སོས་དལ་བག་ཕེབས་བྱུང་བའི་དགུན་གྱི་དུས་སྐབས་འདིར། སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་ལི་ཐང་རྫོང་རྒྱ་བ་གྲོང་རྡལ་གདོང་དྲུག་གྲོང་ཚོའི་ཞིང་པའི་དཔེ་ཁང་དུ། གྲོང་མི་རྣམས་ཉིན་རྒྱུན་དུ་ཚན་རྩལ་ལ་བརྟེན་ནས་ས་ཞིང་འདེབས་པ་དང་། ཕྱུགས་རིགས་གསོ་ཚགས་བྱེད་ཐབས་སོགས་ཞིང་ལས་ཚན་ཁག་གི་དཔེ་དེབ་གཡར་བར་ཡོང་བས། ཞིང་གྲོང་གི་དཔེ་ཁང་འདི་དགུན་ཁར་ཁོམ་དུས་སུ་གྲོང་མི་རྣམས་འགྲོ་ས་ཡག་ཤོས་ཤིག་ཏུ་གྱུར་ཡོད།
གྲོང་མིས་གདོང་དྲུག་གྲོང་ཚོའི་ཞིང་པའི་དཔེ་དེབ་ཁང་དུ་དཔེ་ཆ་ལྟ་བཞིན་པའི་རྣམ་པ།
གདོང་དྲུག་གྲོང་ཚོའི་ཞིང་པའི་དཔེ་ཁང་དུ་སྐྱོད་སྐབས། དཔེ་དེབ་ཀྱི་ཤོག་བུའི་དྲི་ཞིམ་གྱིས་ཁེངས་པས། སྨི་གྲུ་བཞི་མ་60ལྷག་ཙམ་ལས་མེད་པའི་དཔེ་ཁང་ནང་དུ་གྲོང་མི་མི་ཉུང་བ་ཞིག་འཛོམས་འདུག ཁོ་ཚོ་ལ་ལས་གསོ་ཚགས་ཀྱི་དཔེ་དེབ་ལ་ལྟ་ཀློག་བྱེད་བཞིན་ཡོད་པ་དང་།ལ་ལ་མཉམ་གཅིག་ཏུ་བསྡད་ནས་དཔེ་དེབ་ཀྱི་ནང་དོན་ལ་གྲོས་བསྡུར་བྱས་ཏེ་རང་སོ་སོའི་ཉམས་མྱོང་བརྗེ་རེས་བྱེད་བཞིན་འདུག་པས། དཔེ་ཁང་དུ་སློབ་སྦྱོང་གི་ཁོར་ཡུག་སྟུག་པོ་ཞིག་གིས་ཁེངས་འདུག
ལི་ཐང་རྫོང་རྒྱ་བ་གྲོང་རྡལ་གདོང་དྲུག་གྲོང་ཚོའི་ཀྲུའུ་རེན་བློ་བཟང་ཕུན་ཚོགས་ཀྱིས་“ཁོམ་ལོང་ཆེ་བའི་དགུན་དུས་གྲོང་མི་རྣམས་ལ་འགྲོ་ས་ཡག་པོ་ཞིག་ཡོད་ཆེད། ང་ཚོས་མང་ཚོགས་རྣམས་ལ་ཞིང་གྲོང་གི་དཔེ་ཁང་ཞིག་བཙུགས་ཤིང་།ལོ་ལྔའི་རིང་ཁྱོན་བསྡོམས་དཔེ་དེབ་ 10000ལྷག་ཉར་ཚགས་བྱས་ནས་གྲོང་མིར་ལྟ་ཀློག་བྱ་རྒྱུར་མཁོ་འདོན་བྱས་ཏེ་གྲོང་མིའི་ཤེས་བྱ་འཕེལ་བར་མཐུན་རྐྱེན་བསྐྲུན་ཡོད”ཅེས་གསུངས་བྱུང་།
ཉེ་བའི་ལོ་ཤས་རིང་། ལི་ཐང་རྫོང་རྒྱ་བ་གྲོང་རྡལ་གྱིས་ཞིང་གྲོང་གི་དཔེ་ཁང་དང་། རྒྱང་ཁྲིད་སློབ་གསོ་སོགས་མཉེན་ཆས་སྒྲིག་བཀོད་ལ་སྐུལ་འདེད་བཏང་ནས། ཞིང་གྲོང་དཔེ་ཁང་གི་དོ་དམ་དང་། དཔེ་དེབ་གཡར་ཀློག་སོགས་ཀྱི་ལམ་ལུགས་ལ་རྒྱུན་ཆད་མེད་པར་ཤུགས་སྣོན་བརྒྱབ་པ་དང་། ལོ་གཅིག་དང་དུས་ཚིགས་བཞིའི་རིང་། གྲོང་མིར་དཔེ་ཁང་གི་སྒོ་ཕྱེས་ནས་གྲོང་གསེབ་ཀྱི་སྔོན་ཐོན་བསམ་བློ་དང་ལག་རྩལ་ཁྱབ་སྤེལ་ལ་ཤུགས་སྣོན་བརྒྱབ་ཡོད་པ་རེད།
གདོང་དྲུག་གྲོང་ཚོའི་ཞིང་གྲོང་དཔེ་ཁང་གིས་ཉར་ཚགས་བྱས་པའི་དཔེ་དེབ་ཁག་ཅིག
ད་ཆ་དཔེ་དེབ་ཀློག་རྒྱུ་དེ་ནི་གདོང་དྲུག་གྲོང་ཚོའི་མཛེས་ལྗོངས་ཤིག་ཏུ་གྱུར་ཡོད་པ་དང་། ཞིང་གྲོང་གི་དཔེ་ཁང་དེ་གྲོང་མིས་རིག་གནས་སློབ་སྦྱོང་དང་ལས་གཏོད་ཕྱུག་འགྱུར་གྱི་ཤེས་བྱའི་བང་མཛོད་ཅིག་ཏུ་གྱུར་འདུག ཞིང་གྲོང་གི་དཔེ་ཁང་དེ་ཞིང་འབྲོག་པ་མི་དམངས་ཀྱི་རིག་གནས་འཚོ་བ་ཕུན་སུམ་ཇེ་ཚོགས་སུ་གཏོང་བའི་གཞི་རྟེན་གལ་ཆེན་ཞིག་ཡིན་པའི་ཆ་ནས། དེས་ཞིང་འབྲོག་མང་ཚོགས་ཀྱི་རིག་གནས་ཀྱི་དགོས་མཁོ་སྐོང་ཐུབ་པར་མ་ཟད། མང་ཚོགས་ཀྱིས་ཤེས་བྱར་སློབ་སྦྱོང་དང་དེང་རབས་ཀྱི་ཆ་འཕྲིན་བསྡུ་ལེན་བྱ་བ་ལའང་རིག་གནས་ཀྱི་ཟམ་པ་ལེགས་པོ་ཞིག་བསྐྲུན་ཡོད་པ་རེད།
