རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས། ཨེ་ཛིའི་ནད་ཡམས་ཁོ་རང་ནི་དེ་འདྲའི་འཇིགས་སུ་རུང་བ་ཞིག་མིན།  འཇིགས་སུ་རུང་བ་ནི་ཨེ་ཛིའི་ནད་ཡམས་ལ་མ་རྟོགས་ལོག་རྟོགས་དང་ཨེ་ཛིའི་ནད་པར་མཐོང་ཆུང་བྱེད་པ་དེ་རེད། ཨེ་ཛིའི་ནད་དུག་ཅན་དང་ཨེ་ཛིའི་ནད་པ་ཚང་མ་ང་ཚོའི་ཕུ་ནུ་མིང་སྲིང་ཡིན་པས། སྤྱི་ཚོགས་ཧྲིལ་བོས་བརྩེ་སེམས་ཀྱི་གཟི་འོད་ཀྱིས་ཁོང་ཚོའི་འཚོ་བ་གསལ་དུ་འཇུག་དགོས་ཞེས་གསུངས་ཡོད།
རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས། ཨེ་ཛིའི་ནད་ཡམས་ནི་རྒྱལ་ཁབ་ཀྱི་དབྱེ་བ་མེད་པའི་རྒྱལ་སྤྱིའི་ཐུན་མོང་གི་དགྲ་བོ་ཞིག་རེད། ལོ་རྒྱུས་ཐོག འབྲུམ་ནག་ལ་སོགས་པའི་རིམས་ནད་མང་པོ་ཞིག་ལ་མིའི་རིགས་ཐུན་མོང་གིས་ཧུར་བརྩོན་སྒོས་འཐབ་རྩོད་བྱས་པས་མཐར་སྨན་བཅོས་བྱ་ཐུབ་ཡོད་ཕྱིན། ནམ་ཞིག་ཨེ་ཛིའི་ནད་ཡམས་ལས་ཀྱང་རྒྱལ་ཁ་ལོན་པའི་ཤེས་རབ་ཞིག་ཡོད་ངེས་ཅན་ཡིན་ཞེས་ཨེ་ཛིའི་ནད་པ་དག་ལ་སེམས་གསོ་མཛད་ཡོད། 
      ལིས་ཁི་ཆང་གིས། ཨེ་ཛི་འགོག་བཅོས་བྱེད་པར་ངེས་པར་ཏུ་སྤྱི་ཚོགས་རྩ་འཛུགས་ཀྱི་ནུས་པ་མངོན་དུ་འགྱུར་དགོས། སྤྱི་ཚོགས་ཀྱི་ནུས་པར་བརྟེན་ནས་སྤྱི་ཚོགས་ལ་དོན་བཟང་བསྒྲུབ་པ་ནི་སྤྱི་ཚོགས་ཀྱི་སྒྲིག་གཞི་ལེགས་བཅོས་དང་སྤྱི་ཚོགས་འཛུགས་སྐྲུན་ལ་ངེས་མཁོའི་ཆ་རྐྱེན་ཡིན། ལྷག་པར་ཏུ་ཨེ་ཛིའི་འགོ་ལམ་མངོན་གསལ་མིན་པ་དང་གསང་བ་ཡིན་པ་སོགས་གནས་ཚུལ་དང་གནད་དོན་གསར་བའི་འོག སྤྱི་ཚོགས་ཚོགས་པ་མཉམ་ཞུགས་བྱེད་པར་དམིགས་བསལ་གྱི་དོན་སྙིང་ལྡན། སྒྲིག་གཞི་གསར་འཛུགས་དང་འཐུས་ཚང་ཡོང་བའི་ཆེད་དུ་ཞིབ་འཇུག་བྱས་ཏེ། མ་དངུལ་དང་ལག་རྩལ་སོགས་ཀྱི་ཐད་སྤྱི་ཚོགས་རྩ་འཛུགས་ལ་རོགས་སྐྱོར་བྱས་ཤིང་། ཨེ་འགོག་ཐེབས་རྩ་ཚོགས་པ་འཛུགས་རྒྱུ་དང་། ཕྱོགས་མང་པོ་ནས་རོགས་དངུལ་འདོན་ཐབས་ལ་ཞིབ་འཇུག་བྱ་དགོས། གཞན་ནོར་སྲིད་གཏོང་ཕྱོགས་ཀྱི་ཐད་ལ་གསར་གཏོད་ཡོད་དགོས། ཅི་ནུས་ཀྱིས་སྤྱི་ཚོགས་ནས་ཞབས་ཞུ་ཉོ་སྒྲུབ་བྱེད་པ་དང་། དགེ་ཕན་ཚོགས་པའི་ཁྲལ་བསྡུ་འཕྲུ་སྙུང་བྱེད་པའི་སྲིད་ཇུས་འཐུས་ཚང་དུ་གཏོང་བ། སྤྱི་ཕན་བྱེད་སྒོར་ཞུགས་མྱོང་བའི་སློབ་ཆེན་སློབ་མ་ལ་ལས་ཞུགས་བྱེད་པའི་ཐད་རོགས་སྐྱོར་བྱ་རྒྱུ་བཅས་བྱེད་དགོས། དེ་ལྟར་བྱས་ན། ཨེ་འགོག་ནུས་པར་ཤུགས་སྣོན་བྱེད་པར་ཕན་པས་མ་ཚད། སྤྱི་ཚོགས་ཧྲིལ་བོའི་བཅོས་བསྒྱུར་ལ་ཉམས་མྱོང་བསྡུ་ལེན་བྱ་ཐུབ་ཅེས་གསུངས།
        རྒྱལ་ཁབ་འཕྲོད་བསྟེན་པུའུ་ཡི་པུའུ་ཀྲང་ཁྲེན་ཀྲུའུ་ཡིས། ཨེ་ཛིའི་ནད་ཡམས་ཀྱི་འགོག་བཅོས་ནི་སྤྱི་ཚོགས་ཀྱི་ཕྱོགས་མང་པོ་ཞིག་དང་འབྲེལ་ནས་ཡོད་པས། དེ་ནི་རྙོག་འཛིངས་ཆེ་བའི་སྤྱི་ཚོགས་ཀྱི་མ་ལག་ལས་གཞི་ཞིག་ཡིན་པས། རྒྱ་ཆེ་བའི་འཕྲོད་བསྟེན་ལས་སྒྲུབ་མི་སྣས་གོམ་གང་མདུན་སྤོས་ཀྱིས་ལས་དོན་དང་འགན་འཁྲིའི་བསམ་བློར་ཤུགས་སྣོན་བྱས་ཤིང་། སྣེ་ཁྲིད་ཀྱི་བྱེད་སྒོ་སྤེལ་དགོས། རང་ཉིད་ནས་མགོ་བརྩམས་ཏེ་སྤྱི་ཚོགས་དགེ་ཕན་གྱི་ལས་ཀ་བསྒྲུབ་པ། སྨན་བཅོས་དང་འཕྲོད་བསྟེན་ཞབས་ཞུའི་ཁྲོད། ཨེ་ཛིའི་ནད་དུག་ཅན་དང་ཨེ་ཛིའི་ནད་པར་མཐོང་ཆུང་དང་ལོག་རྟོགས་བྱས་པ་སེལ་ཐབས་དང་། ཨེ་ཛིའི་ནད་དུག་ཅན་དང་ཨེ་ཛིའི་ནད་པར་སྔ་ཙམ་ནས་ནད་ངོས་ཟིན་པ་དང་། སྔ་ཙམ་ནས་སྨན་བཅོས་བྱེད་པར་ཆ་རྐྱེན་བཟང་བོ་བསྐྲུན་པ། ཁོང་ཚོས་བརྟག་བཅོས་བྱ་བའི་ཁེ་དབང་ལ་སྔར་ལས་བཟང་བའི་ཁག་ཐག་ཐུབ་པ་བྱ་དགོས་ཞེས་གསུངས་ཡོད་པ་རེད།