སྐྱ་རེངས་ཆུ་ཚོད4པར་ཚོང་སྒོ་ཕྱེ་ནས་མཚན་གུང་ཆུ་ཚོད11ལ་འཚོང་མཚམས་འཇོག

སྤྱི་ཟླ8པའི་ཚེས6ཉིན་གྱི་སྐྱ་རེངས་ཆུ་ཚོད4པར་དར་མདོ་གྲོང་ཁྱེར་གྱི་ཤ་མོ་བཚོང་གཉེར་བྱེད་མཁན་ཨོའུ་ཡུས་ཕིང་གིས་དར་མདོ་གྲོང་ཁྱེར་གྱི་རྫིང་བྲག་ཞིང་ལས་ཉོ་ཚོང་ཚོང་ཁྲོམ་ནས་ཉིན་གཅིག་གི་ཤ་མོ་བྲིན་འཚོང་བྱེད་མགོ་བཙུགས་པ་རེད།

སྤྱི་ཟླ8པའི་ཚེས5ཉིན་གྱི་དགོངས་མོའི་ཆུ་ཚོད11ལ་ཨོའུ་ཡུས་ཕིང་གིས་དར་མདོ་གྲོང་ཁྱེར་དང་ཉག་ཆུ་རྫོང་གི་རི་མགོ་ནས་བསྐྱལ་འོང་བའི་རྒྱ་མ500ཡོད་པའི་ཤ་མོ་ཚན་པ་དང་པོ་དེ་ཉོ་སྒྲུབ་བྱས་ཐོག་ད་དུང་ཚོང་ཁྲོམ་ནས་ཡང་དུ་ཚན་པ་གཅིག་ཉོ་སྒྲུབ་བྱེད་བསམ་པ་རེད། ད་ལྟ་དྲ་བ་དར་ཁྱབ་ཆེ་བས་འཕྲིན་ཕྲན་གྱི་ཐོག་ནས་དངོས་ཟོག་སྔོན་མངག་བྱེད་མཁན་མང་སྟབས། ཉིན་རེར་རྒྱ་མ་བརྒྱད་བརྒྱ་ཙམ་མེད་ན་དགོས་མཁོ་སྐོང་མི་ཐུབ་པས་སྔ་སྣུར་ནས་ཡང་དུ་རྒྱ་མ་བརྒྱ་ཕྲག་འགའ་ཉོ་དགོས་ཀྱི་ཡོད་པ་རེད་ཅེས་ཨོའུ་ཡུས་ཕིང་གིས་དེ་ལྟར་ངོ་སྤྲོད་བྱས་པ་རེད།

ཨོའུ་ཡུས་ཕིང་གིས་བེ་ཤ་ཚོང་གཉེར་བྱས་ནས་ལོ5རེད་ཡོད་ཅིང་། ལོ་རེ་བཞིན་རྫིང་བྲག་ཞིང་ལས་ཉོ་ཚོང་ཚོང་ཁྲོམ་དུ་ཟླ་བ་གཉིས་ལྷག་གི་རིང་བྲེལ་བ་བྱ་དགོས་ཀྱིན་ཡོད། སྤྱི་ཟླ6པའི་ཟླ་མཇུག་ནས་བེ་ཤ་ཐོན་རུང་ཐོན་ཚད་ཉུང་བ་དང་རིན་གོང་ཆེ་ནས་ཚོང་ཁེ་དེ་ཙམ་ཆེན་པོ་མེད་པ་རེད། ང་ཚོ་སྤྱི་ཟླ7པའི་ཚེས10ཉིན་ཚོང་ཁྲོམ་དུ་ཕྱིན་ནས་སྤྱི་ཟླ9པའི་ཟླ་དཀྱིལ་དང་མ་ཐ་ཡང་ཟླ་སྨད་ཙམ་ཚོང་གཉེར་བྱེད་པ་རེད་ཅེས་ཨོའུ་ཡུས་ཕིང་གིས་སྨྱུག་འཛིན་པར་དེ་ལྟར་བཤད་པ་རེད།

ཨོའུ་ཡུས་ཕིང་གིས་གྲོགས་པོ་གཞན་པ་གཉིས་དང་མཉམ་དུ་ཕལ་ཆེར་སྐྱ་རེངས་ཆུ་ཚོད་བཞི་ལྔ་ཙམ་ནས་ཚོང་ཁྲོམ་དུ་ཤ་མོ་ཉོ་སྒྲུབ་བྱེད་དུ་ཕྱིན་ནས། ཚོང་ཟོག་མངག་ཐོ་ལྟར་ཐུམ་རྒྱག་པ་དང་། མྱུར་སྐྱེལ་དངོས་ཟོག་གི་ཚོང་ཟོག་གཏོང་ཚར་རྗེས། གཞི་ནས་ཤ་མོ་ཉོ་མཁན་སྒུག་པ་རེད།

ཡུལ་དེའི་གྲོང་མིས་ཤ་མོ་ཉོས་ནས་རང་གི་ཟ་རྒྱུ་ཕུད་ཁར། ད་དུང་ཕྱི་ཡུལ་དུ་ཡོད་པའི་གྲོགས་པོ་ལ་སྐུར་བཞིན་པ་རེད། ང་ཚོས་ཤ་མོ་ཉོ་མཁན་ཚང་མ་ལ་ཞབས་ཕྱི་ཁྱད་མེད་ཡག་པོ་སྒྲུབ་སྟབས་ཡང་བསྐྱར་ཕྱི་ལོག་ནས་ཤ་མོ་ཉོ་སྒྲུབ་བྱེད་མཁན་མང་བ་རེད་ཅེས་ཨོའུ་ཡུས་ཕིང་གིས་དེ་ལྟར་བཤད།

གསར་འགོད་པ་དང་ཁ་བརྡ་ལབ་བཞིན་པའི་སྐབས་སུ་ཡང་དུ་ཤ་མོ་ཉོ་མཁན་ཞིག་སླེབས་འདུག ཨོའུ་ཡུས་ཕིང་དང་མཉམ་དུ་ཚོང་རྒྱག་མཁན་གྲོགས་པོ་ཝང་ཁུན་ཧྥང་གིས་དེ་མ་ཐག་གོང་རྒྱག་པ་དང་། ཤ་མོ་བདམས་པ། སྒམ་དུ་འཇུག་པ། མྱུར་སྐྱེལ་བཅས་བྱས་པར་བྲེལ་བ་བྱེད་བཞིན་པ་རེད།

ཨོའུ་ཡུས་ཕིང་གིས་ངོ་སྤྲོད་བྱས་དོན། དགོངས་མོའི་ཆུ་ཚོད་དགུ་ལྷག་གི་བར་ཕལ་ཆེར་འདི་ལྟར་བྲེལ་བ་བྱ་དགོས་འདུག ངལ་གསོ་ཅུང་བྱས་རྗེས་རི་མགོ་ནས་ཐོན་པའི་ཤ་མོ་དག་ཉོ་སྒྲུབ་བྱེད་མཁན་སྒུག་ནས་ཕྱི་ཉིན་ཚོང་རྒྱག་རྒྱུའི་གྲ་སྒྲིག་བྱ་དགོས་ཀྱི་ཡོད་པ་རེད།

དར་མདོའི་ཤ་མོའི་ཚོང་ཁྲོམ་དུ་ཨོའུ་ཡུས་ཕིང་དང་འདྲ་བའི་ཤ་མོ་འཚོང་མཁན100ལྷག་ཡོད། ཁོ་ཚོ་ཕལ་ཆེར་སྐྱ་རེངས་ཆུ་ཚོད4པའི་ཐོག་ཚོང་གཉེར་བྱེད་མགོ་བཙུགས་ནས་དགོངས་མོའི་ཆུ་ཚོད11ལ་ཚོང་གཉེར་བྱེད་མཚམས་འཇོག་བཞིན་པ་རེད།

སྣ་ཁ10ཙམ་ལྡན་པའི་ཤ་མོ་དེ་དག་ཉིན་རེར་རྒྱ་མ་ཁྲི་ཙམ་བཙོང་ཐུབ་ཀྱི་ཡོད།

ཚོང་དཔོན་ཁྲེང་ཏ་ཀང་གིས་གསར་འགོད་པར་ད་ལོའི་བེ་ཤའི་ཐོན་འབོར་སྔོན་ཆད་ལས་མང་དྲགས་པ་རེད། དུས་སྐབས་སྔ་མར་རྒྱ་མ་གང་ལ་ཆ་སྙོམས་རིན་གོང་སྒོར70ཡན་མན་ཡིན་ཞིང་། ཉེ་དུས་ཉིན་འགའ་ལ་ཤ་མོ་ཉུང་དུ་ཕྱིན་ཏེ་རིན་གོང་འཕར་ནས་རྒྱ་མ་གང་ལ་ཆ་སྙོམས་རིན་གོང་སྒོར90ཡན་མན་ལ་སླེབས་འདུག བེ་ཤ་མང་ཙམ་ཉོ་སྒྲུབ་བྱེད་ཐུབ་པའི་ཆེད་དུ་ཚོང་པ་ཚོ་ནམ་རྒྱུན་རྫོང་སོ་སོའི་ཡུལ་ཤོག་དང་གྲོང་རྡལ་གྱི་ཞིང་པའི་ཁྱིམ་ཚང་དང་ཡང་ན་བེ་ཤ་འཐུ་སར་ཕྱིན་ནས་བེ་ཤ་ཉོ་སྒྲུབ་བྱེད་བཞིན་པ་རེད་ཅེས་བཤད་པ་རེད།

བེ་ཤ་ནི་ཤ་མོའི་ནང་འཚོ་བཅུད་རིན་ཐང་ཆེས་ཆེ་བ་དེ་ཡིན། བེ་ཤ་མིན་པའི་ཤ་མོ་ད་དུང་མང་པོ་ཡོད་འདུག རྫིང་བྲག་གི་ཞིང་ལས་ཉོ་ཚོང་ཚོང་ཁྲོམ་དུ་གསར་འགོད་པས་ད་དུང་སྒོ་ངའི་དབྱིབས་ཅན་གྱི་ཤ་མོ་ལ་སོགས་པའི་ཤ་མོ་སྣ་ཁ10ཙམ་ཡོད། བེ་ཤའི་རིན་གོང་ནི་བལྟོས་བཅས་སུ་ཆེས་མཐོ་ཤོས་དེ་ཡིན་པ་དང་གཞན་པའི་ཤ་མོའི་ཆ་སྙོམས་རིན་གོང་ནི་ཕལ་ཆེར་སྒོར30ཡན་མན་ཡིན་པ་རེད་ཅེས་བཤད་པ་རེད།

ཤ་མོ་ཉོ་བཞིན་པའི་དར་མདོ་གྲོང་ཁྱེར་གྱི་ཡུལ་མི་ཝང་ཆུན་ཡིང་གིས་བེ་ཤ་ཕུད་པའི་གཞན་པའི་ཤ་མོ་དེ་ཚོ་ཡག་པོ་མ་ཡིན་པ་མིན། བེ་ཤ་ལ་སྐད་གྲགས་ཆེ་ནའང་ང་རང་གཞན་པའི་ཤ་མོ་དེ་ཚོ་ཉོ་སྒྲུབ་བྱ་རྒྱུ་དགའ་བ་ཡིན་ཞེས་བཤད་པ་རེད།

ཨོའུ་ཡུས་ཕིང་གིས་གཞན་པའི་ཤ་མོ་དེ་དག་ཕལ་ཆེར་དར་མདོ་གྲོང་ཁྱེར་གྱི་ར་རྔ་ཁ་གྲོང་རྡལ་དང་སྐྱ་གད་གྲོང་རྡལ་ནས་ཐོན་པ་རེད། བེ་ཤ་ནི་དར་མདོ་ནས་ཐོན་པ་དང་ཕལ་ཆེར་ཉག་ཆུ་རྫོང་ནས་ཐོན་པ་རེད། རྫིང་བྲག་ཞིང་ལས་ཉོ་ཚོང་ཚོང་ཁྲོམ་ནས་ཉིན་རེར་རི་སྐྱེས་ཤ་མོ་མང་པོ་ཉོ་ཚོང་བྱས་ཏེ་བསྡོམས་རྩིས་ཡང་དག་རྒྱག་མ་མྱོང་། ཚོང་ཁང་རེར་ཉིན་རེར་བེ་ཤ་རྒྱ་མ་སྟོང་ཡན་མན་འཚོང་ཐུབ་པ་དང་། གཞན་པའི་ཤ་མོ་ཕལ་ཆེར་རྒྱ་མ་དྲུག་རྒྱ་ཙམ་འཚོང་ཐུབ་ཀྱི་ཡོད། ཚོད་དཔག་བྱས་ན་ཉིན་རེར་བེ་ཤ་རྒྱ་མ་ཁྲི2དང་གཞན་པའི་ཤ་མོ་རྒྱ་མ་ཁྲི1ལས་མི་ཉུང་བ་འཚོང་ཐུབ་ཀྱི་ཡོད་འདུག་ཅེས་བཤད་པ་རེད།

གངས་ལྗོངས་མཐོ་སྒང་གི་ཡུལ་ཐོན་ཁྱད་རྫས་ཀྱི་ཚོང་དཔོན་ཚེ་རིང་གཡང་མཚོས་ལོ་འཁོར་དུ་ཤ་མོའི་ཚོང་ཁྲོམ་དུ་ཤ་མོ་སྣ་ཚོགས་དང་དབྱར་རྩྭ་དགུན་འབུ། སྙི་བ། སྡུང་ཕུང་། མཐོ་སྒང་གི་གནག་ཕྱུགས་ཤ་སྐམ་ལ་སོགས་པའི་ཚོང་བརྒྱབ་ནས་ཚོང་ལམ་ཧ་ཅང་བྲིན་པ་རེད། མོས་གསར་འགོད་པར་ཡུལ་སྐོར་བྱེད་པའི་དུས་བཟང་སླེབས་པ་དང་སྦྲགས། ཚོང་བཤམས་ས་ནས་ཉིན་རེར་བེ་ཤ་གསར་པ་རྒྱ་མ་སྟོང་ཙམ་འཚོང་ཐུབ་པ་རེད། སིལ་འཚོང་བྱས་པ་ཕུད་ཁར་ཁོ་མོས་ད་དུང་སྡེབ་འཚོང་བྱེད་བཞིན་འདུག

སྐྱེ་ཁམས་ཀྱི་ཤ་མོ་མང་པོ་ཐོན་ནས་མི་སེར་ཚོ་ཕྱུག་འགྱུར་ལམ་དུ་ཁྲིད།

ད་ལོར་བེ་ཤའི་ཐོན་འབོར་སྔོན་ཆས་ལས་མཐོ་བ་རེད། མིག་སྔའི་བར་ང་རང་གིས་བེ་ཤ་རྒྱ་མ་ཉིས་སྟོང་ལྷག་འཚོང་ནས་ཡོང་འབབ་སྒོར་ཁྲི་བཅུ་ལྷག་ཡོད་འདུག་ཅེས་དར་མདོ་གྲོང་ཁྱེར་སྐྱ་གད་གྲོང་རྡལ་གྱི་ཡུལ་མི་དགྲ་འདུལ་གྱིས་རྩིས་ཞིག་བརྒྱབ་ནས་དགའ་སྤྲོའི་ངང་དེ་ལྟར་བཤད་པ་རེད།

བེ་ཤ་ཐོན་ལེགས་བྱུང་བར་དགྲ་འདུལ་གྱིས་གནམ་གཤིས་ཀྱི་རྒྱུ་མཚན་ཕར་ཕུད། གཙོ་བོར་ལོ་འགའི་རིང་སྐྱེ་ཁམས་ཁོར་ཡུག་གི་ཆ་རྐྱེན་ལོ་རེ་ལས་ལོ་རེར་ཇེ་ཡག་ཏུ་གྱུར། སྔོན་ཆད་རི་མགོའི་སྔོ་ཁེབས་དེ་ཙམ་ཡག་པོ་མིན་སྟབས་བེ་ཤའི་ཐོན་ཚད་ཉུང་བ། དུས་ཡུན་ཉིན་ཕྱེད་ཙམ་འགོར་ཡང་བེ་ཤ་འགའ་ལས་བཙལ་མི་ཐུབ་པ་རེད། ད་ལྟར་ཉིན་རེར་རྒྱ་མ་བཅུ་ཕྲག་འགའ་རག་ཐུབ་ཀྱི་ཡོད་ཅེས་བཤད་པ་རེད།

དགྲ་འདུལ་གྱིས་གསར་འགོད་པར་ཉིན་རེའི་སྐྱ་རེངས་ཀྱི་ཆུ་ཚོད4པ་ནས་མལ་ལས་ལངས་ཏེ་སྟབས་བདེའི་ཟ་མ་ཅུང་ཟོས་རྗེས། དེ་མ་ཐག་འཕྲུལ་རྟ་གཞོན་ནས་ཤ་མོ་འཐུ་ཡུལ་དུ་ཕྱིན་དགོས་ཀྱི་ཡོད། སྔོན་གྱི་ཉིན་འགའ་རིང་དགོང་མོར་ཆར་ཆུ་འབེལ་བ་དང་ཉིན་མོར་གནམ་དྭངས་པར་གྱུར་ནས་བེ་ཤ་སྐྱེ་བར་ཧ་ཅང་འཚམ་པ་རེད། ད་ལོར་ཐོབ་འབབ་ཡག་ནས་ཁྱིམ་མི་ཡོངས་རྫོགས་དགའ་སྤྲོའི་ངང་རི་མགོར་བེ་ཤ་འཐུ་སར་སོང་བ་ཡིན། བེ་ཤ་འཐུ་བར་སྐེད་པ་སྒུར་སྒུར་དང་སྤུས་མོ་ས་ལ་བཙུགས་ནས་བཙལ་དགོས་པས་དཀའ་ལས་ཆེན་པོ་བརྒྱག་དགོས། བེ་ཤ་ཕལ་ཆེར་ཐང་ཤིང་གི་ནགས་ཁྲོད་ལ་སྐྱེ་ཡོད། ལུས་ཀྱི་གྱོན་གོས་དག་ནམ་རྒྱུན་ཤིང་སྡོང་ར་ལག་གིས་དབྲལ་འགྲོ་བ་དང་ལྷམ་ཡང་གཟའ་འཁོར་གཅིག་ལས་སྤྱོད་ཐབས་བྲལ་བས་བེ་ཤ་འཐུ་བ་ནི་ལས་སླ་མོ་ཞིག་མ་ཡིན་ཞེས་བཤད་པ་རེད།

དགྲ་འདུལ་གྱིས་དམིགས་བསལ་དུ་ད་དུང་གསར་འགོད་པར་བེ་ཤ་འཐུ་བའི་གོ་རིམ་བརྗོད་པ་སྟེ། བེ་ཤ་མཐོང་རྗེས་ཨང་དང་པོར་ཤིང་ལོ་དང་ས་རྡུལ་མེད་པ་བྱ་དགོས། ཨང་གཉིས་པར་རྩེ་མོ་རྣོན་པོ་ཅན་གྱི་ཤིང་ཐུར་ཞིག་གིས་བེ་ཤའི་རྩ་བར་བཙུགས་ནས་ཡར་འདེགས་རྗེས་ད་གཟོད་བེ་ཤ་ཕྱིན་ཐོན་ཐུབ་པ་རེད། ཨང་གསུམ་པར་གཟབ་གཟབ་ངང་བེ་ཤ་ཧྲིལ་པོ་ཕྱིན་ལེན་དགོས། ཨང་བཞི་པར་ཕྱིར་བླངས་པའི་བེ་ཤ་དེ་དག་གྲལ་འགྲིག་པའི་སྒོས་འཇོག་དགོས་པར་མ་ཟད། ད་དུང་བེ་ཤ་ཡོད་སར་ས་ཁེབས་བརྒྱག་དགོས། དགྲ་འདུལ་གྱིས་གོ་རིམ་བཞི་པ་དེར་ཡང་དུ་གཟབ་ནན་བྱས་ཏེ་བཤད་བཞིན་པ་རེད། ཁོས་རྗེས་མར་ད་དུང་བེ་ཤ་འཐུ་རྒྱུ་རག་ཐུབ་པའི་ཆེད་དུ་གོ་རིམ་བཞི་པ་འདི་ལྷག་པར་དུ་གཟབ་དགོས་ཀྱི་ཡོད། ས་ཁེབས་དེ་བརྒྱབ་ན་མ་གཏོགས་བེ་ཤ་སྐྱེ་ཐུབ་པ་མ་རེད། གལ་སྲིད་ཁྱོད་རང་གིས་ས་ཡག་པོ་བཀབ་ཡོད་ན་ཆར་རྗེས་སུ་བེ་ཤ་འཐུ་མྱོང་སར་ཡང་བསྐྱར་བེ་ཤ་སྐྱེ་འོང་བ་རེད་ཅེས་བཤད་པ་རེད།

ཁུལ་ནགས་ལས་དང་རྩྭ་ཐང་ཅུས་ཀྱི་ལག་རྩལ་མི་སྣ་ཧོ་ཁང་གིས་གསར་འགོད་པར་བཤད་དོན། གནས་འགག་ཆེ་བའི་གོ་རིམ་བཞི་པོ་འདི་མང་ཚོགས་ཀྱི་སྐྱེ་ཁམས་ཀྱི་འདུ་ཤེས་ཡིན། འདུ་ཤེས་འདིས་སྔོ་ཁེབས་དང་སྐྱེ་ཁམས་ལ་སྲུང་སྐྱོང་བྱས་ཡོད། རི་སྐྱེས་ཤ་མོ་སྐྱེ་འཕེལ་བྱུང་སའི་ཁོར་ཡུག་བཟང་འགྱུར་བྱུང་ནས་ད་གཟོད་རི་སྐྱེས་ཤ་མོ་ཐོན་ལེགས་བྱུང་བ་རེད། རང་ཁུལ་གྱི་སྐྱེ་ཁམས་ཁོར་ཡུག་མུ་མཐུད་དེ་བཟང་འགྱུར་བྱུང་བ་དང་སྦྲགས། བེ་ཤའི་ལོ་རེའི་ཐོན་ཚད་དེ་གནམ་གཤིས་ཀྱི་ཆ་རྐྱེན་འདྲ་མཉམ་འོག ཐོན་འབོར་དང་སྤུས་ཚད་གཉིས་ཀར་རྒྱུན་མཐུད་གོང་འཕེལ་འགྲོ་བའི་གནས་ཚུལ་མངོན་པ་རེད།

འབྲེལ་ཡོད་དཔྱད་གཞིའི་ཡིག་རིགས་ཐོག་གསལ་པོ་མཚོན་དོན། རང་ཁུལ་གྱི་རྫོང9ལ་བེ་ཤ་ཐོན་བཞིན་འདུག ཉག་ཆུ་རྫོང་ལ་དེ་བས་ཀྲུང་གོའི་བེ་ཤའི་ཕ་ས་ཞེས་པའི་མཚན་སྙན་ཐོབ་ཡོད། ཁུལ་ཡོངས་སུ་ལོ་རེར་བེ་ཤ་ཐོན་ཚད་ཏུན2800ཡན་མན་ཡོད་པས་རྒྱལ་ཡོངས་ཀྱི་བེ་ཤའི་ཐོན་ཚད་ཀྱི་བརྒྱ་ཆ60ལ་ཟིན་ཡོད། རྒྱ་མ་གང་རེར་ཆ་སྙོམས་རིན་གོང་སྒོར50ལྟར་བརྩིས་ན་བེ་ཤ་ཏུན2800ཡིས་ཁུལ་ཡོངས་ཀྱི་མང་ཚོགས་ལ་ཐོན་སྐྱེད་རིན་ཐང་སྒོར་དུང་ཕྱུར2.8ཡོད་པ་རེད། སྐྱེ་ཁམས་བཟང་ན་ཤ་མོ་མང་བས། ཤ་མོ་བྲིན་འཚོང་བྱེད་པ་ནི་མང་ཚོགས་དབུལ་ཐར་ཕྱུག་འགྱུར་གྱི་ལམ་བུ་བཟང་པོར་གྱུར་པ་རེད།།