སྤྱི་ཟླ་3པའི་ཚེས་17ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་མི་དམངས་ཚོགས་ཁང་ཆེན་མོར་ཕ་ཁི་སི་ཐན་གྱི་ཙུང་ཐུང་ཨར་ཝེ་དང་མཇལ་མོལ་གནང་བ་རེད།
ཞི་ཅིན་ཕིང་གིས། མིག་སྔར་ཀྲུང་གོའི་སྲིད་གཞུང་དང་མི་དམངས་ནས་ཏོག་གསར་གློ་ཚད་རིམས་ནད་ལ་འགོག་རྒོལ་བྱེད་པར་མཐའ་མའི་རྒྱལ་ཁ་ཕུ་ཐག་ཆོད་པ་ལེན་ཆེད་འབད་འཐབ་བྱེད་བཞིན་ཡོད། རིམས་ནད་ཐོན་པའི་ཐོག་མའི་དུས་སུ། ཙུང་ཐུང་སྐུ་ཞབས་མཆོག་ནས་འཕྲལ་མ་ཉིད་དུ་འཚམས་འདྲིའི་ཡི་གེ་བཏང་གནང་བ་དང་། ད་རེས་སླར་ཡང་ཆེད་མངགས་ཀྲུང་གོར་འཚམས་འདྲིར་ཕེབས་ནས། ཀྲུང་གོའི་ཕྱོགས་ལ་བློ་བརྟན་འགྱུར་མེད་ཀྱིས་རྒྱབ་སྐྱོར་ཞུ་ལུགས་མཚོན་པར་གནང་ཡོད། ཕ་ཁི་སི་ཐན་སྲིད་གཞུང་དང་སྤྱི་ཚོགས་ལས་རིགས་ཁག་ནས་ནུས་ཤུགས་ཡོད་རྒུས་ཀྲུང་གོར་དངོས་ཟོག་ཞལ་འདེབས་སུ་ཕུལ་བས། ཀྲུང་གོས་དེར་སེམས་གཏིང་ནས་ཐུགས་རྗེ་ཆེ་ཞུ་བཞིན་ཡོད། དོན་དངོས་ཀྱིས་ར་སྤྲོད་བྱས་པར། ཀྲུང་གོ་དང་ཕ་ཁི་སི་ཐན་རྒྱལ་ཁབ་གཉིས་ནི་སྡུག་སྔོན་མོའི་ཆུ་ལ་མཉམ་འཐུང་དང་། སྐྱིད་ལ་ཁའི་རྩྭ་ལ་མཉམ་ཟ་བྱེད་མཁན་གྱི་གྲོགས་པོ་ངོ་མ་དང་སྤུན་ཟླ་ཡག་པོ་ཞིག་རེད། ཀྲུང་གོ་དང་ཕ་ཁི་སི་ཐན་གྱི་མཛའ་བཤེས་ནི་ལོ་རྒྱུས་ཀྱིས་གདམ་ག་བྱས་ཤིང་། རྒྱལ་ཁབ་གཉིས་པོའི་མི་དམངས་ཀྱི་སེམས་གཏིང་ལ་ཟུག་པ་ཞིག་རེད་ཅེས་བསྟན་འདུག
ཞི་ཅིན་ཕིང་གིས། མིག་སྔར། རིམས་ནད་འཛམ་བུ་གླིང་གི་ས་ཆ་མང་པོར་ཁྱབ་ཡོད་པས། རྒྱལ་ཁབ་ཁག་གིས་ཕྱར་བ་གྲུ་འདེགས་དང་། ལག་གདང་དཔུང་སྦྲེལ་གྱིས་རིམས་ནད་འགོག་དགོས་ངེས་ཡིན། ཀྲུང་གོས་ཐོག་མཐའ་བར་གསུམ་དུ་མིའི་རིགས་ལས་དབང་གཅིག་མཐུན་མ་ལག་གི་འདུ་ཤེས་རྒྱུན་འཁྱོངས་བྱས་ཐོག ཡོངས་བསྒྲགས་དང་། ཁ་གསལ། འགན་འཁུར་བ་བཅས་ཀྱི་རྣམ་འགྱུར་ཐོག་ནས་རིམས་ནད་ཀྱི་ཆ་འཕྲིན་དུས་ཐོག་ཏུ་ཁྱབ་བསྒྲགས་དང་། སྔོན་འགོག་ཚོད་འཛིན་དང་བརྟག་བཅོས་ཐད་ཀྱི་ཉམས་མྱོང་མཉམ་སྤྱོད་ཞུས་ཡོད། རིམས་ནད་འཛམ་གླིང་ཁྱབ་ཁོངས་ནང་འགོས་ཁྱབ་འགྲོ་བར་བཀག་འགོག་བྱ་རྒྱུའི་ཐད་ཀྲུང་གོས་ལེགས་སྐྱེས་མང་ཙམ་འབུལ་འདོད་ཡོད་ལ། ཕ་ཁི་སི་ཐན་ཕྱོགས་ལ་ཡང་རྒྱབ་སྐྱོར་དང་རོགས་རམ་མུ་མཐུད་བྱ་རྒྱུ་ཡིན་ཞེས་བསྟན་འདུག
ཞི་ཅིན་ཕིང་གིས། ཀྲུང་གོ་དང་ཕ་ཁི་སི་ཐན་གྱི་དུས་དང་རྣམ་པ་ཀུན་གྱི་འཐབ་ཇུས་མཉམ་ལས་རོགས་པའི་འབྲེལ་བ་སྲ་བརྟན་ཡག་པོ་དང་གོང་འཕེལ་ཡག་པོ་གཏོང་རྒྱུ་ནི། རྒྱལ་ཁབ་གཉིས་པོའི་མི་དམངས་ཀྱི་ཐུན་མོང་གི་བསམ་འདུན་རེད། ང་ཚོས་མཐུན་སྒྲིལ་དང་། བརྟན་ལྷིང་། དར་རྒྱས། སྟོབས་ཆེ་བཅས་ཀྱི་ཕ་ཁི་སི་ཐན་ཞིག་མཐོང་བའི་རེ་བ་བྱེད་ཀྱི་ཡོད། རྒྱལ་སྤྱིའི་དུས་བབ་ལ་འགྱུར་བ་གང་འདྲ་ཞིག་ཕྱིན་རུང་། ཀྲུང་གོས་ཐོག་མཐའ་བར་གསུམ་དུ་བློ་བརྟན་འགྱུར་མེད་ངང་ཕ་ཁི་སི་ཐན་དང་མཉམ་དུ་ལང་ངེས་པ་དང་། ཀྲུང་གོ་དང་ཕ་ཁི་སི་ཐན་གྱི་བློས་ཐུབ་མཛའ་བཤེས་ཟབ་ཏུ་གཏོང་རྒྱུར་ཤུགས་སྣོན་བརྒྱབ་ནས། ཀྲུང་གོ་དང་ཕ་ཁི་སི་ཐན་གྱི་འབྲེལ་བ་དེ་མིའི་རིགས་ལས་དབང་གཅིག་མཐུན་མ་ལག་མཉམ་གཏོད་ཀྱི་དཔེ་མཚོན་དུ་འགྱུར་བ་བྱས་ཐོག རྒྱལ་ཁབ་གཉིས་པོའི་མི་དམངས་ལ་ཕན་བདེ་དེ་བས་ལེགས་པ་བསྐྲུན་རྒྱུ་ཡིན། ཀྲུང་གོས་ཕ་ཁི་སི་ཐན་གྱིས་རྒྱལ་ཁབ་ཀྱི་རང་བཙན་དང་། བདག་དབང་། མངའ་ཁོངས་ཆ་ཚང་བཅས་ལ་སྲུང་སྐྱོབ་བྱ་རྒྱུར་མུ་མཐུད་རྒྱབ་སྐྱོར་བྱ་རྒྱུ་དང་། ཕ་ཁི་སི་ཐན་རང་ཉིད་ཀྱི་རྒྱལ་ཚུལ་དང་འཚམས་པའི་གོང་འཕེལ་འགྲོ་ལམ་ཐོག་བསྐྱོད་རྒྱུར་རྒྱབ་སྐྱོར་བྱ་རྒྱུ་ཡིན། ཕྱོགས་གཉིས་པོས་འགོ་ཁྲིད་མི་སྣའི་བར་གྱི་རྟག་རྒྱུན་རང་བཞིན་གྱི་འཚམས་འདྲི་དང་ཐུག་འཕྲད་བྱེད་རེས་ཀྱི་སྲོལ་རྒྱུན་རྒྱུན་འཁྱོངས་དང་། གཙོ་གནད་ཁྱབ་ཁོངས་དང་རྣམ་གྲངས་མཉམ་ལས་ལ་སྐུལ་འདེད་ཧུར་ཐག་བཏང་ནས། ཀྲུང་གོ་དང་ཕ་ཁི་སི་ཐན་གྱི་དཔལ་འབྱོར་བར་ཁྱམས་དེ་རྒྱུད་གཅིག་ལམ་གཅིག་སྤུས་མཐོའི་གོང་འཕེལ་གཏོང་བའི་དཔེ་སྟོན་ལས་གཞིར་འགྱུར་བ་བྱ་དགོས། རྒྱལ་སྤྱི་དང་ས་ཁུལ་གྱི་བྱ་དོན་ཁྲོད་འབྲེལ་གཏུག་གཞོགས་འདེགས་བྱ་རྒྱུར་ཤུགས་སྣོན་བརྒྱབ་ནས། འཛམ་གླིང་དང་ས་ཁུལ་གྱི་ཞི་བདེ་དང་། བརྟན་ལྷིང་། བདེ་འཇགས་བཅས་ལ་མཉམ་དུ་སྲུང་སྐྱོབ་བྱ་དགོས། ཕ་ཁི་སི་ཐན་ཕྱོགས་ནས་འབུ་ཆ་ག་པའི་གནོད་འཚེ་སེལ་རྒྱུར་ཀྲུང་གོས་རྒྱབ་སྐྱོར་བྱ་རྒྱུ་ཡིན་ཞེས་བསྟན་འདུག
ཨར་ཝེས། ཀྲུའུ་ཞི་ཞི་ཅིན་ཕིང་གི་སྲ་ཞིང་བརྟན་པའི་འགོ་ཁྲིད་འོག ཀྲུང་གོའི་རིམས་ནད་སྔོན་འགོག་ཚོད་འཛིན་ལས་དོན་ལ་ཕན་འབྲས་ཡག་པོ་ཐོན་པས། ངས་ཕ་ཁི་སི་ཐན་སྲིད་གཞུང་དང་མི་དམངས་ཀྱི་ཚབ་ཞུས་ནས་བཀྲ་ཤིས་བདེ་ལེགས་ཞུ་རྒྱུ་ཡིན། གནོད་འཚེའི་མདུན་དུ་ཀྲུང་གོ་གུང་ཁྲན་ཏང་དང་ཀྲུང་གོའི་སྲིད་གཞུང་གི་ཁྱད་དུ་འཕགས་པའི་འགོ་ཁྲིད་ནུས་པ་དང་། ཤུགས་ཆེ་བའི་སྐུལ་སློང་ནུས་པ་མངོན་ཡོད། ཀྲུང་གོའི་མི་དམངས་ནི་རྡོག་རྩ་གཅིག་སྒྲིག་བྱེད་མཁན་ཞིག་ཡིན་ལ། བློས་གཏོང་ལ་མི་སྐྲག་མཁན་ཞིག་ཀྱང་རེད། ཀྲུང་གོའི་ཉམས་མྱོང་དང་བྱ་ཐབས་ཀྱིས་རྒྱལ་ཁབ་གཞན་པར་ཕན་ཡོད་ཀྱི་དཔྱད་གཞི་མཁོ་འདོན་བྱས་ཡོད། རིམས་ནད་མཇུག་འགྲིལ་རྗེས། ཀྲུང་གོ་དེ་བས་སྟོབས་ཆེ་རུ་འགྲོ་ངེས་རེད། སྟོབས་ཤུགས་འགའ་རེས་རིམས་ནད་ལ་ཁ་གཡར་ནས་ཀྲུང་གོར་མཚན་ཤད་བཟོ་བ་དང་ཀྲུང་གོ་ཁེར་རྐྱང་དུ་འཇོག་འདོད་བྱེད་པ་དེ་ནི་མི་སེམས་ལ་མི་ཟུག་པ་ཞིག་དང་། ལམ་ལྷོངས་མི་ཡོང་བ་ཞིག་རེད། ཕ་ཀྲུང་གཉིས་ནི་སྐྱིད་སྡུག་མཉམ་མྱོང་གི་སྤུན་ཟླ་ཡག་པོ་རེད། རྒྱལ་ཁབ་གཉིས་པོའི་མི་དམངས་ཀྱི་མཛའ་བཤེས་ཟབ་པས་ཇི་སྲིད་བར་དེར་འགྱུར་བ་འགྲོ་མི་སྲིད། དཀའ་ངལ་ཇི་ཙམ་གྱིས་ཆེ་བ་འཕྲད་པའི་སྐབས། ཕ་ཀྲུང་གཉིས་པོའི་མཛའ་བཤེས་དང་མཐུན་སྒྲིལ་དེ་ཙམ་གྱིས་མངོན་གསལ་དོད་དུ་འགྲོ་བཞིན་ཡོད། ཀུང་གོས་རྒྱབ་སྐྱོར་དང་རོགས་རམ་བྱས་པར་ཕ་ཁི་སི་ཐན་ཕྱོགས་ནས་ཐུགས་རྗེ་ཆེ་ཞུ་རྒྱུ་ཡིན་ལ། བློ་བརྟན་འགྱུར་མེད་ངང་ཀྲུང་གོའི་ཕྱོགས་སུ་ལངས་ནས་མཉམ་དུ་དཀའ་ངལ་ཁྱད་བསད་བྱ་རྒྱུ་ཡིན། ཕ་ཁི་སི་ཐན་ནས་སྔར་རྒྱུན་ལྟར་ཀྲུང་གོའི་ལྟེ་བའི་ཁེ་ཕན་དང་འབྲེལ་བའི་གནད་དོན་ཐད་ཀྲུང་གོར་རྒྱབ་སྐྱོར་བྱ་རྒྱུ་དང་། ཀྲུང་གོའི་བར་སྤེལ་རེས་དམ་ཟབ་རྒྱུན་འཁྱོངས་དང་མཉམ་ལས་གཏིང་ཟབ་ཏུ་བཏང་ནས། ཕ་ཁི་སི་ཐན་དང་ཀྲུང་གོའི་དཔལ་འབྱོར་བར་ཁྱམས་འཛུགས་བསྐྲུན་ཡག་པོ་བྱ་རྒྱུ་ཡིན། ཕ་ཁི་སི་ཐན་ནས་མུ་མཐུད་ཀྲུང་གོའི་བར་འཇིགས་སྐུལ་ལ་ངོ་རྒོལ་བྱེད་པའི་ཐད་ཀྱི་མཉམ་ལས་བྱ་རྒྱུ་དང་། རྒྱལ་སྤྱིའི་ཐོག་འདྲ་མཉམ་དྲང་བདེན་ལ་སྲུང་སྐྱོབ་བྱ་རྒྱུ་ཡིན་ཞེས་གསུངས་འདུག
མཇལ་མོལ་གྲུབ་རྗེས། རྒྱལ་ཁབ་གཉིས་པོའི་གཙོ་བདག་ནས་ཕྱོགས་གཉིས་བར་གྱི་མཉམ་ལས་ཡིག་ཆ་མང་པོར་མིང་རྟགས་འགོད་པར་དཔང་པོ་གནང་ཡོད།
རྒྱལ་ཁབ་གཉིས་པོས་ཀྲུང་གོ་དང་ཕ་ཁི་སི་ཐན་གྱི་དུས་དང་རྣམ་པ་ཀུན་གྱི་མཉམ་ལས་རོགས་པའི་འབྲེལ་བ་ཟབ་ཏུ་གཏོང་རྒྱུའི་སྐོར་གྱི་མཉམ་འབྲེལ་གསལ་བསྒྲགས་སྤེལ་ཡོད་པ་རེད།
ཝང་དབྱི་དང་། ཧོ་ལི་ཧྥེང་སོགས་མཇལ་མོལ་ནང་ཞུགས་ཡོད་པ་རེད།
