ཟླ་4ཚེས་6ཉིན། རླངས་འཁོར་གྱི་སྒྲ་ལྡིར་ལྡིར་དུ་གྲགས་པ་དང་བསྟུན་ནས། སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་དཀར་མཛེས་རྫོང་སྲིབ་ངོ་ཤང་ཧོར་རྒུ་མདོ་གྲོང་ཚོའི་བསྟན་འཛིན་ཆོས་འཕེལ་ཚང་གི་སྒོ་ཁར་རྫོང་གི་ཞིང་སྤྱོད་དངོས་རྫས་སྐྱེལ་བའི་རླངས་འཁོར་འབྱོར་བ་དང་། མི་ཚང་མས་འུར་འུར་ཟིང་ཟིང་གི་ངང་དངོས་ཟོག་མར་ཕབ་པ་རེད། ད་ལོར་བསྟན་འཛིན་ཆོས་འཕེལ་གྱིས་རང་ཁྱིམ་གྱི་ཞིང་ས་མུའུ་30ལྷག་ཙམ་ལ་རྨོ་འདེབས་བྱས་པ་ཕུད། ད་དུང་གཉེན་ཉེའི་ཁྱིམ་གྱི་ས་ཞིང་མུའུ་30འགན་གཙང་ལེན་བྱས་ཏེ། ནས་དང་ཞོག་ཁོག་དམར་པོ་སོགས་འདེབས་རྩིས་བྱེད་བཞིན་ཡོད་། འོན་ཀྱང་། རིམས་ནད་ཀྱི་ཤུགས་རྐྱེན་ཐེབས་ནས་ས་བོན་དང་རྫས་ལུད་སོགས་གྲབས་གསོག་འདང་ངེས་བྱས་མེད། ཉེ་ཆར་དཀར་མཛེས་རྫོང་གི་ཞིང་འབྲོག་གྲོང་གསེབ་དང་ཚན་རྩལ་ཅུས་འགན་ལེན་ཚན་པའི་འགོ་ཁྲིད་དང་གྲོང་གསེབ་ལས་བྱེད་པ་རང་འགུལ་ངང་ཁྱིམ་ཚང་སོ་སོའི་སྒོ་རྩར་སླེབས་ནས་ཞབས་འདེགས་ཞུས་པ་དང་། ས་བོན་དང་རྫས་ལུད་སོགས་དངོས་ཟོག་གཏོང་འདྲེན་བྱས་ནས་དཔྱིད་ཀའི་རྨོ་འདེབས་ཀྱི་དཀའ་གནད་ཐག་གཅོད་བྱས་པ་རེད།
བློ་བདེའི་ཞིང་སྤྱོད་དངོས་རྫས་གྲོང་གསེབ་ཏུ་སྐྱེལ་བ།
“མ་གཞི་རིམས་ནད་ཀྱི་ཤུགས་རྐྱེན་ཕོག་ནས་ད་ལོའི་དཔྱིད་ཀའི་རྨོ་འདེབས་བྱེད་དཀའ་བར་འདོད་ཀྱང་། ད་ལྟ་ས་བོན་དང་ལུད་རྫས་འདང་ངེས་ཤིག་གྲ་སྒྲིག་བྱས་ཡོད་པས། ངའི་སེམས་པ་ཧ་ཅང་བདེ་པོ་བྱུང་།”བསྟུད་མར་ཉིན་ཁ་ཤས་རིང་ལ། དཀར་མཛེས་རྫོང་གི་ཞིང་ལས་ཀྱི་ཤང་དང་གྲོང་རྡལ་17གྱི་ཏང་ཡོན་ལས་བྱེད་པས་རྡོག་རྩ་གཅིག་སྒྲིལ་སྒོས་དཔྱིད་ཀའི་རྨོ་འདེབས་ཀྱི་ཞིང་སྤྱོད་དངོས་རྫས་ཞིང་བའི་ཁྱིམ་ཚང་གི་སྒོ་འགྲམ་དུ་སྐྱེལ་བ་དང་། ཕྱོགས་མང་པོའི་ཐད་ནས་ཞིང་པའི་རྨོ་འདེབས་ཐོན་སྐྱེད་ལ་མཁོ་བའི་ཞིང་སྤྱོད་དངོས་རྫས་ཀྱི་དགོས་མཁོ་བསྐངས་ཏེ། རིམས་ནད་ཐོན་པའི་སྐབས་སུ་དཔྱིད་ཀའི་རྨོ་འདེབས་ལས་དོན་ལ་ཤུགས་རྐྱེན་མི་ཐེབས་པར་འགན་ལེན་བྱས་པ་རེད།
ཞིང་པ་རྣམས་ཀྱིས་ཞིང་སྤྱོད་དངོས་རྫས་མར་འབེབས་བཞིན་པ།
དཀར་མཛེས་རྫོང་ཞིང་འབྲོག་གྲོང་གསེབ་དང་ཚན་རྩལ་ཅུས་ཀྱི་འབྲེལ་ཡོད་འགན་འཛིན་པས་ངོ་སྤྲོད་བྱས་པར་གཞིགས་ན། རིམས་ནད་ཀྱིས་དཔྱིད་ཀའི་རྨོ་འདེབས་ལ་ཤུགས་རྐྱེན་ཐེབས་ཚད་དམའ་རུ་གཏོང་གང་ཐུབ་བྱེད་པ་དང་། མང་ཚོགས་ཀྱིས་རྨོ་འདེབས་དུས་ཚིགས་དམ་འཛིན་སྒོས་སྔ་ཙམ་ནས་འདེབས་འཛུགས་ཐུབ་པར་འགན་ལེན་བྱ་ཆེད། ཞིང་འབྲོག་གྲོང་གསེབ་དང་ཚན་རྩལ་ཅུས་ཀྱིས་མཁོ་སྤྲོད་འགན་ལེན་གྱི་“རྒྱབ་ཕྱོགས་མཁོ་སྒྲུབ་པུའུ”ཡག་པོ་ཞིག་བྱ་རྒྱུ་མཐའ་འཁྱོངས་བྱས་པ་རེད། མིག་སྔའི་ཞིང་པ་དང་ལྷག་པར་དུ་དཀའ་ངལ་ཡོད་པའི་ཞིང་པའི་དཔྱིད་ཀའི་རྨོ་འདེབས་ཐོན་སྐྱེད་ཀྱི་དགོས་མཁོ་གཞིར་བཟུང་སྟེ། “སོན་བཟང་སྐྱེལ་བ་དང་། རྫས་ལུད་སྐྱེལ་བ། རྨོ་འདེབས་རོགས་སྐྱོར།”བཅས་ཀྱི་ཞིང་སྐྱོར་ཞིང་ཕན་ཀྱི་ལས་དོན་སྤེལ་ནས། རྨོ་འདེབས་ཐོན་སྐྱེད་དང་འབྲེལ་བ་དམ་པོ་ཡོད་པའི་སྤུས་ལེགས་ཞིང་སྤྱོད་དངོས་རྫས་དང་། ཞིང་ལས་འཕྲུལ་ཆས། སྔོན་ཐོན་གྱི་ཞིང་ལས་ཚན་རྩལ་བཅས་ཁག་གཅིག་མང་ཚོགས་ཀྱི་སྒོ་འགྲམ་དུ་བསྐྱལ་བ་རེད། མིག་སྔའི་བར་ཞིང་འབྲོག་གྲོང་གསེབ་དང་ཚན་རྩལ་ཅུས་ཀྱིས་ཉིན་10ལས་མ་འགོར་བའི་རིང་ལ་རིན་མེད་ངང་རྫས་ལུད་རྒྱ་མ་ཁྲི་278.24དབོར་འདྲེན་བྱས་པ་དང་ནས་ཀྱི་སོན་བཟང་རྒྱ་མ་ཁྲི་45.65ཞིང་ལས་ཀྱི་ཤང་དང་གྲོང་རྡལ་ཁག་ཏུ་བསྐྱལ་བ་རེད།
ཤེས་རྟོགས་བྱུང་བར་གཞིགས་ན། རྫོང་དེའི་ཤང་དང་གྲོང་རྡལ་ཁག་གིས་གྲོང་ཚོ་རིམ་པར་དམིགས་ཏེ། གྲོང་ཚོའི་མང་ཚོགས་ཀྱི་རྨོ་འདེབས་ཞིང་སྤྱོད་དངོས་རྫས་ཀྱི་གྲ་སྒྲིག་གི་ད་ལྟའི་གནས་བབ་དང་དགོས་མཁོའི་གནས་ཚུལ་གཅིག་སྡུད་ཐོག་ཚོ་ཆུང་དང་ཁྱིམ་ཚང་རེ་རེ་བཞིན་བརྟག་དཔྱད་བྱས་པ་དང་། ཞིང་ལས་ཚན་པར་གཅིག་གྱུར་ཕྱོགས་སྡོམ་དང་མཐུན་སྦྱོར་ཉོ་སྒྲུབ་བྱ་རྒྱུའི་སྙན་སེང་ཞུས་པ་མ་ཟད། ཤང་དང་གྲོང་ཚོའི་ལས་བྱེད་པ་དང་། གྲོང་ཚོའི་བཅའ་སྡོད་ལས་བྱེད་པ། ཏང་ཡོན་གདོང་ལེན་རུ་ཁག་གི་དང་བླངས་པ། ཞིང་ལས་ལག་རྩལ་མི་སྣ་བཅས་དང་མཉམ་དུ་ལས་དོན་སྤེལ་ཏེ། གྲོང་ཚོའི་མང་ཚོགས་ལ་མཁོ་བའི་རྫས་ལུད་དང་། ས་བོན། ཞིང་སྨན། ཞིང་སྤྱོད་འགྱིག་ཤོག་སོགས་ཞིང་སྤྱོད་དངོས་རྫས་མང་ཚོགས་ཀྱི་སྒོ་འགྲམ་དུ་དབོར་ནས་རིམས་འགོག་ཤེས་བྱ་དྲིལ་སྒྲོག་བྱས་པ་མ་ཟད། ཞིང་སྤྱོད་དངོས་རྫས་གྲ་སྒྲིག་བྱེད་པར་རོགས་རམ་བྱས་པ་རེད།
