གྱོད་དཔེ།

 

          ཚེ་རིང་དང་མཚོ་མོ་གཉིས་ཀ་མཐུན་པོ་ཡོད་ཀྱང་གཉེན་སྒྲིག་གི་འདོད་བློ་མེད།  2018ལོར་ཚེ་རིང་གིས་རང་གི་མིང་ཐོག་ན་ཡོད་པའི་ཁང་པ་ཕྱིར་འཚོང་བྱས་རྗེས། ད་ལྟའི་བར་དུ་མཚོ་མོ་ཚང་ནས་བསྡད་དེ་མཉམ་དུ་འཚོ་བ་རོལ་བཞིན་ཡོད། ཉེ་ལམ་ཁོའི་ཚོང་ལས་ལ་གནད་དོན་བྱུང་བས་བུ་ལོན་གང་མང་ཞིག་གཞན་ལ་ཆད་ཡོད།

          ཕྲན་དཔྱད།

 

          《ཁྲིམས་ཁང་གིས་གཉེན་སྒྲིག་ཐོ་འགོད་མ་བྱས་པར་ཁྱོ་ཤུག་གི་མིང་ཐོག་ནས་མཉམ་སྡོད་བྱས་པའི་གྱོད་གཞིར་ཞིབ་གཅོད་བྱ་བའི་སྐོར་གྱི་བསམ་འཆར་འགའ》ཡི་གཏན་འབེབས་ལྟར་ན། ཁྲིམས་འགལ་གྱི་མཉམ་སྡོད་འབྲེལ་བ་མེད་པར་བཟོ་སྐབས། མཉམ་སྡོད་དུས་ཡུན་ནང་ཐུན་མོང་གིས་ཐོན་སྐྱེད་བྱས་པའམ། ཡང་ན་འཚོ་བའི་བུན་དབང་དང་བུ་ལོན་དེ་དག་ཐུན་མོང་གི་བུན་དབང་དང་བུ་ལོན་ལྟར་ཐག་གཅོད་བྱས་ཆོག་ཅེས་བཀོད་ཡོད།

          གྱོད་དོན་འདིར་གཞིགས་ན། གལ་ཏེ་ཚེ་རིང་གི་བུ་ལོན་ནི་ཕྱོགས་གཉིས་ཀས་ཐུན་མོང་གི་འཚོ་བ་དང་ཐོན་སྐྱེད་གཉེར་སྐྱོང་གི་དགོས་མཁོའི་ཆེད་དུ་བཀོལ་སྤྱོད་བྱས་པ་ཡིན་ན། མཉམ་སྡོད་བྱེད་རིང་གི་ཐུན་མོང་གི་བུ་ལོན་དུ་བརྩི་རྒྱུ་དང་། གལ་ཏེ་བུ་ལོན་ནི་ཚེ་རིང་གིས་མི་སྒེར་གྱི་ཚོང་ལས་ལ་བཀོལ་ནས་སྒེར་གྱི་འགྲོ་སོང་ལ་མཁོ་སྤྲོད་བྱས་པ་ཡིན་ན། དེ་ནི་མི་སྒེར་གྱི་བུ་ལོན་ལ་གཏོགས། གལ་ཏེ་བུ་ལོན་དེར་ཚེ་རིང་དང་མཚོ་མོ་གཉིས་ཀ་མཉམ་སྡོད་བྱེད་རིང་གི་ཐུན་མོང་གི་འཚོ་བར་སྤྱད་པའི་དཔང་རྟགས་ཡོད་ན། ཁོ་གཉིས་ཀར་བུ་ལོན་འཇལ་འགན་ཡོད།