ཟླ་དགུ་བའི་རྔ་བ་ནི་མཛེས་སྡུག་ལྷམ་མེར་མངོན་པའི་དུས་ཤིག་ཡིན་པ་དང་། ལྷག་པར་རྔ་བ་རྫོང་གི་གཉན་པོ་གཡུ་རྩེའི་རང་བྱུང་གི་མཛེས་ལྗོངས་ནི་རི་མོ་མཁན་གྱི་པུར་རྩེ་ལས་ཐོན་འདྲའི་ཡིད་དབང་རབ་ཏུ་འཕྲོག་པའི་བཀོད་པ་དང་མཚུངས་པར་སྣང་། མཛེས་སྡུག་གི་དུས་སྐབས་འདི་ལ་རྔ་བ་རྫོང་གི་གཉན་པོ་གཡུ་རྩེའི་འདབས་རོལ་ནས་ རྫོང་དེའི་པར་ལེན་མཐུན་ཚོགས་ཀྱི་པར་ལེན་པ༢༤ཡིས་ཡུལ་དེའི་མིག་དབང་འཕྲོག་པའི་མཛེས་ལྗོངས་པར་མིག་ཏུ་བླངས་ནས་རྒྱ་ཆེའི་ལྟད་མོ་བའི་མཐོང་ལམ་ངོམས་པར་བྲེལ།
ཟླ༩པའི་ཚེས༡༧ཉིན་ནས་ཚེས༡༩ཉིན་གྱི་བར་ལ། རྔ་བ་རྫོང་ཨུའི་དྲིལ་སྒྲོག་པུའུ་དང་། རྫོང་རྩོམ་རིག་སྒྱུ་རྩལ་ལྷན་ཚོགས། རྫོང་རིག་གནས་ཡུལ་སྐོར་ཅུས། རྫོང་གསེར་རྔའི་ལྗོངས་རྒྱུ་དར་སྤེལ་ཚད་ཡོད་ཀུང་སི་སོགས་ཀྱི་རྩ་འཛུགས་འོག རྫོང་པར་ལེན་མཐུན་ཚོགས་ཀྱི་ཚོགས་མི༢༤ཡིས་རྫོང་ཨུའི་སྲིད་གཞུང་གི༼རིག་གནས་ཡུལ་སྐོར་མཉམ་འདྲེས༽ཀྱི་འཕེལ་རྒྱས་འཐབ་ཇུས་ལྟེ་བར་བཟུང་སྟེ། གཉན་པོ་གཡུ་རྩེའི་ལྗོངས་ཁུལ་ནས་ཉིན་གསུམ་རིང་གི་མཛེས་ལྗོངས་འཚོལ་བསྡུའི་བྱ་འགུལ་སྤེལ། ཁོ་ཚོས་པར་མིག་བརྒྱུད་ནས་ཡུལ་དེའི་རང་བྱུང་གི་བཀོད་པ་ལེགས་པོ་སྟེ། རྔམ་བརྗིད་ལྡན་པའི་བྲག་རི་དང་། གསལ་ཞིང་དྭངས་བའི་མཚེའུ། ཀྱར་ཀྱུར་བཞུར་བའི་ཆུ་ཕྲན། སྔོ་ཐིང་ཐིང་གི་སྤང་ལྗོངས། ཁྲ་ཆིལ་ཆིལ་གྱི་མེ་ཏོག་སོགས་ཀྱི་བགྲང་གིས་མི་ལངས་པའི་མཛེས་སྡུག་གི་བཀོད་པ་ཕྱོགས་ཡོངས་དང་ཟུར་མང་པོའི་སྒོ་ནས་མི་རྣམས་ཀྱི་མཐོང་ལམ་དུ་མངོན་པར་བྱས་ཏེ། ལྗོངས་རྒྱུ་དྲིལ་སྒྲོག་དང་རིག་གནས་ཁྱབ་སྤེལ་ལ་རྨང་གཞི་བརྟན་པོ་བཟོས།
