ཞོགས་པའི་ཉི་ཟེར་འབར་ཁམས་གྲོང་ཁྱེར་གྱི་རི་ཀླུང་ཀུན་ཏུ་འཕྲོས་པ་དང་ལྷན་དུ་དལ་འབབ་ཆུ་བའི་རྒྱུན་དེད་དེ་གྲོང་ཁྱེར་ནས་སྤྱི་ལེ་འགའ་སོང་རྗེས་ཡིད་དུ་འོང་བའི་གྲོང་སྡེ་ཞིག་ཏུ་སླེབས་སོང་། གྲོང་སྡེ་དེའི་མིང་ལ་སའི་སོ་ཞེས་འབོད་ཅིང་མདུན་གྱི་དེའུ་འབུར་སྟེང་དུ་བརྗིད་ཅིང་རྔམ་ལ། བཟོ་ལེགས་པའི་ཕོ་བྲང་ཉམས་དགའ་བ་ཞིག་ཀྲོང་ངེར་འགྱིང་འདུག་ལ། དེ་ནི་རྒྱལ་རོང་རྒྱལ་ཁག་བཅོ་བརྒྱད་ཀྱི་ཡ་གྱལ་ཅོག་ཙེ་རྒྱལ་པོའི་གཞིས་ཀའམ་ཕོ་བྲང་རེད་འདུག །

    གནས་ཚུལ་རྒྱུས་ལོན་བྱུང་བ་ལྟར་ན། ཅོག་ཙེ་རྒྱལ་པོ་ནི་ཡོན་རྒྱལ་རབས་ཀྱི་ལོ་ཉི་ཤུ་རྩ་གསུམ་པར་(སྤྱི་ལོ1286)རྒྱལ་པོ་བསྐོས་པ་དང་རྒྱལ་པོ་ཐོག་མ་ནི་སྟག་འབུམ་ཡིན། ཅོག་ཙེ་རྒྱལ་པོས་བསྟུད་མར་ལོ་665སྟེ་མི་རབས་བཅུ་བདུན་རིང་ས་གནས་དེ་ལ་དབང་བསྒྱུར་བྱས་ཤིང་། ཕོ་བྲང་འདི་ནི་རྒྱལ་པོའི་གཞུང་ལས་སྒྲུབ་ས་དང་། རྒྱལ་པོ་དང་ཁྱིམ་མིའི་འཚོ་གནས་བྱེད་ས་ཞིག་ཀྱང་ཡིན་འདུག །ད་ལྟ་ཡོད་པའི་ཕོ་བྲང་འདི་ནི་སྤྱི་ལོ་1918ལོར་བཞེངས་པ་དང་སྤྱི་ལོ་1936ལོར་མེས་བསྲེགས། སྤྱི་ལོ་1938ནས་1940ལོའི་བར་རྒྱལ་པོ་མི་རབས་བཅུ་དྲུག་པ་བསོད་ནམས་ཚེ་རིང་གིས་སྔོན་མའི་གནས་སའི་སྟེང་དུ་བསྐྱར་བསྐྲུན་བྱས་སྐད་འདུག །ཕོ་བྲང་དེའི་སྤྱིའི་རྒྱ་ཁྱོན་ལ་སྨི་གྲུ་བཞི་མ་1500ཙམ་ཡོད་པ་དང་ཁང་མིག་ཆེ་ཆུང་དུ་མ་དང་འགྲེམ་སྟོན་ཁང་63འདུག །འཛུགས་སྐྲུན་གྱི་རྒྱ་ཁྱོན་ཆེ་བ་དང་ཁང་བ་མཐོ་ཞིང་བརྗིད་ལ་རྒྱལ་རོང་ས་ཁུལ་གྱི་ཐུན་མོང་མ་ཡིན་པའི་བཟོ་བཀོད་ཀྱི་ཁྱད་ཆོས་ཕུན་སུམ་ཚོགས་པ་ལྡན།

    སྣེ་ཤན་པས་ངོ་སྤྲོད་བྱས་པ་ལྟར་ན། སྤྱི་ལོ་1935ལོར་དམར་དམག་རྒྱང་སྐྱོད་བྱེད་སྐབས་མའོ་ཙེ་ཏུང་དང་ཀྲུའུ་ཏེ། ཀྲོའུ་ཨུན་ལའེ་སོགས་ཕོ་བྲང་འདི་རུ་གཟའ་འཁོར་གཅིག་ཙམ་རིང་བཞུགས་མྱོང་ལ། གསར་བརྗེའི་ལས་ཀ་བསྒྲུབས་མྱོང་སའི་ཕོ་བྲང་ཁྱད་པར་བ་ཞིག་ཡིན་ལ། དེང་དུས་ཀྱང་སྐབས་དེའི་ཡིད་དབང་འཕྲོག་པའི་འདྲ་པར་དང་ལོ་རྒྱུས་དུ་མ་ཞིག་མཇལ་རྒྱུ་འདུག །

    དེང་དུས་ནི་ཝུན་ཁྲོན་ནས་འབར་ཁམས་གྲོང་ཁྱེར་བར་གྱི་མྱུར་བགྲོད་གཞུང་ལམ་ཤར་བཏང་བྱས་ཟིན་པ་དང་ཡུལ་སྐོར་བ་གང་མང་ཞིག་ས་གནས་དེ་རུ་སྤྲོ་འཁྱམ་དང་རིག་གནས་ཉམས་ཞིབ་ཏུ་ཡོང་བཞིན་འདུག་ལ། བཟོ་བཀོད་མཛེས་ཤིང་སྲུང་སྐྱོབ་གང་ལེགས་བྱས་པའི་ཕོ་བྲང་དེ་ནི་ཡུལ་སྐོར་བའི་བསྟི་གནས་ཤིག་ཏུ་གྱུར་པ་དང་། དེ་དང་དུས་མཚུངས་སུ་ཉེར་འཁོར་གྱི་གྲོང་སྡེ་དག་ཀྱང་ཡུལ་སྐོར་ལྗོངས་རྒྱུ་སོགས་ལ་བརྟེན་ནས་འཕེལ་རྒྱས་ཀྱི་ལམ་ཁ་རུ་འགྲོས་ཚད་མྱུར་མོས་སྐྱོད་བཞིན་མཆིས་སོ། །