ཆུ་ཆེན་རྫོང་ཆིང་ཉིང་ཡུལ་ཚོས་མཉམ་ལས་ཁང་བཙུགས་ནས་གསོ་སྤེལ་ལས་རིགས་འཕེལ་རྒྱས་བཏང་ཚུལ་བཀོད་པ།

     ཉེ་བའི་ལོ་ཤས་རིང་། རྒྱལ་ཁབ་ཀྱི་ཕ་ཡུལ་དུ་ལོག་ནས་ལས་གཏོད་བྱེད་པའི་སྲིད་ཇུས་ལག་ཏུ་བསྟར་བ་དང་བསྟུན། ཆེད་ལས་མཉམ་ལས་ཁང་རེ་རེ་ཡང་ཁྲོམ་རའི་དགོས་མཁོ་ལྟར་ཚུགས་ཡོད། ཆུ་ཆེན་རྫོང་ཆིང་ཉིང་ཡུལ་ཚོ་ཆིང་ཉིང་གྲོང་སྡེའི་ཅིང་ཁྲེང་ཕྱུགས་ལས་གསོ་སྤེལ་ཆེད་ལས་མཉམ་ལས་ཁང་གིས་གསོ་སྤེལ་ལས་རིགས་འཕེལ་རྒྱས་སུ་བཏང་ནས་གསར་གཏོད་དང་སྐུལ་ཁྲིད། ཕྱུག་འགྱུར་བཅས་འཕེལ་རྒྱས་ཀྱི་རྣམ་པ་གསར་བ་ཞིག་འཚོལ་ཞིབ་བྱས་ཡོད།

     ཆིང་ཉིང་ཡུལ་ཚོ་ཆིང་ཉིང་གྲོང་སྡེའི་ལེའོ་ཧུང་ཆིང་ལ་སྔོན་ཆད་ཚོང་ལས་གཉེར་རྩིས་ཡོད་ལ། ད་ལོའི་ལོ་མགོར་ཁོས་གཞན་ཡུལ་གྱི་གླ་ཕོགས་མཐོ་བའི་ལས་ཀ་བསྐྱུར་ཏེ། འཕེལ་རྒྱས་ཀྱི་གོ་སྐབས་དམ་པོར་བཟུང་ནས་ཅིང་ཁྲེང་ཕྱུགས་ལས་གསོ་སྤེལ་ཆེད་ལས་མཉམ་ལས་ཁང་བཙུགས་ནས་གསོ་སྤེལ་གྱི་ལས་མགོ་དངོས་སུ་བཙུགས།

     མཉམ་ལས་ཁང་དུ་ཞོར་ལས་གཉེར་མཁན་རྣམས་ནི་ས་གནས་དེའི་མང་ཚོགས་ཡིན་ལ། མཉམ་ལས་ཁང་མ་ཚུགས་པའི་སྔོན་དུ་སྡེ་མི་ཚོས་སྲོལ་རྒྱུན་གྱི་ཞིང་ལས་གཉེར་ནས་འཚོ་བ་རོལ་བ་དང་། ལོ་ཧྲིལ་བོར་དཀའ་ཚེགས་མྱོང་ནའང་ཡོང་འབབ་དེ་འདྲ་མང་བོ་མེད། ད་སྐབས་ཁོ་ཚོས་རང་ཉིད་ཀྱི་ཞིང་ས་མཉམ་ལས་ཁང་ལ་གླས་པར་མ་ཟད། མཉམ་ལས་ཁང་དུ་ཞོར་ལས་གཉེར་ནས་གཏན་འཇགས་ཀྱི་གླ་ཕོགས་ལེན་ཆོག

     སྔོན་ཆད་ཞིང་ལས་གཉེར་ནས་ལོ་གཅིག་ལ་ཡོང་འབབ་སྒོར་ཁྲི་1ལྷག་མ་གཏོགས་མེད་ལ། རང་གི་ཕྲུ་གུ་གཉིས་སློབ་གྲྭར་སྐྱེལ་དགོས་པ་དང་ཁྱིམ་གྱི་རྒན་རྒོན་ཡང་བདག་སྐྱོང་བྱ་དགོས་པས་འཚོ་བའི་ཆ་རྐྱེན་ཧ་ཅང་ཞན། ད་ལོའི་ལོ་སྟོད་དུ་ཝང་ཁྲེང་ཡུས་ཀྱིས་མཉམ་ལས་ཁང་དུ་ཞོར་ལས་གཉེར་བ་དང་། ཞིང་ས་མཉམ་ལས་ཁང་ལ་གླས་པས་ལོ་རེར་ཡོང་འབབ་སྒོར་ཁྲི་4ལྷག་ཡོད། ཝང་ཁྲེང་ཡུས་ཀྱིས་ད་ལྟ་ཟླ་རེར་གཏན་འཇགས་ཀྱི་ཡོང་འབབ་ཡོད་ཅིང་། ཁྱིམ་གྱི་རྒན་རྒོན་བདག་སྐྱོང་བྱེད་ཐུབ་པ་དང་། ཕྲུ་གུའི་སློབ་ཡོན་ལའང་སེམས་ཁྲལ་བྱེད་མི་དགོས་ལ། འཚོ་བའི་ཆ་རྐྱེན་ཡང་ཡར་ངོའི་ཟླ་ལྟར་འཕེལ་བཞིན་ཡོད་ཅེས་བཤད།

     ཆིང་ཉིང་ཡུལ་ཚོ་ཆིང་ཉིང་གྲོང་སྡེའི་མང་ཚོགས་ཀྱིས་སྲོལ་རྒྱུན་གྱི་འདེབས་འཛུགས་དང་གསོ་སྤེལ་གཙོ་བོར་བྱས་ཤིང་། དཔལ་འབྱོར་གྱི་ཡོང་ཁུངས་སྣ་གཅིག་ཡིན་ལ་ཀ་རྟེན་གྱི་ཐོན་ལས་མེད། མཉམ་ལས་ཁང་བཙུགས་པ་དང་བསྟུན་མཉམ་ལས་ཁང་གིས་གྲོང་སྡེའི་བེད་མེད་དུ་ལུས་པའི་ཞིང་ས་མུའུ་120སྐོར་སྤྱོད་བྱས་ནས་མང་ཚོགས་སྣེ་ཁྲིད་དེ་ཕྱུག་འགྱུར་གྱི་ལམ་བུར་བསྐྱོད།

     ཆིང་ཉིང་ཡུལ་ཚོ་ཆིང་ཉིང་གྲོང་སྡེའི་ཀྲི་པུའུ་ཧྲུའུ་ཅི་ཀྲང་དབྱིན་ཀུའེ་ཡིས། ང་ཚོ་ནི་ཆུ་ཆེན་རྫོང་ཆིང་ཉིང་གྲོང་སྡེའི་མཉམ་ལས་ཁང་གཉིས་པར་གཏོགས་ཤིང་། 2012ལོར་ས་གཤིས་གནོད་འཚེ་ཡི་རྐྱེན་གྱིས་སྡེ་མི་ཚང་མ་བཀོད་སྒྲིག་བྱ་ཡུལ་དུ་གནས་སྤར་བས་ཞིང་ས་ས་རྒོད་དུ་གྱུར། ད་སྐབས་ང་ཚོའི་མཉམ་ལས་ཁང་གཉིས་པའི་སྡེ་མི་ལེའོ་ཧུང་ཆིང་ཕ་ཡུལ་དུ་ལོག་ནས་ཅིང་ཁྲེང་ཕྱུགས་ལས་གསོ་སྐྱོང་ལས་རིགས་ཆེད་ལས་མཉམ་ལས་ཁང་བཙུགས་པ་དང་། སྡེ་མི་ཚོར་ཞིང་ས་གླས་གླ་སྤྲད་པར་མ་ཟད། ཁྱིམ་ཚང་50ལྷག་དང་དབུལ་ཁྱིམ་10ལྷག་སྣེ་ཁྲིད་དེ་ཕྱུག་འགྱུར་གྱི་ཕྱོགས་སུ་བསྐྱོད་པ་དང་། མཉམ་ལས་ཁང་ཡང་དེ་ལས་སྟོབས་ཆེར་གཏོང་བཞིན་ཡོད་ཅེས་བཤད།

     ད་ལྟའི་བར་དུ་གསོ་སྐྱོང་ར་བ་རུ་བྱ་ར་དྲུག་ཡོད་པ་དང་། ཕག་ཁང་སྨི་གྲུ་བཞི་མ་3000ཡོད་ལ། ཁྱིམ་བྱ་52000དང་ཕག་མོ་20། ཚོང་ཟོག་ཕག་20གསོས་ཡོད། རྗེས་ཕྱོགས་སུ་ཁྱིམ་ཚང་དེ་བས་མང་བོར་ཕག་དང་བྱ་གསོ་རྒྱུ་ཡིན་ལ། མཉམ་ལས་ཁང་གིས་དགེ་རྒན་ཆེན་མོ་དང་འབྲེལ་ཡོད་གསོ་སྐྱོང་ལག་རྩལ་དང་ཉོ་སྒྲུབ་གན་རྒྱ་བཞག་ནས་མང་ཚོགས་དེ་བས་མང་བོ་ཕྱུག་འགྱུར་གྱི་ལམ་བུར་ཁྲིད་རྒྱུ་རེད་དོ།།