ད་ལོའི་ལོ་སྟོད། ཁྲི་ཤོར་རྒྱལ་མོའི་བྱང་ངོགས་ཀྱི་རྐང་ཚ་རྫོང་ཁོངས་སུ་ཕྱག་རྗེས་བྲག་རིས་ཚོན་ལྡན་མ་ཞིག་གསར་དུ་རྙེད་ཅིང་། འདི་ནི་མདོ་དབུས་མཐོ་སྒང་དུ་རྙེད་ཐེངས་དང་པོ་རེད། བྲག་རིས་དེ་རྐང་ཚ་རྫོང་འོམ་ཆུ་གྲོང་རྡལ་འཕན་པོ་གྲོང་པའི་མཐོ་སྒང་འབྲོག་ས་རུ་གནས་ཤིང་། བྱང་ཤར་ནི་མཁར་རྙིང་ཡུལ་ཚོའི་ལུག་ར་དང་འབྲེལ་ལ། ལྷོ་ནས་རྐང་ཚ་རྫོང་མཁར་བར་སྤྱི་ལེ་24ཡོད། བྲག་རིས་དེ་མདོ་ལ་རི་རྒྱུད་ཀྱི་ནུབ་བྱང་རི་ཁུལ་དུ་གནས་ཤིང་། རིའི་གཟར་ཚད་ཆུང་ལ་ས་ངོས་སུ་རྡོ་ཕ་བོང་ཆེན་པོ་ཤིན་ཏུ་མང་། གནས་དེའི་ས་གཤིས་ནི་འཁྱགས་ཀླུང་རྡོ་ཧྲུག་གི་མཐོ་སྒང་རྩྭ་ཐང་ཡིན་ཞིང་། ཉེ་འགྲམ་དུ་རྩྭ་ཆུ་འཛོམས་པས་འབྲོག་པའི་མཚེས་སས་ཁྱབ་ཡོད། ཁྲི་ཤོར་རྒྱལ་མོའི་མཐའ་འཁོར་ནི་མཚོ་སྔོན་གྱི་བྲག་རིས་མོད་པའི་ས་ཁུལ་གྱི་ཆར་གཏོགས་ཤིང་། མཚོ་བྱང་དང་མཚོ་ལྷོ། མཚོ་ནུབ་བཅས་སུ་བྲག་རིས་30ལྷག་རྙེད་ཡོད། ཉེ་བའི་ལོ་འགའི་རིང་། མཚོ་སྔོན་ལྷོ་རྒྱུད་ཀྱི་ཡུལ་ཤུལ་དང་མགོ་ལོག་སོགས་སུ་བྲག་རིས་འབོར་ཆེན་གསར་དུ་རྙེད་ཅིང་། ཚང་མ་བྲག་ངོས་ཀྱི་བརྐོས་རིས་དང་ཕ་བོང་ཆེན་པོའི་བརྐོས་རིས་སུ་གཏོགས། རྐང་ཚ་རྫོང་དུ་ཕྱག་རྗེས་བྲག་རིས་ཚོན་ལྡན་མ་གསར་དུ་རྙེད་པ་དེས་མཚོ་སྔོན་བྲག་རིས་ཀྱི་སྟོང་ཆ་གསུམ་ལ་ཁ་གསབ་བྱས་ཡོད་དེ། མཚོ་སྔོན་བྲག་རིས་རིག་གནས་ཀྱི་ནང་དོན་ཕུན་སུམ་ཇེ་ཚོགས་གཏོང་བ་མ་ཟད། མདོ་དབུས་མཐོ་སྒང་གི་བསྐལ་པ་ཡར་ཐོག་གི་བྲག་རིས་སྒྱུ་རྩལ་ཞིབ་འཇུག་ཐད་རྒྱུ་ཆ་གསར་པ་ཁ་གསབ་བྱས་ཡོད་ལ། རིག་གཞུང་ཞིབ་འཇུག་གི་རིན་ཐང་བླ་ན་མཐོའོ། །