སྔར་ལས་ལྷག་པའི་ཐོག་ནས་ཐོག་མའི་བསམ་འདུན་མི་བརྗེད་པར་འགན་འཁྲི་སེམས་ལ་བརྟན་པོར་བཅངས་ཞེས་པ་བརྗོད་དོན་གཙོ་བོ་བྱས་པའི་སློབ་གསོའི་གྲུབ་འབྲས་གཏིང་ཟབ་དང་། ཏང་གི་སྐབས་བཅུ་དགུ་པའི་ཚང་འཛོམས་གྲོས་ཚོགས་ཐེངས་བཞི་བའི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་ཡོང་ཆེད། ཁང་དམར་རྫོང་གི་གཏིང་ཟབ་རིག་གནས་དང་དངོས་པོའི་ཐོན་ཁུངས་ཕུན་སུམ་ཚོགས་པོ་གཅིག་བསྡུས་ཐོག་འགྲེམ་སྟོན་དང་། ཞིང་འབྲོག་ས་ཁུལ་གྱི་ཁྱད་ལྡན་ཐོན་རྫས་ཕྱོགས་ཀུན་ཏུ་བཀྲམ་སྟེ། ཁྲོམ་རྭའི་གསོན་ཤུགས་ལ་སྐུལ་འདེད་དང་གྲོང་ཁྱེར་དང་གྲོང་གསེབ་གྱི་དཔལ་འབྱོར་གོང་འཕེལ་འགྲོ་བ་བཅས་ལ་ཤུགས་སྣོན། མི་རིགས་ཁག་གི་འབྲེལ་འདྲིས་སོགས་གཏིང་ཟབ་དུ་གཏང་རྒྱུར་སྐུལ་འདེད་གཏོང་བ་དང་། མེས་རྒྱལ་མཐའ་མཚམས་དར་རྒྱས་བརྟན་ལྷིང་དང་མི་དམངས་བདེ་སྐྱིད་ལྡན་པའི་འཚོ་བ་རོལ་བ་མངོན་འགྱུར་ཡོང་བ་བཅས་ཀྱི་ཆེད་དུ། ཟླ་༡༢ཚེས་༦ཉིན། ༢༠༡༩ལོའི་ཐོན་ལས་འགྲན་སྡུར་རམ་དགུན་དུས་དངོས་ཟོག་བརྗེ་རེས་ཚོགས་འདུ་འཚོགས་འགོ་བཙུགས་པ་རེད།
རྫོང་ཨུའི་ཧྲུའུ་ཅི་གཞོན་པ། སྲིད་གཞུང་གི་རྫོང་དཔོན་བཀྲ་ཤིས་སྟོབས་ུ་ལགས་ཀྱིས་ཤིས་ཚིག་ཕུལ་བ་དང་། རྫོང་ཨུའི་ཧྲུའུ་ཅི་གཞོན་པ། མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ལྷག་པ་མཆོག་སྐྱིད་ལགས་ཀྱིས་ཚོགས་འདུར་གཙོ་སྐྱོང་གནང་པ་རེད།
འགོ་ཚུགས་མཛད་སྒོའི་སྟེང་། བཀྲ་ཤིས་སྟོབས་ུ་ལགས་ཀྱིས་ད་ལོའི་ཐོན་ལས་འགྲན་སྡུར་རམ་དངོས་ཟོག་བརྗེ་རེས་ཚོགས་འདུ་ཡིས་ཁང་དམར་རྫོང་དུ་དབུལ་སྒྲོལ་འགག་སྒྲོག་བྱུང་བའི་རླབས་ཆེན་གྱི་རྒྱལ་ཁ་ལོན་པ་དང་། ཕྱོགས་ཡོངས་ནས་འབྱོར་འབྲིང་སྤྱི་ཚོགས་འཛུགས་སྐྲུན་མངོན་འགྱུར་ཡོང་བའི་གནད་འགག་གི་དུས་སྐབས་སུ་སྤེལ་བའི་གཟབ་རྒྱས་ཚོགས་འདུ་ཞིག་ཡིན་པས། དོན་སྙིང་གལ་ཆེན་ལྡན་པར་མ་ཟད་ཤུགས་རྐྱེན་གཏིང་ཟབ་ཀྱང་ལྡན་པས། ཁང་དམར་རྫོང་གི་༢༠༡༩ལོའི་ཐོན་ལས་འགྲན་སྡུར་རམ་དགུན་དུས་ཀྱི་དངོས་ཟོག་བརྗེ་རེས་ཚོགས་འདུའི་ཐོག་ཚོང་ལས་ཐུགས་གྲ་ལེགས་འགྲུབ་ཡོང་རྒྱུ་དང་། ལྷག་བསམ་རྣམ་དག་གིས་ཐེངས་འདིའི་ཐོན་ལས་འགྲན་སྡུར་ཐོལ་བརྒལ་ཡོང་བ། འགྲན་སྡུར་གྲུབ་འབྲས་འབུར་ཐོན་ལེན་ཐུབ་པ། ཚོང་འདུས་མགྲོན་པོ་རྣམས་དགའ་སྤྲོའི་ངང་ཕེབས་ཏེ་ཡིད་ཚིམ་པའི་ངང་ཕྱིར་ལོག་ཐུབ་པའི་བཀྲ་ཤིས་སྨོན་འདུན་ཞུ་རྒྱུ་ཡིན་ཞེས་གསུངས་པ་རེད
འགོ་ཚུགས་མཛད་སྒོ་མཇུག་བསྒྲིལ་རྗེས། ཡུལ་དངོས་ནས་རིག་རྩལ་ཕུན་སུམ་ཚོགས་པོའི་འཁྲབ་སྟོན་བྱས་པ་དང་། ཐེངས་འདིར་རིག་རྩལ་འཁྲབ་སྟོན་གྱི་ཁྲོད་དུ་རྒྱལ་རྩེ་རྫོང་རིག་རྩལ་འཁྲབ་སྟོན་ཚོགས་པ་ཆེད་དུ་གདན་དྲངས་པ་དང་། དེ་ཡང་ཁང་དམར་རྫོང་རིག་རྩལ་ཚོགས་པས་བཏང་པའི་མི་རིགས་མཐུན་སྒྲིལ་ཁྱིམ་ཚང་གཅིག་དང་འདྲ་ཞེས་པས་འཁྲབ་སྟོན་འགོ་ཚུགས་པ་དང་། གཞས་སྐད་སྙན་ཞིང་འཇེབས་ལ། སྟངས་སྟབས་ལྡེམ་ཞིང་འཁྱུག་པ་བཅས་ཀྲུང་ཧྭའི་བུ་དང་བུ་མོ་རྣམས་ཀྱིས་མེས་རྒྱལ་ལ་སྨོན་འདུན་ཞུས་པ་རེད། དེའི་རྗེས་ཀྱི་ཞབས་བྲོ་དང་གླུ་གཞས། འཁྲབ་ཚན་ཐུང་ངུ་སོགས་མི་རྣམས་ཀྱི་ཡིད་དབང་འཕྲོག་པའི་འཁྲབ་སྟོན་གྱིས་འཁྲབ་སྟོན་ཡོངས་ལ་སྤྲོ་བ་ཚད་མེད་བསྣན་ཡོད་ཅིང་། འགོ་ཚུགས་མཛད་སྒོའི་རིག་རྩལ་འཁྲབ་སྟོན་གྱི་མཇུག་ཏུ་རྒྱལ་རྩེ་རྫོང་རིག་རྩལ་འཁྲབ་སྟོན་ཚོགས་པས་འཁྲབ་སྟོན་བྱས་པའི་སྒོར་གཞས་ཏེ་ཐང་གཞས་ཞེས་པས་རིག་རྩལ་འཁྲབ་སྟོན་ཡོངས་སུ་མཇུག་བསྒྲིལ་བ་རེད།
ཐེངས་འདིའི་དངོས་ཟོག་བརྗེ་རེས་ཚོགས་རིང་༼ཟླ་༡༢ཚེས་༦ཉིན་ནས་ཚེས་༨ཉིན་བར༽རྫོང་ཡོངས་ཀྱི་འཐུས་ཚབ་རུ་ཁག་སོ་སོས་ཐོན་ལས་འགྲན་སྡུར་དང་རྐང་རྩེད་སྤོ་ལོའི་མཛའ་བརྩེའི་འགྲན་སྡུར་བཅས་ཀྱང་སྤེལ་དང་སྤེལ་བཞིན་པ་རེད།
ཤེས་རྟོགས་བྱུང་པ་ལྟར་ན། རྫོང་ནང་ཁུལ་གྱི་ཤང་དང་གྲོང་བརྡལ་༩ཡི་ཞིང་འབྲོག་པའི་ཆེད་ལས་མཉམ་ལས་ཁང་༢༠ལྷག་དང་། སྒེར་གཉེར་བཟོ་ཚོང་དུད་ཚང་དང་གྲོང་ཁྱེར་ཕྱི་ནང་དང་། མཐའ་སྐོར་གྱི་རྫོང་དང་ཆུས་ཀྱི་ཚོང་ལས་ཁེ་ལས་སོགས་ཚོང་དུད་༢༠༠ཉེ་བ་མཉམ་དུ་ཐེངས་འདིའི་དངོས་ཟོག་བརྗེ་རེས་འགྲེམ་ཚོགས་ནང་ཞུགས་པ་དང་། འགྲེམ་སྟོན་བྱས་པའི་ཐོན་རྫས་རིགས་མང་ཞིང་། གཙོ་བོ་ཁྱད་ལྡན་མི་རིགས་ལག་བཟོའི་ཐོན་རྫས་དང་ཞིང་ཕྱུགས་ཐོན་རྫས། འཚོ་བའི་མཁོ་ཆས་སྣ་ཚོགས། དུས་ཆེན་སོགས་ལ་མཁོ་བའི་ཅ་ལག་སོགས་རེད།
