རྒྱལ་རོང་གི་ཕྱོགས་ཕལ་ཆེ་བ་ན་ལོ་རེའི་ཧོར་ཟླ་བཅུ་གཅིག་པའི་ཚེས་བཅུ་གསུམ་ཉིན་གླུ་ལེན་བྲོ་འཁྲབ་ཟས་སྟོན་ཆང་གསོལ་གྱི་དུས་སྟོན་ཞིག་ཡོད་འདུག དེ་ནི་སྔོན་ཧོར་དམག་ཚ་རོང་དུ་ཤོར་ནས་ཡུན་རིང་འདས་རྗེས་གླིང་གེ་སར་ཕེབས་ཏེ་ཧོར་ཕམ་པར་བྱས་པའི་ཉིན་རེད་ཟེར་བའི་ཡུལ་སྲོལ་གཏམ་རྒྱུད་འདུག་པ་དང་། སྔོན་ཚ་རོང་བཀྲ་ཤིས་གླིང་གི་ཕྱོགས་ནས་ལོ་རེའི་ཧོར་ཟླ༡༡པའི་ཚེས་༡༣ཉིན་གླིང་དམག་ཧོར་ལས་རྒྱལ་བའི་དུས་ཆེན་ཞེས་དཔོན་འབངས་ཡོངས་མཉམ་དུ་འདུས་ནས་སྟོན་མོར་རོལ་བ་དང་། ཕྱེ་རུལ་སྣུམ་དུ་བཙོས་ནས་དགྲ་ཧོར་སེར་གྱི་མིག་ཡིན་ཟེར་ནས་ཟ་སྲོལ་ཡོད་ཚུལ་དང་། དུས་སྟོན་དེར་ཨ་མྱེ་སྒོ་གདོང་དུས་སྟོན་ཟེར་ཞིང་ཨ་མྱེ་སྒོ་གདོང་ཞེས་པ་ཨ་མྱེ་ཁྲོ་ཐུང་གི་དོན་ཞེས་མཁས་དབང་དམུ་དགེས་གསུང་འདུག།