རྒྱལ་ཡོངས་སྲིད་གྲོས་སྐབས་བཅུ་གསུམ་པའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅུ་གསུམ་པ་ཚེས་ཉེར་ལྔ་ཉིན་གྱི་སྔ་དྲོར་པེ་ཅིང་ནས་ཚོགས་མགོ་བརྩམས། རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལོ་ལྔའི་འཆར་འགོད་བཅུ་བཞི་བ་གཏན་འབེབས་བྱེད་པར་དམིགས་ནས་གྲོས་མོལ་བྱས། ཀྲུང་གུང་ཀྲུང་དབྱང་ཆབ་སྲིད་ཅུའི་རྒྱུན་ལས་ཨུ་ཡོན། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཝང་དབྱང་ཚོགས་མགོ་རྩོམ་པའི་མཛད་སྒོར་ཞུགས། 

རྒྱལ་སྲིད་ཨུ་ཡོན་ཝང་ཡུང་གིས་གདན་ཞུས་ལྟར་གྲོས་ཚོགས་ལ་ཞུགས་ནས་སྙན་ཞུ་ཕུལ། ཡུལ་དངོས་ནས་སྲིད་གྲོས་རྒྱུན་ཨུ་རྣམས་ཀྱི་བསམ་འཆར་དང་གྲོས་གཞིར་ལ་ཉན། ཝང་ཡུང་གིས་བསྟན་དོན། ཚན་རིག་དང་མཐུན་པར་ལོ་ལྔའི་འཆར་འགོད་བཅུ་བཞི་བ་སྒྲིག་བཟོ་བྱེད་པ་དང་། མ་འོངས་པའི་ལོ་ལྔའི་རྒྱལ་ཁབ་ཀྱི་འཕེལ་རྒྱས་འཆར་གཞི་འབྲི་བཞེངས་བྱེད་པ་དེ། བརྒྱ་ལོ་གཉིས་ཀྱི་འབད་འཐབ་དམིགས་འབེན་གྱི་རྒྱང་སྐྱོད་གསར་བ་མགོ་ལེགས་པར་རྩོམ་པར་ཐད་ཀར་འབྲེལ་བ་ཡོད་ལ། དེར་དོན་སྙིང་ཧ་ཅང་གལ་ཆེན་ལྡན། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མགོ་ཁྲིད་བརྟན་པོའི་འོག རང་རྒྱལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཐད་ནས་ལོ་རྒྱུས་རང་བཞིན་གྱི་གྲུབ་འབྲས་བླངས་པ་དང་། ལོ་ལྔའི་འཆར་གཞི་བཅུ་གསུམ་པ་བདེ་བླག་ངང་ལག་བསྟར་བྱས་ཏེ། ལོ་ལྔའི་འཆར་གཞི་བཅུ་བཞི་བར་རྨང་གཞི་བརྟན་པོ་བཏིང་ཡོད། ཏང་ཀྲུང་དབྱང་གི་ཐབས་ཇུས་བཀོད་སྒྲིག་གཞིར་བཟུང་ཞིང་། ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་སྟོན་དུ་བྱེད་པ་རྒྱུན་འཁྱོངས་དང་། ཏང་གི་ཕྱོགས་ཡོངས་མགོ་ཁྲིད་ལ་ཤུགས་སྣོན་པ། འཕེལ་རྒྱས་གསར་བའི་འདུ་ཤེས་ལག་ལེན་མཐར་ཕྱིན་བྱེད་པ། ཕྱོགས་སོ་སོའི་བསམ་འཆར་རྒྱ་ཆེར་བསྡུ་ལེན་བྱས་ནས། ཚན་རིག་དང་མཐུན་པའི་སྒོ་ནས་ལོ་ལྔའི་འཆར་གཞི་བཅུ་བཞི་བའི་དམིགས་འབེན་དང་ལས་འགན་གཙོ་བོ་འཆར་འགོད་བྱེད་པ། ཁྱབ་ཁོངས་གཙོ་བོ་དང་ཉམ་ཞན་ལས་རིམ་གཙོར་འཛིན་པ། གཅིག་གྱུར་བཀོད་འདོམ་དང་མཐུན་སྦྱོར་ལ་དོ་སྣང་བྱེད་པ། དཀའ་ཁག་ཁྱད་བསལ་བྱེད་པར་ཤུགས་འདོན་པ། འཕེལ་རྒྱས་ཀྱི་གཞི་རྒྱ་དང་མྱུར་ཚད། སྤུས་ཚད། གྲུབ་ཚུལ། ཕན་འབྲས། བདེ་འཇགས་བཅས་མཉམ་དུ་འཛིན་པ་མངོན་འགྱུར་བྱས་ཏེ། ཧུར་ཐག་སྒོས་མི་དམངས་ཀྱི་འདོད་བློ་དང་འཚམ་ཞིང་། དུས་རབས་ཀྱི་ཁྱད་ཆོས་ལྡན་ལ། དེང་རབས་ཅན་འཛུགས་སྐྲུན་གྱི་རྣམ་པ་གསར་བ་གསར་སྤེལ་བྱེད་པའི་འཆར་འགོད་ཅིག་སྒྲིག་བཟོ་བྱེད་དགོས་པར་བསྟན། 

རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་ཀྲང་ཆིན་ལིས་ཀྱིས་མགོ་རྩོམ་པའི་གྲོས་ཚོགས་ལ་མགོ་འཛིན་བྱས། ཁོས་ནན་གྱིས་བསྟན་དོན། ཐབས་ཇུས་གལ་ཆེན་མ་བཏོན་གོང་དང་ཐབས་ཇུས་ལག་བསྟར་བྱེད་སྐབས་གྲོས་མོལ་རྒྱ་ཆེར་སྤེལ་བ་དང་། དམངས་གཙོའི་གྲོས་མོལ་དེ་ཐབས་ཇུས་གཏན་འབེབས་དང་ཐབས་ཇུས་ལག་བསྟར་གྱི་བརྒྱུད་རིམ་ཧྲིལ་བོར་བརྒྱུས་ཏེ། ཧུར་ཐག་སྒོས་ཐབས་ཇུས་ཀྱི་ཚན་རིག་རང་བཞིན་ཇེ་དྲག་ཏུ་གཏོང་བར་ཕན་པའི་ཐུན་མོང་གི་ལྟ་ཚུལ་ཆགས་པར་བྱེད་པ་ནི་སྤྱི་ཚོགས་རིང་ལུགས་ཀྱི་གྲོས་མོལ་དམངས་གཙོའི་ཁྱད་ཆོས་གཙོ་བོ་དང་མི་དམངས་སྲིད་གྲོས་ཀྱིས་འགན་འཁྲི་ལག་བསྟར་བྱེད་པའི་རེ་བ་གཙོ་བོ་ཡིན། རྒྱུན་ལས་ཨུ་ཡོན་ལྷན་ཁང་གི་ཁོངས་མིས་ནན་ཏན་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ལོ་ལྔའི་འཆར་གཞི་བཅུ་བཞིའི་སྒྲིག་བཟོ་བྱ་བའི་སྐོར་གྱི་མཛུབ་སྟོན་གལ་ཆེན་གྱི་དགོངས་དོན་ལག་ལེན་དངོས་འབེབས་བྱས་ཏེ། ཆབ་སྲིད་ཀྱི་འགན་འཁྲིའི་འདུ་ཤེས་དང་ལོ་རྒྱུས་ཀྱི་འགན་འཁྲིའི་འདུ་ཤེས་དྲག་པོས་གྲོས་ཚོགས་ཀྱི་བརྗོད་གཞིར་དམ་དུ་སྦྲེལ་ནས་གྲོས་མོལ་དང་ཇུས་འབུལ་བྱེད་པ་དང་། ཆེད་དོན་གྲོས་མོལ་ལས་ཁུངས་ཀྱི་ནུས་པ་འདོན་སྤེལ་གང་ལེགས་བྱས་ནས། ཚན་རིག་དང་མཐུན་པའི་སྒོ་ནས་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལོ་ལྔའི་འཆར་གཞི་བཅུ་བཞི་བ་གཏན་འབེབས་བྱེད་པར་ཐུན་མོང་གི་ལྟ་ཚུལ་གཅིག་སྡུད་དང་། བློ་གྲོས་བཏོན་ནས་སྟོབས་ཤུགས་གཅིག་ཏུ་འདྲིལ་དགོས་ཟེར། 

ལིས་ཏའོ་ཁོས་དང་། ཁྲིན་ཙའེ་ཧྥང་། ཀྲང་ཡུང་། ལོས་ཁྲང་ཅིན། ཆན་ཁི་མེན། ཚེ་ཝེ། ཁྱིག་ཡོན་ཕེན། དབྱང་ཝེ་མེན་སོགས་རྒྱུན་ཨུ་བརྒྱད་ཀྱིས་ཚོགས་ཐོག་ནས་གཏམ་བཤད་སྤེལ་ཏེ་བསམ་འཆར་དང་གྲོས་གཞི་བཏོན། 

གྲོས་ཚོགས་སྐབས་སུ། རྒྱུན་ལས་ཨུ་ཡོན་ལྷན་ཁང་གི་ཁོངས་མིས་འཕེལ་རྒྱས་གསར་བའི་འདུ་ཤེས་གཏིང་ཟབ་ཏུ་ལག་ལེན་བྱས་ནས་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་། ཞང་དང་སྡེ་བའི་དར་རྒྱས་འཐབ་ཇུས་གཏིང་ཟབ་ཏུ་ལག་བསྟར་བྱས་ནས་ཞིང་ལས་དང་ཞིང་སྡེའི་དེང་རབས་ཅན་ལ་ཡར་སྐུལ་གཏོང་བ། སྐྱེ་ཁམས་དཔལ་ཡོན་གྱི་འཛུགས་སྐྲུན་ལ་སྐུལ་འདེད་བཏང་སྟེ་ལྷད་མེད་འཕེལ་རྒྱས་ཐད་ནས་གྲུབ་འབྲས་ཆེན་པོ་ལེན་པར་ཡར་སྐུལ་གཏོང་བ། གསར་གཏོད་སྒུལ་ཤུགས་ཀྱིས་འཕེལ་རྒྱས་འཐབ་ཇུས་གཏིང་ཟབ་ཏུ་ལག་བསྟར་བྱས་ཏེ་གསར་གཏོད་རྣམ་པའི་རྒྱལ་ཁབ་གསར་འཛུགས་བྱེད་པ། མཁར་གྲོང་དམངས་འཚོའི་འགན་སྲུང་ལམ་ལུགས་འཐུས་ཚང་དུ་བཏང་སྟེ་མཉམ་འཛུགས་མཉམ་བཅོས་མཉམ་སྤྱོད་བཅས་ཀྱི་སྤྱི་ཚོགས་བཅོས་སྐྱོང་རྣམ་པ་ཆགས་པར་བྱེད་པ་སོགས་ལ་དམིགས་ནས་ཆེད་དོན་གྲོས་བསྡུར་བྱེད་རྒྱུ་རེད། 

མགོ་རྩོམ་པའི་གྲོས་ཚོགས་སྟེང་། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་དྲུང་ཡིག་ཆེན་མོའི་ལས་འགན་གཅིག་ལྕོགས་སུ་ཁུར་མཁན་ལིས་པེན་སོགས་ཀྱིས་འབྲེལ་ཡོད་གྲོས་གཞིར་གསལ་བཤད་བྱས།