་རིག་སློབ་གླིང་དང་སྒོ་བསྟེན་སྨན་ཁང་། སྨན་སྦྱོར་ཚན་ཁག་བཅས་དངོས་སུ་བཙུགས་ནས་ལོ་དྲུག་ཅུ་ལྷག་ཙམ་འབད་བརྩོན་བྱས་པར་བརྒྱུད་སྨན་ཁང་གི་སྨན་སྣ་རྒྱུན་ཆད་མེད་པར་མང་དུ་ཕྱིན་ཡོད།

སྨན་སྦྱོར་ཚན་ཁག་ནི་སྤྱི་ལོ་2003ལོ་དང་སྤྱི་ལོ་2007ལོ། སྤྱི་ལོ་2014ལོ་བཅས་རྒྱལ་ཁབ་ཀྱིས་སྔ་རྗེས་སུ་མ་དངུལ་སྒོར་ཁྲི་བདུན་བརྒྱ་ལྷག་ཙམ་བཏང་ནས་སྤྱིའི་རྒྱ་ཁྱོན་ལ་སྨི་གྲུ་བཞི་མ་3590ལྷག་འཛུགས་སྐྲུན་བྱས་ཡོད་ལ། སྨན་རྫས་མཛོད་ཁང་དང་ཐོན་སྐྱེད་མཛོད་ཁང། གཞུང་ལས་ཁང་། ཞིབ་བཤེར་ཁང་དང་སྨན་རྫས་བཤམས་སྟོན་ཁང་། འདུལ་སྦྱོང་ཁང་སོགས་སྡེ་ཚན་དུ་མ་ཕྱེས་ཏེ་རྒྱལ་སྤྱིའི་སྨན་སྦྱོར་ཁང་GPPགི་ཚད་གཞི་ལྟར་བསྐྲུན།

སྨན་རྒྱུན་གཙོ་བོ་ནི་གཡུ་ཐོག་པ་ཡབ་སྲས་རྣམས་ཀྱི་རྒྱུད་བཞི། ཟུར་མཁར་མཉམ་ཉིད་རྡོ་རྗེ་མཆོག་གིས་མཛད་པའི་《བྱེ་བ་རིང་བསྲེལ།》 དེའུ་དམར་དགེ་བཤེས་བསྟན་འཛིན་ཕུན་ཚོགས་ཀྱིས་མཛད་པའི་《ཤེལ་གོང་ཤེལ་ཕྲེང་།》དང་《སྨན་གྱི་ལག་ལེན་གཅེས་བསྡུས་ཀུན་གསལ་སྣང་མཛོད།》 《 ཉེར་ལྔ་བརྒྱ་རྩའི་སྦྱོར་བ།》

ཀརྨ་ངེས་ལེགས་བསྟན་འཛིན་གྱིས་མཛད་པའི་《སྨན་བསྡུས་ཨེ་ཝཾ།》 ཀརྨ་ངེས་དོན་བསྟན་འཛིན་འཕྲིན་ལས་རབ་རྒྱས་ཀྱིས་མཛད་པའི་《 འཆི་མེད་ནོར་ཕྲེང་མ་བུ། 》 ཀོང་སྤྲུལ་ཡོན་ཏན་རྒྱ་མཚོས་མཛད་པའི་《ཟིན་ཏིག》 འཇུ་མི་ཕམ་རིན་པོས་མཛད་པའི་《སྨན་སྦྱོར་བདུད་བརྩིའི་ཐིག་ལེ།》 ལྔ་རིག་སྨྲ་བའི་དབང་པོ་མཁན་ཁྲོ་རུ་ཚེ་རྣམ་གྱིས་ངེད་སྨན་ཁང་ལ་གནང་བའི་《སྨན་གྱི་སྦྱོར་ཚད་མ་ནོར་ལམ་བཟང་བློ་གསལ་མཛེས་རྒྱན།》སོགས་ལ་གཞི་བཅོལ་བྱས་པ་མ་ཟད། སྤྱི་ལོ་1980ལོར་ཁྲོ་རུ་མཁན་ཆེན་ཚེ་རྣམ་རིན་པོ་ཆེ་གདན་ཞུ་བྱས་ནས། སྡེ་དགེ་ཁྲོ་མཎྜལ་ཕུན་ཚོགས་བཀྲ་ཤིས་ཆོས་གླིང་དུ་རིན་ཆེན་དངུལ་ཆུ་བཙོ་བཀྲུ་ཆེན་མོ་དང་རིན་ཆེན་ཁག་བསྡུ་སྒྲུབ་བྱས་པ་དང་གསོ་རིག་རྒྱུད་བཞིའི་ཁྲིད་དང་ལུང་མན་ངག་ལག་ལེན་རིམ་པའི་ཕྱག་བརྒྱུན་བཅས་མཐོང་བརྒྱུད་ཀྱི་མན་ངག་ཆ་ཚང་ཀཿཐོག་རྒྱུད་སྡེ་བ་ཚེ་རིང་དབང་རྒྱལ་གྱིས་སློབ་སྟོན་བྱས་པའི་ཟིན་བྲིས་ལྟར་དངུལ་ཆུ་བཙོ་བཀྲུ་ཆེན་མོ་དང་། ལྕགས་ཁམས་ཐལ་བཟོ་། རིན་ཆེན་རིལ་བུའི་སྦྱོར་བ་ཡི་ལག་ལེན་ནག་འགྲོས་སུ་བཀོད་པ་ཟླ་བའི་འོད་ཟེར་ཞེས་བྱ་བ། སྐབས་དེའི་དུས་ཀྱི་ཕྱག་རྒྱུན་ཟིན་བྲིས་ལྟར་སྡེ་དགེ་བོད་སྨན་ཁང་གིས་དཔེ་དེབ་ཞིག་ཀྱང་བརྩམས། དེ་ནས་རིམ་པར་སྤྱི་ལོ1996ལོ་དང་། སྤྱི་ལོ་2003ལོར། སྤྱི་ལོ་2011ལོར་བཅས་སྨན་ཁང་རང་གནས་སུ་དངུལ་བཙོ་ཆེན་མོ་ཐེངས་བཞི་མཛད་དེ་གདམས་པ་ཟབ་མོ་དེའི་ཕྱག་རྒྱུན་མི་ཉམས་གོང་འཕེལ་དུ་བཏང་ཡོད། ཡང་སྤྱི་ལོ་1985ལོར་མཁན་ཆེན་ཚེ་རྣམ་རིན་པོ་ཆེ་གདན་ཞུ་བྱས་ཏེ་སྡེ་དགེ་པར་ཁང་དང་བོད་སྨན་རྩིས་ཁང་གིས་མཛེས་ཕུ་ལྷ་ཁང་དུ་རིན་ཆེན་གྲང་སྦྱོར་རིལ་ནག་ཆེན་མོ་དང་རཏྣ་བསམ་འཕེལ། རིན་ཆེན་མང་སྦྱོར་སོགས་ལག་ལེན་མན་ངག་བསླབས། དེ་ནས་དངོས་སློབ་བཟོད་པ་དང་ཀརྨ་སོགས་ཀྱིས་གཙོ་བོ་བྱས་ནས་རིན་ཆེན་སྨན་སྦྱོར་དང་རྒྱུན་སྤྱོད་ཀྱི་སྨན་སྦྱོར་གྲངས་མང་བཅས་བསྡུ་སྦྱོར་ལག་ལེན་ཕྱག་རྒྱུན་མ་ཆད་པ་གནས་ཡོད་པས། སྤྱི་ལོ་2006ལོར་ཞིང་ཆེན་སྨན་རྫས་དོ་དམ་ཅུས་ཀྱིས་སྨན་ཁང་རང་གིས་སྤྱོད་ཆོག་པའི་སྨན་སྣ་བརྒྱ་དང་སུམ་བཅུ་སོ་ལྔའི་ཆོག་མཆན་ཨང་གྲངས་ཐོབ་ཡོད། སྨན་སྦྱོར་ཚན་ཁག་དུ་ད་ལྟ་ལས་བཟོ་མི་སྣ་ཉི་ཤུ་ལྷག་ཡོད་དེ། རྒན་རབས་མི་སྣ་གསུམ་དང་། སྨན་རྫས་ཆེད་ལས་མི་སྣ་དྲུག །སྨན་རྫས་ཞིབ་བཤེར་མི་སྣ་གཉིས། ལག་རྩལ་སྨན་སྦྱོར་བ་དགུ་བཅས་ཡོད།

རིན་ཆེན་མུ་ཏིག་བདུན་ཅུ་ཕྱི་ཐུམ་རྒྱག་བཞིན་པ། 
正在包装七十珍珠
མདོར་ན་སྨན་སྦྱོར་ཚན་ཁག་ནི་ཟུར་ལུགས་གསོ་རིག་གི་སྨན་བརྒྱུད་མ་ཉམས་པ་ཏེ། ཟུར་མཁར་བ་མཉམ་ཉིད་རྡོ་རྗེ་ནས་དེའུ་དམར་དགེ་བཤེས་བསྟན་འཛིན་ཕུན་ཚོགས་དང་དེའི་དངོས་སློབ་སི་ཏུ་ཆོས་ཀྱི་འབྱུང་གནས། དེའི་དངོས་སློབ་གླིང་སྨན་བཀྲ་ཤིས་འབུམ་དང་དྲུང་འཚོ་གུ་རུ་འཕེལ་སོགས་ནས་རིན་བཞིན་མན་ངག་ཕྱག་བརྒྱུན་དང་བཅས་དར་སྤེལ་བྱུང་བར་བརྟེན་ཁོང་རྣམས་ཀྱིས་མཛད་པའི་འདུལ་སྦྱོང་ལག་ལེན་དང་སྨན་རྫས་ངོས་འཛིན་སོགས་ལ་བརྟེན་ནས་ཟུར་ལུགས་ཀྱི་ཕྱག་རྒྱུན་ཟམ་མ་ཆད་པར་མི་རབས་དུ་མ་རྒྱུད་ནས་འཕེལ་རྒྱས་སོང་དང་འགྲོ་མུས་སུ་མཆིས། །