ཤིན་ཧྭ་གསར་འགྱུར་ཁང་ཝ་ཧྲིང་ཐོན་ནས་གློག་འཕྲིན་འབྱོར་གསལ། ཟླ་9ཚེས་2ཉིན་ཨ་རི་སྲིད་གཞུང་གིས་རྒྱལ་སྤྱིའི་ཉེས་དོན་ཁྲིམས་ཁང་གིས་ཨ་རི་ཕྱོགས་ཀྱི་མི་སྣར་མུ་མཐུད་བརྟག་དཔྱད་བྱས་པར་ཁ་གཡར་ནས་ཁྲིམས་ཁང་དེའི་མཐོ་རིམ་དཔོན་རིགས་གཉིས་ལ་བཀག་སྡོམ་བྱ་རྒྱུའི་ཁྱབ་བསྒྲགས་བྱས་པ་རེད།
     ཨ་རིའི་རྒྱལ་དོན་བློན་ཆེན་ཕེང་ཕེ་ཨའོ་ཡིས་དེ་ཉིན་རྒྱལ་དོན་ཁང་གི་གསར་འགོད་པའི་ཚོགས་འདུའི་ཐོག ཨ་རི་ཕྱོགས་ཀྱིས་རྒྱལ་སྤྱིའི་ཉེས་དོན་ཁྲིམས་ཁང་གི་དབུ་བཞུགས་ཞིབ་དཔྱོད་དཔོན་ཧྥ་ཐུའུ་པེན་སུའུ་ཏ་དང་དེའི་མངའ་འོག་དང་། གསབ་རེས་དང་མཉམ་ལས་སྡེ་ཚན་གྱི་འགན་འཁུར་བ་ཧྥ་ཅི་སོ་མོ་ཆའོ་ཆའོ་ཁོའོ་ལ་བཀག་སྡོམ་བྱ་རྒྱུ་ཡིན་ཞེས་ཁྱབ་བསྒྲགས་བྱས་པ་རེད། ཕེང་ཕེ་ཨའོ་ཡིས། ཨ་རིའི་རྒྱལ་དོན་ཁང་གིས་ཨ་རི་ཕྱོགས་ཀྱི་མི་སྣར་བརྟག་དཔྱད་བྱེད་པའི་ནང་ཞུགས་མཁན་མི་སྒེར་ལ་རྒྱལ་གྲོལ་ཐོངས་མཆན་གྱི་ཚད་བཀག་བྱ་ཐབས་སྤྱད་པ་དང་། མུ་མཐུད་བཀག་སྡོམ་བྱ་ཡུལ་ལ་དངོས་པོའི་རྒྱབ་སྐྱོར་མཁོ་འདོན་བྱེད་མཁན་མི་སྒེར་དང་དངོས་ཚན་ལའང་བཀག་སྡོམ་གྱི་ཉེན་ཁ་འཕྲད་རྒྱུ་རེད་ཅེས་བརྗོད།
     རྒྱལ་སྤྱིའི་ཉེས་དོན་ཁྲིམས་ཁང་གིས་འདི་ལོའི་ཟླ་3པར་ཐ་ལི་པན་དང་། ཨ་ཧྥུ་ཀ་ནི་སི་ཐན་གྱི་བདེ་འཇགས་དཔུང་སྡེ། ཨ་རིའི་དམག་དོན་དང་གསང་འཕྲིན་མི་སྣ་བཅས་ཀྱིས་ཨ་ཧྥུ་ཀ་ནི་སི་ཐན་དུ་དམག་འཁྲུག་གི་བྱས་ཉེས་དང་མིའི་རིགས་ལ་ངོ་རྒོལ་བྱེད་པའི་བྱས་ཉེས་དང་འབྲེལ་བར་བརྟག་དཔྱད་བྱ་རྒྱུའི་ཆོག་མཆན་སྤྲོད་རྒྱུའི་ཁྲུན་ཐག་བཅད་པ་རེད། པེན་སུའུ་ཏ་ཡིས་ཨ་རི་ཕྱོགས་ཀྱི་མི་སྣས་2003ལོ་ནས་2004ལོའི་བར་ཨ་ཧྥུ་ཀ་ནི་སི་ཐན་དུ་བཙོན་པར་མནར་གཅོད་གཏོང་བ་དང་མི་སྒེར་གྱི་ལ་རྒྱར་བཙན་གནོད་བྱས་པ་སོགས་ཀྱི་བྱེད་སྤྱོད་ཡོད་པའི་དཔང་རྟགས་ཁུངས་བཙན་ཡོད་ཅེས་བརྗོད་པ་རེད།
     ཨ་རིའི་ཙུང་ཐུང་ཐེ་རོན་ཕུས་ཟླ་6པར་སྲིད་འཛིན་བཀའ་རྒྱ་ཁྱབ་བསྒྲགས་བྱས་ནས། ཨ་རི་ནི་རྒྱལ་སྤྱིའི་ཉེས་དོན་ཁྲིམས་ཁང་གི་ཆིངས་འཇོག་རྒྱལ་ཁབ་མིན། ཁྲིམས་ཁང་དེས་ཨ་རིའི་དམག་དོན་དང་གསང་འཕྲིན་མི་སྣས་ཨ་ཧྥུ་ཀ་ནི་སི་ཐན་དུ་སྤེལ་བའི་བྱེད་སྤྱོད་ལ་བརྟག་དཔྱད་བྱས་པ་དེས་ཨ་རིའི་བདག་དབང་དང་རྒྱལ་ཁབ་ཀྱི་བདེ་འཇགས་དང་ཕྱི་འབྲེལ་སྲིད་ཇུས་ལ་འཇིགས་སྐུལ་བྱས་པར་དམིགས་ནས་ཨ་རི་སྲིད་གཞུང་གིས་འབྲེལ་ཡོད་མི་སྣར་བཀག་སྡོམ་བྱ་རྒྱུ་ཡིན་ཞེས་བརྗོད་པ་རེད།
     ཨ་རིའི་སྨྱན་སྦྱོར་གྱིས་དེ་གོང་གནས་ཚུལ་སྤེལ་བར་གཞིགས་ན། ཨ་ཧྥུ་ཀ་ནི་སི་ཐན་ནི་རྒྱལ་སྤྱིའི་ཉེས་དོན་ཁྲིམས་ཁང་གི་ཆིངས་འཇོག་རྒྱལ་ཁབ་ཅིག་ཡིན་པས། ཁྲིམས་ཁང་དེས་ཨ་ཧྥུ་ཀ་ནི་སི་ཐན་དུ་ཐོན་པའི་འབྲེལ་ཡོད་ཉེས་གསོག་ལ་བདག་སྐྱོང་བྱེད་དབང་ཡོད།
     རྒྱལ་སྤྱིའི་ཉེས་དོན་ཁྲིམས་ཁང་ཧོ་ལན་གྱི་གྲོང་ཁྱེར་ཧའེ་ཡར་བཙུགས་ཡོད། 2002ལོར་ནུས་པ་ཐོན་པའི《རོ་མའི་ཁ་དན་གྱི་ཡི་གེ》ལ་གཞིགས་ནས་བཙུགས་པ་རེད། རིགས་རྒྱུད་རྩ་མེད་གཏོང་བའི་བྱས་ཉེས་དང་། དམག་འཁྲུག་གི་བྱས་ཉེས། མིའི་རིགས་ལ་ངོ་རྒོལ་བྱེད་པའི་བྱས་ཉེས། བཙན་འཛུལ་གྱི་བྱས་ཉེས་བཅས་བསགས་པའི་མི་སྒེར་ལ་ཉེས་འགན་བདའ་འདེད་གཏོང་གི་ཡོད་པ་རེད།