ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཟླ་བཅུ་གཅིག་པའི་ཚེས་གསུམ་ཉིན། ཀྲུང་གུང་ཀྲུང་དབྱང་གིས་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལོ་ལྔའི་འཆར་འགོད་བཅུ་བཞི་པ་དང་ཉིས་སྟོང་སོ་ལྔ་ལོའི་རྒྱང་རིང་དམིགས་འབེན་གཏན་འབེབས་བྱེད་པའི་སྐོར་གྱི་གྲོས་གཞི་བསྒྲགས།
གྲོས་གཞིའི་ནང་དུ་ནན་གྱིས་བསྟན་དོན། ལོ་ལྔའི་འཆར་འགོད་བཅུ་བཞི་པའི་དུས་སྐབས་ནི་རང་རྒྱལ་གྱིས་འབྱོར་འབྲིང་སྤྱི་ཚོགས་ཕྱོགས་ཡོངས་ནས་བསྐྲུན་ཏེ་འགྲུབ་པར་བྱེད་པ་དང་། བརྒྱ་ལོ་དང་པོའི་འབད་འཐབ་དམིགས་འབེན་མངོན་འགྱུར་བྱས་རྗེས། བབ་བསྟུན་མདུན་སྐྱོད་ཀྱིས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་འཛུགས་སྐྲུན་བྱེད་པའི་བགྲོད་ལམ་གསར་བ་འབྱེད་པ་དང་། བརྒྱ་ལོ་གཉིས་པའི་འབད་འཐབ་དམིགས་འབེན་གྱི་ཕྱོགས་སུ་མདུན་སྐྱོད་བྱེད་པའི་ཐེངས་དང་པོའི་ལོ་ལྔ་ཡིན་པས། ཀྲུང་གོ་གུང་ཁྲན་ཏང་གི་སྐབས་བཅུ་དགུ་པའི་ཀྲུང་དབྱང་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ཐེངས་ལྔ་པས་རྒྱལ་སྤྱི་དང་རྒྱལ་ནང་གི་གནས་བབ་ལ་དབྱེ་ཞིབ་ཟབ་མོ་བྱས་ཏེ། རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལོ་ལྔའི་འཆར་འགོད་བཅུ་བཞི་པ་དང་ཉིས་སྟོང་སོ་ལྔ་ལོའི་རྒྱང་རིང་དམིགས་འབེན་གཏན་འབེབས་བྱེད་པར་གཤམ་གྱི་གྲོས་གཞི་བཏོན།
གཅིག འབྱོར་འབྲིང་སྤྱི་ཚོགས་ཕྱོགས་ཡོངས་ནས་བསྐྲུན་ཏེ་འགྲུབ་པར་བྱས་ནས། སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་འཛུགས་སྐྲུན་བྱེད་པའི་བགྲོད་ལམ་གསར་པ་འབྱེད་དགོས།
གྲོས་གཞིའི་ནང་དུ་ཏང་གི་ཚོགས་ཆེན་བཅུ་དགུ་པས་བརྒྱ་ལོ་གཉིས་པའི་འབད་འཐབ་དམིགས་འབེན་མངོན་འགྱུར་བྱེད་པར་དུས་རིམ་གཉིས་སུ་བགོས་ནས་འཐབ་ཇུས་བཀོད་སྒྲིག་བྱས་ཡོད་དེ། ཉིས་སྟོང་སོ་ལྔ་ལོར་སྤྱི་ཚོགས་རིང་ལུགས་དེང་རབས་ཅན་ཕལ་ཆེར་མངོན་འགྱུར་བྱ་རྒྱུ་དང་། དུས་རབས་འདིའི་དུས་དཀྱིལ་དུ་རང་རྒྱལ་འདི་ཉིད་འབྱོར་ཕྱུག་དང་དམངས་གཙོ། དཔལ་ཡོན། འཆམ་མཐུན། མཛེས་སྡུག་བཅས་ཀྱི་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ཅན་དུ་འཛུགས་སྐྲུན་བྱ་རྒྱུ་དེ་ཡིན་ཞེས་བསྟན་ཡོད།
གཉིས། ལོ་ལྔའི་འཆར་འགོད་བཅུ་བཞི་པའི་དུས་སྐབས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་མཛུབ་སྟོན་བྱེད་ཕྱོགས་དང་དམིགས་འབེན་གཙོ་བོ།
གྲོས་གཞིའི་ནང་དུ་ལོ་ལྔའི་འཆར་འགོད་བཅུ་བཞི་པའི་དུས་སྐབས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ངེས་པར་དུ་བསྲུང་དགོས་པའི་རྩ་དོན་གསལ་བོར་བསྟན་ཡོད་དེ། ཏང་གི་ཕྱོགས་ཡོངས་ཀྱི་འགོ་ཁྲིད་རྒྱུན་འཁྱོངས་དང་། མི་དམངས་ལྟེ་བར་འཛིན་རྒྱུ་རྒྱུན་འཁྱོངས། འཕེལ་རྒྱས་ཀྱི་འདུ་ཤེས་གསར་པ་རྒྱུན་འཁྱོངས། བཅོས་སྒྱུར་སྒོ་འབྱེད་ཟབ་སྤེལ་བྱ་རྒྱུ་རྒྱུན་འཁྱོངས། མ་ལག་ཅན་གྱི་འདུ་ཤེས་རྒྱུན་འཁྱོངས་བཅས་བྱ་རྒྱུ་དེ་རེད།
གྲོས་གཞིའི་ནང་དུ་ལོ་ལྔའི་འཆར་འགོད་བཅུ་བཞི་པའི་དུས་སྐབས་ཀྱི་སྤྱི་ཚོགས་དང་དཔལ་འབྱོར་འཕེལ་རྒྱས་ཐད་ཧུར་ཐག་གིས་མངོན་འགྱུར་བྱ་དགོས་པའི་དམིགས་འབེན་གཙོ་བོ་གསལ་བོར་བསྟན་ཡོད་དེ། གཅིག་ནི་དཔལ་འབྱོར་འཕེལ་རྒྱས་ལ་ཕན་འབྲས་གསར་པ་ལེན་རྒྱུ། གཉིས་ནི་བཅོས་སྒྱུར་སྒོ་འབྱེད་ཐད་གོམ་སྟབས་གསར་པ་སྤོ་རྒྱུ། གསུམ་ནི་སྤྱི་ཚོགས་དཔལ་ཡོན་གྱི་ཚད་གསར་དུ་མཐོར་འདེགས་གཏོང་རྒྱུ། བཞི་ནི་སྐྱེ་ཁམས་དཔལ་ཡོན་འཛུགས་སྐྲུན་གོང་སྤེལ་གསར་པ་བྱ་རྒྱུ། ལྔ་ནི་དམངས་ཚིས་བདེ་སྐྱིད་ཆུ་ཚད་གསར་པར་བསླེབ་པར་བྱ་རྒྱུ། དྲུག་ནི་རྒྱལ་ཁབ་བཅོས་སྐྱོང་གི་ཕན་ནུས་མཐོར་འདེགས་གསར་པ་བྱ་རྒྱུ་བཅས་རེད།
གསུམ། གསར་གཏོད་ཀྱིས་འཕེལ་རྒྱས་ལ་སྐུལ་བ་རྒྱུན་འཁྱོངས་བྱས་ཏེ། འཕེལ་རྒྱས་ཀྱི་གནས་བབ་གསར་པ་ཕྱོགས་ཡོངས་ནས་བསྐྲུན་དགོས།
བཞི། དེང་རབས་ཐོན་ལས་མ་ལག་མྱུར་དུ་འཕེལ་རྒྱས་སུ་བཏང་ནས། དཔལ་འབྱོར་མ་ལག་གི་ལེགས་སྒྱུར་རིམ་སྤོར་ལ་སྐུལ་འདེད་གཏང་དགོས།
ལྔ། རྒྱལ་ནང་གི་ཁྲོམ་ར་སྟོབས་ཅན་ཆགས་པར་བྱས་ཏེ། འཕེལ་རྒྱས་ཀྱི་རྣམ་པ་གསར་པ་བསྐྲུན་དགོས།
དྲུག བཅོས་སྒྱུར་ཕྱོགས་ཡོངས་ནས་ཟབ་སྤེལ་བྱས་ཏེ། ཆུ་ཚད་མཐོ་བའི་སྤྱི་ཚོགས་རིང་ལུགས་ཁྲོམ་རའི་དཔལ་འབྱོར་གྱི་སྒྲིག་སྲོལ་འཛུགས་དགོས།
བདུན། ཞིང་ལས་དང་ཞིང་སྡེ་དམིགས་བསལ་གྱིས་འཕེལ་རྒྱས་སུ་བཏང་ནས། ཞང་སྡེ་དར་རྒྱས་ཕྱོགས་ཡོངས་ནས་སྐུལ་སྤེལ་བྱ་དགོས།
བརྒྱད། རྒྱལ་ཁོངས་བར་སྟོང་གི་གྲུབ་ཚུལ་ལེགས་སྒྱུར་བྱས་ཏེ། ས་ཁོངས་མཐུན་སྦྱོར་འཕེལ་རྒྱས་དང་རྣམ་པ་གསར་པའི་མཁར་གྲོང་ཅན་སྐུལ་སྤེལ་བྱ་དགོས།
དགུ། རིག་གནས་ལས་དོན་དང་རིག་གནས་ཐོན་ལས་དར་རྒྱས་གོང་འཕེལ་དུ་བཏང་ནས། རྒྱལ་ཁབ་ཀྱི་རིག་གནས་མཉེན་སྟོབས་ཇེ་ཆེར་གཏང་དགོས།
བཅུ། ལྗང་མདོག་འཕེལ་རྒྱས་ལ་སྐུལ་འདེད་བཏང་ནས། མི་དང་རང་བྱུང་ཁམས་འཆམ་མཐུན་མཉམ་གནས་འབྱུང་བར་ཡར་སྐུལ་བྱ་དགོས།
བཅུ་གཅིག ཆུ་ཚད་མཐོ་བའི་ཕྱི་ཕྱོགས་སྒོ་འབྱེད་ལག་བསྟར་བྱས་ཏེ། མཉམ་ལས་མཉམ་རྒྱལ་གྱི་རྣམ་པ་གསར་པ་གསར་སྤེལ་བྱ་དགོས།
བཅུ་གཉིས། མི་དམངས་ཀྱི་འཚོ་བའི་རྒྱུ་སྤུས་ལེགས་བཅོས་བྱས་ཏེ། སྤྱི་ཚོགས་འཛུགས་སྐྲུན་གྱི་ཆུ་ཚད་ཇེ་མཐོར་གཏང་དགོས།
བཅུ་གསུམ། འཕེལ་རྒྱས་དང་བདེ་འཇགས་ལ་གཅིག་གྱུར་འཆར་འགོད་བྱས་ཏེ། ཆུ་ཚད་སྔར་ལས་མཐོ་བའི་བདེ་འཇགས་ཀྲུང་གོ་འཛུགས་སྐྲུན་བྱ་དགོས།
བཅུ་བཞི། རྒྱལ་སྲུང་དང་དམག་དཔུང་མྱུར་དུ་དེང་རབས་ཅན་དུ་བསྒྱུར་ནས། རྒྱལ་ཁབ་སྟོབས་འབྱོར་ཅན་དང་དམག་དཔུང་དར་རྒྱས་ཅན་གཉིས་གཅིག་གྱུར་འབྱུང་བར་བྱ་དགོས།
བཅོ་ལྔ། ཏང་ཡོངས་དང་རིགས་སོ་སོའི་མི་དམངས་ཀྱིས་མཐུན་སྒྲིལ་དམ་པོས་ལོ་ལྔའི་འཆར་འགོད་བཅུ་བཞི་པ་དང་ཉིས་སྟོང་སོ་ལྔ་ལོའི་རྒྱང་རིང་དམིགས་འབེན་མངོན་འགྱུར་བྱེད་ཆེད་འབད་འཐབ་བྱ་དགོས།
