ང་རང་ཕྱིར་ཕ་ཡུལ་སྡེ་དགེ་འཁོར་ལོ་མདོ་རུ་འགྲོ་བའི་གོ་སྐབས་དང་བསྟུན་ནས་སྤྱི་ཟླ་7པའི་ཚེས་8ཉིན། ཆེད་དུ་ས་གནས་དེ་གའི་རྒྱུག་མདའ་ཞེས་པའི་གྲོང་སྡེ་རུ་དགུང་ལོ་103ལོན་པའི་མི་རྒན་ཞིག་ལ་བཅར་འདྲི་ཞུ་ས་སོང་།
དགུང་ལོ་103ལོན་པའི་མི་རྒན་བློ་དགའ་ལགས།
རྒྱུག་མདའ་གྲོང་ནི་ཁྲོ་ལ་རི་བོའི་ཞོལ་གྱི་ཁྲོན་བོད་གཞུང་ལམ་317ཡི་ལམ་ཟུར་གྱི་རི་སྤང་ནགས་གསུམ་འཛོམས་པའི་ས་ཆ་སྐྱིད་པོ་ཞིག་ཏུ་ཆགས་ཡོད། ང་རང་བོད་ཁང་ཐོག་བརྩེགས་གཉིས་ཅན་ལ་རྒྱ་རས་བསྐོར་བའི་ཁྱིམ་ཚང་དེ་རུ་འཛུལ་སྐབས་རྒྱ་རའི་ཟུར་གྱི་ཤེལ་ཁང་ཞིག་ཏུ་མི་རྒན་ཞིག་བཞུགས་ཡོད་པ་མཐོང་། ཁོང་ནི་ངས་དེ་རིང་བཅར་འདྲི་ཞུ་སའི་དགུང་ལོ་103ལོན་པའི་མི་རྒན་བློ་དགའམ་བློ་གྲོས་ཕུན་ཚོགས་རེད།
འཁོར་ལོ་མདོ་རྒྱུག་མདའ་གྲོང་པ།
བློ་དགའ་ནི་བོད་ས་རྟ་ལོ་སྟེ་སྤྱི་ལོ་1918ལོར་སྡེ་དགེ་འཁོར་ལོ་མདོ་རུ་སྐྱེས་ཤིང་། སྤྱི་ཚོགས་གསར་རྙིང་གཉིས་ཀྱི་སྐྱིད་སྡུག་གི་འཚོ་བ་རོལ་མྱངས་པའི་མི་རྒན་ཞིག་རེད། བར་སྐབས་སུ་མཉམ་ལས་ཁང་གི་ར་རྫི་བྱེད་མྱངས་པས་ལ་ལས་ར་རྫི་བློ་དགའང་འབོད་བཞིན་ཡོད། ཁོ་རང་སྔ་རྗེས་སུ་རྐང་པ་ཐེངས་གསུམ་ཆག་མྱངས་པས་འགྲོ་འདུག་ཅུང་མི་བདེ་བ་དང་། རྣ་བའི་དབང་པོ་དེ་འདྲ་རྣོ་པོ་མེད་པ་ཙམ་ལས་གཞན་དག་གི་ན་ནད་མེད་པས། ད་དུང་བློ་རིག་དྭངས་པ་དང་། ཁ་ལྕེ་དག་པ། ལུས་པོ་བདེ་ཐང་བཅས་ཡིན་པ་རེད། ཁོང་ལ་སྔོན་བྱུང་གི་ལོ་རྒྱུས་དང་གཏམ་རྒྱུད་ཅི་ཞིག་དྲིས་ན་ཐག་ཐག་བཤད་ཀྱིན་འདུག །
ཚ་བོ་བསོད་ནམས་ཚང་གི་སྡོད་ཁང་།
བློ་དགའ་ལ་བཟའ་ཟླ་དང་ཕྲུ་གུ་མེད་ཅིང་སྔོན་ཆོད་ཁོ་རང་མི་རྐྱང་ཕལ་པ་ཞིག་ཡིན་པ་དང་། རྗེས་དུ་ལོ་ན་ལོན་སྐབས་ཁོ་རང་གི་ཚ་བོ་བསོད་ནམས་དང་། ཚ་བོའི་བག་མ་ལྷ་མོ་སྒྲོལ་མ་གཉིས་ཀྱིས་ཁོ་ཚོའི་ཁྱིམ་དུ་བསུས་ནས་འཚོ་བ་མཉམ་རོལ་བྱས་ཏེ་མི་རྒན་གྱི་ཚེ་མཇུག་ལ་བདེ་སྐྱིད་སྐྲུན་ཅི་ནུས་བྱས་པ་དང་། ས་གནས་དེ་གའི་ཏང་སྲིད་ཀྱིས་ཀྱང་མི་རྒན་ལ་ཐུགས་ཁུར་གནང་ནས་“འགན་ལེན་ལྔའི་དུད་ཚང་”གི་གྲལ་དུ་བཞག་ནས་འཚོ་བའི་ཐད་ལའང་རོགས་སྐྱོར་གནང་བཞིན་ཡོད་པས་མི་རྒན་བློ་དགའ་ལ་ཟ་གྱོན་སོགས་ཀྱི་ཐད་ལ་དཀའ་ངལ་ཅི་ཡང་མེད་པ་རེད།
ཚ་བོ་བསོད་ནམས་དང་བུ་མོ་བཀྲ་ཤིས་དཔལ་མོས་གཡོག་ཞབས་ཕྱི་ཞུ་བཞིན་པ།
མི་རྒན་བློ་དགའ་ཡིས་གསར་འགོད་པར་བཤད་རྒྱུར། ང་རང་ཆུང་དུས་སུ་འཚོ་བ་ཞན་པ་དང་། སྡུག་སྣ་ཚོགས་མྱངས་རུང་། ཚེ་མཇུག་ཏུ་བདེ་སྐྱིད་ཀྱི་འཚོ་བ་རོལ་ཐུབ་པ་བྱུང་ཞིང་། ཚ་བོ་དང་གཉེན་ཉེ་ཚོས་ཀྱང་ཟ་གྱོན་སོགས་ཀྱི་འཚོ་བའི་ལྟ་རྟོག་ཡག་པོ་བྱེད་བཞིན་ཡོད་པས་ད་ལྟ་མི་རྒན་ཧ་ཅང་སྐྱིད་པོ་འདུག་ཟེར། །
གསར་འགོད་པས་མི་རྒན་བློ་དགའ་ལ་བཅར་འདྲི་བྱེད་བཞིན་པ།
