ཞིང་ལས་དང་གྲོང་གསེབ་པུའི་གོང་འཕེལ་འཆར་འགོད་སིའི་སི་ཀྲང་ཝེ་པའེ་ཀང་གིས་ཚོགས་འདུའི་ཐོག རང་རྒྱལ་འབྲུ་རིགས་ཀྱི་ཐོན་སྐྱེད་ཐད་ལོ་བསྟུད་མར་ལོ་ལེགས་བྱུང་བ་དང་། འབྲུ་རིགས་ཀྱི་བདེ་འཇགས་ལ་འགན་སྲུང་ཡོད་པ། མི་རེའི་ཆ་སྙོམས་ཀྱི་འབྲུ་རིགས་ཐོབ་ཆ་རྒྱུན་མཐུད་ངང་འཛམ་གླིང་གི་ཆ་སྙོམས་ཆུ་ཚད་ལས་མཐོ་བ་ཡོད་པ། ལོ་རེར་འབྲུ་རིགས་ནང་འདྲེན་བྱེད་ཚད་ཉུང་ཉུང་ཡིན་པ་དང་། ནང་འདྲེན་བྱེད་པའི་འབྲུ་རིགས་ཀྱིས་རང་རྒྱལ་གྱི་འབྲུ་རིགས་འཛད་སྤྱོད་བྱེད་ཚད་ཀྱི་བརྒྱ་ཆ་2གཡས་གཡོན་ལས་ཟིན་གྱི་མེད་པས། སྒེར་གྱིས་འབྲུ་རིགས་གསོག་ཉར་བྱེད་དགོས་དོན་མེད་ཅེས་བསྟན་ཡོད།
རིམས་ནད་ཀྱིས་ཤུགས་རྐྱེན་འོག དཔྱིད་རྨོས་དཔྱིད་འདེབས་ལ་ཡང་ཀུན་གྱིས་དོ་སྣང་བྱེད་བཞིན་ཡོད། ཞིང་ལས་དང་གྲོང་གསེབ་པུའི་འདེབས་འཛུགས་ལས་རིགས་དོ་དམ་སིའི་སི་ཀྲང་ཕན་ཝེན་པོ་ཡིས། སྤྱི་ཟླ་4ཚེས་3ཉིན་བར་སླེབས་དུས། རྒྱལ་ཡོངས་ཀྱི་སྔ་སྨིན་འབྲས་མྱུག་གསོས་ཚད་བརྒྱ་ཆ་80ཡན་ཟིན་ཡོད་པ་དང་། སྔ་སྨིན་འབྲས་མྱུག་འདེབས་འཛུགས་བྱས་ཚད་བརྒྱ་ཆ་40ཡན་ཟིན་པས། མྱུར་ཚད་ན་ནིང་གི་དུས་མཉམ་དང་བསྡུར་ན་མངོན་གསལ་དོད་པོས་མགྱོགས་པ་ཡོད་ཅེས་ངོ་སྤྲོད་གནང་ཡོད།
ཀྲུང་དབྱང་གི་གྲབས་གསོག་འབྲུ་རིགས་དང་ས་གནས་ཀྱི་གྲབས་གསོག་འབྲུ་རིགས་ནི་མ་མཐའི་ཚད་གཞི་སྲུང་བ་དང་། སྔོན་དཔག་བརྟན་པོ་ཡོང་བ་བྱེད་པ། བདེ་འཇགས་ལ་འགན་ལེན་བཅས་ཀྱི་རྨང་རྡོ་ལྟ་བུ་ཡིན། རྒྱལ་ཁབ་འབྲུ་རིགས་དང་དངོས་ཟོག་གྲབས་གསོག་ཅུད་འབྲུ་རིགས་གྲབས་གསོག་སིའི་སི་ཀྲང་ཆིན་ཡུས་ཡུན་གྱིས། རང་རྒྱལ་གྱི་འབྲུ་རིགས་གསོག་འཇོག་འདང་ངེས་ཡོད་པ་དང་། མིག་སྔའི་བར་སླེབས་དུས་ཀྲུང་དབྱང་གྲབས་གསོག་འབྲུ་རིགས་བེད་སྤྱོད་བཏང་མེད་ཅེས་བསྟན་ཡོད།
