ཀྲུང་གོའི་བོད་ལྗོངས་དྲ་བའི་འཕྲིན། ཟླ་1པོའི་ཚེས་30ཉིན་རང་སྐྱོང་ལྗོངས་འཕྲོད་བསྟེན་བདེ་ཐང་ཨུ་ལྷན་གྱིས་ཏོག་དབྱིབས་ནད་དུག་གསར་པའི་གློ་ཚད་འགོས་པའི་ནད་དཔེ་ཐོག་མ་གཏན་འཁེལ་བྱས་པའི་གནས་ཚུལ་བརྡ་ཁྱབ་བཏང་བ་དང་བསྟུན་ནས། བོད་ལྗོངས་ཀྱིས་འཕྲལ་མར་གློ་བུར་དུ་ཐོན་པའི་སྤྱི་པའི་འཕྲོད་བསྟེན་དོན་རྐྱེན་ཚབས་ཆེན་གྱི་རིམ་པ་དང་པོ་དང་ལེན་བྱེད་འགོ་བཙུགས་ནས་གངས་ལྗོངས་ས་མཐོར་“རིམས་ནད”དམག་འཐབ་ཀྱི་འཛོམས་བརྡ་དངོས་སུ་གྲགས་པ་རེད། ལྗོངས་ཡོངས་ཀྱི་ཏང་ཡོན་ལས་བྱེད་པ་དང་མི་རིགས་ཁག་གི་མང་ཚོགས་ཀྱིས་རིམས་ནད་སྔོན་འགོག་ཚོད་འཛིན་ཡག་པོ་བྱ་རྒྱུ་དེ་མིག་སྔའི་ལས་དོན་གལ་ཆེ་ཤོས་སུ་བརྩིས་ནས་རིམས་ནད་སྔོན་འགོག་ཚོད་འཛིན་གྱི་འགོག་རྒོལ་དམག་འཐབ་ལ་རྒྱལ་ཁ་མཐའ་གཅིག་ཏུ་ལེན་པར་བྱས།
ལྷ་སའི་བར་སྐོར་ཁྲོམ་ལ་ད་ལྟའི་བར་ལོ་ངོ་1300ལྷག་ཙམ་གྱི་ལོ་རྒྱུས་ལྡན་ཞིང་། ལོ་རྒྱུས་ཀྱི་ཆུ་རྒྱུན་རིང་མོའི་ཁྲོད་མི་རིགས་རིག་གནས་མཉམ་འདྲེས་དང་འབྲེལ་འདྲིས་བྱས་ཡོད་པ་དང་། ཚོང་དོན་དར་རྒུད་དང་དར་རྒྱས། སྤྱི་ཚོགས་ལམ་ལུགས་ཀྱི་འཕོ་འགྱུར་དང་མཆོང་སྐྱོད་བཅས་ཀྱི་དཔང་པོར་གྱུར་ཡོད་པར་མ་ཟད། ལྷ་སའི་ས་མཐོའི་གནའ་གྲོང་འདིའི་ལོ་ངོ་སྟོང་གི་འཕོ་འགྱུར་དང་དར་རྒྱས་ཀྱི་དཔང་པོའང་བྱེད་ཀྱི་ཡོད། རིམས་ནད་བྱུང་རྗེས། བར་སྐོར་ཁྲོམ་དུ་གནས་སྐབས་སུ་དེ་སྔའི་མི་ཚོགས་ཀྱི་ཚ་རླབས་འཕྱུར་བའི་རྣམ་པ་འཇམ་ཐིང་ངེར་གྱུར་ཞིང་། ཁྲོམ་གཞུང་ཆེ་ཆུང་གི་མི་ཚོགས་ཉུང་དུ་ཕྱིན་ནས་ཕྱི་ལོགས་སུ་མི་འགྲོ་བ་དང་ཉུང་དུ་འགྲོ་རྒྱུ་ནི་མང་ཚོགས་མང་ཆེ་བའི་གདམ་ག་ཨང་དང་པོར་གྱུར་ཡོད།
ཟླ་2པའི་ཚེས་3ཉིན་གྱི་ཞོགས་པར། གསར་འགོད་པ་ཚོ་བར་སྐོར་ཁྲོམ་གཞུང་དོན་གཅོད་ཁྲུའུ་བར་སྐོར་སྡེ་ཁུལ་ཨུ་ལྷན་དུ་སྐྱོད་སྐབས། སྡེ་ཁུལ་གྱི་ཏང་ཡོན་ལས་བྱེད་པ་མིག་དམར་དང་ཏང་ཡོན་ལས་བྱེད་པ་གཞན་དག་གིས་འགོག་སྲུང་ལས་དོན་ཡག་པོ་བསྒྲུབས་ནས། ཁོངས་གཏོགས་ཁུལ་གྱི་སྒོ་རའི་ནང་དུག་སེལ་བྱེད་པ་དང་། ཟུར་འཇོག་མི་སྣའི་ལུས་པོའི་དྲོད་ཚད་འཇལ་བ་སོགས་འབྲེལ་ཡོད་རིམས་འགོག་གི་ལས་དོན་སྤེལ་རྩིས་ཡོད་པ་མཐོང་བྱུང་།
སྡེ་ཁུལ་གྱི་རིམས་ནད་སྔོན་འགོག་ཚོད་འཛིན་ལས་དོན་ཞིབ་ཚགས་ལྡན་པ་ཞིག་སྒྲུབ་ཆེད། བར་སྐོར་སྡེ་ཁུལ་ཨུ་ལྷན་གྱི་ཏང་ཡོན་34དང་ལས་དོན་མི་སྣ་9ཡིས “གྲལ་བཤེར་གསུམ་དང་། ཞིབ་བཤེར་གཅིག འགན་ལེན་གཉིས”ཀྱི་ལས་དོན་བཀོད་སྒྲིག་གཞིར་བཟུང་སྟེ། ཆུ་ཚོད་24ཡི་རིང་ལས་བྱེད་མི་སྣ་ཚང་མ་ལས་གནས་སུ་ཡོད་པ་དང་འབྲེལ་ཚོགས་ཆུང་གསུམ་དུ་བགོས་ནས། ཉིན་རེའི་སྔ་དྲོའི་ཆུ་ཚོད་8པ་ནས་བཟུང་ཁོངས་གཏོགས་ཁུལ་གྱི་འཕྲོད་བསྟེན་དང་བདེ་འཇགས་སོགས་ལ་སྐོར་གཡེང་དང་རིམས་འགོག་ཤེས་བྱ་དྲིལ་བསྒྲགས་བྱེད་པའི་ལས་དོན་སྤེལ་བ་རེད།
གསར་འགོད་པས་སྡེ་ཁུལ་གྱི་ཏང་ཡོན་དང་བར་སྐོར་སྡེ་ཁུལ་འཕྲོད་བསྟེན་ཞབས་ཞུའི་ལྟེ་གནས་ཀྱི་སྨན་དོན་མི་སྣ་བཞི་ཡིས་ལག་ཏུ་དུག་སེལ་གཤེར་ཁུ་དང་། ལུས་དྲོད་འཇལ་ཆས། ཟུར་འཇོག་མི་སྣའི་ཐོ་འགོད་རེའུ་མིག་སོགས་འཁྱེར་ནས་ཁོངས་གཏོགས་ཁུལ་གྱི་དུད་ཁྱིམ་བདུན་གྱི་ཁྱིམ་སྡོད་ཟུར་འཇོག་མི་སྣའི་གཟུགས་པོའི་དྲོད་ཚད་འཇལ་བ་དང་། དེ་བཞིན་ཞབས་ཞུ་གཞན་དག་བསྒྲུབས་ཀྱི་ཡོད་པ་མཐོང་།
སེ་ར་སྟག་མགོ་སྲང་ལམ་གྱི་སྒོ་ར་ཆེ་མོའི་དུད་ཚང་ཞིག་གི་སྒོ་འགྲམ་དུ“ཁྱིམ་སྡོད་ཟུར་འཇོག་མི་སྣ་ཡིན་པས་འགྲོ་འོང་མ་བྱེད”ཅེས་པའི་བསྒྲགས་ཡིག་སྦྱར་ཡོད་པ་མཐོང་། སྐབས་དེར་སྡེ་ཁུལ་གྱི་ཏང་ཡོན་ཀུན་བཟང་གིས་སྒོ་རྡུང་ནས“སྒོ་ཕྱེ་རོགས། ང་ཚོ་སླེབས་བྱུང་།”ཞེས་གཉེན་ཉེར་འཚམས་འདྲི་བྱེད་པར་ཕེབས་པ་ནང་བཞིན་རྒྱུས་མངའ་ཧ་ཅང་ཆེན་པོས་འབོད་བརྡ་བཏང་། ཉིས་ཐོག་ཏུ་སྡོད་པའི་ཚེ་རིང་རྒྱལ་པོས་འབོད་སྐད་ཐོས་རྗེས་ལམ་སེང་ཐོག་ཁང་ནས་མར་ཡོང་སྟེ་སྒོ་ཕྱེས་ནས་ལུས་དྲོད་ཚད་འཇལ་དང་ལེན་བྱས།
“ཏུའུ་གྲངས36.9℃རེད། ལུས་དྲོད་རྒྱུན་ལྡན་རེད”ཅེས་སྨན་དོན་མི་སྣ་ཕུར་བུ་མཚམས་ཀྱིས་ལུས་དྲོད་ཀྱི་གནས་ཚུལ་བཤད་པ་ཐོས་སྐབས་ཚེ་རིང་རྒྱལ་པོར་དགའ་ཚོར་ཆེན་པོ་བྱུང་།
ཚེ་རིང་རྒྱལ་པོ་ཚང་གླེང་སྐབས་མ་གཞི་ཚེ་རིང་རྒྱལ་པོ་དང་བཟའ་ཟླས་བུ་མོ་ཆུང་ཆུང་ཁྲིད་ནས་ཧྲན་ཏུང་ཅི་ནན་དུ་ནང་སའི་བོད་ལྗོངས་འཛིན་གྲྭར་སློབ་སྦྱོང་བྱེད་བཞིན་པའི་བུ་མོ་ཆེ་བར་ལྟ་རུ་ཕྱིན་པ་རེད། ཟླ་1པོའི་ཚེས་30ཉིན། ཁོང་ཚོ་གསུམ་པོས་ཟི་ལིང་ནས་མེ་འཁོར་ལ་བསྡད་དེ་ལྷ་སར་ཕྱིར་ལོག་བྱས་པ་དང་མིག་སྔར་ཁྱིམ་དུ་ཟུར་འཇོག་བྱེད་བཞིན་ཡོད།
བར་སྐོར་སྡེ་ཁུལ་གྱི་ཏང་ཀྲི་པུའུ་ཧྲུའུ་ཅི་ཚུལ་ཁྲིམས་ཀྱིས་གསར་འགོད་པར་བཤད་རྒྱུར། མིག་སྔའི་བར་སྡེ་ཁུལ་གྱི་དུད་ཚང་བདུན་གྱི་མི་22ལྷག་ཉེ་ཆར་ནང་ས་ནས་བོད་ལྗོངས་སུ་ཕྱིར་ལོག་བྱས་པ་དང་། མིག་སྔར་ཁོ་ཚོ་ཁྱིམ་དུ་བསྡད་ནས་ཟུར་འཇོག་བྱས་ཡོད་ཅེས་བཤད། ཚུལ་ཁྲིམས་འགྲམ་གྱི་སྡེ་ཁུལ་གྲོང་ལྷན་གྱི་ཀྲུའུ་རེན་བསོད་ནམས་ཚེ་རིང་གིས་བཤད་རྒྱུར། སྡེ་ཁུལ་གྱི་ནང་ས་ནས་བོད་དུ་ཕྱིར་ལོག་པའི་སློབ་ཆེན་སློབ་མ་30ཡིས་རང་འགུལ་གྱིས་མིང་ལ“བར་སྐོར་གྲོང་ཨུའི་བོད་དུ་ལོག་པའི་སློབ་མའི་ཐོ་འགོད་ཚོགས་པ”བཙུགས་ནས་ཉིན་ལྟར་ཚོགས་པའི་ནང་རང་ཉིད་ཀྱི་གཟུགས་པོའི་གནས་ཚུལ་དུས་ཐོག་ཏུ་སྙན་སེང་ཞུ་གི་ཡོད་ཅེས་ཁ་གསབ་བྱས།
ཚུལ་ཁྲིམས་ཀྱིས་བཤད་རྒྱུར། ཏོག་དབྱིབས་ནད་དུག་གསར་པའི་གློ་ཚད་ཀྱི་རིམས་ནད་ཐོན་པ་ནས་བཟུང་། སྡེ་ཁུལ་ཏང་ཀྲི་པུའུ་ཡིས་སྡེ་ཁུལ་ཉེན་རྟོག་ལས་དོན་ཁང་དང་མཉམ་འབྲེལ་བྱས་ཏེ་བོད་ལྗོངས་སུ་ཡོང་བའམ་ཕྱིར་ལོག་པའི་མི་སྣ་ཚང་མའི་ཞིབ་ཕྲའི་དུས་ཚོད་ཤེས་རྟོགས་བྱས་ནས། ཁྱིམ་དུ་ཟུར་འཇོག་བྱས་པ་དང་ཟུར་འཇོག་གི་དུས་བཀག་གཏན་འཁེལ་བྱ་རྒྱུར་དཔྱད་གཞི་ཡིག་ཆ་ཐོག་མ་མཁོ་འདོན་བྱས་ཡོད་པར་མ་ཟད། ལས་ཀའི་ཟུར་དུ་རྩིས་ཁྲ་ནན་མོ་བཟོས་ཤིང་མི་སྣར་ཚ་བ་རྒྱས་པ་སོགས་རྒྱུན་གཏན་མིན་པའི་གནས་ཚུལ་ཐོན་སྐབས། འཕྲལ་མར་འབྲེལ་གཏུག་དམ་ཟབ་བྱེད་མཁན་གྲལ་བཤེར་ཐུབ་པར་བྱས་ཏེ། གོམ་སྟབས་རྗེས་མར་སྔོན་འགོག་ཚོད་འཛིན་གྱི་བྱ་ཐབས་སྤྱོད་ཕྱིར་ཆ་འཕྲིན་ཡང་དག་མཁོ་འདོན་བྱས་ཡོད། རང་འགུལ་གྱིས་ཁྱིམ་དུ་བསྡད་ནས་ཟུར་འཇོག་བྱེད་མཁན་ལ་ཉིན་ལྟར་སྡེ་ཁུལ་གྱི་ཏང་ཡོན་ལས་བྱེད་པས་སྡེ་ཁུལ་སྨན་ཁང་དང་མཉམ་འབྲེལ་བྱས་ཏེ་། དུད་ཚང་དུ་བསྐྱོད་ནས་ལུས་དྲོད་ཚད་འཇལ་གྱི་ལས་ཀ་བྱེད་ཀྱི་ཡོད། ཟུར་འཇོག་མི་སྣའི་འཚོ་བའི་དངོས་ཟོག་འདང་ངེས་ཤིག་འགན་ལེན་བྱ་ཆེད། སྡེ་ཁུལ་ཏང་ཀྲི་པུའུ་ཡིས་གཅིག་གྱུར་གྱིས་ཉོ་སྒྲུབ་བྱ་བར་དོ་དམ་བྱས་ཏེ་ཟུར་འཇོག་མི་སྣ་ཚང་མའི་ཁྱིམ་དུ་སྤྲོད་བཞིན་ཡོད་ཅེས་ངོ་སྤྲོད་བྱས།
ཟུར་འཇོག་མི་སྣའི་ཁྱིམ་གྱི་ཉིན་རེའི་འཚོ་བའི་གད་སྙིགས་ལ་དམིགས་ཏེ། སྡེ་ཁུལ་གྱི་ཏང་ཡོན་གདོང་ལེན་རུ་ཁག་གིས་ཕྱིར་བསྡུ་བྱེད་ཅིང་། ཕྱིར་བསྡུ་བྱས་པའི་ཟོག་རོ་ལ་གཅིག་གྱུར་གྱིས་དུག་སེལ་དང་གཙང་སེལ་བྱེད་ཀྱི་ཡོད། “དུད་ཚང་དུ་བསྐྱོད་པ་དང་ཁ་པར”སོགས་ཀྱི་རྣམ་པའི་ཐོག་ནས་རིམས་ནད་སྔོན་འགོག་ཚོད་འཛིན་གྱི་ཤེས་བྱ་ཁྱིམ་དུ་སྐྱེལ་བའི་ཞབས་ཞུ་སྤེལ་བ་དང་། དགོང་མོའི་ཆུ་ཚོད་8པ་ནས་10བར་ལས་དོན་མི་སྣས་ཡང་བསྐྱར་ཁོངས་གཏོགས་ཁུལ་གྱི་མེ་ཟོན་སྒྲིག་ཆས་ལ་ཞིབ་བཤེར་བྱས་ཏེ་གྲོང་མིའི་སྒོ་རའི་སྒོ་ཆེན་ཡག་པོ་རྒྱག་དགོས་པའི་དྲན་སྐུལ་བྱེད་ཀྱི་ཡོད།
ད་ཆ་བར་སྐོར་སྡེ་ཁུལ་གྲོང་ཨུའི་ཏང་ཡོན་ལས་བྱེད་པ་དང་། ལས་དོན་མི་སྣ། མི་དམངས་ཉེན་རྟོག་པ། སྨན་པ་སོགས་ཀྱི་འཐབ་ཕྱོགས་དང་པོའི་སྟོབས་ཤུགས་ཀྱིས་དུས་དང་རྣམ་པ་ཀུན་ཏུ་སྡེ་ཁུལ་མང་ཚོགས་ཀྱི་བདེ་ཐང་ལ་སྲུང་སྐྱོབ་བྱེད་ཀྱི་ཡོད་ཅིང་། ཁོ་ཚོས་རྔུལ་ཆུ་དང་འགན་འཁྲིས་གྲོང་ཁུལ་རྙིང་པའི་རིམས་ནད་སྔོན་འགོག་ཚོད་འཛིན་གྱི་དམག་འཐབ་ལ་རྒྱལ་ཁ་ལེན་ཆེད་གྲགས་མེད་འགུལ་མེད་ཀྱིས་རང་ཉིད་ཀྱི་སྟོབས་ཤུགས་སྐྱེས་སུ་འབུལ་བཞིན་ཡོད་པ་རེད།
