ཉེ་ཆར། གསེར་རྟ་རྫོང་རགས་བཀྲམ་ཡུལ་ཚོ་བླ་རྒྱ་སྡེ་པའི་རགས་བཀྲམ་ལུང་པ་རུ་བྲག་བརྐོས་རི་མོ་ཞིག་གསར་དུ་རྙེད་ཅིང་། ས་གནས་དེ་གའི་མི་རྣམས་ཀྱིས་རྒྱལ་བ་བྱམས་པའི་སྐུ་ཡིན་ཚུལ་བཤད་བཞིན་འདུག །རི་མོ་དེ་གནའ་ཉམས་དོད་ཅིང་བབ་ཆགས་ལ། ལོ་ཟླའི་འཁོར་འགྲོས་དུ་མ་བརྒྱུད་མྱོང་བའི་སྒྱུ་རྩལ་གྱི་མཛེས་ཉམས་མངོན། གཙོ་སྐུའི་གཡས་གཡོན་དུ་སྐུ་བཞེངས་ཡོད་པའི་ལྷ་སྐུ་གཉིས་དང་། སྤྱི་ཡོངས་ཀྱི་གྲུབ་ཚུལ་དེ་ལུའོ་ཧྲན་བྱམས་པ་ཆུ་གཟིགས་མ་དང་མཚུངས།

        གཞན་ཡང་། རྫོང་མཁར་དང་བར་ཐག་སྤྱི་ལེ་ཉི་ཤུ་ལྷག་ཡོད་པའི་གར་སྐྱ་ལུང་པ་ལ་གནས་རི་ཞིག་ཡོད་དེ། ས་གནས་དེ་གའི་མི་ཚོས་གར་སྐྱའི་བྲག་དཀར་གནས་རི་ཞེས་འབོད་སྲོལ་ཡོད། བྲག་ངོས་སུ་མཐོང་དཀོན་ཞིང་ཤིན་ཏུ་འདྲ་བའི་ངོ་མཚར་ཅན་གྱི་ཕྱག་རྗེས་ཤིག་ཡོད་དེ། བཤད་ཚུལ་ལ་དཔྱི་ཆེན་དགོན་པའི་སྒོམ་ཆེན་ཞིག་གིས་གནས་དེར་བཞག་པའི་ཕྱག་རྗེས་ཡིན་པ་གྲགས། བྲག་བརྐོས་རི་མོ་ཁག་འདི་གཉིས་ཀྱི་དུས་རབས་དང་ནང་དོན་ཐད་རིགས་གཅིག་མཁས་པ་ཚད་ལྡན་རྣམས་ཀྱིས་ཁུངས་འཚོལ་དང་བདེན་དཔང་བྱ་དགོས་འདུག །