འཛམ་ཐང་རྫོང་གིས་འགྲིམ་འགྲུལ་ལ་བརྟེན་ནས་དབུལ་ཕོངས་ལས་ཐར་བའི་གནས་ཚུལ་བཀོད་པ།

     ལམ་འདི་བསྐྲུན་རྗེས་ད་ལྟ་འབྲོག་རར་དུས་ཚོད་གཅིག་གི་ཐོན་ཐུབ། སྔོན་ཆད་རྟ་བཞོན་ན་ཡང་ཉིན་ཞག་གཅིག་ལ་འགྲོ་དགོས་ཞེས་བཤད། འཛམ་ཐང་རྫོང་རྡོ་སྟོད་ཡུལ་ཚོ་བུ་རྒྱས་གྲོང་སྡེའི་འབྲོག་པ་བློ་པོ་རླངས་འཁོར་ལ་བསྡད་དེ་མར་གོར་དང་སྔོ་ཚལ་ཕྱུགས་ལས་གཉེར་བའི་བཟའ་མི་ཚོར་སྐྱེལ་བཞིན་ཡོད།
     ཟླ་5བ་དང་ཟླ་6པ་ནི་མཐོ་སྒང་གི་དབྱར་རྩྭ་དགུན་འབུ་བརྐོ་བའི་དུས་ཚིགས་ལེགས་ཤོས་དེ་ཡིན་ཞིང་། བློ་པོ་ཡིས་བཟའ་མི་ཚོར་ཟ་མ་བསྐྱལ་རྗེས་རི་མགོར་སོང་ནས་དབྱར་རྩྭ་དགུན་འབུ་བརྐོ་རུ་སོང་། 
     ཇ་རྟའི་ཚོང་ལམ་ནས་བཟུང་འབྲོག་ཁུལ་མང་ཚོགས་ཀྱི་ཐོན་སྐྱེད་འཚོ་བ་ནི་འགྲིམ་འགྲུལ་དང་འབྲེལ་བ་དམ་ཟབ་ཡོད། སྔོན་ཆད་འཛམ་ཐང་རྫོང་གི་རྡོ་སྟོད་དང་ན་མདའ་ཡུལ་ཚོ་གཉིས་ཀྱི་འབྲོག་ཁྱིམ་400ཙམ་ལ་འགྲིམ་འགྲུལ་སྟབས་མི་བདེ་བས། 2016ལོར་རྒྱལ་ཁབ་འགྲིམ་འགྲུལ་སྐྱེལ་འདྲེན་པུའུ་ཡི་དམིགས་འཛུགས་དབུལ་སྐྱོར་གྱིས་རྒྱབ་སྐྱོར་འོག  མ་དངུལ་སྒོར་ཁྲི་5000ལྷག་བཏང་བ་དང་། ལམ་ལས་པ་200ལྷག་གིས་དྲོ་གྲང་དང་གསོ་རླུང་དཀོན་པའི་དཀའ་ངལ་ལ་མ་འཛེམས་པར། མཚོ་ངོས་ལས་མཐོ་ཚད་སྨི་4000ཟིན་པའི་ས་ཆ་རུ་སྤྱིའི་རིང་ཚད་སྤྱི་ལེ་40ཙམ་གྱི་ལམ་བསྐྲུན་ནས་འབྲོག་པ་མང་ཚོགས་2000ལྷག་གི་འགྲོ་འོང་དང་འཚོ་བ། ཐོན་སྐྱེད་ལ་སྟབས་བདེ་བཟོས།
     ན་མདའ་གྲོང་རྡལ་ཨ་སུག་མ་གྲོང་སྡེའི་འབྲོག་པ་སྐར་མ་འཕྲིན་ལས་ལ་མཚོན་ན། མཚོ་ངོས་ལས་མཐོ་ཚད་སྨི་4000ཟིན་པའི་ཨ་སུག་མ་གྲོང་སྡེའི་འགྲོ་འོང་ལམ་བུ་གཅིག་པུ་ནི་འབྲོག་ལམ་དེ་རེད། འགྲིམ་འགྲུལ་སྟབས་མི་བདེ་བས་གྲོང་ཁྱེར་དུ་འཚོ་བའི་དངོས་རྫས་ཉོ་རུ་འགྲོ་ཐེངས་རེར། ཡང་ན་དབྱར་དགུན་གྱི་དུས་སུ་འབྲོག་ས་གནས་སྤར་རྒྱུ་ནི་ས་གནས་ཀྱི་འབྲོག་པ་མང་ཚོགས་ཀྱི་སེམས་ནད་ཅིག་རེད། སྤྱི་ལེ་བཅུ་ལྷག་གི་ལམ་ཐག་ལ་ཉིན་ཞག་གཅིག་ཙམ་འགྲོ་དགོས། 

     ལམ་འདི་དངོས་སུ་ཤར་གཏོང་བྱས་པ་དང་བསྟུན་ཐག་ཉེ་ཤོས་ཀྱི་བུ་རྒྱས་གྲོང་སྡེ་དང་ཨ་སུག་མ་གྲོང་སྡེའི་འབྲོག་པ་ཚོའི་ཐོན་སྐྱེད་དང་འཚོ་བར་འགྱུར་ལྡོག་བྱུང་ཡོད། ལམ་ཤར་གཏོང་ཐུབ་རྗེས་འབྲོག་པ་ཚོས་རླངས་འཁོར་དང་འདྲུད་འཐེན་འཕྲུལ་འཁོར་ཉོས་པ་དང་། སྔོན་ཆད་ཀྱི་རྟ་ཁལ་མ་འདེད་པའི་རྣམ་པར་འགྱུར་ལྡོག་བྱུང་འདུག
     ལམ་འདི་ཤར་གཏོང་བྱས་རྗེས་མང་ཚོགས་ལ་འདུ་ཤེས་གསར་བ་ཞིག་ཆགས། རྐ་ལམ་དགུ་ཁུག་གི་རང་བྱུང་གི་མཛེས་ལྗོངས་ཀྱིས་ལྗོངས་རྒྱུ་བ་མང་པོའི་ཡིད་དབང་བཀུག་ཅིང་། འབྲོག་པ་ཀརྨ་ནམ་པོ་ཡིས་ཚོང་ལམ་གྱི་གོ་སྐབས་དམ་པོར་བཟུང་སྟེ་འབྲོག་ཁྱིམ་སྤྲོ་གསེང་ཁང་གཉེར་བ་དང་། ན་ནིང་གི་ཟླ་བདུན་པ་དང་བརྒྱད་པར་ཡོང་འབབ་སྒོར་ཁྲི་2ཙམ་ཡོད།
     ལམ་ཤར་གཏོང་ཐུབ་ཚེ་དབུལ་སྒྲོལ་ཕྱུག་འགྱུར་ལ་ཡིད་ཆེས་ཀྱིས་ཁེངས་འདུག ཉེ་བའི་ལོ་ཤས་རིང་རྒྱལ་ཁབ་འགྲིམ་འགྲུལ་སྐྱེལ་འདྲེན་པུའུ་ཡི་གནས་འཁེལ་རོགས་སྐྱོར་འོག་འཛམ་ཐང་རྫོང་གི་འགྲིམ་འགྲུལ་ལ་འཕོ་འགྱུར་ཆེན་པོ་བྱུང་ཡོད་ཅིང་། 2016ལོ་དང་2019ལོའི་བར་ཡུལ་ཚོ་དང་གྲོང་རྡལ། གྲོང་སྡེ་ཡི་མཁྲེགས་འགྱུར་ལ་དང་འགྲུལ་སྐྱེལ་ལམ་གྱི་དམིགས་ཚད་མངོན་འགྱུར་བྱུང་ཡོད་པ་དང་། སྔོན་ཆད་འགྲོ་འོང་དཀའ་བ་ནས་འགྲིམ་འགྲུལ་སྟབས་བདེ་བ་དང་། འགྲིམ་འགྲུལ་ཡང་འགྲོ་འོང་ལམ་ནས་ཐོན་ལས་ལམ་དང་ལྗོངས་སྐོར་ལམ་བཅས་སུ་འགྱུར་བཞིན་ཡོད། རྐ་ལམ་དགུ་ཁུག་ལམ་རྒྱུད་ཀྱི་འབྲོག་པ་མང་ཚོགས་འབྱུང་འགྱུར་གྱི་འཚོ་བ་ལ་ཡིད་ཆེས་ཀྱིས་ཁེངས་ཡོད། 
     ཤེས་རྟོགས་བྱུང་བ་ལྟར་ན། ཏང་ཀྲུང་དབྱང་གིས་འགྲིམ་འགྲུལ་དམིགས་འཛུགས་དབུལ་སྐྱོར་འཐབ་ཇུས་ལག་བསྟར་བྱས་པ་ནས་བཟུང་། རྒྱལ་ཁབ་འགྲིམ་འགྲུལ་སྐྱེལ་འདྲེན་པུའུ་དང་སི་ཁྲོན་ཞིང་ཆེན་འགྲིམ་འགྲུལ་སྐྱེལ་འདྲེན་ཐིང་གིས་འཛམ་ཐང་རྫོང་ལ་མ་དངུལ་སྒོར་དུང་ཕྱུར་11.55བཏང་བ་དང་རྣམ་གྲངས་62ལག་བསྟར་བྱས་ཡོད་ཅིང་། དེའི་ནང་རྒྱལ་ཁབ་དང་ཞིང་ཆེན་རིམ་པའི་གཞུང་ལམ་གཙོ་བོ་2དང་སྤྱི་ལེ་127.9དང་། གྲོང་གསེབ་ཀྱི་གཞུང་ལམ་24དང་སྤྱི་ལེ་332.7། ཟམ་པ་32བཅས་བསྐྲུན་ཡོད། རྫོང་ཡོངས་ཀྱི་གཞུང་ལམ་དངོས་སུ་ཤར་གཏོང་ཐུབ་པའི་ལམ་ཚད་སྤྱི་ལེ་806.288ཟིན་ཡོད། མིག་སྔར་རྐ་ལམ་དགུ་ཁུག་འདི་ནི་མང་ཚོགས་འབྱོར་འབྲིང་གི་ཕྱོགས་སུ་བསྐྱོད་པ་དང་། མང་ཚོགས་ཀྱི་ཕྱུག་འགྱུར་གྱི་རེ་བ་བསྐང་ཐུབ་པའི་ལམ་ཞིག་ཡིན་ནོ།།