མཛོད་དགེ་བོད་ཡིག་སློབ་འབྲིང་བཙུགས་ནས་ལོ་འཁོར་དྲུག་ཅུ་འཁོར་བའི་དགའ་སྟོན་ཚོགས་ཆེན་དང་སློབ་དཔོན་བློ་བཟང་ཉི་མ་མཆོག་གི་རྗེས་དྲན་བྱེད་སྒོ།
2020ལོའི་ཟླ་9ཚེས་28ཉིན་གྱི་སྔ་དྲོར། སྣོད་བཅུད་ཐམས་ཅད་ལ་འབྲས་བཟང་རབ་ཏུ་སྨིན་པའི་དུས་བཟང་འདིར། རྔ་བ་ཁུལ་མཛོད་དགེ་བོད་ཡིག་སློབ་འབྲིང་བཙུགས་ནས་ལོ་འཁོར་དྲུག་ཅུ་འཁོར་བའི་དགའ་སྟོན་ཚོགས་ཆེན་དང་། སློབ་དཔོན་བློ་བཟང་ཉི་མ་མཆོག་སྐུ་གཤེགས་ནས་ལོ་འཁོར་སུམ་ཅུ་ལོན་པའི་རྗེས་དྲན་བྱེད་སྒོ་མཛོད་དགེ་རྫོང་བོད་ཡིག་སློབ་འབྲིང་དུ་གཟབ་རྒྱས་ངང་འཚོགས།
ཐེངས་འདིའི་བྱེད་སྒོར། ཞིང་ཆེན་དང་ཁུལ་རིམ་པའི་འགོ་ཁྲིད་དང་སློབ་གསོ་བ། འབྲེལ་ཡོད་སྡེ་ཁག་གི་མི་སྣ་དག་གདན་ཞུས་ལྟར་བྱེད་སྒོར་ཞུགས་ཤིང་། སྔར་གྱི་སི་ཁྲོན་ཞིང་ཆེན་སྲིད་གྲོས་ཀྱི་ཀྲུའུ་ཞི་གཞོན་པ་གཡང་གླིང་རྡོ་རྗེ་དང་། དོར་ཞི་གདོང་དྲུག་སྙེམས་པའི་བློ་གྲོས་སོགས་ཀྱིས་ཤིས་འཕྲིན་བསྐུར། བོད་ཡིག་སློབ་འབྲིང་ནས་སློབ་མཐར་ཕྱིན་པའི་ཕྱོགས་ཀྱི་སློབ་མ་བུང་བུའི་ཚོགས་ཀྱིས་བོད་ཡིག་སློབ་འབྲིང་གི་འཁྲུངས་སྐར་ཉིན་མོར། དགའ་བཞིན་སྤྲོ་བཞིན་ལེགས་སྐྱེས་གྱ་ནོམ་པའི་སྤམ་མཐོ་བཏེགས།
མི་རིགས་སློབ་གསོ་བ་ཆེན་མོ་བློ་བཟང་ཉི་མ་མཆོག་གིས། སྤྱི་ལོ་1960ལོར། སློབ་གྲྭ་འདིའི་རྨང་བཙུགས་ཤིང་། སྦྲ་གུར་སློབ་གྲྭ་དང་། སྨན་པའི་སློབ་གྲྭ་ནས་རིམ་པར་འཕེལ་བ་བརྒྱུད། དེང་གི་སློབ་ཁྲིད་སྒྲིག་ཆས་ཆ་ཚང་བ་དང་། དགེ་རྒན་གྱི་དཔུང་ཁག་ཁྱད་དུ་འཕགས་པ། སློབ་མའི་སྦྱངས་འབྲས་གཟེངས་སུ་ཐོན་པ་བཅས་ཀྱི་འཐུས་སྒོ་ཚང་བའི་དེང་རབས་སློབ་འབྲིང་ཞིག་ལ་གྱུར་པ་རེད། དུས་རབས་གང་དང་ཡང་མི་འདྲ་བའི་ལོ་འཁོར་དྲུག་ཅུའི་ལོ་ཟླ་རིང་མོའི་ནང་། བོད་ཡིག་སློབ་འབྲིང་གིས་བསླབ་གསུམ་འགྲོས་གཅིག་དང་རྣམ་གསུམ་གཅིག་གྲུབ་ཀྱི་ཐུན་མོང་མ་ཡིན་པའི་ཉི་མའི་སློབ་གསོའི་ཐབས་ལམ་ལ་བརྟེན་ནས། སྔ་རྗེས་སུ་སི་ཁྲོན་དང་། ཀན་སུའུ། མཚོ་སྔོན། བོད་ལྗོངས། ཡུན་ནན། ནང་སོག ཡུ་གུར་སོགས་ཞིང་ལྗོངས་ས་ཁུལ་དག་ལ། ལག་རྩལ་ལྡན་ལ་ཡོན་ཏན་ཡང་ལྡན་པའི་ཕུལ་བྱུང་མི་སྣ་ཁྲི་ཕྲག་ལྷག་སྐྱེད་སྲིང་བྱས།
མ་འོངས་པའི་ལོ་ཟླ་རིང་མོར་ཡང་། བོད་ཡིག་སློབ་འབྲིང་གིས་སྔར་བཞིན་སྲོལ་བཟང་རྒྱུད་འཛིན་བྱས་ཏེ། གསར་གཏོད་ཀྱི་རྣམ་པ། མཐོ་སྒང་དུ་མི་རིགས་སློབ་གསོའི་ལོ་རྒྱུས་ཀྱི་རྡོ་རིང་བཞེང་བའི་ཡིད་ཆེས་ཡོད་ལ། བོད་ཡིག་སློབ་འབྲིང་གིས་སྔར་བཞིན་ཞུམ་མེད་མདུན་སྐྱོད་ཀྱི་རྣམ་པས། མཐོ་སྒང་དུ་དཔལ་ཡོན་གྱི་དར་ཆ་བསྒྲེང་བའི་ཡིད་ཆེས་ཡོད། མཐར། དེང་རབས་སློབ་རའི་ཟློས་གར་《རྩྭ་ཐང་གི་ཉི་མ》ཞེས་པ་འཁྲབ་སྟོན་བྱས་ནས་བྱེད་སྒོ་མགོ་བཀྲ་ཤིས་ཤིང་མཇུག་ཕུན་སུམ་ཚོགས་པའི་སྒོ་ནས་མཇུག་བསྒྲིལ་ཏོ།།
