མ་ཎི་བསྐུལ་བའི་མགུར་དབྱངས།
               མགོན་ཐུགས་རྗེའི་གཏེར་ཆེན་སྤྱན་རས་གཟིགས། །བོད་པུར་རྒྱལ་འདྲེན་པ་དཀོན་མཆོག་འབངས། །དུས་ད་ལྟ་འཇམ་དབྱངས་བཞད་པའི་སྡེ། །ལྷ་བླ་མ་དབྱེར་མེད་ཐུགས་རྗེས་གཟིགས། །བོད་ཆེན་པོ་བྱང་གི་ཕྱོགས་མཐའ་འདིར། །མ་འགྲོ་བའི་བདེ་སྐྱིད་བསྟན་ལ་རག །ཆོས་བསྟན་པའི་འཕེལ་རྒྱས་ཁྱེད་ཀྱི་དྲིན། །འདི་བསམ་ཞིང་བཀའ་དྲིན་སྙིང་ནས་དྲན། །སྔོན་བླ་མ་དྲི་མ་མེད་པ་དང་། །མ་མཁའ་འགྲོ་གསང་བ་ཡེ་ཤེས་སོགས། །ཡོངས་གནས་གསུམ་གྱི་དཔའ་བོ་དཔའ་མོ་ཀུན། །མགྲིན་གཅིག་གིས་ལུང་བསྟན་ཇི་ལྟར་མཛད། །ཀྱེེ་གངས་རིའི་མགོན་པོ་སྤྱན་རས་གཟིགས། །གནས་དེ་ན་ཁྱོད་ཀྱི་ཞིང་ཁམས་ཡོད། །ཞིང་དེ་ན་ཁྱོད་ཀྱི་གདུལ་བྱ་ཡོད། །ཅེས་ལུང་བསྟན་གྱི་གདུལ་བྱའི་དུས་ལ་བབས། །ཆེས་སྙིགས་མ་ལྔ་བདོའི་དུས་ངན་དང་། །ལས་སྡིག་ལ་སྤྱོདཔའི་ཡུལ་མཐའ་འདིར། །ལྷ་སྙིང་རྗེའི་གཏེར་ཆེན་ཁྱོད་མིན་པ། །ང་ཉམ་ཐག་གི་མགོན་སྐྱབས་སུ་ལ་ཞུ། །ཆོས་མདོསྔགས་བསྟན་པ་ཉི་རྒས་འདྲ། །དེ་བཤད་སྒྲུབ་ཀྱིས་འཛིན་པའི་བསྟན་འཛིན་དཀོན། །ཆོས་ཚུལ་བཞིན་སྒྲུབ་ལ་དགྲ་བོ་མང་། །དུསསྙིགས་མའི་རང་མཚང་མཚོ་ལྟར་རྡོལ། །འདི་བསམས་ན་ཤེས་པ་གྱ་ཏིང་ནས་སྐྱེ། །་སེམས་སྐྱོ་ཡང་ལས་ངན་སྒྲོག་གིས་བཅིངས། །ང་གདུངས་པའི་འོ་དོད་རྒྱང་ནས་འབོད། །ལྷ་ཐུགས་རྗེ་ཆེན་པོས་གསན་ལགས་སམ། །སྒོས་ཚེ་ཐུང་ནམ་འཆི་ཆ་མེད་ལ། །ཉིན་དེ་རིང་ཡན་ཆད་གདོན་གྱིས་སྨྱོས། །ལས་དོན་མེད་སྡིག་པས་རང་རང་ཕུང་། །ད་འགྱོད་ཀྱང་འགྱོད་པ་འཕྱིས་ནས་གདའ། །མི་རྒན་གཞོན་མེད་པར་འཆི་བ་ལ། །ཁྱད་མེད་པ་རང་གིས་མངོན་སུམ་མཐོང་། །ད་རང་རང་དེ་ལྟར་གློ་བུར་དུ། །འཆི་མི་དགོས་བློ་རྩེ་ཅི་ཞིག་ཡོད། །རི་ལུང་པ་གསེར་གྱིས་བཀང་ན་ཡང་། །རང་འཆི་དུས་རྡུལ་ཙམ་འཁྱེར་དབང་མེད། །གཟུངས་ཡིག་དྲུག་ཚར་གཅིག་བཏོན་ན་ཡང་། །དེ་འཇིག་རྟེན་ཕྱི་མའི་ལམ་རྒྱག་ཡིན། །ཆོས་གཅིག་ལ་བྱིན་རླབས་ཆེ་བ་དེ། །སྔགས་གཟུངས་མཆོག་ཡི་གེ་དྲུག་མ་ཡིན། །ཁོང་བྱིས་པ་ཚུན་ཆད་ཤེས་པ་དེ། །ངེད་བོད་ཀྱི་ཆོས་སྐལ་ཡིན་པའི་རྟགས། །མི་སྡིག་ཅན་བཙན་ཐབས་འཆང་རྒྱའི་ཆོས། །དཀོར་བག་ཆགས་ངན་པ་སྦྱོང་བ་ལ། །ཆེས་ཟབ་པའི་མཐར་ཐུག་སྨྱུང་གནས་ཡིན། །འདིའི་ཕན་ཡོན་ནམ་མཁའི་མཐའ་དང་མཉམ། །དུས་དེང་སང་ངན་ལ་མགོ་མཐོ་ཡང་། །ལམ་བར་དོའི་འཕྲང་རིང་བརྒལ་བའི་ཉིན། །དགྲ་གཤིན་རྗེའི་དམག་གིས་བསྐོར་བའི་ཚེ། །ཆོས་ཚུལ་བཞིན་བྱས་པའི་མི་དེ་སྐྱིད། །འཕྲང་ཡ་ངའི་འཇིགས་པ་སེལ་འདོད་ཅིང་། །མར་ངན་སོང་སྐྱེ་སྒོ་གཅོད་འདོད་ན། །ལྷ་ཐུགས་རྗེ་ཆེན་པོའི་ཞབས་ལ་འཇུག །དུས་ཉིན་མཚན་མེད་པར་གསོལ་བ་ཐོབ། །ཡར་མཐོ་རིས་ཐར་པའི་གོ་འཕང་དང་། །མར་ངན་སོང་གསུམ་པོ་གང་དུ་འགྲོ། །དུས་ད་ལྟའང་མ་ཁ་རང་གི་ལག །མཚམས་འདི་ལས་འདས་ན་ཐར་བ་དཀའ། །ཁོ་འཆི་བདག་བདུད་ཀྱིས་ཁྲིད་པའི་སྐབས། །མིང་གོ་ས་དཔའ་རྩལ་སྟོབས་འབྱོར་སོགས། །རྒྱ་ཅི་ཙམ་ཆེ་ཡང་ཕན་པ་མེད། །ཕན་ངེས་པ་དམ་པའི་ལྷ་ཆོས་ཡིན། །ནོར་ལོངས་སྤྱོད་སྦྲང་མའི་སྦྲང་རྩི་འདྲ། །སྡིག་རང་གིས་བསགས་ཀྱང་གཞན་གྱིས་སྤྱོད། །གཉེན་མཛའ་བཤེས་ཚོང་འདུས་མགྲོན་པོ་འདྲ། །དུས་རིང་པོ་མི་སྡོད་གྱེས་ནས་འགྲོ། །གཟུགས་ལང་ཚོ་སྟོན་ཀའི་མེ་ཏོག་འདྲ། །ཞག་རེ་རེ་བཞིན་དུ་རིམ་གྱིས་ཡལ། །ལས་སྐྱིད་སྡུག་ཐག་མཁན་རྐང་སྟབས་འདྲ། །གང་དར་བའི་ཐ་མ་རྒུད་པ་ཡིན། །གནས་འཁོར་བ་འདི་ཡི་ཕུན་ཚོགས་ལ། །མཐར་མི་བསླུ་བྱ་བ་གཅིག་ཀྱང་མེད། །དེ་སོམས་ལ་དམ་པའི་ལྷ་ཆོས་གྱིས། །ཆོས་ཟབ་མོ་འཕགས་པའི་སྒོམ་བཟླས་གྱིས། །དུས་ནམ་ཞིག་བེམ་རིག་བྲལ་བའི་ཉིན། །ལྷ་ཐུགས་རྗེ་ཆེན་པོས་ཞལ་བསྟན་ནས། །བུ་བདེ་བ་ཅན་དུ་ཤོག་ཅིག་ཅེས། །མགོན་འོད་དཔག་མེད་ཀྱི་དྲུང་དུ་འཁྲིད། །དོན་དེ་ཕྱིར་སྒོ་གསུམ་དགེ་ལ་འབད། །དགེ་གང་བསགས་དེ་ཡི་དོན་དུ་སྔོས། །དེ་བྱས་ན་མི་ལུས་དོན་དང་ལྡན། །ཆོས་བསྟན་དང་མཇལ་བའི་དགོས་པ་འགྲུབ། །ཚུལ་དེ་ལྟར་སྨྲས་བའི་དགེ་བས་ཀྱང་། །ངེད་ཡོན་མཆོད་བློ་སྣ་ཆོས་ལ་བསྒྱུར། །ལས་དཀར་པོ་དགེ་ལ་རྟག་སྦྱང་ནས། །མཆོག་ཐར་བའི་གོ་འཕང་མྱུར་ཐོབ་ཤོག །ཅེས་སྨྱུང་གནས་སོགས་དང་འབྲེལ་བར་མ་ཎི་བསྐུལ་བའི་མགུར་དབྱངས་འདི་ལྟ་བུ་ཞིག་དགོས་ཞེས་འཕགས་པ་ཐུགས་རྗེ་ཆེན་པོའི་རྣལ་འབྱོར་ལ་བརྩོན་པའི་སྨྱུང་གནས་པ་དགེ་སློང་ངག་དབང་རྒྱལ་མཚན་གྱིས་བསྐུལ་ངོར་བཙུན་པ་དཀོན་མཆོག་བསྟན་པའི་སྒྲོན་མེས་ཀུན་གྱིས་གོ་བདེ་བར་བྲིས་པ་འདིས་ཀྱང་སྐྱེ་བོ་རྣམས་ལ་ཕན་ཐོགས་པར་གྱུར་ཅིག། །།
 
དབྱངས་གསལ་གྱི་མགུར་མ།
              ཨ་ཨཱ་དལ་འབྱོར་རྟེན་བཟང་ལན་གཅིག་ཐོབ་པ་འདི་ངོ་མཚར། །ཨི་ཨཱི་འདི་ནས་ལྷུང་ན་འགྲོ་ས་ངན་སོང་རང་ཡིན་ནོ། །ཨཱ་ཨཱུ་མ་ཀིར་ལྷུང་ཕྱིན་ཐར་པའི་དུས་ཚོད་ཅིག་མེད་དོ། །རཱྀ་རྀ་མེ་རི་འབར་བའི་སྦུབས་དེར་ཅི་འདྲ་བྱས་སྡོད་པ། ལྀ་ལཱྀ་ལས་ངན་ལུས་ལ་སྨིན་ན་བྱ་ཐབས་དང་བྲལ་ལོ། །ཨེ་ཨཻ་གནས་དེར་མི་ལྟུང་ཐབས་ཤིག་ད་ལན་རང་བྱེད་དགོས། །ཨོ་ཨཽ་ཐབས་ཤིག་བྱེད་ན་སྐྱབས་འགྲོ་ལས་འབྲས་རང་ཡིན་ནོ། །ཨཾ་ཨཾ་བསམ་བློ་གཏོང་སའི་འགག་མདོ་འདི་ཀ་རང་རེད་ཨཿ ཀེ་ལ་ཤ་འམ་རྫ་རི་སྨུག་པོ་ཡི་མགུལ་དུ། །ཁེ་འདོད་གྲགས་འདོད་མེད་པ་རི་དྭགས་ཀྱི་བུ་བཞིན། །གསེར་དྲི་བསུང་འཐུལ་བའི་རྫི་ངད་ལ་སྣོམས་ཤིང་། །དེ་རང་གཅིག་པུར་བག་ཡངས་རྒྱུ་བ་ཞིག་བྱུང་ན། །ཅེ་སྤྱང་བཞིན་དུ་ཟས་ཀྱིས་གདུངས་པ་འདི་སྤངས་ཤིང་། །ཆེ་མཐོའི་ཆ་ལུགས་སྡེ་དཔོན་སྤྱོད་ཚུལ་འདི་དོར་ཏེ། །ཇེ་རིང་ཇེ་རིང་དབེན་པའི་ས་མཐའ་རུ་ཕྱིན་ནས། །ཉེ་དུ་མཛའ་བཤེས་འབྲེལ་ཐག་ཆད་བ་ཞིག་བྱུང་ན། །ཏེ་ལོ་ནཱ་རོའི་རྣམ་ཐར་འཁྱོང་བ་རུ་དཀའ་ཡང་། །ཐེ་གཏོགས་གྲོས་བསྡུར་མཛའ་བའི་བྱ་བྱེད་འདི་བཞག་ནས། །དེ་ན་འདི་ན་མེད་པ་སྐྱི་བསེར་གྱི་རླུང་བཞིན། །ནེའུ་གསིང་སྤང་ལྗོངས་གང་དགར་མྱུལ་བ་ཞིག་བྱུང་ན། །པེ་ཧར་དཀོར་མཛོད་བསྲུང་དྲའི་གཉེར་ཁ་ཡང་མ་དགོས། །ཕེ་ར་ཕྱག་པའི་ཁྲིམས་དཔོན་སྤྱོད་པ་ཡང་མ་དགོས། །བེའུ་ལུག་ཚུན་ཆད་པར་བརླག་དོགས་པ་ཡང་མ་དགོས། །མེ་ཆུ་ཤིང་གསུམ་འཛོམས་པས་ཅོག་པ་ཞིག་བྱུང་ན། །ཙེ་ནེ་ལངས་པ་ཁོ་ནས་གཞིས་རྫོགས་ཀྱི་འགྲོ་བདེ། །ཚེ་འདི་གང་སྐྱིད་ཕ་ཡུལ་བྱེད་པ་ཡི་འདུག་བདེ། །ཛེ་རེག་ཕོག་ཐུག་མེད་པར་ཀུན་སྙོམས་ཀྱི་འགྲོགས་བདེ། །ཝེ་ལྟར་གར་ཡིབ་མི་ཤེས་སྟབས་བདེ་ཞིག་བྱུང་ན། །ཞེ་ས་ངོ་འཛིན་དགོས་པའི་དཔོན་པོ་ཡང་མེད་ལ། །ཟེ་བ་ཡར་འཐེན་དགོས་པའི་གཡོག་པ་ཡང་མེད་ཅིང་། །འེ་གནོད་དོགས་པ་དགོས་པའི་དགྲ་བོ་ཡང་མེད་པར། །ཡེ་ཤེས་ལྷ་ཚོགས་ཁོ་ནར་བསྟེན་པ་ཞིག་བྱུང་ན། །རེ་ཐག་བཅད་པའི་མངའ་ཐང་རྒྱང་སྐྱུར་དུ་བྱས་ལ། །ལེ་ལོ་སྤངས་པའི་དམ་ཆོས་རྣལ་མ་ཞིག་བྱས་ཏེ། །ཤེས་རབ་ཐབས་ཀྱིས་ཟིན་པ་རྒྱལ་སྲས་ཀྱི་སྤྱོད་པས། །སེམས་ཅན་ཀུན་ལ་ཕན་པ་བསྒྲུབ་ནུས་ཤིག་བྱུང་ན། །ཧེ་ཧེ་ཡིད་སྨོན་ལྟར་གྱི་སྐལ་བ་ཞིག་ཡོད་ན། །ཨེ་མ་དེ་ལས་ལྷག་བའི་དགའ་རྒྱུ་ཞིག་ཅི་ཡོད། །ཨེ་ཀྱཻ་དགའ་བ་ཆེན་པོའི་གླུ་དབྱངས་ཤིག་བླངས་ཏེ། །ཨེ་ཝཾ་ཟུང་འཇུག་ས་ལ་བྲོ་བརྡུང་ཞིག་བྱའོ། །དབྱངས་གསལ་གྱི་མགུར་མ་འདི་ས་སྦྲུལ་སྟོན་ཟླ་གཉིས་པའི་ཚེས་ལྔའི་ཉིན་ངེས་འབྱུང་སྤུ་སུད་ཅིག་གིས་བསྐུལ་ཏེ་སུག་བྲིས་སུ་བགྱིས་པའོ།། །།