ཚན་རྩལ་ཁྱབ་སྤེལ་བཏང་ནས། དབུལ་བྲལ་གནད་སྒྲོལ་ལ་རམ་འདེགས་བྱེད།
བསོད་ནམས་སྐྱིད། རྩོམ་སྒྲིག་པ།ཡོང་ཁུངས།ངེད་དྲ་བ། སྤེལ་དུས། 10-21
ཉེ་ཆར། ཏེ་དབྱང་ཚན་རྩལ་མཐུན་ཚོགས་ཀྱི་ཀྲུའུ་ཞི་གཞོན་པ་ཏེང་རེན་ཁོན་དང་། ཚན་རྩལ་ཁྱབ་སྤེལ་ཁང་། ཚན་རྩལ་ཁང་གི་འབྲེལ་ཡོད་མི་སྣ། གཞོན་ནུ་ལོ་ཆུང་གི་ཚན་རྩལ་གསར་གཏོད་དང་སྔོ་ཚལ་འདེབས་འཛུགས་ལག་རྩལ་ཁྱབ་ཁོངས་ཀྱི་ཆེད་མཁས་པ་སོགས་མཛོད་དགེ་རུ་ཡོང་ནས་ཐོན་ལས་འདེགས་སྐྱོར་དང་རིག་སྟོབས་རོགས་སྐྱོར། ཀྲི་པུའུ་མཉམ་སྐྲུན་གྱི་བྱེད་སྒོ་སྤེལ་བ་རེད།
ཏེ་དབྱང་གྲོང་ཁྱེར་ཚན་རྩལ་མཐུན་ཚོགས་ཀྱི་འབྲེལ་ཡོད་མི་སྣ་མཛོད་དགེ་རྫོང་སློབ་འབྲིང་དུ་ཡོང་ནས་སློབ་གྲྭ་ཡོངས་ཀྱི་དགེ་སློབ་1200ལྷག་ལ་གཞོན་ནུ་ལོ་ཆུང་གི་ཚན་རྩལ་ཟུར་ཁྲིད་དང་ཉམས་ལེན་བྱེད་སྒོ་སྤེལ་ཞིང་། ཡུལ་དངོས་སུ་རིག་ནུས་འཕྲུལ་མི་དང་མི་མེད་གནམ་གྲུ། VRསོགས་ཚན་རིག་ཁྱབ་གདལ་གྱི་འཆད་ཁྲིད་བྱས་ལ། དེ་མིན་མཉམ་འགུལ་རྣམ་པའི་ཚན་རིག་ཁྱབ་གདལ་གྱི་འཆད་ཁྲིད་བྱས་ལ། སློབ་གྲོགས་ཚོའི་སྒྲ་དང་འོད། གློག་སོགས་ཐད་ཀྱི་ཚན་རྩལ་དོགས་སློང་ལ་འགྲེལ་བཤད་བརྒྱབ་པ་མ་ཟད། སློབ་གྲྭར་རིག་ནུས་འཕྲུལ་མི་དང་དེ་བཞིན་ཚན་རྩལ་བཟོ་སྐྲུན་གྱི་ལྷུ་ལག་ཆ་ཚང་སྤྲད་པ་རེད། ཏེ་དབྱང་གཞོན་ནུ་ལོ་ཆུང་གི་གསར་གཏོད་འཕེལ་རྒྱས་ཆེད་མཁས་པས་སློབ་གྲྭའི་ཚན་རྩལ་ཟུར་ཁྲིད་དགེ་རྒན་དང་གཞོན་ནུ་ལོ་ཆུང་གི་ཚན་རྩལ་གསར་གཏོད་ཀྱི་བློ་སྒོ་འབྱེད་པའི་སློབ་གསོ་སྤེལ་རེས་བྱས།
མཛོད་དགེ་རྫོང་སློབ་འབྲིང་གི་དམའ་འབྲིང་དང་པོའི་སློབ་མ་གཡང་ཆེན་མཚོས་བཤད་རྒྱུར། འཕྲུལ་མིའི་འཁྲབ་སྟོན་ལ་བལྟས་རྗེས་ང་ལ་མྱོང་ཚོར་ཟབ་མོ་སྐྱེས་ནས་འཕྲུལ་མིར་དགའ་བྱུང་ལ། ངས་ད་ལྟའི་ཚན་རྩལ་དར་རྒྱས་ཆེན་པོ་བྱུང་ཡོད་པ་གཞི་ནས་རྟོགས་ཤིང་། སླད་ཕྱིན་སློབ་སྦྱོང་ཧུར་བརྩོན་བྱས་ནས་ནར་སོན་རྗེས་རྒྱལ་ཁབ་ལ་ཕན་པ་ལྡན་པའི་མི་ཞིག་བྱེད་རྒྱུ་ཡིན།
ཏེ་དབྱང་ཚན་རྩལ་མཐུན་ཚོགས་ཀྱི་འབྲེལ་ཡོད་མི་སྣ་ཆོས་རྗེ་ཡུལ་ཚོ་བྱང་རྩེ་སྨད་པ་སྡེ་བར་ཕྱིན་ཏེ་ས་མཐོའི་སྔོ་ཚལ་ཐོན་ལས་འདེབས་འཛུགས་ལག་རྩལ་གྱི་མཛུབ་ཁྲིད་བྱས་ལ། ས་གནས་ཀྱི་སྔོ་ཚལ་འདེབས་འཛུགས་དུད་ཆེན་དང་འབྲེལ་འདྲིས་ཟབ་མོ་བྱས་ནས། སྔོ་ཚལ་འདེབས་འཛུགས་རྟེན་གཞི་དང་ཚོད་ལྟའི་ཞིང་ཁ་དང་དེ་བཞིན་མྱུ་གུ་གསོ་བའི་དྲོད་ཁང་ཆེ་མོར་རྟོག་ཞིབ་བྱས། སྡེ་བ་འདིའི་སྔོ་ཚལ་གྱི་སྣ་ཁ་འདེམས་པ་དང་། ས་ཁམས་ཀྱི་ཆ་རྐྱེན། ཕྱིར་ཚོང་ཁྲོམ་ར་སོགས་ཀྱི་ཐད་དབྱེ་ཞིབ་བྱས་པ་མ་ཟད། གྲོས་འགོ་དང་བསམ་འཆར་ཡང་བཏོན་ཏེ། བྱང་རྩེ་སྨད་པ་སྡེ་བའི་འདེབས་འཛུགས་གྲུབ་ཆ་ལེགས་སྒྲིག་དང་ཐོན་རྫས་ཀྱི་རིན་ཐང་མཐོར་འདེགས་གཏོང་བར་ཇུས་འགོད་བྱས།
ཆ་སྒྲིག་བྱེད་རིང་། ཕྱོགས་གཉིས་པོའི་ཚན་རྩལ་མཐུན་ཚོགས་ཀྱིས་ཀྲི་པུའུ་མཉམ་སྐྲུན་བྱེད་སྒོ་སྤེལ་བ་དང་ཏེ་དབྱང་ཚན་རྩལ་མཐུན་ཚོགས་ཀྱིས་མཛོད་དགེ་རྫོང་ཚན་རྩལ་མཐུན་ཚོགས་ལ་སྒོར་ཁྲི་གཅིག་རིན་གྱི་ཚན་རིག་ཁྱབ་གདལ་ཀློག་དེབ་ཞལ་འདེབས་བཏང་བ་རེད།
ཏེ་དབྱང་ཚན་རྩལ་མཐུན་ཚོགས་ཀྱི་ཀྲུའུ་ཞི་གཞོན་པ་ཏེང་རེན་ཁོན་གྱིས། ཏེ་དབྱིང་གྲོང་ཁྱེར་གྱི་ཁོངས་ཡོངས་ཀྱིས་བོད་ཁུལ་གྱི་རྫོང་དབུལ་པོར་ཆ་སྒྲིག་རོགས་སྐྱོར་བྱེད་པའི་ལས་དོན་གྱི་བླང་བྱར་གཞིགས་ནས། ཏེ་དབྱང་ཚན་རྩལ་མཐུན་ཚོགས་ཀྱིས་ས་ཚིགས་ལ་རོགས་སྐྱོར་བྱེད་པའི་བྱ་ཐབས་གཞིར་བཟུང་ཐོན་ལས་འཕེལ་རྒྱས་དང་རིག་སྟོབས་རོགས་སྐྱོར་སོགས་ཀྱི་གཙོ་གནད་ལས་འགན་དམ་འཛིན་བྱ་གཞིར་བྱས་ནས་ཆ་སྒྲིག་རོགས་སྐྱོར་ལས་དོན་ཏན་ཏིག་ངང་སྤེལ་རྒྱུ་ཡིན་པར་བཤད་དོ།།
དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས། 蜀ICP备14009601号-1
