འབྲོག་པའི་ཐོན་རྫས་དེང་རབས་ལག་རྩལ་དང་སྦྲེལ་བའི་ཧུང་ཡོན་རྫོང་ཀུན་ཕན་ཞིང་འབྲོག་ཆེད་ལས་མཉམ་འབྲེལ་སྤྱི་གཉེར་ཁང་།

    སྤྱི་ཟླ་6པའི་ཚེས་15ཉིན། ཧུང་ཡོན་རྫོང་ཀུན་ཕན་ཞིང་འབྲོག་ཆེད་ལས་མཉམ་འབྲེལ་སྤྱི་གཉེར་ཁང་དུ་འབྲེལ་ཡོད་གནས་ཚུལ་རྒྱུས་ལོན་བྱེད་དུ་ཕྱིན་སྐབས། སྣེ་ཁྲིད་པས་ཐོན་རྫས་ལ་རོལ་མྱོང་བྱོས་ཟེར་ནས་ནང་ལོགས་སུ་དར་ཁྱབ་ཆེ་བའི་ཤོག་ཕོར་ཅན་གྱི་ཞོ་ཞིག་སྤྲད་བྱུང་བས། དེ་མ་ཐག་དོ་སྣང་ཅི་ཡང་མེད་པར་ཁ་གོང་འཐུང་བ་ཡིན། དེང་རབས་ཀྱི་ལག་རྩལ་བེད་སྤྱོད་ནས་ཆེད་དུ་བཟོ་པའི་ཤོག་ཕོར་འདིའི་ནང་འབྲི་ཞོ་ཞིམ་པོ་དེ་འདྲ་ཞིག་ཡོད་རྒྱུ་ལར་ནས་དྲན་མ་བྱུང་། ཧའོ་ཧྲེང་150ཡོད་པའི་འབྲི་ཞོ་ཤོག་ཕོར་གོང་དེ་འཐུང་ཚར་རྗེས་དའང་གཅིག་འཐུང་འདོད་ཀྱང་། ཉེ་འཁོར་དུ་མགྲོན་པོ་མང་པོ་ཞིག་འདུག་པས་སྟབས་བདེ་པོ་ཞིག་མ་བྱུང་། ཤོག་ཕོར་གྱི་ངོས་སུ་རྫས་སོ་སོའི་འདུས་ཚད་དང་དུས་ཡུན། ཉར་ཚགས་བྱེད་སྟངས་སོགས་ཞིབ་ཕྲ་བྲིས་འདུག་ལ། ཁྱད་པར་དུ་དྲོད་ཚད་ངེས་ཅན་ཐོག་ཉིན་21ལ་ཉར་ཚགས་བྱེད་ཆོག་ཚུལ་བྲིས་འདུག་པས། སྤྱིར་བཏང་ཡིན་ན་ཉིན་གཉིས་གསུམ་འགོར་རྗེས་ཞོ་སྐྱུར་ནས་འཐུང་མི་ལོ་ཡང་། དེང་དུས་དེང་རབས་ལག་རྩལ་གྱི་གཞོགས་འདེད་འོག་རོང་འབྲོག་གི་ཐོན་རྫས་དག་རྒྱལ་སྤྱིའི་ཁྲོམ་ར་རུ་སླེབས་པར་རེ་བ་ཅི་ལ་མེད།

འབྲི་ཞོ་མངར་མོ།

    གནས་ཚུལ་རྒྱུས་ལོན་བྱུང་བ་ལྟར་ན། སྤྱི་ལོ་2016ལོའི་ཟླ་8པར་ཧུང་ཡོན་རྫོང་ཀུན་ཕན་ཞིང་འབྲོག་ཆེས་ལས་མཉམ་འབྲེལ་སྤྱི་གཉེར་ཁང་གསར་དུ་བཙུགས་ཤིང་། རྫོང་ཡོངས་ཀྱི་ཡུལ་ཚོ་དང་གྲོང་རྡལ་11གི་རོང་འབྲོག་དུད་ཁྱིམ་7000ལྷག་སྣེ་ཁྲིད་ནས་སྲིད་གཞུང་+སྤྱི་ཁྱབ་མཉམ་ལས་ཁང་དང་དངུལ་རྩའི་ལས་ཁུངས། མཉམ་ལས་ཁང་། འབྲོག་ཁྱིམ། དབུལ་ཕོངས་དུད་ཁྱིམ་བཅས་མཉམ་འབྲེལ་གྱི་“1+5”ཡི་ཐོན་ལས་ཐབས་ཤེས་བེད་སྤྱོད་ནས་དབུལ་སྐྱོར་བྱེད་བཞིན་ཡོད་པ་དང་། ད་དུང་རྫོང་ཡོངས་ཀྱིས་ཡིག་ཚགས་དང་བྱང་བུ་བཟོས་པའི་དབུལ་ཕོངས་དུད་ཁྱིམ་གྱི་སྲིད་གཞུང་དབུལ་སྐྱོར་མ་དངུལ་དང་ཐོན་ལས་རོགས་འདེད་མ་དངུལ་སོགས་མ་རྐང་འཇོག་པ་སོགས་ཀྱི་ཐབས་ཤེས་སྤྱོད་ནས་ལོ་རེར་དུད་ཚང་རེ་ལ་ཆ་སྙོམས་སུ་ཡོང་བབས་སྒོར་650ཇེ་མང་བཏང་ཡོད། ད་དུང་དེས་མ་ཚད་ཡིག་ཚགས་དང་བྱང་བུ་བཟོས་པའི་དབུལ་ཕོངས་དུད་ཚང་100ལ་སྤྱི་ཁྱབ་མཉམ་ལས་ཁང་དུ་ལས་ཀ་བཀོད་སྒྲིག་བྱས་ཤིང་། ཐོན་ལས་ཀྱིས་སྣེ་འདྲེན་དང་གཉིས་ཕན་མཉམ་རྒྱལ། བབ་འཕར་ཕྱུག་འགྱུར། གནད་སྨིན་དབུལ་སྒྲོལ་བཅས་ཀྱི་འཕེལ་རྒྱས་དམིགས་དབེན་དངོས་སུ་མངོན་འགྱུར་བྱུང་ཡོད།

འཛུགས་སྐྲུན་བྱེད་བཞིན་པའི་ཧུང་ཡོན་རྫོང་ཀུན་ཕན་ཞིང་འབྲོག་ཆེད་ལས་མཉམ་འབྲེལ་སྤྱི་གཉེར་ཁང་།

སྤྱི་གཉེར་ཁང་གི་བཟོ་བཀོད།

    ཧུང་ཡོན་རྫོང་ཀུན་ཕན་ཞིང་འབྲོག་ཆེད་ལས་མཉམ་འབྲེལ་སྤྱི་གཉེར་ཁང་གི་སྤྱི་གཉེར་པ་བློ་བཟང་གིས་བཤད་རྒྱུར། ཧོང་ཡོན་རྫོང་ཨུ་དང་སྲིད་གཞུང་གི་རྒྱབ་སྐྱོར་འོག་སྤྱི་གཉེར་ཁང་འདི་བཙུགས་ཐུབ་པ་བྱུང་། ང་ཚོའི་སྤྱི་གཉེར་ཁང་ལ་ཀུན་ཕན་ཞེས་མིང་བཏགས་ཡོད་དེ། དེ་ནི་གཙོ་བོ་མི་དམངས་ལ་ཕན་ཐོག་པའི་ཆེད་དུ་ཡིན་ལ། འབྲོག་པའི་འོ་མ་དང་མར། རྐོ་བ། རྩིད་པ་སོགས་ཐོན་རྫས་སུ་བསྒྱུར་ནས་རིན་གོང་གང་ལེགས་ཤིག་ཐོབ་པར་འབད་འབུངས་བྱེད་བཞིན་ཡོད། དམིགས་སྔར་འབྲི་ཞོ་སྤུས་དག་ཐོན་སྐྱེད་བྱས་ནས་རྔ་བ་ཁུལ་ཙམ་མ་ཚད་རྒྱལ་ནང་གི་གྲོང་ཁྱེར་ཆེ་ཁག་ཁྲེན་ཏུའུ་སོགས་སུ་སྐྱེལ་འདྲེན་བྱེད་བཞིན་ཡོད་ལ། སྤྱིར་བཟོ་གྲྭ་གསར་པ་ཞིག་ཡིན་ཀྱང་རྒྱལ་ཁབ་ཀྱི་རྒྱབ་སྐྱོར་འོག་མི་དམངས་ལ་ཕན་ཐོག་རྒྱ་ཆེན་པོ་འདུག་ཅེས་ཟེར། ཁོང་གིས་ད་དུང་ཤིན་ཏུ་གཟབ་ནན་སྒོས་ས་གནས་འདིའི་སློབ་མ་རྣམས་སློབ་མཐར་ཕྱིན་རྗེས་གཞུང་ཞབས་པ་དང་དགེ་རྒན་སོགས་ལ་རྒྱུགས་སྤྲད་རྒྱུ་འཚང་ཁ་རྒྱེབ་འདུག་པ་ལས། རང་གིས་ལས་གཏོང་བྱེད་འདོད་མཁན་ཤིན་ཏུ་ཉུང་ཉུང་རེད། ང་ཚོས་ངེས་པར་དུ་འདི་ལྟ་བུའི་འདུ་ཤེས་དེ་རྩ་གཏོར་གཏོང་ནས་ས་གནས་རང་ལ་ཕན་ཞིང་སྤྱོད་སྒོ་ཆེ་བའི་ལག་ཤེས་གང་མང་སྦྱོང་དགོས་བཞིན་འདུག་ཅེས་ཟེར།

ནང་གི་སྒྲིག་གཞི་དང་འཕྲུལ་ཆ།

    ངོ་སྤྲོད་བྱས་པ་ལྟར་ན། སྤྱི་གཉེར་ཁང་དེས་འབྲི་ཞོ་དང་འོ་མ། ཟོག་ཤ། ངོ་བྱུག་སོགས་ཐོན་རྫས་རིགས་ལྔ་ཐོན་སྐྱེད་བྱེད་འཆར་ཡོད་པ་ལས་འབྲི་ཞོའི་ཐོན་རྫས་དངོས་སུ་ཐོན་སྐྱེད་བྱས་ནས་ཚོང་ར་ལ་འགྲེམ་བཞིན་ཡོད་ལ། ཐོན་རྫས་གཞན་དག་གི་ཐོན་སྐྱེད་སྒྲིག་གཞི་དང་འཕྲུལ་ཆ་སོགས་བཟོ་སྐྲུན་བྱེད་བཞིན་པ་རེད་འདུག །

རང་འགུལ་རྩིས་རྒྱག་ས།