ཀྲུང་གོའི་བོད་ལྗོངས་དྲ་བའི་འཕྲིན། དབུལ་སྒྲོལ་འགག་སྒྲོལ་གྱི་དམག་འཐབ་དེ་མཇུག་བསྡུ་བའི་དུས་སུ་སླེབས་ཤིང་། རྒྱལ་ཡོངས་གོང་འོག་ཚང་མས་ཆེས་མཐའ་མའི་གདོང་མཆོང་བྱེད་བཞིན་ཀྲུང་ཧྭའི་ས་གཞི་ཆེན་མོར་བྲེལ་འཚུབ་ཀྱི་རྣམ་པས་ཁེངས་འདུག
གསར་དུ་སྐྱེས་པའི་ལྗང་མདོག་ལ་རོལ་བཞིན་བོད་རང་སྐྱོང་ལྗོངས་ལྷོ་ཁ་གྲོང་ཁྱེར་དུ་ཡོང་ཞིང་། དེ་གའི་ཡར་ཀླུང་གཙང་པོའི་ངོགས་གཉིས་ཀྱི་གནས་གང་སར་ལྗང་མདོག་གི་སྐྱེ་སྟོབས་ཀྱི་དཔལ་འབར་བཞིན་ཡོད།
འདི་ནི་ཐོན་ལས་གླིང་གི་རྒྱ་སེ་མེ་ཏོག་རྟེན་གཞི་རེད།
གྲ་ནང་རྫོང་དེང་རབས་ཞིང་འབྲོག་ཐོན་ལས་གླིང་དུ་བསྐྱོད་ཚེ། གྲལ་འགྲིག་པོར་བསྒྲིགས་པའི་རྒྱ་སེའི་མེ་ཏོག་གི་དྲོད་ཁང་ཆེ་མོའི་ནང་ཟླ་བ་གསུམ་པར་ལས་འགོ་བསྐྱར་ཚུགས་བྱས་ཚུན་དུ་འདེབས་འཛུགས་བྱས་པའི་རྒྱ་སེའི་མེ་ཏོག་རྐང་ཁྲི་བདུན་པོ་ཚང་མ་རྣམ་པར་བཞད་དེ། དགའ་འོས་པའི་ལོ་ལེགས་ཀྱི་དུས་ཚིགས་གསར་པ་ཞིག་བསུས་ཡོད།
གྲ་ནང་རྫོང་དེང་རབས་ཞིང་འབྲོག་ཐོན་ལས་གླིང་ནི་གྲ་ནང་རྫོང་སྲིད་གཞུང་གི་ཚོང་འགུགས་མ་འདྲེན་གྱི་རྣམ་གྲངས་ཤིག་ཡིན་ཞིང་། དེ་ནི་གྲ་ནང་རྫོང་མི་དམངས་སྲིད་གཞུང་དང་། ཀྲུང་གོ་ཞིང་ལས་སློབ་ཆེན། ཞ་མོན་གྲོང་ཁྱེར་ཅང་ཕིང་སྐྱེ་དངོས་རྨང་གཞིའི་ལག་རྩལ་མ་རྐང་ཚད་ཡོད་ཀུང་སི་བཅས་ཕྱོགས་གསུམ་པོས་མཉམ་འགུལ་གྱིས་དབུལ་སྒྲོལ་ལ་བཙུགས་པའི“ཚན་རྩལ་གྱི་གཤོག་ཟུང”ཞིག་རེད།
ཐོན་ལས་གླིང་འདི་ནི་2017ལོར་དོན་འཁྱོལ་བྱུང་བ་དང་། ཁྱོན་བསྡོམས་མ་དངུལ་སྒོར་ཁྲི་7000བཏང་ཞིང་། ཐོན་ལས་གླིང་ནང་དུ་འབྲི་ཏ་ས་འཛིན་དྲོད་ཁང་འདེབས་འཛུགས་གླིང་དང་། རྒྱ་སེ་གླིང་། གཟན་རྩྭའི་སོན་བཟང་གསོ་སྤེལ་རྟེན་གཞི། སྐྱེ་ལྡན་ལུད་རྫས་བཟོ་གྲྭ། སྤུས་ལེགས་ཀྱི་བཞོན་མ་གསོ་ཚགས་རྟེན་གཞི་བཅས་ཡོད་པ་རེད།
འདི་ནི་རྣམ་པར་བཞད་པའི་རྒྱ་སེའི་མེ་ཏོག་རེད།
ཕྱོགས་གསུམ་པོས་མཉམ་སྐྲུན་བྱས་པའི་གྲ་ནང་རྫོང་དེང་རབས་ཞིང་འབྲོག་ཐོན་ལས་གླིང་གི་དམིགས་ཡུལ་ནི་གྲ་ནང་རྫོང་གི་དེང་རབས་ཞིང་འབྲོག་ལས་དང་། འཁོར་རྒྱུག་ཞིང་ལས། སྐྱེ་ཁམས་ཞིང་ལས་ཀྱི་འཛུགས་སྐྲུན་བཅས་ལ་ལག་རྩལ་གྱི་ཞབས་འདེགས་ཞུས་ཏེ། གྲ་ནང་རྫོང་དང་རྒྱལ་ཡོངས་ཀྱིས་མཉམ་གཅིག་ཏུ་འབྱོར་འབྲིང་སྤྱི་ཚོགས་སྐྲུན་ཐུབ་པ་བྱ་རྒྱུར་སྐུལ་འདེད་གཏོང་རྒྱུ་དེ་རེད།
ཐོན་ལས་གླིང་གི་འགན་འཁུར་བ་ཞེ་ལེ་ཁུའེ་ཡིས་ངོ་སྤྲོད་བྱས་དོན། ཐོན་ལས་གླིང་གི་འབྲི་ཏ་ས་འཛིན་ནི་ཕྱི་རྒྱལ་ནས་ནང་འདྲེན་བྱས་པའི་ས་བོན་ཡིན་ཞིང་། དེར་རང་བདག་གིས་ཞིབ་འཇུག་གསར་སྤེལ་བྱས་པའི་འབྲི་ཏ་ས་འཛིན་གྱི་ཆེད་སྤྱོད་རྨང་རྫས་ཀྱི་འདེབས་གསོ་དང་སྔོན་ཐོན་གྱི་ཆུ་ལུད་ཐིགས་ཆུ་གཏོང་བའི་གཞི་གཅིག་ཅན་གྱི་མ་ལག་སྤྱད་ཡོད་པ་དང་། དེར་རྫས་ལུད་གང་ཡང་བསྣན་མེད་ཅིང་ལྗང་མདོག་སྦགས་བཙོག་མེད་པ་ཞིག་ཡིན།
“ཟླ་མཇུག་ཏུ། འཛད་སྤྱོད་པ་རྣམས་ཀྱིས་འབྲི་ཏ་ས་འཛིན་གསར་པ་མཐོང་ཐུབ་པས། གནས་དེ་གར་འབྲི་ཏ་ས་འཛིན་བཏོག་ནས་ཟས་ཆོག”
འདི་ནི་འབྲས་བུ་ཐོགས་གྲབས་ཡོད་པའི་འབྲི་ཏ་ས་འཛིན་རེད།
རིག་ནུས་ཅན་གྱི་རྒྱ་སེ་མེ་ཏོག་གནད་སྨིན་འདེབས་གསོའི་མ་ལག་གིས་རང་ཉིད་ཀྱིས་ཇུས་འགོད་བྱས་པའི་རིག་ནུས་མ་ལག་ཆ་ཚང་ཞིག་བརྒྱུད་དེ། ལོ་ཏོག་གི་ལོ་འཁོར་གྱི་ཐོན་སྐྱེད་མངོན་འགྱུར་བྱེད་ཆོག་པར་མ་ཟད་གནད་ལ་ཁེལ་ཞིང་ཕན་འབྲས་ཆེན་པོ་ཡོད།
དེའི་ནང་། མུའུ་2000ཟིན་པའི་གཟན་རྩྭའི་སོན་བཟང་གསོ་སྤེལ་རྟེན་གཞིས་ཐོན་སྐྱེད་བྱེད་འགོ་བཙུགས་པ་ནས་བཟུང་ཐོན་འབབ་ཏུན་2500ཙམ་ཟིན་པ་དང་། བསྡོམས་པས་ཐོན་ཚད་ཀྱི་ཡོང་འབབ་སྒོར་ཁྲི་850ཙམ་བྱུང་ཡོད། ས་གནས་དེ་གའི་བྱེར་འགྱུར་ས་ཞིང་སྤང་ལྗོངས་སུ་བསྒྱུར་བ་དང་དུས་མཚུངས་སུ། ས་གནས་དེ་གའི་ནོར་ལུག་གསོ་ཚགས་ལ་གཟན་རྩྭ་མཁོ་འདོན་བྱས་ཏེ་གནས་དེའི་ནོར་ལུག་གི་དགུན་དུས་ཀྱི་གཟན་རྩྭ་དཀོན་པའི་གནད་དོན་ཐག་གཅོད་བྱས་ཏེ། ས་གནས་དེ་གའི་འབྲོག་ལས་རྒྱུན་མཐུད་ངང་འཕེལ་རྒྱས་སུ་འགྲོ་བར་མདུན་སྐྱོད་ཀྱི་ཁ་ཕྱོགས་མཁོ་འདོན་བྱས་ཡོད།
འདི་ནི་ཐོན་ལས་གླིང་དུ་འདེབས་འཛུགས་བྱས་པའི་ཤ་ཆེན་གྱི་རྩྭ་རེད།
ཚན་རྩལ་གྱིས་ལྷོ་ཁ་གྲོང་ཁྱེར་གྲ་ནང་རྫོང་གི་དབུལ་སྒྲོལ་འགག་སྒྲོལ་ལ་ནུས་པ་འདོན་བཞིན་ཡོད་པ་དང་། ཡར་ཀླུང་བུ་ཕྲུག་གི “དབུལ་པོའི་རྩ་བ”ལེན་བཞིན་ཡོད།
ཟུར་མཁར་གྲོང་ཚོའི་རིམ་པ་ཉིས་བརྩེགས་ཀྱི་ཐོག་ཁང་སྟར་པ་རེ་རེ་བཞིན་གྲལ་འགྲིག་པོར་ཡོད་ཅིང་། གྲོང་མི་བཀྲ་ཤིས་ཀྱིས་རང་ཁྱིམ་གྱི་མགྲོན་ཁང་ལ་མཛེས་བཟོ་བྱེད་བཞིན་ཡོད། ད་ཆའི་བཀྲ་ཤིས་ནི་ལོ་འགའི་སྔོན་གྱི་རོགས་རམ་བྱེད་མཁན་མེད་པ་དང་མིས་སྙིང་རྗེ་སྐྱེ་བའི་མི་དེ་མིན།
ལོ་37ལ་སླེབས་པའི་བཀྲ་ཤིས་ལ་གོང་དུ་ལོ་ན་བགྲེས་པའི་ཨ་ཕ་ཡོད་པ་དང་། འོག་ཏུ་སློབ་ཆུང་འགྲིམ་བཞིན་པའི་བུ་ཡོད་པས། ཁྱིམ་ཚང་གང་བོས་མོར་བརྟེན་ནས་འཚོ་བ་རོལ་གྱི་ཡོད། ཁྱིམ་གྱི་ངལ་རྩོལ་ནུས་ཤུགས་གཅིག་པུ་དེ་ཡིན་པའི་ཆ་ནས་བཀྲ་ཤིས་ཀྱིས་སྒོར་མོ་བཙལ་དགོས་པར་མ་ཟད་ད་རུང་ཐག་རིང་དུ་འགྲོ་མི་རུང་།
2017ལོར་གྲ་ནང་རྫོང་དེང་རབས་ཞིང་འབྲོག་ཐོན་ལས་གླིང་བཙུགས་ནས་ཐོན་སྐྱེད་བྱེད་འགོ་ཚུགས་པ་དེས་མོའི་དཀའ་ངལ་དེ་དག་ཐག་གཅོད་བྱས་ཡོད་པ་རེད།
འདི་ནི་བཀྲ་ཤིས་ཚང་གི་ཁྱིམ་ལ་མཛེས་བཟོ་བྱེད་བཞིན་པའི་རྣམ་པ་རེད།
“ཞིང་ལས་ལ་ཁོམ་ལོང་བྱུང་དུས་ངས་ཐོན་ལས་གླིང་གི་འབྲི་ཏ་ས་འཛིན་རྟེན་གཞིའི་ནང་ལས་ཀ་བྱེད་ཀྱི་ཡོད་ཅིང་། ཉིན་ལྟར་ཡོང་འབབ་སྒོར་150ཡོད། འདིས་ངའི་དཔལ་འབྱོར་གྱི་ཡོང་འབབ་ཆེས་ཆེར་འཕར་ཡོད”ཅེས་བཀྲ་ཤིས་ཀྱིས་ཁྱིམ་དང་ཐག་ཉེ་བ་དང་ཁྱིམ་ཚང་ལ་ལྟ་རྟོག་བྱ་རྒྱུར་འཐུས་ཤོར་མི་འགྲོ་བའི་ལས་ཀ་དེར་བློ་ཡིད་ཚིམས་པོ་ཡོད།
“འབྲི་ཏ་ས་འཛིན་འདེབས་འཛུགས་དང་། དོ་དམ། འཐུ་བ། ཐུམ་སྒྲིལ་བཅས་རིམ་པ་རེ་རེར་ལས་གཉེར་གྱི་དགོས་མཁོ་ཆེ་ཙམ་ཡོད་པ་དང་། ལས་མི་སྤྱོད་ཚད་མང་བའི་སྐབས་སུ་ཉིན་རེར་མི་30དགོས་ཀྱི་ཡོད། སྤྱིར་བཏང་གི་གནས་ཚུལ་ལའང་མི་10ལྷག་ཙམ་དགོས”ཞེས་ཐོན་ལས་གླིང་གི་འགན་འཁུར་བ་ཞེ་ལེ་ཁུའེ་ཡིས་མཚམས་སྦྱོར་བྱས་པ་དང་། ཁོས་བཤད་རྒྱུར་ཐོན་ལས་གླིང་གིས་རིམ་རྩིས་བྱས་ན་ས་གནས་དེ་གའི་གྲོང་མིར་གླ་ཆ་སྒོར་ཁྲི་460ལྷག་ཙམ་སྤྲོད་ཀྱི་ཡོད་ཅེས་བཤད།
གྲ་ནང་རྫོང་དེང་རབས་ཞིང་འབྲོག་ཐོན་ལས་གླིང་བཙུགས་པ་ནས་བཟུང་། ཐོག་མཐའ་བར་གསུམ་དུ་མཐའ་འཁོར་གྱི་དུད་ཚང་དབུལ་པོ་དབུལ་སྒྲོལ་ཕྱུག་འགྱུར་ཡོང་རྒྱུར་སྐུལ་ཁྲིད་བྱ་བར་འབད་དེ། ས་གནས་དེ་གའི་གྲོང་མི་ལས་མིའི་ལས་ཀ་ཐག་གཅོད་བྱས་པར་མ་ཟད། ས་གནས་དེ་གའི་སློབ་ཆེན་གྱི་སློབ་མ་26གི་ལས་ཞུགས་གནད་དོན་ཐག་གཅོད་བྱས་ནས་ལོ་ལྟར་ཉིང་ཁྲི་ཞིང་འབྲོག་སློབ་གླིང་དང་། ལྷོ་ཁ་ལས་རིགས་སློབ་གྲྭ་སོགས་ལ་སློབ་ཆེན་སློབ་མའི་དངོས་སྦྱོང་མི་གྲངས་30མཁོ་འདོན་བྱེད་ཀྱི་ཡོད། གཞན་ཡང་ཐོན་ལས་གླིང་གིས་ལོ་ལྟར་གྲོང་ཚོ་ཨུ་ལྷན་ལ་ཐུན་མོང་སྒོས་ས་ཞིང་གི་བོགས་དངུལ་སྒོར་ཁྲི་56ཙམ་སྤྲོད་ཀྱི་ཡོད།
2019ལོར། ཉིང་ཁྲི་ཞིང་འབྲོག་སློབ་གླིང་ཕྱུགས་རིགས་སྨན་པའི་ཆེད་ལས་ནས་མཐར་ཕྱིན་པའི་བསྟན་འཛིན་ཟླ་བ་གྲ་ནང་རྫོང་དེང་རབས་ཞིང་འབྲོག་ཐོན་ལས་གླིང་གི་བཞོན་མ་གསོ་ཚགས་རྟེན་གཞིར་ཡོང་བ་རེད།
འདི་ནི་བསྟན་འཛིན་ཟླ་བས་བཞོན་མ་གསོ་ཚགས་རྟེན་གཞིར་ལས་ཀ་བྱེད་པའི་རྣམ་པ་རེད།
“སློབ་ཆེན་དུ་རིགས་པའི་གཞུང་ལུགས་ཀྱི་ཤེས་བྱ་ཆ་ཚང་སྦྱངས་པ་དང་། གནས་འདིར་ཡོང་ནས་ལག་ལེན་ལ་བརྟེན་ནས་རང་ཉིད་གསར་བཟོ་བྱ་རྒྱུའི་རེ་བ་བྱེད་ཀྱི་ཡོད”ཅེས་བསྟན་འཛིན་ཟླ་བས་བཤད་པ་དང་། ཁོས་ཚན་རིག་དང་མཐུན་པའི་ཕྱུགས་ལས་གསོ་སྤེལ་ལས་རིགས་ལ་འཕེལ་རྒྱས་ཀྱི་མདུན་ལྗོངས་ཧ་ཅང་ཆེན་པོ་ཡོད་པས། རང་ཉིད་ཀྱིས་འདི་ནས་ཆེད་ལས་ཀྱི་ཤེས་བྱ་དེ་བས་མང་བ་སློབ་སྦྱོང་བྱེད་རྒྱུ་ཡིན་ཞེས་བཤད།
བྱ་བ་ཆུང་ཙག་ཚང་མས་མིའི་བསམ་བློ་དང་སྙིང་སྟོབས་ལ་འགྱུར་ལྡོག་འགྲོ་བར་སྐུལ་འདེད་གཏོང་བཞིན་ཡོད་ཅིང་། གྲ་ནང་རྫོང་དེང་རབས་ཞིང་འབྲོག་ཐོན་ལས་གླིང་གིས་ལག་རྩལ་གསར་པ་དང་དོ་དམ་འཕེལ་རྒྱས་ཀྱི་འདུ་ཤེས་གསར་པ་སྦ་གསང་མེད་པར་བརྒྱུད་བསྒྲགས་བྱས་ཏེ། ས་གནས་དེ་གའི་ལག་རྩལ་དོ་དམ་པ་ཁག་གཅིག་གསོ་སྐྱོང་བྱས་ཡོད་པ་རེད།
འདི་ནི་ཐག་ཉེ་སར་ལས་ཞུགས་ཐུབ་པའི་སློབ་ཆེན་སློབ་མ་ཞི་བློས་རྒྱ་སེ་མེ་ཏོག་རྟེན་གཞིར་རྒྱ་སེའི་མེ་ཏོག་ལ་བདག་སྐྱོང་བྱེད་པའི་རྣམ་པ་རེད།
ན་ནིང་། ཀྲུང་གོ་ཞིང་ལས་སློབ་ཆེན་གྱི་དགེ་རྒན་ཆེ་མོ་བའི་ལས་དོན་ས་ཚིགས་དེ་གྲ་ནང་དེང་རབས་ཞིང་འབྲོག་ཐོན་ལས་གླིང་དུ་བཙུགས་ཤིང་། དེ་ནི་རྒྱལ་ཡོངས་ཀྱི་མཐོ་སློབ་ཀྱིས་བོད་ལྗོངས་སུ་བཙུགས་པའི་དགེ་རྒན་ཆེ་མོའི་ལས་དོན་ས་ཚིགས་གཅིག་པུ་དེ་ཡིན། དགེ་རྒན་ཆེ་མོ་བའི་ལས་དོན་ས་ཚིགས་དངོས་སུ་ལས་གཉེར་བྱས་རྗེས་གྲ་ནང་ཞིང་ཁ་དང་ཐོན་སྐྱེད་ཀྱི་འཐབ་ས་དང་པོར་རྒྱུན་ཆད་མེད་པར་རིག་སྟོབས་ཀྱི་དབུལ་སྐྱོར་བྱས་ཏེ། གྲ་ནང་དབུལ་སྒྲོལ་འགག་སྒྲོལ་བྱ་བར་“རང་བརྟེན”གྱི་མ་ལག་གསར་གཏོད་བྱ་རྒྱུ་རེད།
ཐོན་ལས་གླིང་གི་བཞོན་མ་གསོ་ཚགས་རྟེན་གཞིའི་ནང་བཞོན་མ་བརྒྱ་ལྷག་ཙམ་ཡོད་ཅིང་། ཐོན་ལས་གླིང་གི་འགན་འཁུར་བ་ཞེ་ལེ་ཁུའེ་ཡིས་བཤད་རྒྱུར། ཟླ་གོང་མར་གླིང་ཁུལ་དུ་ཧོ་སི་ཐན་གྱི་བཞོན་མ་དཀར་ནག་མགོ་གྲངས་100ནང་འདྲེན་བྱས་པ་དང་། སྔོན་དཔག་བྱས་ན་བཞོན་མ་གསོ་ཚགས་ཀྱིས་ས་གནས་དེ་གའི་གྲོང་མིར་འབབ་འཕར་སྒོར་ཁྲི་30ཙམ་ཡོང་བར་སྐུལ་ཁྲིད་ཐུབ་རྒྱུ་རེད། “ཐོན་ལས་གླིང་གིས་དོན་དངོས་ཀྱིས་ས་གནས་དེ་གའི་གྲོང་མི་ཕ་ཡུལ་དང་ཐག་ཉེ་ས་ནས་ལས་ཞུགས་འབབ་འཕར་ཡོང་བར་སྐུལ་ཁྲིད་བྱས་ཡོད་ཅེས་བརྗོད་ཆོག”ཅེས་བཤད།
ཡར་ཀླུང་གཙང་པོའི་འགྲམ་ངོགས་སུ་ཚན་རྩལ་དབུལ་སྐྱོར་གྱི་མྱུ་གུ་འཇམ་ཐིང་ངེར་འབུས་ཏེ། གྲ་ནང་མང་ཚོགས་ནི་དཔྱིད་དཔལ་བཞད་པ་ལྟར་འབྱུང་འགྱུར་གྱི་འཚོ་བར་ཡིད་ཆེས་བརྟན་པོས་ཁེངས་ཡོད།
