ཉེ་ཆར། སི་ཁྲོན་མི་རིགས་དཔེ་སྐྲུན་ཁང་གིས་དཔར་དུ་སྐྲུན་པའི་བོད་ཀྱི་མཛེས་རྩལ་ཀུན་བཏུས་ལས་རི་མོ་སྒྱུ་རྩལ་སྐོར་གྱི་སི་ཁྲོན་ལྡེབས་རིས་༼༡༽ཞེས་པ་པར་སྐྲུན་འགྲེམ་སྤེལ་བྱས་ཤིང་། དེབ་འདིའི་ནང་དོན་ནི་སྤྱིའི་གླེང་བརྗོད་དང་དཔྱད་རྩོམ། པར་རིས་དང་རིས་འགྲེལ་གསལ་བཤད། འཚོལ་བྱང་བཅས་ཀྱིས་གྲུབ་ཡོད་ལ། ནང་དོན་དངོས་ལ་རོང་བྲག་རྫོང་སྤྲོ་སྣང་གི་རྡོ་མཁར་མཆོད་ཁང་ལྡེབས་རིས་དང་བརྒྱད་ཟུར་རྫོང་གྲོང་མགོའི་རྡོ་མཁར་མཆོད་ཁང་ལྡེབས་རིས། མི་ཉག་ས་བདེ་གྲོང་རྡལ་གྱི་མཆོད་ཁང་ལྡེབས་རིས། མི་ཉག་ཁྲོད་རྒྱུད་ཀྱི་མཆོད་ཁང་ལྡེབས་རིས། མི་ཉག་ཨ་བརྒྱ་སྟོད་པའི་མཆོད་ཁང་ལྡེབས་རིས་བཅས་ཀྱིས་གྲུབ་ཞིང་། ལྡེབས་རིས་ཀྱི་སྤུས་ཀ་ལེགས་ཤིང་ལོ་རྒྱུས་ཀྱི་རིན་ཐང་ཤིན་ཏུ་ཆེ།
དེབ་དེའི་གཙོ་སྒྲིག་པ་དང་པར་ལེན་མཁན་ནི་གངས་ལྗོངས་ཉི་གཞོན་འཕྲིན་སྦྱོར་ཀུན་འདུས་ལྟེ་གནས་ཀྱི་ཀྲུའུ་རེན་དཀོན་མཆོག་རྡོ་རྗེ་དང་། གཙོ་སྒྲིག་གཞོན་པ་ནི་ལྷོ་ནུབ་མི་རིགས་སློབ་ཆེན་གྱི་དགེ་རྒན་ཆེན་མོ་ཚེ་རིང་འགྱུར་མེད་དང་དབང་ཆེན་ཡིན་ཞིང་། སྤྱི་བཤད་དང་རིས་འགྲེལ་འབྲི་མཁན་དབང་ཆེན་དང་། སྤྱི་བཤད་རྒྱ་ཡིག་སྒྱུར་མཁན་རྡོ་རྗེ་ཚེ་བརྟན་དང་གསལ་བཤད་རྒྱ་ཡིག་སྒྱུར་མཁན་ཚེ་རིང་རྡོ་རྗེ་ཡིན་པ་རེད།
རྒྱུས་ལོན་བྱུང་ལ་ལྟར་ན། བོད་ཀྱི་མཛེས་རྩལ་ཀུན་འདུས་ཆེན་མོ་ནི་ཚོན་རིས་པོད་བརྒྱ་ཐམ་པའི་བདག་ཉིད་ཀྱིས་གྲུབ་ཅིང་། དེ་ལས་རི་མོ་སྒྱུ་རྩལ་སྐོར་ལ་པོད་ཞེ་བརྒྱད་དང་། འབུར་བརྐོས་སྒྱུ་རྩལ་སྐོར་ལ་པོད་ཉེར་གསུམ། བཟོ་སྐྲུན་སྒྱུ་རྩལ་སྐོར་ལ་པོད་བཅུ་གཅིག །བཟོ་བཀོད་མཛེས་རྩལ་སྐོར་ལ་པོད་བཅུ་བཞི། ཡིག་གཟུགས་དང་ཐམ་བརྐོས་སྐོར་ལ་པོད་གསུམ། མཛེས་རྩལ་གཞུང་ལུགས་སྐོར་ལ་པོད་གཅིག་བཅས་གཞུང་དོན་སྤྱིའི་ཁོག་འབུབས་དོན་ཚན་ཆེན་པོ་དྲུག་ལ་བཀར་སྟེ་གྲུབ་ཡོད།
བོད་ཀྱི་མཛེས་རྩལ་ཀུན་བཏུས་སུ་འཁོད་པའི་པར་རིས་ནི་གནའ་རྫས་ཀྱི་བརྟག་ཞིབ་ལས་གསར་རྙེད་བྱུང་བ་དང་། དགོན་པ། དངོས་རྙིང་རྩ་ཆེན་ཉར་ཚགས་བགྱིས་པ་གཙིགས་སུ་བཟུང་ཞིང་། དམངས་ཁྲོད་ཀྱི་མཚོན་བྱེད་རང་བཞིན་ལྡན་པའི་ཅ་དངོས་རྩ་ཆེན་ཡང་བསྡུས་ཡོད། དེའི་ཁྲོད་དུ་གཙོ་བོ་བོད་ལྗོངས་དང་མཚོ་སྔོན། ཀན་སུའུ། སི་ཁྲོན། ཡུན་ནན། ནང་སོག །དེ་བཞིན་ཞིང་ཆེན་གཞན་དག་ཏུ་ད་ལྟ་དངོས་སུ་གཅེས་ཉར་བྱས་པ་དང་། དེ་བསྟུན་ཕྱི་རྒྱལ་དུ་ཉར་བའི་དངོས་པོ་སོགས་བོད་ཀྱི་མཛེས་རྩལ་འབྲེལ་ཡོད་རྩ་ཆེན་དངོས་པོའི་པར་རིས་གང་ཐུབ་ཀྱིས་བཀོད་ཡོད།
