མཚོ་བོད་མཐོ་སྒང་གི་ཤར་མཚམས་སུ་ཆགས་པའི་ཀན་ལྷོ་རྩྭ་ཐང་ཆེན་མོ་ནི་ང་འཚོ་ཞིང་གནས་པའི་ཕ་ཡུལ་དེ་ཡིན། གནས་འདིའི་རི་ཆུ་མཛེས་ཤིང་། དམངས་སྲོལ་བག་ཆགས་པ། མི་རིགས་སྒྱུ་རྩལ་གྱི་ནང་དོན་གཏིང་ཟབ་པས། དམངས་ཁྲོད་སྒྱུ་རྩལ་པ་མང་པོ་ཞིག་བྱུང་མྱོང་བ་རེད། ང་རང་ཆུང་དུས་ནས་གླུ་གར་ལ་དགའ་ཞིང་དམངས་ཁྲོད་སྒྱུ་རྩལ་པ་རྒན་རབས་པ་དང་འགྲོགས་ནས་སློབ་སྦྱོང་བྱས་ཏེ། ཀན་སུའུ་དང་། མཚོ་སྔོན་བོད་ཁུལ་ནས་མི་ཚེ་ཕྱེད་ཀ་ལྷག་གི་རིང་འཁྲབ་སྟོན་བྱས། དེ་ཡང་ལས་སྐལ་བཟང་པོའི་པེ་ཅིན་དུ་ཐེངས་གཉིས་ལ་འཁྲབ་སྟོན་བྱས་ཤིང་། མའོ་ཙེ་ཏུང་དང་། ལིའུ་ཧྲའོ་ཆི། ཀྲུའུ་ཨིན་ལེ། ཀྲུའུ་ཏའེ་སོགས་ཀྲུང་དབྱང་དབུ་ཁྲིད་ཀྱིས་མཇལ་འཕྲད་གནང་མྱོང་། ང་ད་ལྟ་ལོ་ངོ་70སོན་རུང་། སྔར་བཞིན་འཁྲབ་སྟོན་གྱི་སྤྲོ་བ་མ་ཡལ་ཞིང་སློབ་བུ་ཚོར་སློབ་ཁྲིད་ཅི་ཐུབ་བྱེད་བཞིན་ཡོད། རྩྭ་ཐང་གི་གླུ་གར་སྒྱུ་རྩལ་ངའི་ཚེ་འདིའི་འཚོ་བར་བརྒྱུས་ཤིང་གླུ་གར་སྒྱུ་རྩལ་འདི་ངའི་ཤ་གསེང་རུས་གསེང་ལ་ཐིམ་ཡོད་ཅེས་བརྗོད་ཆོག་ཆོག་ཡིན།

1949ལོར་གླུ་གར་སྒྱུ་རྩལ་པ་འཇིགས་བྱེད་འཚོ་ལགས་ཀན་ལྷོ་ཁུལ་བསང་ཆུ་རྫོང་གི་བོད་ཁྱིམ་དཀྱུས་མ་ཞིག་ཏུ་སྐྱེས་ཤིང་། ཆུང་དུས་ནས་དམངས་ཁྲོད་རིག་གནས་སྒྱུ་རྩལ་གྱི་བྲོ་བ་མཐུག་པའི་ཁྱིམ་ཚང་དང་ཕ་ཡུལ་གྱི་ཁོང་མོར་བག་ཆགས་ཟབ་མོ་ཞིག་བཞག་སྟེ། སློབ་གྲྭར་འགྲིམ་པ་དང་བསྟུན་ནས་མིང་གྲགས་ཅན་གྱི་འཁྲབ་སྟོན་པ་ཆུང་ཆུང་ཞིག་ཏུ་གྱུར། རྗེས་ནས་ཞིང་ཆེན་སྒྱུ་རྩལ་སློབ་གྲྭར་འདེམ་མངགས་བྱས་ཏེ་ལོ་གཅིག་རིང་སློབ་སྦྱོང་བྱས་པ་དང་། དེ་རྗེས་མུ་མཐུད་དུ་ནུབ་བྱང་མི་རིགས་སློབ་གྲྭ་ཆེན་མོར་སློབ་སྦྱོང་བྱས། 1960ལོར་མུ་གེ་ཆེན་པོའི་དུས་སྐབས་དང་འཕྲད་དེ་ཕ་མའི་འདུན་པ་ལྟར་སློབ་གྲྭའི་སློབ་སྦྱོང་འཚོ་བ་དང་ཁ་བྲལ་ཏེ་བསང་ཆུ་རྫོང་ལ་ཕྱིར་ལོག་པ་དང་། བསང་ཆུ་རྫོང་གི་ལས་ཞོར་དྲིལ་བསྒྲགས་རུ་ཁག་ཏུ་ཞུགས་ནས་ག་ས་གང་ནས་འབྲོག་པ་མང་ཚོགས་ལ་འཁྲབ་སྟོན་བྱས། 1964ལོར། 《བུད་མེད་ཡུལ་དམག་གསུམ།》ཞེས་པའི་ལེ་ཚན་གྱི་གཙོ་འཁྲབ་པའི་འགན་ཁུར་བ་དང་། ལེ་ཚན་དེས་ཀན་སུའུ་ཞིང་ཆེན་གྱི་འཐུས་ཚབ་བྱས་ཏེ་རྒྱལ་ཡོངས་གྲངས་ཉུང་མི་རིགས་ཀྱི་རིག་རྩལ་འཁྲབ་སྟོན་དུ་ཞུགས་ཤིང་། པེ་ཅིན་དུ་ཕྱིན་པའི་ཀན་སུའུ་ཡི་ལེ་ཚན་བཅུའི་ཁྲོད་ནས་བྱ་དགའ་ཐོབ་ས་གཅིག་པུར་གྱུར་ཏེ། རིག་རྩལ་འཁྲབ་སྟོན་གྱི་ཆེས་མཐོའི་བྱ་དགའ་སྟེ་བྱ་དགའ་ཨང་དང་པོ་བླངས། དེར་མཐུད་《བུད་མེད་ཡུལ་དམག་གསུམ།》གདན་ཞུས་ལྟར་ཁྲང་ཁྲུན་གློག་བརྙན་བཟོ་གྲྭ་ནས་དངོས་བྲིས་གློག་བརྙན་དུ་ཕབ་ཅིང་ཟླ་གཉིས་ཀྱི་རྗེས་ནས་རྒྱལ་ཡོངས་སུ་བཤམས་གཏོང་བྱས།

དེ་ཡང་1966ལོར་རིག་གནས་གསར་བརྗེའི་དུས་སྐབས་དང་འཕྲད་ཅིང་འཁྲབ་སྟོན་ལས་ཀ་མཚམས་མི་འཇོག་ཀ་མེད་དུ་གྱུར། 1978ལོར་མུ་མཐུད་ནས་རིག་རྩལ་འཁྲབ་སྟོན་གྱི་བྱ་གཞག་ཁྲོད་བློ་སེམས་འཁོར་ཏེ། 《མཛེས་པའི་བླ་བྲང་།》དང་《སྦྲང་མ།》《ལྷ་བྱ་ངང་པ།》ཞེས་པ་སོགས་ཀྱི་ཕུལ་བྱུང་རྡུང་ལེན་བརྩམས་ཆོས་ཁག་གཅིག་གསར་རྩོམ་བྱས། 1980ལོར་རང་ཉིད་ཀྱི་མཉམ་ལེན་བརྩམས་ཆོས་《ཨ་ཞང་ལོ་ལོ།》ཞེས་པ་སྟེ་གཉེན་སྒྲིག་རང་མོས་ཀྱི་བརྗོད་དོན་བྱས་པའི་གླུ་གཞས་བརྩམས་ཆོས་ཀྱིས་ཀན་སུའུ་ཡི་ཚབ་བྱས་ཏེ་པེ་ཅིན་དུ་རྒྱལ་ཡོངས་གྲངས་ཉུང་མི་རིགས་ཀྱི་རིག་རྩལ་འཁྲབ་སྟོན་དུ་ཞུགས་ཅིང་བྱ་དགའ་ཨང་གཉིས་པ་བླངས། དེ་བཞིན་ལོ་དང་ཟླ་བའི་རིང་གི་ཧུར་བརྩོན་དང་རྒྱུན་འཁྱོངས་བྱེད་བཞིན། 1981ལོར་ཁོང་ཉིད་དམངས་ཁྲོད་སྒྱུ་རྩལ་པའི་ཐོབ་ཐང་ནས་ཀན་ལྷོ་ཁུལ་བོད་ཀྱི་ཟློས་གར་ཚོགས་པའི་འཁྲབ་སྟོན་པ་ཞིག་གི་མཚན་ཉིད་དངོས་སུ་ཐོབ་ཅིང་། ཞོར་དུ་གླུ་བྲོའི་དགེ་རྒན་དང་འཁྲབ་ཁྲིད་པའི་འགན་བཞེས། རྗེས་ནས་བསང་ཆུ་རྫོང་རིག་གནས་ཁང་གི་མང་ཚོགས་རིག་གནས་ལས་འཛིན་པའི་ལས་འགན་མི་ལོ་18རིང་ཁུར་ཏེ་ལས་འཁྱུར་ངལ་གསོ་བྱས།

ལས་འཁྱུར་ངལ་གསོ་བྱས་རྗེས། ཁོང་ཉིད་ཀྱིས་སྔར་བཞིན་མང་ཚོགས་རིག་རྩལ་བྱ་གཞག་ལ་ཐུགས་ཁུར་བྱས་ཤིང་། བྱེད་སྒོ་ཆེ་གྲས་ཀྱི་ཆེད་དུ་ལེ་ཚན་རྩོམ་སྒྲིག་དང་ཁུལ་དང་ཞིང་ཆེན་སོགས་སུ་འཁྲབ་སྟོན་གང་མང་བྱས། ཁོང་གིས་བཤད་རྒྱུར། ང་རང་ཉིད་སྒྱུ་རྩལ་བྱ་གཞག་འདི་དང་བྲལ་ཐབས་མེད་ཅིང་། ང་ལ་ལས་འཁྱུར་ངལ་གསོ་ཞེས་པའི་སྣང་བའང་མེད། བོད་ཀྱི་དམངས་ཁྲོད་སྒྱུ་རྩལ་དར་སྤེལ་དང་མི་སྣ་གསོ་སྐྱོང་བྱ་རྒྱུ་ནི་ངའི་དུས་གཏན་གྱི་ལས་ཀ་ཉག་གཅིག་ཡིན་ཞེས་སྒྱུ་རྩལ་གྱི་དུང་ཞེན་དང་མི་རིགས་ལ་བཅངས་པའི་བརྩེ་བ། སྤྱི་ཚོགས་ལ་བཅངས་པའི་འགན་འཁྲི་བཅས་ཀྱི་ལོ་ན་བདུན་ཅུ་སོན་པའི་སྒྱུ་རྩལ་པ་ཁོང་གི་འབད་བྱར་གྱུར་འདུག །