སྤྱི་ཟླ7པའི་ཚེས13ཉིན་གྱི་ཕྱི་དྲོར། སེར་ཤུལ་རྫོང་འཕྲིན་སྦྱོར་མཉམ་འདྲེས་ལྟེ་གནས་ཀྱི་གསར་འགོད་པ་གཞི་རིམ་དུ་བཅར་འདྲི་བྱེད་པར་སྐྱོད་སྐབས་རྫོང་གྲོང་ནས་ཐོན་མ་ཐག་པའི་འབུམ་རྙིང་གྲོང་རྡལ་མང་དགེ་གྲོང་ཚོའི་ཉེ་འགྲམ་གྱི་རྩྭ་ཆུ་འཛོམས་པའི་རི་ལྡེབས་སུ་དྲེད་མོང་ཨ་མ་ཞིག་གིས་ཕྲུ་གུ་གསུམ་ཁྲིད་ནས་སོས་དལ་བག་ཕེབས་ངང་ཉི་མར་ལྡེ་བཞིན་ཡོད་པ་དང་། དེ་ནས་དྲེད་མོང་ཨ་མས་ལྟོ་སྟེར་རྗེས་རིམ་བཞིན་ཕྲུ་གུ་རྣམས་ཁྲིད་དེ་རི་ཁུག་ཏུ་དལ་བུར་བསྐྱོད་པར་མཐོང་།
   སེར་ཤུལ་རྫོང་ནི་སི་ཁྲོན་དང་མཚོ་སྔོན། བོད་ལྗོངས་བཅས་ཞིང་ཆེན་གསུམ་འབྲེལ་གྱི་མཚམས་སུ་གནས་པའི་འབྲི་ཆུའི་སྟོད་རྒྱུད་ཀྱི་སྐྱེ་ཁམས་སྲུང་སྐྱོང་ཁུལ་གལ་ཆེན་ཞིག་ཡིན་ཞིང་། མངའ་ཁོངས་སུ་སྐར་ཚོགས་ལྟར་ཁྱབ་པའི་མཐོ་སྒང་གི་མཚེའུ་དང་། རྩྭ་ཆུ་འཛོམས་པའི་འདམ་ར་མང་པོ་ཡོད། ཉེ་བའི་ལོ་ཤས་རིང་རྫོང་དེས་སྐྱེ་ཁམས་དཔལ་ཡོན་གྱི་འདུ་ཤེས་ལག་བསྟར་གཏིང་ཟབ་བྱས་པས་གཙང་གསུམ་ཆུ་མགོའི་ལྗང་མདོག་སྲུང་སྐྱོང་བྱེད་པར་ནུས་པ་གལ་ཆེན་བཏོན་ཡོད།
   དྲེད་མོང་ནི་མགོ་ཆེ་ཞིང་མཆུ་རིང་བ། མིག་ཟུང་དོམ་ལྟར་ཆུང་ངུ་ཞིག་ལས་མེད་པ་དང༌། སོག་མགོ་མཐོ་ཞིང་རྒྱབ་ཞེང་ཆེ་བ། གདོང་ཞེང་ཆེ་ལ་སུག་བཞི་སྦོམ་ཞིང་སྤར་ཁྱིམ་ཆེ་བ། སྤར་ཁྱིམ་རེར་སེན་མོ་ལྔ་རེ་ཡོད་པ་དང་རྐང་པའི་སྡེར་མོ་ལས་ལག་པའི་སྡེར་མོ་རིང༌། མཇུག་མ་ཐུང་ངུ་ཞིག་ལས་མེད། དྲེད་མོང་གི་མིག་དང་མཆུ་མཐའི་སྤུ་མདོག་སྨུག་སྐྱ་ཡིན་པ་དང་། མ་མགལ་གྱི་སྤུ་མདོག་སྨུག་སེར་ཡིན། རྐང་ལག་གི་ནང་ངོས་དང་གསུས་ཁུགས་ཀྱི་སྤུ་མདོག་ནག་སྨུག་ཡིན་ལ། དང་ག་ན་ཐིག་ལེ་དཀར་བོ་ཞིག་ཡོད། གཟུགས་གཞི་ཡོངས་ཀྱི་སྤུ་མདོག་ཁམ་སེར་ཅན་རྩུབ་ཅིང་མཐུག་པ་ཕག་སྤུ་དང་མཚུངས་ལ། རྩ་བའི་གཟུགས་དབྱིབས་སོགས་དོམ་དང་གཅིག་མཚུངས་ཡིན།

   དྲེད་མོང་དར་མ་ཞིག་གི་གཟུགས་གཞིའི་རིང་ཚད་ལ་སྨི1.8ཡས་མས་དང་། ལུས་ཀྱི་ལྗིད་ཚད་ལ་སྤྱི་རྒྱ180ཡས་མས་ཡོད། དྲེད་མོང་འཚོ་སྡོད་བྱེད་ས་ནི་མཚོ་འཕགས་སྨི3500ནས་སྨི5000ཡོད་པའི་ས་ཆ་ཡིན་ལ། ཕལ་ཆེར་ལུང་གྲོག་དང་ཉིན་ཕྱོགས་ཀྱི་རི་ངོས། ཆུ་འགྲམ་སོགས་ན་གནས་པར་མ་ཟད། ཟས་ཆུ་འཛོམས་ས་དང་སྡེ་འདབས་ཚོ་འདབས་ནའང་མཐོང་རྒྱུ་ཡོད། སྲོག་ཆགས་འདི་ནི་བོད་ཀྱི་རོང་འབྲོག་གཉིས་ཀར་འཚོ་གནས་བྱེད་ཅིང༌། དེའི་ནང་ནས་མང་ཆེ་བ་འབྲོག་ཁུལ་དང་བྱང་ཐང་སོགས་སུ་འཚོ་གནས་བྱེད་བཞིན་ཡོད་པ་དང༌། རོང་ཁུལ་དུ་ཤིང་ནགས་ཉུང་ཤས་གསེབ་ཏུ་གནས་སྡོད་བྱེད། འབྲོག་ས་ལ་ལར་དྲེད་མོང་ཕྱུགས་ཁྱུ་དང་སྦྲ་ཁྱིམ་དུ་བརྒྱུགས་པའི་གནས་ཚུལ་བཤད་རྒྱུ་ཡོད་ལ། སྤང་ངོས་དང་རི་ངོས་སུ་དྲེད་མོང་གིས་འཕྱི་ཁུང་བསློགས་པའི་བསློགས་ཤུལ་ཡང་མཐོང་རྒྱུ་ཡོད།