སི་ཁྲོན་གསར་འགྱུར་དྲ་བས་གནས་ཚུལ་སྤེལ་བར་གཞིགས་ན། ཉེ་ཆར། དཀར་མཛེས་སེར་ཤུལ་རྫོང་གི་འབྲེལ་གཏུག་དམ་ཟབ་ཡོད་མཁན་གྱི་ནད་ཡམས་རིག་པའི་བརྟག་དཔྱད་སྙན་ཞུ་ཞིག་སྐད་འཕྲིན་ཚོགས་པའི་ནང་བརྒྱུད་སྤེལ་བྱེད་ཀྱི་ཡོད་ལ། དྲ་དམངས་ཁག་གཅིག་གིས་སྙན་ཞུ་དེ་མཐོང་རྗེས་སེར་ཤུལ་རྫོང་དུ་གདགས་གཤིས་ནད་དཔེ་ཞིག་ཐོན་ཡོད་ཅེས་བརྗོད་ཀྱི་ཡོད། 
     ཟླ་6ཚེས་18ཉིན། གསར་འགོད་པས་སེར་ཤུལ་རྫོང་ཨུད་དྲིལ་བསྒྲགས་པུའུ་ནས་ཤེས་རྟོགས་བྱུང་བར་གཞིགས་ན། སེར་ཤུལ་རྫོང་ནད་ཡམས་སྔོན་འགོག་ཚོད་འཛིན་ལྟེ་གནས་ཀྱིས་དེ་ཉིན་སྤྱི་བསྒྲགས་སྤེལ་ནས་ཆ་འཕྲིན་དེ་རྫུན་མ་ཡིན་པར་བརྗོད་ཡོད། 
     སྤྱི་བསྒྲགས་ཀྱི་མ་ཡིག་གཤམ་གསལ། 
     ཉེ་ཆར་སེར་ཤུལ་རྫོང་གི་འབྲེལ་གཏུག་དམ་ཟབ་ཡོད་མཁན་གྱི་ནད་ཡམས་རིག་པའི་བརྟག་དཔྱད་སྙན་ཞུ་སྐད་འཕྲིན་ནང་རྒྱ་ཁྱབ་ངང་བརྒྱུད་སྤེལ་བྱས་པའི་གནས་ཚུལ་ལ་དམིགས་ནས། སེར་ཤུལ་རྫོང་ནད་ཡམས་སྔོན་འགོག་ཚོད་འཛིན་ལྟེ་གནས་ཀྱིས་རྒྱ་ཆེའི་མང་ཚོགས་ལ་གཟབ་ནན་གྱིས་ཤེས་སུ་འཇུག་དགོས་རྒྱུ་ཞིག་ནི། ངེད་ལྟེ་གནས་ཀྱིས་འཕྲལ་མ་ཉིད་དུ་སྙན་ཞུ་དེ་དང་འབྲེལ་བ་ཡོད་པའི་མི་སྣར་ཉིང་སྐྱུར་བཤེར་འཇལ་དང་དྭངས་ཁྲག་གི་འགོག་གཟུགས་ཞིབ་དཔྱད་ཚད་ལེན་བྱས་པ་ཡིན། དེའི་མཇུག་འབྲས་ཚང་མ་སྲིབས་གཤིས་ཡིན་པས། རྒྱ་ཆེའི་མང་ཚོགས་ཀྱིས་དཀྲོག་གཏམ་ལ་ཡིད་ཆེས་མི་བྱེད་པ་དང་། དཀྲོག་གཏམ་མི་བཤད་པ། དཀྲོག་གཏམ་མི་བཟོ་བ་བཅས་བྱ་བའི་འབོད་སྐུལ་བྱ་རྒྱུ་ཡིན།
     སེར་ཤུལ་ནད་ཡམས་སྔོན་འགོག་ཚོད་འཛིན་ལྟེ་གནས་ཀྱིས་སླར་ཡང་ནན་པོའི་ངང་ཁས་ལེན་བྱ་རྒྱུ། ཐེངས་འདིའི་ཏོག་གསར་རིམས་ནད་དང་འབྲེལ་བ་ཡོད་པའི་ནད་ཡམས་ཞིབ་བཤེར་གྲལ་བཤེར་དང་། རིམས་ནད་རིག་པའི་བརྟག་དཔྱད། མཇུག་འབྲས་སྙན་ཞུ་དང་སྤྱི་བསྒྲགས་སོགས་ལ་བླང་བྱ་ནན་པོ་བཏོན་ཡོད། ངེད་ལྟེ་གནས་ཀྱིས་ལྷུ་ཚིགས་ཁག་གི་ལས་ཀ་བྱེད་རིང་ལས་ཀའི་བླང་བྱ་དང་ལས་རིགས་ཀྱི་སྤྱོད་ལམ་དམ་སྲུང་བྱས་ཡོད། དུས་མཚུངས་སུ་རྒྱ་ཆེའི་མང་ཚོགས་ཀྱིས་མི་གཞན་པའི་གསང་དོན་ལ་བརྩི་འཇོག་བྱས་ནས་བརྒྱུད་སྤེལ་བྱེད་མཚམས་འཇོག་དགོས་པའི་རེ་བ་ཞུ་རྒྱུ་ཡིན། ད་ཐེངས་ཀྱི་སྐད་འཕྲིན་བརྒྱུད་སྤེལ་དོན་རྐྱེན་གྱིས་སྤྱི་ཚོགས་ལ་ཤུགས་རྐྱེན་ངན་པ་བཟོས་པར་དམིགས་ཏེ་སེར་ཤུལ་རྫོང་སྤྱི་བདེ་དྲ་བའི་ཉེན་རྟོག་རུ་ཆེན་ལ་བརྟག་དཔྱད་བྱ་རྒྱུའི་སྙན་སེང་ཞུས་ཡོད།